Ti Namilagruan a Panangpaimbag iti Sangatauan Asidegen
“DITAY pay pulos nakakita ti kas iti dayta.” Kastat’ kinuna dagiti nakasaksi iti namilagruan, giddato a panangpaimbag ni Jesus iti maysa a paralitiko. (Marcos 2:12) Inagasan met ni Jesus dagiti bulsek, umel, ken pilay, ket kasta met ti inaramid dagidi pasurotna. Babaen iti ania a pannakabalin a naaramidan ni Jesus dayta? Aniat’ nakainaigan ti pammati? Ania a lawag ti insilnag dagitoy a kapadasan idi umuna a siglo iti namilagruan a panangpaimbag ita?—Mateo 15:30, 31.
“Ti Pammatim Pinaimbagnaka”
Dagiti agdama a mangngagas babaen ti pammati magustuanda a dakamaten ti sasao ni Jesus iti nagpaagas kenkuana a babai a 12 a tawenen nga agsagsagaba iti panagpadara: “Ti pammatim pinaimbagnaka.” (Lucas 8:43-48) Impasimudaag kadi ti sasao ni Jesus a ti pannakapaimbagna agpannuray iti pammatina? Ehemplo kadi dayta ti “panangpaimbag babaen ti pammati” kas ti maar-aramid ita?
No basaentayo a naimbag ti rekord ti Biblia, makitatayo a kaaduanna di kinalikaguman ni Jesus ken dagiti adalanna nga ipaduyakyak dagiti masakit ti pammatida sakbay a mapaimbagda. Ti babai a nadakamat dimteng ken, awan pay imbagbagana ken Jesus, siuulimek a sinagidna ti pagan-anayna iti likudan ket “giddato a nagsardeng ti panagbulos ti darana.” Iti sabali pay a gundaway, pinaimbag ni Jesus ti lalaki a kadua dagidiay nangaresto kenkuana. Pinaimbagna pay ti maysa a lalaki nga awan ammona iti kinasiasino ni Jesus.—Lucas 22:50, 51; Juan 5:5-9, 13; 9:24-34.
No kasta, aniat’ nakainaigan ti pammati? Idi a ni Jesus ken dagiti adalanna addada idiay distrito ti Tiro ken Sidon, dimteng ti maysa a babai a taga Fenicia ket nagikkis: “Maasianka kaniak, Apo, Anak ni David. Ti anakko a babai nakaro unay ti pannakasairona.” Iladawanyo ti kinalidayna bayat a nagpakpakaasi: “Apo, tulongannak!” Natignay gapu iti asi, insungbat ni Jesus: “O babai, dakkel ti pammatim; mapasamak koma kenka a kas iti kayatmo.” Ket ti anakna a babai napaimbag “manipuden iti dayta nga oras.” (Mateo 15:21-28) Nalawag, adda nakainaigan ti pammati, ngem makin-pammati? Kitaenyo ta ti pammati ti ina ti kinomendaran ni Jesus, saan a ti pammati ti masakit nga anak. Ken pammati iti ania? Iti panangawagna ken Jesus nga “Apo, Anak ni David,” nabatad a ti babai binigbigna iti publiko a ni Jesus ti naikari a Mesias. Saan a basta ebkas ti pammati iti Dios wenno pammati iti pannakabalin ti mangngagas. Idi kinuna ni Jesus, “Ti pammatim pinaimbagnaka,” kayatna a sawen a no awan pammatida kenkuana kas ti Mesias, saan koman a nagpaagas kenkuana dagiti masakit.
Kadagitoy nga ehemplo iti Kasuratan, matarusantayo a ti panangagas ni Jesus ket naiduma unay iti gagangay a makitkita wenno ibagbagada ita. Awan ti nakaro nga ebkas ti rikna—panagririaw, panagkankanta, panagas-asug, pannakatalimudaw, ken dadduma pay—manipud iti bunggoy ken awan inaramid ni Jesus a kasla panagballa. Mainayon pay, awan a pulos ti di naagasan ni Jesus a pinagpambarna ti kinaawan pammatida wenno bassit ti donasionda.
Panangpaimbag Babaen iti Pannakabalin ti Dios
Kasano a napasamak ti panangpaimbag ni Jesus ken dagiti adalanna? “Ti pannakabalin ni Jehova adda sadiay tapno isu mangpaimbag,” kuna ti Biblia. (Lucas 5:17) Kalpasan ti maysa a panangpaimbag, kuna ti Lucas 9:43, “nangrugida amin nga agsiddaaw unay iti natan-ok a pannakabalin ti Dios.” Mayataday unay, saan nga intan-ok ni Jesus ti bagina kas mangngagas. Iti maysa a gundaway, imbagana iti lalaki a winayawayaanna manipud panangriribuk ti sairo: “Agawidka kadagiti kakabagiam, ket ipadamagmo kadakuada dagiti amin a bambanag nga inaramid kenka ni Jehova ken ti panangaasina kenka.”—Marcos 5:19.
