Panangtaginayon iti Panaggagayyem iti Awanan Ayat a Lubong
“Dagitoy a banag ibilinko kadakayo, nga ayatenyo ti maysa ken maysa.”—JUAN 15:17.
1. Apay a masapul nga agtalinaed a nasinged iti maysa ken maysa dagiti Kristiano idi umuna a siglo?
ITI maudi a rabii ni Jesus ditoy daga, pinaregtana dagiti matalek nga adalanna a taginayonenda ti panaggagayyemda. Sakbayna, kinunana a ti panagiinnayatda ti pammaneknek a pasurotna ida. (Juan 13:35) Masapul nga agtalinaedda a nasinged iti maysa ken maysa tapno maibturanda dagiti suot a pakaipasanguanda ken maitungpalda ti trabaho a mabiiten nga italek kadakuada ni Jesus. Kinapudnona, agdindinamag dagiti Kristiano idi umuna a siglo gapu iti natibker a debosionda iti Dios ken iti maysa ken maysa.
2. (a) Ania ti determinado nga aramidentayo, ken apay? (b) Ania dagiti saludsod nga usigentayo?
2 Anian a ragsaktayo ita a maitimpuyog iti sangalubongan nga organisasion, a dagiti miembrona tultuladenda ti ulidan nga impasdek dagiti Kristiano idi umuna a siglo! Determinadotayo nga agtulnog iti bilin ni Jesus nga ayatentayo a naimpusuan ti maysa ken maysa. Ngem bayat daytoy maudi nga al-aldaw, saan a nasungdo ti kaaduan a tattao ken awananda iti naikasigudan nga ayat. (2 Tim. 3:1-3) Masansan a pammarang ken managimbubukodan ti pannakigayyemda. Tapno mataginayon ti pakabigbigantayo kas pudno a Kristiano, masapul a ditay tuladen ti kasta a kababalin ti lubong. Usigentayo ngarud ita dagiti sumaganad: Ania ti nakaibatayan ti napaut a panaggayyem? Kasano a maaddaantayo kadagiti nasayaat a gagayyem? Kaano a masapul a gupdentayo ti pannakigayyemtayo? Ken kasanotayo a mataginayon ti makagunggona a panaggayyem?
Ania ti Nakaibatayan ti Napaut a Panaggayyem?
3, 4. Ania ti nakaibatayan ti katibkeran a panaggayyem, ken apay?
3 Ti katibkeran a panaggayyem ket naibatay iti panagayat ken Jehova. Insurat ni Ari Solomon: “No ti asinoman maringbawanna ti agmaymaysa, ti dua a sangsangkamaysa makapagtakderda a maibusor kenkuana. Ket ti tinallo a tali saan a nadaras a mapugsat.” (Ecl. 4:12) Mataginayon ti panaggayyem no ni Jehova ti maikatlo a paset dayta a singgalut ti panaggayyem.
4 Agpayso a posible a maaddaan met iti makagunggona a panaggagayyem dagidiay saan nga agayat ken Jehova. Ngem no ti panaggayyem ket naibatay iti panagayat iti Dios, natibtibker dayta. No tumanor dagiti di panagkikinnaawatan, dagiti pudno nga aggagayyem tratuenda ti maysa ken maysa iti pamay-an a makaay-ayo ken Jehova. Aniaman a panangikagumaan dagiti bumusbusor iti Dios, dida madadael dayta a panaggagayyem dagiti pudno a Kristiano. Iti intero a historia, napaneknekan dagiti adipen ni Jehova a sidadaanda a matay imbes a liputanda dagiti kakabsatda.—Basaen ti 1 Juan 3:16.
