Maaddaan Managsakripisio nga Espiritu!

NI Rolfa ket maysa a matagtagipateg nga empleado. Idi inkeddengna ti pananggun-odna ti paset-tiempo a trabaho tapno mapalawana ti pasetna iti Kristiano a ministerio, dagdagus a nakitinnulong ti amona. Iti adu a tawen natagiragsak ngarud ni Rolf ti kinapayunir a serbisio. Maysa nga aldaw, nupay kasta, nagbaliw ti kasasaad ti trabaho. Napaneknekan unay ni Rolf a kabaelanna unay ti trabahona ket naitukon kenkuana ti saad ti marketing manager iti kompania. Ti trabaho inramanna ti nangato a sueldo ken naimbag a panginanamaan iti masanguanan a pannakaingato ti saad. Nupay kasta, saanen a mabalin ti paset-tiempo a trabaho.

Addaan ni Rolf iti asawa ken dua nga annak a suportaranna, ket ti kanayonan a kuarta ti kasapulanda unay koma. Uray kasta, nagkedkedanna ti tukon ket isut’ nagaplikar iti sabali a trabaho, daydiay mangipalubos kenkuana a manggaw-at agpadpada kadagiti naespirituan ken pinansial nga obligasionna. Nasdaaw ti amo ni Rolf iti daytoy a pangngeddengna. Iti pannakailasinna nga uray ti tukon ti nangatngato a sueldo ket awan mamaayna, inkeddeng ti amona: “Maawatak a diak mabalinan ti makiinnagaw iti panamatim.”

Wen, addaan panamati ni Rolf. Ngem isut’ addaan sabali pay a galad​—ti espiritu ti panagsakripisio. Ti kasta nga espiritu ket mammano iti manangigamer-bagina a lubongtayo. Ngem makaiturong daytoy iti maysa a dalan ti biag a makagunggona ken makapnek. Ania ti espiritu a panagsakripisio? Ania ti iramanna? Ken ania ti masapul nga aramidentayo tapno mataginayon dayta?

Maysa a Kiddawen ti Biblia

Ti idaton kaipapananna ti isuko wenno ited ti maysa a napateg a banag. Ti panagdaton ket paseten ti pudno a panagdayaw sipud pay ti immuna a matalek a saksi, ni Abel, indatagna “dagiti inauna iti arbanna” a daton iti Dios. (Genesis 4:4) Dagiti lallaki iti pammati, kas ken Noe ken Jacob, simmurotda met. (Genesis 8:20; 31:54) Dagiti daton nga animal ket napategda met a parupa ti Mosaiko a Linteg. (Levitico 1:2-4) Iti sidong dayta a Linteg, nupay kasta, naparayray dagiti managdayaw a mangidatag iti kasasayaatanda. Saanda a napalubosan a mangidatag iti adda pilawna nga animal kas maysa a daton. (Levitico 22:19, 20; Deuteronomio 15:21) Idi linabsing dagiti apostata nga Israelitas daytoy a linteg, tinubngar ida ti Dios, a kunkunana: “No idatagyo ti pilay nga animal [maipaay iti panagdaton, kunayo]: ‘Saan a dakes.’ Iyasidegmo dayta, pangngaasim, iti agturaymo. Maay-ayonto aya kenka, wenno siaanusto aya nga awatennaka? . . . Awatekto koma aya daytoy iti imayo?”​—Malakias 1:8, 13.

Ti prinsipio ti panagdaton ket naitugot iti Kristiano a panagdayaw. Nupay kasta, yantangay imbayaden ni Kristo ti naan-anay a gatad ti subbot, dagiti daton nga animal ket saanen a makaay-ayo iti Dios. Gapuna, aniat’ makaay-ayo a maidaton dagiti Kristiano? Isurat ni Pablo idiay Roma 12:1: “Dawatek ngarud kadakayo kakabsat gapu iti kaasi ti Dios nga ipaayyo dagiti bagbagiyo kas daton a sibibiag, nasantuan, makaay-ayo iti Dios, maysa a sagrado a serbisio buyogen ti bileg ti rasonyo.” Anian a makapakellaat a panagbaliw! Imbes a ti panangidaton kadagiti natay a bagi dagiti animal, kasapulan a mangaramid dagiti Kristiano iti sibibiag a panangidaton kadagiti bagbagida​—dagiti pigsada, sanikuada, ken abilidadda. Ken kas idiay Israel, saan nga awaten ni Jehova dagiti “pilay,” wenno di naimpusuan, a daton. Dawatenna a dagiti managdayawna itdenda kenkuana ti kasasayaatanda, nga agserbida kenkuana buyogen ti amin a puso, kararua, panunot, ken pigsada.​—Marcos 12:30.

