HERES

1. [Tuleng; Agul-ulimek]. Levita a ti naganna agparang iti maysa a listaan dagidiay nagsubli manipud pannakaidestiero idiay Babilonia.​—1Cr 9:1, 14, 15.

2. [Init]. Bantay (Heb., har) a nagtultuloy a nagnaedan dagiti Amoreo iti laksid ti panangparmek ti Israel iti Canaan. Nainaig dayta iti teritoria ti tribu ni Dan. (Uk 1:34, 35) Ibilang ti kaaduan nga eskolar a katupag dayta ti Ir-semes (a nabatad nga isu met laeng ti Bet-semes iti beddeng ti Juda ken Dan) a nadakamat iti Josue 19:41.​—Kitaenyo ti BET-SEMES Num. 1.

3. Manipud pannakigubat kadagiti Midianita, nagsubli ni Gideon a dimmalan iti “bessang a sumang-at iti Heres.” Saan nga ammo daytoy a lugar malaksid iti panangtukoy ti Biblia iti Uk-ukom 8:13. Gapuna isingasing ti sumagmamano nga eskolar a ti Hebreo a teksto mabalin a sigud a mabasa a “sakbay a ti init [ha·cheʹres] timmangkayag,” wenno “manipud iti ngato iti bambantay,” imbes a “ti bessang a sumang-at iti Heres.”