5. Apay a nakatibtibker ti panaggayyem da Ruth ken Noemi?
5 Awan duadua a ti kasayaatan a pakigayyemantayo ket kadagidiay agayat ken Jehova. Usigentayo ti pagarigan da Ruth ken Noemi. Ti panaggayyemda ti maysa kadagiti kasayaatan a pagwadan a nairekord iti Biblia. Apay a natibker ti panaggayyemda? Imbaga ni Ruth ti rason idi kinunana ken Noemi: “Dagiti kailiam isudanto dagiti kailiak, ket ti Diosmo Diosko. . . . Kasta koma ti aramiden kaniak ni Jehova ken inayonna iti dayta no adda aniaman a banag malaksid ken patay a mamagsina kadata.” (Ruth 1:16, 17) Nalawag nga agpada a nasged ti panagayatda iti Dios ken impalubosda a dayta nga ayat ti mangimpluensia iti panangtratoda iti maysa ken maysa. Kas resultana, agpada a binendisionan ida ni Jehova.
No Kasano a Maaddaan Kadagiti Nasayaat a Gagayyem
6-8. (a) Ania ti kasapulan tapno agpaut ti pannakigayyemyo? (b) Ania ti aramidenyo tapno maaddaankayo kadagiti gagayyem?
6 Ipakita ti ulidan da Ruth ken Noemi a saan a naiparparna ti nasayaat a panaggayyem. Masapul a naibatay dayta iti agpada a panagayat dagiti aggayyem ken Jehova. Kaskasdi, kasapulan ti panagregget ken panagsakripisio tapno agpaut dayta. Uray dagiti agkabsat iti lasag nga agpada nga agdaydayaw ken Jehova kasapulanda ti panagregget tapno agbalinda a nasinged nga aggayyem. Kasano ngarud a maaddaantayo kadagiti nasayaat a gagayyem?
7 Dakayo ti mangyun-una. Pinaregta ni apostol Pablo dagiti gagayyemna iti kongregasion ti Roma a ‘surotenda ti dalan ti kinamanagpadagus.’ (Roma 12:13) No kasano a literal nga agaddangka no surotem ti maysa a dalan, kasapulan met ti panangaramid kadagiti babassit ken regular a tignay tapno maipakita ti kinamanagpadagus. Sika a mismo ti masapul a mangipakita iti kinamanagpadagus. (Basaen ti Proverbio 3:27.) Ti maysa a pamay-an ket babaen ti panangawis iti nagduduma a kakongregasionyo para iti maysa a pannangan. Mabalinyo kadi nga iyugali ti agbalin a managpadagus kadagiti kakongregasionyo?
8 Maipakitatayo met a datayo ti mangyun-una no awisentayo ti nagduduma a kakabsat a makikadua kadatayo a mangasaba. No mangngegmo ti kaduam nga iyeb-ebkasna iti bumalay ti naimpusuan a panagayatna ken Jehova, dimo malapdan ti suminged kenkuana.
9, 10. Ania ti inyulidan ni Pablo, ken kasanotayo a matulad?
9 Palawaenyo ti ayatyo. (Basaen ti 2 Corinto 6:12, 13.) Kasla kadi awan ti kagayyemanyo iti kongregasionyo? Gapu kadi ta kedkednganyo ti agbalin a gagayyemyo? Mapagwadan ni apostol Pablo no maipapan iti panangpalawa iti ayat. Adda idi tiempo a dina pulos pinanunot ti makisinninged kadagiti saan a Judio. Nupay kasta, isu ket nagbalin nga “apostol iti nasnasion.”—Roma 11:13.
10 Kanayonanna, saan laeng a dagiti kaedad ni Pablo ti nakigayyemanna. Kas pagarigan, nagbalinda a nasinged nga aggayem ken Timoteo iti laksid ti dakkel a baet ti tawenda ken ti nagduma a nalikudanda. Adu nga agtutubo ita ti maragragsakan a nakigayyem kadagiti natataengan a kameng ti kongregasion. “Adda nasinged a gayyemko a nasurok a 50 ti tawenna,” kuna ni Vanessa, a nasurok la bassit a 20 ti tawenna. “Mayebkasko kenkuana ti aniaman a maibagak iti kasadarak a gayyemko. Ken maseknan unay kaniak.” Kasano a nabukel ti kasta a panaggayyemda? Kuna ni Vanessa: “Siak ti immuna a nagtignay a nakigayyem kenkuana.” Sidadaanka kadi a makigayyem kadagiti saanmo a kasadaran? Sigurado a gunggonaan ni Jehova ti panagreggetmo.