Yantangay nangpaimbag ni Jesus ken dagiti apostol babaen iti pannakabalin ti Dios, nalaka a makita no apay a ti pammati ti mapapaimbag saan a kanayon a kasapulan iti panangpaimbag. Nupay kasta, nasken ti nabileg a pammati iti biang ti mangngagas. Gapuna, idi saan a maparuar dagiti pasurot ni Jesus ti nabileg a sairo, imbaga ni Jesus kadakuada ti rason: “Gapu iti bassit a pammatiyo.”—Mateo 17:20.
Panggep ti Namilagruan a Panangpaimbag
Nupay adut’ napaimbag ni Jesus iti intero a ministeriona ditoy daga, saanna nga impangpangruna ti ‘ministerio ti panangpaimbag.’ Ti namilagruan a panangagasna—dina pulos siningir dagiti tattao wenno nagur-or iti aniaman a donasion—ket maikadua laeng iti kangrunaan a panggepna, nga isu ti “panangikasaba iti naimbag a damag ti pagarian.” (Mateo 9:35) Kuna ti rekord nga iti naminsan “inawatna ida a siaasi ket nangrugi nga agsao kadakuada maipapan iti pagarian ti Dios, ket pinaimbagna dagidiay agkasapulan iti pannakaagas.” (Lucas 9:11) Iti salaysay ti Ebanghelio, masansan a naawagan ni Jesus kas “Mannursuro” ngem saan a pulos kas “Mangngagas.”
Ngarud, apay a nagaramid ni Jesus kadagiti namilagruan a panangpaimbag? Kangrunaanna tapno ipabigbigna ti kinasiasinona kas ti naikari a Mesias. Idi naibalud ni Juan a Mammautisar nga awan nainkalintegan a rason, tinarigagayanna ti pammatalged a naibanagna ti impaaramid ti Dios kenkuana. Imbaonna dagiti adalanna ken Jesus sada inimtuod: “Sika kadi Daydiay Umay, wenno inanamaenmi aya ti sabali?” Usigenyo ti imbaga ni Jesus kadagiti adalan ni Juan: “Mapankayo ket ipadamagyo ken Juan ti mangmangngeg ken makitkitayo: Dagiti bulsek makakitada manen, ket dagiti pilay magmagnada, dagiti agkukutel madaldalusanda ket dagiti tuleng makangkangngegda, ket dagiti natay mapagpagungarda, ket dagiti napanglaw maidekdeklara kadakuada ti naimbag a damag.”—Mateo 11:2-5.
Wen, ti kinapudno a saan laeng nangagas ni Jesus no di pay ket nagaramid iti sabsabali a milagro a nailanad kadagiti Ebanghelio isu ti nangpasingked iti kinasiasinona kas “Daydiay Umay,” ti naikari a Mesias. Saanen a kasapulan a ‘manginanama [ti asinoman] iti sabali.’
Dagiti Namilagruan a Panangpaimbag Ita?
No kasta, inanamaentay kadi ti Dios a paneknekanna ti pannakabalinna ita babaen iti panangpaimbag? Saan. Babaen kadagiti namilagruan nga aramidna iti tulong ti pannakabalin ti Dios, di pagduaduaan a napasingkedan ni Jesus nga isu ti Mesias nga inkari ti Dios a dumteng. Nailanad iti Biblia dagiti naindaklan nga aramid ni Jesus tapno mabasa ti amin. Saanen a kasapulan nga ipaneknek ti Dios ti pannakabalinna babaen ti panangulit iti kakasta nga aramid iti tunggal kaputotan dagiti tattao.
Makapainteres, saan a kanayon a makakombinsir dagiti panangpaimbag ken dadduma pay a namilagruan nga aramid. Uray ti dadduma a nakaimatang kadagiti milagro ni Jesus dida namati a tultulongan ti nailangitan nga Amana. “Nupay nakaaramid iti nakaad-adu a pagilasinan iti sanguananda, saanda a naaddaan iti pammati kenkuana.” (Juan 12:37) Gapuna, kalpasan ti panangsalaysayna iti nadumaduma a namilagruan a sagut—panagipadto, panagsao iti nadumaduma a lenguahe, panangagas, ken dadduma pay—nga impaay ti Dios iti nadumaduma a kameng ti kongregasion Kristiano idi umuna a siglo, napaltiingan ni apostol Pablo a mangikuna: “Uray no adda dagiti sagut ti panagipadto, mapukawdanto; uray no adda dagiti pagsasao, agsardengdanto; uray no adda pannakaammo, mapukawto. Ta addaantayo iti di naan-anay a pannakaammo ken agipadtotayo a di naan-anay; ngem inton dumteng daydiay naan-anay, daydiay di naan-anay mapukawto.”—1 Corinto 12:28-31; 13:8-10.
