Pito a Nainsiriban a Balakad

DAGITI sumaganad a balakad ket masarakan iti nagkauna a libro a napno iti balakad a napaneknekan a praktikal ken agaplikar iti amin a tiempo. Usigem no kasano a makatulong dagitoy iti nainsiriban a panangusarmo iti kuartam.

1. “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul.” (Eclesiastes 5:10) Dagita ket saan a sasao ti naapal ken nakurapay a tao. Insurat dayta ti maysa kadagiti kabaknangan a nagbiag, ni Ari Solomon iti Israel, sigun iti mismo a kapadasan ken kapaliiwanna. Kasta met la ti makuna dagiti nabaknang ita.

2. “No adda pagtaraon ken pagkawestayo, mapnektayon kadagitoy a banag. Nupay kasta, dagidiay determinado a bumaknang matnagda iti sulisog.” (1 Timoteo 6:8, 9) Insurat dagita ni apostol Pablo a nangtallikud iti prominente a karerana tapno agbalin a pasurot ni Jesu-Kristo. Saan a kas kadagiti lider ti relihion ita, pulos a di nasulisog ni Pablo a manggundaway kadagiti isursuro ken katimpuyogna tapno panguartaanna ida. Sipupudno ketdi a naikunana: “Diak inaguman ti pirak wenno balitok wenno pagan-anay ti asinoman a tao. Dakayo ammoyo a dagitoy nga ima inasikasoda dagiti kasapulak ken dagidiay kakaduak.”—Aramid 20:33, 34.

3. “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos, tapno kitaenna no adda umanay a pangleppasna iti dayta?” (Lucas 14:28) Ti ilustrasion ni Jesus ket mabalin nga iyaplikar iti situasion a mabalin a pakaipasanguam: No adda kayatmo a gatangen, nangruna babaen iti credit card, dagus kadi a gatangem wenno agteppelka ken kuentaem nga umuna ti magastos? Talaga kadi a kasapulam dayta, ken kabaelam kadi a bayadan?

4. “Ti nakabulod adipen iti tao nga agpapautang.” (Proverbio 22:7) Ipakita ti nabiit pay a sangalubongan a krisis iti ekonomia a minamaag ti umutang babaen iti credit card ken iti dadduma pay a pamay-an. “Gagangay laengen ita a makautang ti maysa iti promedio a nasurok a $9,000 iti uppat wenno ad-adu pay a credit card,” kinuna ni Michael Wagner iti librona idi 2009 a Your Money, Day One.

5. “Daydiay nadangkes umutang ket saan nga agbayad, ngem daydiay nalinteg mangipaay iti parabur ken agisagut.” (Salmo 37:21) Para iti dadduma, maliklikanda ti agbayad iti utangda no ideklarada a bangkrapdan. Ngem dagidiay mangipatpateg iti nasayaat a relasionda iti Dios saanda la a sipapanunot a mangbayad iti utangda, nangruna no kabaelanda dayta, no di ket naparaburda met iti adda kadakuada.

6. “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.” (Salmo 37:25) Insurat dagita ti maysa a tao a nagsagaba iti di umiso a pannakatrato. Kas pugante iti adu a tawen, napadasanna ti naglemmeng kadagiti kueba ken nagkamang iti sabali a pagilian. Idi agangay, daytoy a pugante a managan David ket nagbalin nga ari ti nagkauna nga Israel. Iti unos ti panagbiagna, napaneknekanna a mismo ti kinapudno dagita a sasao.

7. “Ad-adu ti kinaragsak iti panangted ngem iti panangawat.” (Aramid 20:35) Imbaga dagita ti katan-okan a tao a nagbiag ditoy daga. “Gapu iti rag-o a naikabil iti sanguananna,” inusar ni Jesus ti biagna ditoy daga tapno agserbi iti sabsabali. Isu ket maysa itan nga imortal nga espiritu idiay langit iti makannawan ti “naragsak a Dios” a ni Jehova.—Hebreo 12:2; 1 Timoteo 1:11.

Awanen ti nasaysayaat pay a pangusarantayo iti biagtayo no di ti panangtulad iti ulidan ni Jesus babaen ti panangaramidtayo iti amin a kabaelantayo a tumulong iti sabsabali. Sigurado nga umanamongka a nasaysayaat ti agbalin a naannad a managurnong, tapno agbalinka a managparabur, ngem iti panangusarmo iti kuartam a para laeng iti bagim.