11. Ania ti masursurotayo iti ulidan da Jonatan ken David?
11 Nasungdokayo koma. “Ti pudno a kadua agayat iti isuamin a tiempo, ken ti kabsat a mayanak no adda rigat,” insurat ni Solomon. (Prov. 17:17) Idi pinutar ni Solomon dagita a sasao, nalabit a pampanunotenna ti panaggayyem ni tatangna a David ken ni Jonatan. (1 Sam. 18:1) Kayat ni Ari Saul a ti anakna a ni Jonatan ti agtawid iti trono ti Israel. Ngem inakseptar ni Jonatan ti kinapudno a ni David ti pinili ni Jehova nga agari. Saan a kas ken Saul, di inapalan ni Jonatan ti pribilehio ni David. Saan a nagsakit ti nakemna gapu iti pammadayaw a naited ken ni David ken dina met pinati ti pammardaya ni Saul maipapan ken David. (1 Sam. 20:24-34) Kaslatayo kadi ken Jonatan? No makaawat iti pribilehio ti gayyemtayo, naragsaktayo kadi para kenkuana? Ken no agsagaba, liwliwaen ken saranayentayo kadi? No makangngegtayo iti tsismis maipapan kenkuana, patientayo kadi a dagus? Wenno kas ken Jonatan, sisusungdo kadi nga isakittayo ti gayyemtayo?
No Kaano a Gupden ti Panaggayyem
12-14. Ania dagiti karit a pakaipaspasanguan dagiti mayad-adalan iti Biblia, ken kasano a matulonganyo ida?
12 No ti maysa nga agad-adal iti Biblia mangrugi a balbaliwanna ti biagna, mabalin a maipasango kadagiti narigat a karit mainaig iti pannakigayyem. Mabalin nga adda dagiti magusgustuanna a kakadua ngem saanda nga an-annuroten ti moral a pagalagadan ti Biblia. Mabalin a regular idi a makilanglangen kadakuada. Ngem itan, mabigbigna a makadadael kenkuana ti aktibidadda isu a mariknana a masapul a limitaranna ti pannakikaduana kadagiti kasta a gagayyem. (1 Cor. 15:33) Kaskasdi, mariknana a kasla saan a nasungdo kadagiti gagayyemna no isardengna ti makikadua kadakuada.
13 No maysaka nga agad-adal iti Biblia a maipaspasango iti kasta a karit, laglagipem a ti pudno a gayyem ket maragsakan no ikagumaam a pasayaaten ti biagmo. Mabalin a kayatna pay ketdi ti agadal maipapan ken Jehova. Iti sabali a bangir, dagiti saan a nasayaat a gagayyem “itultuloyda ti agsao a sibabassawang” kenka gapu ta saankan a makikadua kadakuada iti “lugnak ti kinagaramugam.” (1 Ped. 4:3, 4) No an-anagen, dagita ketdi a gagayyem ti saan a nasungdo kenka.
14 No ti maysa nga agad-adal iti Biblia ket panawan dagiti gagayyemna a saan nga agserserbi iti Dios, mabalinna ti makigayyem kadagiti kakabsat iti kongregasion. (Gal. 6:10) Ngarud, personal kadi nga am-ammoyo dagiti makigimgimong nga agad-adal pay laeng iti Biblia? Adda kadi dagiti gundaway a mangbusboskayo iti makapabileg a pannakilangen kadakuada?
15, 16. (a) Ania ti rumbeng nga aramidentayo no adda gayyemtayo nga agsardeng nga agserbi ken Jehova? (b) Kasanotayo a maipakita ti panagayattayo iti Dios?