Siempre, agpaay iti pagimbagantayo ti kaadda iti pammati iti Dios. Nupay kasta, agbanag laeng iti pannakapaay no isaad ti maysa a tao ti pammatina kadagiti ubbaw a kari ti panangpaimbag. Maysa pay, maipanggep iti tiempo ti panungpalan, impakdaar ni Jesus: “Dagiti ulbod a Kristo ken dagiti ulbod a mammadto tumakderdanto ket mangteddanto kadagiti dadakkel a pagilasinan ken datdatlag tapno mangiyaw-awanda, no mabalin, uray pay kadagiti napili.” (Mateo 24:24) Malaksid iti panagpammarang ken panangallilaw, adda met dagiti parangarang ti pannakabalin dagiti sairo. Kas resultana, ditay koma pakasdaawan dagiti ibagbagada a di mailawlawag a pasamak, ket sigurado a saan a pakaibatayan dagitoy iti pudpudno a pammati iti Dios.
Yantangay awan asinoman ita ti agar-aramid kadagiti panangpaimbag a kas ti inaramid ni Jesus idi, kaipapananna kadi a napaidamantayo? Saan. Kinapudnona, dagidiay pinaimbag ni Jesus nagsakitda manen kamaudiananna. Limmakay ken natayda amin. Apagbiit laeng dagiti gunggona ti pannakapaimbagda. Kaskasdi, adda manayon a kaipapanan dagiti namilagruan a panangpaimbag ni Jesus yantangay iladladawanda dagiti gunggona iti masanguanan.
Gapuna, kalpasan a sinukimatda ti Sao ti Dios, ti Biblia, da Alexandre ken Benedita, a nadakamaten, saandan a namati iti moderno a panangpaimbag ken espiritistiko a panangagas. Nupay kasta, kombinsidoda a dagiti namilagruan a panangpaimbag saan a bambanag a paset laengen ti napalabas. Apay a kasta? Kas iti minilmilion iti intero a lubong, mangnamnamada kadagiti bendision ti panangpaimbag iti sidong ti Pagarian ti Dios.—Mateo 6:10.
Awanen ti Sakit ken Ipapatay
Kas naawatantayon, ti kangrunaan a panggep ti ministerio ni Jesus ket saan a tapno agpaimbag kadagiti masakit ken agaramid iti sabsabali pay a milagro. Imbes ketdi, impangpangrunana ti panangikasaba iti naimbag a damag ti Pagarian ti Dios. (Mateo 9:35; Lucas 4:43; 8:1) Dayta a Pagarian ti usaren ti Dios a mangibanag iti namilagruan a panangpaimbag iti sangatauan ken mangikkat iti amin a dadael nga impagteng ti basol ken kinaimperpekto iti natauan a pamilia. Kasano ken kaano nga ibanagna daytoy?
Iti panangtukoyna iti masanguanan, impaayan ni Kristo Jesus ni apostolna a Juan iti propetiko a sirmata: “Ita napasamaken ti pannakaisalakan ken ti pannakabalin ken ti pagarian ti Diostayo ken ti kinaturay ni Kristona!” (Apocalipsis 12:10) Ipakpakita ti amin nga ebidensia a manipud 1914 ti kangrunaan a bumusbusor iti Dios, ni Satanas, naigarangugongen ditoy daga, ket agtigtignayen ti Pagarian! Naisaaden ni Jesus kas Ari ti Mesianiko a Pagarian ket sisasagana itan a mangaramid iti dadakkel a panagbalbaliw ditoy daga.
Iti din agbayag, ti nailangitan a gobierno ni Jesus iturayannanton ti nalinteg a baro a kagimongan ti tao, kayatna a sawen ti “maysa a baro a daga.” (2 Pedro 3:13) Anianto dagiti kasasaad iti dayta a panawen? Adtoy ti maysa a nadayag a sirmata: “Nakitak ti maysa a baro a langit ken maysa a baro a daga; ta ti immuna a langit ken ti immuna a daga naglabasdan . . . Ket [ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:1, 4.
Mailadawanyo kadi ti kasasaadto ti biag inton pumayso ti namilagruan a panangpaimbag iti sangatauan? “Ti agtaeng dinanto kunaen, Masakitak: dagiti umili nga agtaeng sadiay mapakawanto ti kinadangkesda.” Wen, aramidento ti Dios ti di pulos maaramidan dagiti mangngagas babaen ti pammati. “Isu inalimonna nga agnanayon ni patay.” Wen, “ni Jehova nga Apo punasennanto dagiti lulua kadagiti isuamin a ruprupa.”—Isaias 25:8; 33:24.
[Ladawan iti panid 7]
Simimilagro a mapaimbagto ti sangatauan iti sidong ti Pagarian ti Dios