Ti maysa a managsakripisio nga espiritu iramanna ti ad-adda pay ngem ti basta panangipaay ti maysa iti bagina iti iskediol dagiti gimong ken aramid iti Kristiano a ministerio. Kaipapananna ti determinasion nga agaramid iti pagayatan ti Dios uray ania ti mapasamak. Kaipapananna ti panagbalin a sisasagana nga aglak-am kadagiti rigat ken di kinakumbiniente. “No siasinoman mayat a sumurot kaniak,” kuna ni Jesus, “paglikudanna ti bagina ket alaenna ti kayo a pagtutuokanna ket agtultuloy a sumurot kaniak.” (Mateo 16:24) Saan nga aramiden ti maysa a Kristiano ti personal nga arapaap wenno materialistiko a kalkalat kas kangrunaan a pakaseknanna. Ti biagna naisentro iti panangbiruk nga umuna iti Pagarian ti Dios ken ti kinalintegna. (Mateo 6:33) No kasapulan, isut’ sisasagana a “mangala iti kayo a pagtutuokanna,” aglak-am ti pannakaidadanes, bain, wenno uray ipapatay!

Dagiti Bendision nga Agtaud Manipud Panagsakripisio

No maipasango kadagiti kakasta a mamagpanunot a kasasaad, natural laeng a panunoten ti maysa no talaga a maikari ti panagsakripisio. Kadagidiay nga agayat ken Jehova a Dios ken tarigagayanda a makita ti pannakaidayaw ti naganna, maikari la ketdi dayta. (Mateo 22:37) Utobenyo ti perpekto nga ulidan nga intuyang ni Jesu-Kristo. Sakbay iyaayna ditoy daga, tinagiragsakna ti nangayed a saad idiay langit kas maysa nga espiritu a parsua. Nupay kasta, kas imbagana kadagiti adalanna, sinapulna ‘saan a ti bukodna a pagayatan, no di ket ti pagayatan ti Dios, a nangibaon kenkuana.’ (Juan 5:30) Gapuna nga isut’ situtulok a “binaybay-anna ti bagina ket innalana ti galad nga adipen ket nagbalin a kapadpada dagiti tao. Nangnangruna pay, idinto a nagparang iti kasasaad ti tao, nagpakumbaba a naknakemna ket nagtulnog agingga ken patay, wen, patay iti kayo a pagtutuokan.”​—Filipos 2:7, 8.

Dagiti kakasta a panagsakripisio saan nga awan bungana. Gapu ta situtulok ni Jesus a “mangited iti kararuana maigapu kadagiti gagayyemna,” mabayadanna ti gatad ti subbot, a mamagbalin kadagiti imperpekto a tattao a makaragpat iti imortalidad man idiay langlangit, wenno biag nga agnanayon ditoy daga. (Juan 3:16; 15:13; 1 Juan 2:2) Babaen naan-anay a panangsalimetmetna iti kinatarnawna, naidayaw unay ti nagan ni Jehova. (Proverbio 27:11) Isu met la nga isut’ binendisionan ni Jehova gapu iti managsakripisio a kursona! “Isut’ intan-ok ti Dios iti kangatuan a saad ket siaanus nga inikkanna ti nagan a natantan-ok ngem iti amin a nagan.”​—Filipos 2:9.

Siempre, ni Jesus isu ti bugbugtong nga Anak ti Dios. Gunggonaan kadi met ti Dios dagiti sabsabali nga agsakripisio maipaay kenkuana? Wen, ket impakita daytoy dagiti adu a pangarigan agpada kadagiti nagkauna ken moderno a panawen. Usigenyo ti salaysay ti Biblia maipapan ken Ruth a Moabita. Agminar a naadalna ti maipapan ken Jehova baeten ken Israelita nga asawana. Kalpasan ipapatay ni lakayna, rebbeng nga isut’ mangeddeng. Agtalinaed kadi iti pagano a daga a nakaiyanakanna, wenno isu kadit’ agdaliasat iti Naikari a Daga a kaduana ti nataenganen a katuganganna a babai, a ni Noemi? Pinili ni Ruth ti naud-udi, uray no kinaipapananna ti panangisakripisio iti pannakitimpuyogna kadagiti nagannakna ken nalabit uray ti namnama ti pannakiasawa manen. Uray kasta, naam-ammo ni Ruth ni Jehova, ket ti tarigagay nga agdayaw kenkuana a kadua ti napili nga ilina ti nangtignay kenkuana a di sumina ken Noemi.

