ბიბლია — ჭეშმარიტების საიმედო წყარო

კაცობრიობის ისტორიის მანძილზე სხვადასხვა წარმოშობის ადამიანები ბიბლიას ჭეშმარიტების საიმედო წყაროდ მიიჩნევდნენ. დღეს მილიონები მიჰყვებიან ბიბლიის სწავლებებს. თუმცა არიან ისეთებიც, რომლებიც მას მოძველებულ წიგნად ან მითების კრებულად მიიჩნევენ. თქვენ რას ფიქრობთ, შესაძლებელია ბიბლიის მეშვეობით ჭეშმარიტების გაგება?

ᲠᲐᲢᲝᲛ ᲨᲔᲒᲘᲫᲚᲘᲐᲗ ᲔᲜᲓᲝᲗ ᲑᲘᲑᲚᲘᲐᲡ?

როგორ შეგიძლიათ დარწმუნდეთ, რომ ბიბლია ნამდვილად იმსახურებს თქვენს ნდობას? ალბათ, არ გაგიჭირდებათ ისეთი მეგობრის ნდობა, რომელსაც მრავალი წლის მანძილზე არასოდეს მოუტყუებიხართ. ჰგავს ბიბლია ასეთ სანდო მეგობარს, რომელიც ყოველთვის სიმართლეს გეუბნებათ? ვიმსჯელოთ რამდენიმე მხარეზე.

ბიბლია კეთილსინდისიერმა ადამიანებმა დაწერეს

ბიბლიის დამწერები კეთილსინდისიერი ადამიანები იყვნენ, რომლებიც საკუთარ სისუსტეებსა და შეცდომებს აღიარებდნენ. მაგალითად, წინასწარმეტყველმა იონამ საკუთარი ხელით დაწერა, როგორ ეურჩა ღმერთს (იონა 1:1—3). მან თავისი სახელით წოდებული წიგნი იმით დაასრულა, თუ როგორ შეაგონა ღმერთმა, მაგრამ საგულისხმოა, რომ საკუთარ თავზე ყურადღება არ გაუმახვილებია და საერთოდ არ უხსენებია, თავად როგორ შეიცვალა არასწორი თვალსაზრისი (იონა 4:1, 4, 10, 11). ბიბლიის დამწერთა გულახდილობა იმაზე მოწმობს, რომ მათ უყვარდათ ჭეშმარიტება.

პრაქტიკული ღირებულება აქვს

ბიბლია ყოველდღიურ ცხოვრებაში გამოსადეგ რჩევებს გვთავაზობს. მაგალითად, ყურადღება მიაქციეთ, რას ამბობს ღვთის სიტყვა იმის თაობაზე, თუ როგორ შევინარჩუნოთ სხვებთან ჯანსაღი ურთიერთობა: „ყველაფერში, როგორც თქვენ გინდათ, რომ მოგექცნენ სხვები, თქვენც ისევე მოექეცით მათ“ (მათე 7:12). „მშვიდი პასუხი სიბრაზეს აცხრობს, მწარე სიტყვა კი რისხვას იწვევს“ (იგავები 15:1). დიახ, ეს რჩევები დღესაც ისეთივე პრაქტიკულია, როგორც მაშინ, როცა პირველად ჩაიწერა ბიბლიაში.

ისტორიულად ზუსტია

წლების მანძილზე არაერთი არქეოლოგიური აღმოჩენის შედეგად დადასტურდა, რომ ბიბლიაში აღწერილი მოვლენები ნამდვილად მოხდა და მასში მოხსენიებული გეოგრაფიული ადგილები თუ ხალხები ნამდვილად არსებობდნენ. მაგალითად, ბიბლიაში ვკითხულობთ, რომ ერთ-ერთი დამწერის, ნეემიას დროს იერუსალიმში მცხოვრებ ტვიროსელებს (ფინიკიელები ტვიროსიდან) „მოჰქონდათ თევზი და სხვადასხვაგვარი საქონელი“ (ნეემია 13:16).

არსებობს ამ ბიბლიური მუხლის დამადასტურებელი რაიმე მტკიცებულება? რასაკვირველია. არქეოლოგებმა ისრაელის ტერიტორიაზე აღმოაჩინეს ფინიკიელთა სავაჭრო საქონლის ნარჩენები, რაც ადასტურებს, რომ ამ ორ უძველეს ერს შორის ვაჭრობა იყო გაჩაღებული. გარდა ამისა, გათხრების შედეგად იერუსალიმში აღმოჩენილ იქნა ხმელთაშუა ზღვაში მობინადრე თევზის ნაშთები. არქეოლოგების მტკიცებით, ეს თევზი ვაჭრებს ზღვის შორეული სანაპიროდან ჩამოჰქონდათ ისრაელის მიწაზე. ამ და სხვა მტკიცებულებების კარგად შესწავლის შემდეგ ერთმა ბიბლეისტმა ასეთი დასკვნა გააკეთა: „ნეემიას 13:16-ში ჩაწერილი სიტყვები, რომ ტვიროსელები იერუსალიმში თევზს ყიდდნენ, სიმართლეა“.

მეცნიერულად ზუსტია

მართალია, ბიბლია, ძირითადად, რელიგიური და ისტორიული წიგნია, მაგრამ მეცნიერებასთანაც სრულ თანხმობაშია. მოვიყვანოთ ამის დამადასტურებელი ერთი ფაქტი.

დაახლოებით 3 500 წლის წინათ ბიბლიაში ჩაიწერა, რომ დედამიწა არაფერზე ჰკიდია (იობი 26:7). ეს სრულიად განსხვავდებოდა იმ მითებისგან, რომ თითქოს დედამიწა წყალზე ტივტივებდა ან გიგანტურ კუზე იდგა. წიგნ „იობის“ დაწერიდან დაახლოებით 1 100 წლის შემდეგ ხალხს კვლავ დაუჯერებლად მიაჩნდა, რომ დედამიწა კოსმოსურ სივრცეში არაფერზე ეკიდა; მათ სჯეროდათ, რომ ის რაღაცას ეკავა. მხოლოდ ახ. წ. მე-17 საუკუნეში მოეფინა ამ საკითხს ნათელი. 1687 წელს ისააკ ნიუტონმა გამოაქვეყნა თავისი ნაშრომი, სადაც აღწერა მსოფლიო მიზიდულობა და ახსნა, რომ დედამიწა თავის ორბიტაზე უხილავი ძალის ზემოქმედებით რჩება. ამ მეცნიერულმა აღმოჩენამ დაადასტურა, რომ ის, რაც ბიბლიაში 3 000 წელზე მეტი ხნით ადრე ჩაიწერა, სრულიად შეესაბამება სინამდვილეს.