როგორ დავიწყოთ ბიბლიის შესწავლა მათთან, ვისაც ჟურნალებს ვუტოვებთ?
1. რა მიზანი გვაქვს, როდესაც ჟურნალებს ვავრცელებთ?
1 ჩვეულებრივ, შაბათობით ჩვენ „საგუშაგო კოშკსა“ და „გამოიღვიძეთ!“-ს ვავრცელებთ მსახურებაში. ამ დროს ჩვენ მხოლოდ პირველ ნაბიჯს ვდგამთ იმ მიზნის მისაღწევად, რომ გულწრფელ ადამიანებს ჭეშმარიტება ვასწავლოთ. ქვემოთ მოცემულია რამდენიმე რჩევა იმის თაობაზე, თუ როგორ დავუტოვოთ განმეორებითი მონახულების დროს მობინადრეს წიგნი „რას გვასწავლის ბიბლია?“ და როგორ დავიწყოთ ბიბლიის შესწავლა. ეს რჩევები შეგიძლია ისე გამოიყენო, რომ შეუსაბამო შენს ტერიტორიას და შეთავაზებები საკუთარი სიტყვებით გააკეთო. შეგიძლია სხვა ეფექტური შეთავაზებებიც გამოიყენო.
2. როგორ შეგვიძლია ბიბლიის შესწავლების დასაწყებად გამოვიყენოთ შესავალი ნაწილი წიგნიდან „რას გვასწავლის ბიბლია“?
2 გამოიყენე წიგნის შესავალი ნაწილი: განმეორებითი მონახულების დროს შეგიძლია თქვა: „ჟურნალები, რომლებიც დაგიტოვეთ, ყურადღებას ამახვილებს ბიბლიაზე. ყურადღება მიაქციეთ, თუ რატომ არის მნიშვნელოვანი ბიბლიის კითხვა“. წაიკითხე ესაიას 48:17, 18, იოანეს 17:3 ან სხვა შესაფერისი მუხლი. შემდეგ მობინადრეს უჩვენე წიგნი „რას გვასწავლის ბიბლია?“, ერთი ეგზემპლარი მიაწოდე მას და უთხარი:
◼ „ბიბლია მომავლის რეალურ იმედს გვაძლევს“. მობინადრეს წიგნიდან აჩვენე მე-4, მე-5 გვერდები და ჰკითხე: „ამ დაპირებებიდან რომლის შესრულებას ისურვებდით?“ უჩვენე მას ის თავი, სადაც განხილულია ბიბლიური დანაპირები, რომლითაც მობინადრე განსაკუთრებით დაინტერესდა და მოკლედ განიხილე მასთან ერთი ან ორი აბზაცი, თუ ის ამის საშუალებას მოგცემს.
◼ ან შეგიძლია თქვა: „ბიბლია პასუხობს ყველაზე მნიშვნელოვან კითხვებს, რაც ცხოვრებაში გვებადება“. აჩვენე მას მე-6 გვერდი და ჰკითხე, თუ დაბადებია ისეთი კითხვები, რომლებიც ამ გვერდის ბოლოშია მოცემული. წიგნში მოძებნე ის თავი, რომელიც პასუხობს ამ კითხვას და მოკლედ განიხილე ერთი ან ორი აბზაცი.
◼ ან შეგიძლია უჩვენო სარჩევიდან რამდენიმე სათაური და ჰკითხო, რომელი საკითხი აინტერესებს. შემდეგ გადაშალე ის თავი, რომელიც მან აირჩია და მოკლედ დაანახვე, როგორ ტარდება ბიბლიის შესწავლა.
3. როგორ შეგვიძლია ბიბლიის შესწავლის დაწყება იმ ჟურნალების დატოვების შემდეგ, რომლებშიც განხილულია შემდეგი საკითხები: ა) მსოფლიოში არსებული მდგომარეობის გაუარესება; ბ) ოჯახთან დაკავშირებული საკითხები; გ) სანდოა თუ არა ბიბლია?
