Panangiparang ti Naimbag a Damag—Babaen ti Pannakisao Kadagiti Tattao
1 Ti pannakisao isut’ maysa a “pannakisinnukat iti sentimento, obserbasion, opinion, wenno ideya.” Ngem kasanoyo nga irugi iti pannakisao maipapan ti Biblia kadagiti tattao a bumusbusor wenno kupado kadagiti ar-aramidda? Nagsaludsod idi ni Jesus tapno maawisna dagiti dumdumngeg a makiraman iti saritaan.—Juan 4:9-15, 41, 42.
2 Masapul nga ikararagtayo iti Dios a tumulong kadatayo a mangsarak kadagiti nasingpet ti panagpuspusoda a tattao ken luktanna iti ruangan a maipaay kadatayo a makisao kadakuada. Nalaklaka ti mangasaba no matmatan iti tunggal bumalay a kas agbalinto koma nga adipen ni Jehova. Masapul ngarud nga idanon iti kinapudno babaen ti nabara, napudno a wagas a makaatrakar kadagiti interesado a tattao.
USAREN TI ADDA KADATAYO
3 Ti Panakirinnason a libro itukonna kadatayo iti adu a nagsasayaat nga introduksion idiay pinanid 9-15. Kaaduan kadagitoy ti maaramat a kas epektibo a salsaludsod. No ti bumalay ket sumungbat iti maysa a saludsod, imdengam a siraraem ken padayawam ti opinionna inton sungbatam.—Col. 4:6.
4 Siempre, no agsaludsodkayo, dikay ammo no ania ti isungbat iti bumalay. Gapuna a sidadaankayo a mangihusto iti diskusionyo. Ikagumaanyo a pagtultuloyen ti saritaan babaen ti panangnayon iti impormasion manipud ti Biblia maipapan ti paginteresanna ken babaen iti mainayon pay a salsaludsod.
AGSAGANAKAYO A NASAKBAY
5 Pilienyo dagiti introduksion idiay Panakirinnason a libro nga ammoyo nga isudat’ kaepektibuan iti masinnunuo a teritoriayo. Itutopyo iti maysa kadagitoy nga introduksion idiay agdama a Topiko a Pagsasaritaan. Rugianyo kadagiti bambanag a paginteresan ti bumalay, nga idatag ti problema iti ababa, kalpasanna maited iti solusion ti Biblia. No agkomento, liklikanyo ti mangbabalaw iti nasaona. Sarakenyo dagiti puntos a pagtunosan ken komentuanyo dagitoy. Iturongyo kadagiti positibo a bambanag a kas iti bendision ti Pagarian nga isut’ solusion nga agtaud iti Biblia kadagiti problema ti sangatauan.
6 No makasarakkayo iti saan a rasonable a tao, dikay koma piliten a patienna iti imbagayo. Imbes a kasta agpakadakayo babaen iti nagayyeman a sasao, a dayta ti manglukat iti ruangan a maipaay iti sumaruno nga oportunidad a makisao manen kenkuana.—Prov. 12:8, 18.
7 Dadduma kadagiti tattao ti gagangay a makisao no masabet ida nga impormal. Dikay koma agkedked a mangirugi ti saritaan kadagiti tattao a masabetyo idiay lansangan wenno nakaaliwaksay kadagiti arubayanda. No rugianyo ti saritaan, ikagumaanyo nga aramiden a kas naragsak a kapadasan a maipaay iti bumalay. Agpannuray kadakayo, agpakadakayo iti bumalay nga addaan ti napaboran a rikna maipapan iti Dios, ti Saona, ken dagiti adipenna. Babaen iti kastoy a wagas ti bumalay ket mabalin a mas managpadanon iti sumaruno a tiempo no addanto manen maysa a Saksi a sumarungkar.