Jesús gengur á vatni

Jesús gat ekki bara læknað veika og reist dána til lífs aftur. Hann gat líka stjórnað vindinum og rigningunni. Jesús var búinn að vera að biðja uppi á fjalli. Þá horfði hann niður á Galíleuvatn og sá að það var kominn stormur. Postularnir voru í bátnum og voru að reyna að róa á móti vindinum. Jesús kom niður af fjallinu og gekk út á vatnið á móti bátnum. Postularnir urðu hræddir þegar þeir sáu einhvern koma gangandi á vatninu. En Jesús sagði: ‚Ekki vera hræddir. Þetta er ég.‘

Pétur sagði: ‚Drottinn, ef þetta er í alvörunni þú, segðu mér þá að koma til þín.‘ Jesús sagði við Pétur: ‚Komdu til mín.‘ Pétur steig út úr bátnum og labbaði í áttina til Jesú í storminum. En þegar hann kom nær honum fór hann að hugsa um storminn og varð hræddur. Hann fann að hann var byrjaður að sökkva. Pétur hrópaði: „Drottinn, bjargaðu mér!“ Jesús greip í höndina á honum og sagði: ‚Af hverju fórstu að efast? Ertu með svona litla trú?‘

Um leið og Jesús og Pétur stigu upp í bátinn hætti stormurinn. Hvernig heldurðu að postulunum hafi liðið? Þeir sögðu: ‚Þú ert í alvöru sonur Guðs.‘

Þetta var ekki í eina skiptið sem Jesús stjórnaði veðrinu. Einu sinni þegar Jesús og postularnir voru að sigla yfir vatnið fór Jesús að sofa aftast í bátnum. Það kom mikill stormur á meðan hann var sofandi. Öldurnar skullu yfir bátinn og hann var að fyllast af vatni. Postularnir vöktu Jesú og hrópuðu: ‚Kennari! Við erum að deyja. Hjálpaðu okkur!‘ Jesús fór á fætur og sagði við vatnið: „Þegiðu!“ Vindurinn hætti strax og vatnið varð slétt. Jesús spurði postulana: ‚Hafið þið enga trú?‘ Þeir sögðu hver við annan: ‚Meira að segja vindurinn og vatnið hlýða honum.‘ Postularnir lærðu að þeir þyrftu ekki að vera hræddir við neitt ef þeir treystu Jesú algjörlega.