15 Ngem kasanon no adda gayyemmo iti kongregasion a timmalikud ken Jehova, a nalabit masapul a mailaksid? Makapaupay la ketdi dayta. Kas panangiladawan ti kabsat a babai iti reaksionna idi nagsardeng nga agserbi ken Jehova ti nasinged a gayyemna, kinunana: “Kasla adda paset ti biagko a natay. Impagarupko a natibker ti espiritualidad ti gayyemko ngem saan met gayam. Pampanunotek no nagserbi ken Jehova tapno laeng maay-ayona ti pamiliana. Gapuna, rinugiak a sukimaten dagiti motibok. Agserserbiak ngata ken Jehova buyogen ti umiso a motibo?” Kasano a napagballigian daytoy a kabsat ti situasion? “Inyallatiwko ken Jehova dagiti pakadagsenak,” kinunana. “Determinadoak a mangipakita nga ay-ayatek ni Jehova gapu iti kinasiasinona, saan a gapu ta impaayannak kadagiti gagayyem iti uneg ti organisasionna.”
16 Ditay namnamaen nga agtalinaedtayo a gayyem ti Dios no makisinningedtayo kadagidiay pinilida ti makigayyem iti lubong. Insurat ni adalan a Santiago: “Saanyo aya nga ammo a ti pannakigayyem iti lubong ket pannakibusor iti Dios? Siasinoman, ngarud, nga agtarigagay nga agbalin a gayyem ti lubong ibilbilangna ti bagina a kabusor ti Dios.” (Sant. 4:4) Maipakitatayo ti panagayattayo iti Dios babaen ti panagtalek a tulongannatayo a mangdaer iti pannakaupay nga itden ti pannakapukaw iti gayyem no la ket ta nasungdotayo Kenkuana. (Basaen ti Salmo 18:25.) Kastoy ti pananggupgop ti kabsat a nadakamat itay: “Naadalko a saantay a mapilit ti maysa tapno ayatenna ni Jehova wenno ayatennatayo. Personal a pangngeddengna dayta.” Ngem kasanotayo a mataginayon ti makapabileg a pannakigayyem kadagidiay nasungdo iti kongregasion?
Panangtaginayon iti Nasayaat a Pannakigayyem
17. Kasano ti rumbeng a panagsarita dagiti nasayaat nga aggayyem?
17 Ti nasayaat a komunikasion ti mangtaginayon iti nasinged a panaggayyem. Bayat a basbasaenyo dagiti salaysay iti Biblia maipapan kada Ruth ken Noemi, David ken Jonatan, ken da Pablo ken Timoteo, madlawyo nga adda nawaya ngem nadayaw a komunikasion dagiti nasayaat nga aggayyem. No maipapan iti umiso a pannakisarita iti sabsabali, insurat ni Pablo: “Ti panagsaoyo kankanayon koma a mabuyogan iti kinaparabur, natemplaan iti asin.” Espesipiko a tuktukoyen ni Pablo no kasanotayo a rumbeng a makisarita kadagidiay “adda iti ruar,” kayatna a sawen, dagiti saantay a kapammatian. (Col. 4:5, 6) No kasano a maikari iti panagraem dagiti saantay a kapammatian no makisaritatayo kadakuada, ad-adda pay koma kadagiti gagayyemtayo iti uneg ti kongregasion!
18, 19. Kasano ti rumbeng a panangmatmattayo no balakadannatayo ti Kristiano a gayyemtayo, ken ania ti matuladtayo kadagiti panglakayen iti Efeso?