Nagunggonaan kadi ni Ruth gapu iti kasta a panagsakripisio? La ketdi! Idi agangay, maysa a nalawa ti dagana a managan Booz ti nangasawa kenkuana, ket nagbalin ni Ruth nga ina ti anak a lalaki a napanaganan Obed, a namagbalin kenkuana nga inapo a babai ni Jesu-Kristo.​—Mateo 1:5, 16.

Tinagiragsak met dagiti managsakripisio nga adipen ti Dios kadagiti moderno a panawen dagiti bendision. Kas pangarigan, idi 1923, ni William R. Brown, ad-adda nga am-ammo kas “Bible” Brown, pinanawanna ti balayna idiay West Indies tapno idauluanna ti panangasaba a trabaho idiay Makinlaud nga Africa. Kimmuyog kenkuana ni baketna ken ti balasangna. Idi agangay isut’ immakar idiay Nigeria, a sadiay ti panangasaba a trabaho ket mangrugrugi pay laeng nga agbunga. Kaduana ti maysa a negro nga Americano a managan Vincent Samuels ken sabali pay a taga West Indies a Saksi nga agnagan Claude Brown, napateg ti nagbalin nga akem ni “Bible” Brown kadagiti nasapa a tukad ti trabaho idiay Makinlaud nga Africa.

Ita nasurok a 187,000 nga agibumbunannag ti agserserbi idiay Sierra Leone, Liberia, Ghana, ken Nigeria, dagiti teritoria a rinugian ni “Bible” Brown ken dagiti kakaduana. Sakbay ipapatayna idi 1967, kuna ni “Bible” Brown: “Anian a rag-o a makita dagiti lallaki ken babbai nga agbalbalin a natulnog iti naimbag a damag ti Pagarian ti Dios!” Wen, isut’ sibabaknang a nabendisionan gapu iti managsakripisio a kursona.

Dagiti Pamay-an Tapno Agbalin a Managsakripisio

Ania dagiti sumagmamano a pamay-an a maipakitatayo ti isu met laeng nga espiritu ita? Maysa isu ti kaadda ti regular a linawas a pannakiraman iti panagbalaybalay a ministerio. (Aramid 20:20) Ti panangaramid a kasta, kangrunaanna kalpasan makabannog a lawas iti sekular a trabaho, ket mabalin a saan a nalaka. Mabalin a dawatenna ti disiplina ken nasayaat a panangiyurnos. Ngem dagiti rag-o atiwenda dagiti lak-amen a di kinakumbiniente. Ay ket, maaddaankayo iti pribilehio ti panangtulong iti maysa nga agbalin “a surat ni Kristo . . . a naikur-it saan nga iti tinta no di ket iti espiritu ti sibibiag a Dios, saan a kadagiti tapi a bato, no di ket kadagiti tapi ti lasag, wenno puspuso.”​—2 Corinto 3:3.

Babaen siaannad a “panangsubbot iti nainggundawayan a tiempo,” nalabit manipud sekular a trabaho wenno paglinglingayan, dadduma ti nakaparang-ay iti bingayda iti panangasaba a trabaho. (Efeso 5:16) Adu ti mangiyurnos kadagit iskediolda tapno matagiragsakda ti auxiliary payunir a serbisio uray maminsan laeng iti makatawen. Kabaelan dagiti sabsabali ti agtultuloy nga ag-auxiliary payunir wenno agserbida kas regular payunir. Sabali pay a panagsakripisio nga usigen ket isu ti iyaakar kadagiti lugar nga agkasapulan iti ad-adu nga agibunannag ti Pagarian. Masansan nga iraman daytoy dagiti kellaat a panagbalbaliw iti estilo ti panagbiag, panangitured kadagiti di kinakumbiniente, pannakairuam kadagiti baro a kultura ken kustombre. Ngem dagiti bendision ti kaadda ti dakdakkel a bingay iti panangtulong kadagiti sabsabali a mangragpat iti biag pagbalinenna a maikari dagiti kakasta a panagsakripisio.

