Ozi Ndị Kraịst—Ọrụ Anyị Bụ́ Isi

¹ Anyị nile nwere ụdị ọrụ dị iche iche anyị na-aghaghị ịrụ. Mmadụ igbo mkpa ezinụlọ ya bụ ihe Chineke chọrọ. (1 Tim. 5:8) Otú ọ dị, ọrụ dị n’ihe ahụ Chineke chọrọ anyị n’aka ekwesịghị ịnọchi ọrụ nkwusa Alaeze na ime ndị na-eso ụzọ.—Mat. 24:14; 28:19, 20.

² Jizọs setịpụụrụ anyị ihe nlereanya anyị ga-agbaso ‘n’ịnọgide buru ụzọ na-achọ alaeze ahụ.’ (Mat. 6:33; 1 Pita 2:21) Ọ bụ ezie na o nwere ntakịrị ihe onwunwe, o mikpuru onwe ya n’ime uche Nna ya. (Luk 4:43; 9:58; Jọn 4:34) Ọ dọgburu onwe ya n’ọrụ n’iji ohere ọ bụla dapụtaranụ gbaa àmà. (Luk 23:43; 1 Tim. 6:13) Ọ gbara ndị na-eso ụzọ ya ume inwe ụdị oké mmasị ahụ n’ọrụ owuwe ihe ubi ahụ.—Mat. 9:37, 38.

³ Iṅomi Jizọs Taa: Anyị pụrụ iṅomi ihe nlereanya Jizọs site n’ịgbalịsi ike ibi ndụ dị mfe nke hiwere isi n’ozi Ndị Kraịst. Ọ bụrụ na anyị nwere ihe ndị dị mkpa ná ndụ, ka anyị rube isi na ndụmọdụ ahụ Bible nyere nke bụ́ ịhapụ ịnọgide na-akpakọba ihe onwunwe ụwa a. (Mat. 6:19, 20; 1 Tim. 6:8) Lee ka o si ka mma ịchọ ịmụbakwu òkè anyị na-ekere n’ọrụ nkwusa! Ọ bụrụ na anyị na-enwe ihe isi ike, ka anyị gbalịsie ike ịdị ka Jizọs, ịghara ikwe ka nchegbu nke ndụ kpuchie ọrụ anyị bụ́ isi nke bụ́ ikwusa ozi ọma Alaeze ahụ.—Luk 8:14; 9:59-62.

⁴ Ọbụna ndị nwere ọtụtụ ibu ọrụ na-ebute ọrụ ime nkwusa ụzọ. Otu nwanna nwoke nke nwere ezinụlọ buru ibu, onye nwere ezigbo ọrụ ọ na-arụ ma na-eje ozi dị ka okenye n’ọgbakọ Ndị Kraịst kwuru, sị: “Ana m ele ije ozi ahụ anya dị ka ọrụ dịịrị m.” Otu nwanna nwanyị onye ọsụ ụzọ kwuru, sị: “Ịsụ ụzọ bara uru nke ukwuu karịa ọrụ ego nke a na-enwe ihe ịga nke ọma na ya.”

⁵ N’agbanyeghị ọnọdụ anyị, ka anyị gbasoo ihe nlereanya Jizọs. N’ụzọ dị aṅaa? Site n’ime ka ozi Ndị Kraịst bụrụ ọrụ anyị bụ́ isi.