18 Raemen dagiti nasayaat nga aggayyem ti kapanunotan ti tunggal maysa. Gapuna, masapul a naannad ngem prangka ti komunikasionda. Insurat ti masirib a ni Ari Solomon: “Ti lana ken insienso isuda ti mamagrag-o iti puso, kasta met ti kinasam-it ti kadua ti maysa maigapu iti pammatigmaan ti kararua.” (Prov. 27:9) Kasta kadi ti panangmatmatmo iti aniaman nga ibalakad kenka ti gayyemmo? (Basaen ti Salmo 141:5.) No palagipannaka maipapan iti maysa a banag nga ar-aramidem, ania ti reaksionmo? Matmatam kadi dayta kas ebkas ti naayat a kinamanangngaasina, wenno masairka?
19 Nasinged ni apostol Pablo kadagiti panglakayen iti kongregasion ti Efeso. Nalabit nga am-ammona ti dadduma kadakuada idi kabbaroda pay la a Kristiano. Ngem bayat ti maudi a pannakikaduana kadakuada, sipaprangka a binalakadanna ida. Ania ti reaksionda? Saanda a nasair. Imbes ketdi, inapresiarda ti pannakaseknanna kadakuada, ken nakasangitda pay gapu ta impagarupda a saandanton a makita ni Pablo.—Ara. 20:17, 29, 30, 36-38.
20. Ania ti aramiden ti naayat a gayyem?
20 Dagiti nasayaat nga aggayyem saanda laeng nga awaten no di ket ipaayda pay dagiti nainsiriban a balakad. Siempre, masapul nga ammotayo no kaano a biangan wenno ‘asikasuentayo ti bukodtayo nga aramid.’ (1 Tes. 4:11) Ken masapul met a bigbigentayo a tunggal maysa kadatayo ti “makikuentanto iti Dios maipaay iti bagina.” (Roma 14:12) Ngem no kasapulan, ti naayat a gayyem siaasi koma nga ipalagipna iti gayyemna dagiti pagalagadan ni Jehova. (1 Cor. 7:39) Kas pagarigan, ania ti aramidenyo no madlawyo a ti saan a kasado a gayyemyo ket nasinged iti maysa a saan a manamati? Saanyo ngata a palagipan gapu ta maamakkayo a masair ti gayyemyo? Wenno ania ti aramidenyo no dina ipangag ti balakadyo? Ti nasayaat a gayyem ket agpatulong kadagiti naayat a panglakayen tapno maatur ti gayyemna a nakaaramid iti biddut. Agkalikagum dayta iti kinatured. Ken uray masair ti gayyemyo, saan a madadael ti panaggayyemyo no naibatay dayta iti panagayat ken Jehova.
21. Ania ti maaramidtayo amin no dadduma, ngem apay a napateg a taginayonentayo ti natibker a pannakigayyem kadagiti kakabsat?
21 Basaen ti Colosas 3:13, 14. No dadduma, makaaramidtayo iti banag a ‘pakaigapuan ti reklamo’ kadatayo ti gayyemtayo, wenno isu ti mabalin a makaaramid wenno makaisawang iti makasair kadatayo. “Maitibkoltayo amin iti adu a daras,” insurat ni Santiago. (Sant. 3:2) Ngem ti pangrukodan iti panaggayyem ket saan a no kasano kasansan a makaaramidtayo iti biddut iti tunggal maysa no di ket no kasano kaan-anay ti panangpakawantayo kadagita a biddut. Anian a nagpateg a patibkerentayo ti pannakigayyemtayo babaen ti nawaya a komunikasion ken sidadaan a panangpakawan iti maysa ken maysa! No ipakitatayo ti kasta nga ayat, agserbi dayta a “naan-anay a singgalut ti panagkaykaysa.”
Ania ti Sungbatyo?
• Kasano a maaddaantayo kadagiti nasayaat a gagayyem?
• Kaano a masapul a gupdentayo ti pannakigayyemtayo?
• Ania ti masapul nga aramidentayo tapno mataginayontayo ti natibker a pannakigayyem?
[Ladawan iti panid 18]
Ania ti nakaibatayan ti natibker a panaggayyem da Ruth ken Noemi?
[Ladawan iti panid 19]
Kanayon kadi a mangipakpakitakayo iti kinamanagpadagus?