“Umadanikayo iti Dios, ket Isu Umadaninto Kadakayo”
Sakbay ken Kalpasanna—Nagbalbaliw Gapu Kadagiti Prinsipio ti Biblia
KAS agtutubo, napno idi ni Adrian iti gura ken sakit ti nakem. Ti kinamanagpungpungtotna ket nangituggod iti kinaranggas. Nagin-inum, nagsigsigarilio, ken imoral ti kabibiagna. Pagaammo idi ni Adrian kas punk ken addaan iti tato a mangipakita iti panamatina iti anarkia. No maipapan kadagidi a tawen, kunana: “Pinukisak ti buokko a kas iti pukis ti punk; tapno agsugargar, agusarak iti gel; ket no dadduma, kolorak iti nalabaga wenno sabali a kolor.” Adda pay idi tebbeng iti agong ni Adrian.
Ni Adrian ken dagiti sumagmamano a padana a rebelioso nga agtutubo nagyanda idi iti marmargaay a balay. Naginum ken nagdrogada sadiay. “Nagusarak iti shabu ken nagineksionak iti Valium ken aniaman a droga a nalaka a magun-odak,” kuna ni Adrian. “No awan ti droga wenno pigket a say-upek, pasusopak ti gasolina dagiti lugan dagiti tattao kalpasanna, say-upek dayta.” Gapu ta kanayon a karaman kadagiti krimen iti lansangan, nagbalin ni Adrian a nakabutbuteng ken naranggas unay. Dagiti tattao dida kayat ti makibiang kenkuana. Kasta met, gapu iti reputasionna, nakigayyem kenkuana dagiti dakes a tattao.
In-inut a nabigbig ni Adrian a “dagiti gagayyemna” nakikaduada laeng kenkuana gapu iti bukodda a pagimbagan. Mainayon pay, kinunana nga “awan ti nagimbaganna ti kinamanagpungpungtot ken kinaranggas.” Gapu ta kasla awan ti panggep ti biagna ken naupay, pinanawanna dagiti kakaduana. Idi nakakita iti kopia Ti Pagwanawanan iti lugar a pakaibangbangonan ti maysa a pasdek, naguyugoy ni Adrian iti naibatay-Biblia a mensahe a linaon ti magasin, ket nagtungpal dayta iti pannakipagadalna iti Biblia kadagiti Saksi ni Jehova. Sigagagar ni Adrian a nangipangag iti daytoy nga awis: “Umadanikayo iti Dios, ket isu umadaninto kadakayo.” (Santiago 4:8) Di nagbayag, nabigbig ni Adrian a nasken nga iyaplikarna dagiti prinsipio a masarakan iti Nasantuan a Kasuratan.
Nasayaat ti epektona iti konsiensia ni Adrian ti umad-adu a pannakaammona iti Biblia ket daytoy ti nangtignay kenkuana a mangbalbaliw iti wagas ti panagbiagna. Natulongan a nangparmek iti kinamanagpungpungtotna ken nasursurona ti agteppel. Iti tulong ti Sao ti Dios, simmayaat ti personalidad ni Adrian.—Hebreo 4:12.
Ngem kasano a ti Biblia addaan iti kasta a nabileg nga epekto? Ti pannakaammo iti Kasuratan tulongannatayo a ‘mangikawes iti baro a personalidad.’ (Efeso 4:24) Wen, agbalbaliw ti personalidadtayo no iyaplikartayo ti umiso a pannakaammo a masarakan iti Biblia. Ngem kasano a ti kasta a pannakaammo mapagbalbaliwna dagiti tattao?
Umuna, ti Biblia ibagana dagiti naalas a kababalin a nasken a parmeken. (Proverbio 6:16-19) Maikadua, idagadag ti Biblia nga iparangarangtayo dagiti makaay-ayo a galad a patauden ti nasantuan nga espiritu ti Dios. Karaman kadagitoy ti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—Galacia 5:22, 23.
Ti naun-uneg a pannakaawat kadagiti kalikaguman ti Dios tinulonganna ni Adrian a mangsukimat iti bagina ken mangkita kadagiti kababalin a nasken a sukayenna ken dagidiay rumbeng a baliwanna. (Santiago 1:22-25) Ngem pangrugian laeng dayta. Malaksid iti pannakaammo, nasken ti motibasion—banag a mangtignay ken ni Adrian tapno agbalbaliw.
Naammuan ni Adrian a ti makaay-ayo a baro a personalidad ket masukog a “maitunos iti ladawan Daydiay nangparsua iti dayta.” (Colosas 3:10) Nabigbigna a ti Nakristianuan a personalidad nasken nga umarngi iti personalidad ti Dios. (Efeso 5:1) Babaen ti panagadal iti Biblia, naammuan ni Adrian no kasano ti pannakilangen ni Jehova iti sangatauan ken nakitana dagiti nasayaat a galad ti Dios, kas iti ayat, kinamanangngaasi, kinaimbag, kinadungngo, ken kinalinteg. Ti kasta a pannakaammo ti nangtignay ken ni Adrian a mangayat iti Dios ken mangikagumaan nga agbalin a makaay-ayo ken ni Jehova.—Mateo 22:37.
Idi agangay, babaen ti tulong ti nasantuan nga espiritu ti Dios, nasursuro ni Adrian a medmedan ti pungtotna. Ita, okupadoda a dua ken ni baketna a tumultulong kadagiti dadduma a mangbalbaliw iti kabibiagda iti tulong ti pannakaammo iti Biblia. Kuna ni Adrian: “Saan a kas iti adu kadagiti dati a gagayyemko a natay itan, sibibiagak ken addaanak iti naragsak a pamilia.” Ni Adrian ti sibibiag a pammaneknek ti pannakabalin ti Biblia a mangpasayaat iti kabibiag dagiti tattao.
[Blurb iti panid 25]
“Awan ti nagimbaganna ti kinamanagpungpungtot ken kinaranggas”
[Kahon iti panid 25]
Dagiti Epektibo a Prinsipio ti Biblia
Dagitoy ti sumagmamano a prinsipio ti Biblia a nakatulong tapno agbalin a mannakikappia dagiti adu a managpungpungtot ken naranggas a tattao:
“Makikappiakayo iti amin a tattao. Dikay ibalesan ti bagbagiyo, dungdungnguen, no di ket ipaayanyo ti lugar ti pungtot.” (Roma 12:18, 19) Bay-anyo a ti Dios ti mangikeddeng no kaano nga agibales ken no siasino ti balsenna. Maaramidna dayta gapu ta ammona amin a mapaspasamak, ket ti pannusa nga ipaayna naibasar iti awan pagkuranganna a kinahustisiana.
“Agpungtotkayo, nupay kasta dikay agbasol; saannakay koma a malnekan ti init a sipupungtotkayo pay, dikay met ikkan ti lugar ti Diablo.” (Efeso 4:26, 27) Mabalin a nainkalintegan nga agpungtot ti maysa a tao no maminsan. No mapasamak daytoy, saan koma nga agtalinaed a ‘sipupungtot.’ Apay? Gapu ta daytoy ti mangtignay kenkuana a mangaramid iti dakes, ket ngarud ik-ikkanna “ti lugar ti Diablo,” ken dina maay-ayo ni Jehova a Dios.
“Baybay-am ti unget ket panawam ti pungtot; dika agpudpudot ta dakes laeng ti maaramidam.” (Salmo 37:8) Ti di mamedmedan nga emosion ket mangituggod kadagiti dakes nga aramid. No ti maysa a tao iwayaanna ti pungtot, mabalin a makaisao wenno makaaramid kadagiti banag a makapasakit kadagiti dadduma.