Ni naiyanak idiay Canada a John Cutforth natakkuatanna a mismo daytoy. Kalpasan panagturposna manipud Watchtower Bible School of Gilead, isut’ natudingan kas maysa a misionero idiay Australia. “Anian a nagadayo dayta manipud idiay balay!” nalagip ni Kabsat Cutforth. “Makasubliak pay ngata idiay Canada tapno makitak dagiti nagannak ken gagayyemko sakbay ti Armagedon? Ti laeng pamay-an tapno makita ket isu ti ipapan.” Napan ni Kabsat Cutforth, ket dina nagbabawian dagiti panagsakripisio nga inaramidna. Kadagiti simmaruno a tawtawen indauluanna ti panangsaksi a trabaho idiay Papua New Guinea, a sadiay agserserbi pay laeng a sireregta, a nakumpletonan ti 50 a tawen iti amin-tiempo a serbisio. Naminsan kunana: “Ti kankanayon a panagtarigagay a suroten ti panangidalan ni Jehova, panangawat iti aniaman nga annongen nga ammona a maiparbeng nga itedna, ket mangted iti rag-o, kinaragsak, pannakapnek, ken di mabilang a gagayyem.”

Siempre, dagiti kasasaad kas iti salun-at, pinansial a suporta, ken dagiti obligasion iti pamilia mabalin a kednganda ti maaramidanyo; saan nga amin ket makapagserbi kas payunir ken misionero. Uray kasta, agbalin a determinado a maaddaan iti naan-anay a pannakipaset kadagiti gimong ken iti serbisio iti tay-ak aginggat’ mabalin, a di palpalubusan dagiti babassit a di kinakumbiniente, kas iti dakes a panniempo, a manglapped kadakayo. (Hebreo 10:24, 25) Mabalinyo met a maisakripisio ti ad-adu a panawen maipaay iti personal a panagadal iti Sao ti Dios. Dadduma a pamilia ti nangaramid ti kasta babaen panangkeddengda iti panawen a mabusbos iti panagbuya kadagiti programa ti TV, a nalabit uray pay kaadda ti “awan ti TV” a rabii iti tunggal lawas wenno awan a talaga ti TV. Babaen panangisapar iti tiempo para iti personal a panagadal, ti “daton a panagdayaw” nga iti dayta “agaramidkayo ti publiko a panangipaduyakyak iti naganna” kadagiti gimong ken ti serbisio iti tay-ak ket ad-adda nga agbalin a nangatngato ti kualidadna a panagsakripisio.​—Hebreo 13:15.

Laglagipenyo, ti panangasaba a trabaho ket adda itan kadagiti maudi a tukadna. Din agbayag iyegen ti Dios ti panangukomna iti daytoy naagum ken manangigamer iti bagi a lubong. (Sofonias 2:3) Tapno mataginayon ti pabor ti Dios, ditay koma agbalin a manangikaluya iti bagitayo. Masapul nga ‘idatagtayo dagiti bagitayo a daton a sibibiag, nasantuan, makaay-ayo iti Dios.’ (Roma 12:1) Ti kasta nga espiritu ti mangiyeg ti dakkel a kinaragsak ken pannakapnek. Tulongannatayo a manggun-od iti dakdakkel a rag-o iti ministeriotayo. Ket pagrag-oenna ti puso ni Jehova a Dios!​—Proverbio 27:11.

Gapuna a taginayonenyo ti managsakripisio nga espiritu! Dikay agpangpangngadua a mangipaay iti bagiyo kadagiti sabsabali ken iti panangsuportar iti intereses ti Pagarian. Mamaregta ni Pablo: “Dikay lipatan ti panagaramid iti naimbag ken ti panagririnnaman, ta ti Dios pagay-ayatanna unay dagiti kakastoy a daton.”​—Hebreo 13:16.

[Footnote]

[Ladawan iti panid 26]

Ti panangisapar iti personal a panagadal ken serbisio iti tay-ak mabalin nga iramanna ti panagsakripisio, ngem makagunggona daytoy

[Ladawan iti [panid 28]

Sibabaknang a nabendisionan da W. R. Brown ken John Cutforth gapu iti managsakripisio a kursoda