3 წამოჭერი კითხვა პირველი მისვლისას: გარდა ამისა, პირველი მისვლისას ჩვენ შეგვიძლია საფუძველი ჩავუყაროთ განმეორებით მონახულებას. მას შემდეგ, რაც მობინადრე აიღებს ჟურნალებს, წამოჭერი კითხვა და დაჰპირდი, რომ ამ კითხვაზე მომდევნო მისვლისას გასცემ პასუხს. შეეცადე, რომ მისვლის ზუსტი დრო უთხრა და დანაპირები შეასრულო (მათ. 5:37). როდესაც მობინადრეს მიაკითხავ, შეახსენე მას წამოჭრილი კითხვა და მოკლედ ამოიკითხე და მიმოიხილე პასუხი წიგნიდან „რას გვასწავლის ბიბლია?“ მასაც მიეცი წიგნი, რომ თვალი ადევნოს. ქვემოთ მოცემულია რამდენიმე მაგალითი:
◼ თუ ჟურნალში, რომელიც მობინადრეს დაუტოვე, მსოფლიოში არსებული მდგომარეობის გაუარესების შესახებაა საუბარი, შეგეძლო გეთქვა: „შემდეგ შეხვედრაზე ბიბლიის საფუძველზე შეგვიძლია ვიმსჯელოთ, თუ რა ცვლილებებს მოახდენს ღმერთი დედამიწაზე“. როდესაც მობინადრეს მოინახულებ, გამოიყენე წიგნის მე-4 და მე-5 გვერდები. ან შეგეძლო დაგესვა ასეთი კითხვა: „ღვთის ნებით ხდება უბედურებები?“ შემდეგი მონახულებისას მობინადრეს უჩვენე 1-ლი თავის მე-7 და მე-8 აბზაცები.
◼ თუ ჟურნალში, რომელიც მობინადრეს დაუტოვე, ოჯახთან დაკავშირებული საკითხებია განხილული, წამოსვლის წინ შეგეძლო ასეთი კითხვა წამოგეჭრა: „როგორ შეუძლია ოჯახის თითოეულ წევრს ხელი შეუწყოს ოჯახურ ბედნიერებას?“ შემდეგი მონახულებისას მასთან ერთად განიხილე მე-14 თავის მე-4 აბზაცი.
◼ თუ ჟურნალი, რომელიც მობინადრეს დაუტოვე, განიხილავს საკითხს, სანდოა თუ არა ბიბლია, შეგეძლო წამოგეჭრა კითხვა: „ზუსტია ბიბლია მეცნიერულად?“ ეს საკითხი განიხილე განმეორებითი მონახულებისას და გამოიყენე მე-2 თავის მე-8 აბზაცი.
4. როგორ უნდა მოვიქცეთ, თუ მობინადრე უარს ამბობს შესწავლაზე წიგნიდან „რას გვასწავლის ბიბლია“?
4 ყოველი მონახულების ბოლოს წამოჭერი კითხვა, რომელსაც შემდეგი მისვლისას უპასუხებ. თუ ასეთი სახის შესწავლა სისტემატურ სახეს მიიღებს, ბიბლიის შესწავლა დაიწყე პირველი თავიდან თანმიმდევრულად წიგნით „რას გვასწავლის ბიბლია?“ როგორ უნდა მოიქცე, თუ მობინადრე უარს იტყვის ამ წიგნის შესწავლაზე? განაგრძე მასთან ჟურნალების მიტანა და ბიბლიური მუხლების განხილვა. თუ მის ინტერესს გააღვივებ, შეიძლება ის დროთა განმავლობაში შესწავლაზე დაგთანხმდეს.
5. რატომ უნდა ვეცადოთ, რომ უფრო მეტი გავაკეთოთ, ვიდრე მხოლოდ ის, რომ ჟურნალები დავუტოვოთ მობინადრეებს?
5 ჟურნალების „საგუშაგო კოშკისა“ და „გამოიღვიძეთ!“-ის კითხვამ შეიძლება ადამიანს იმის ინტერესი აღუძრას, თუ რას ასწავლის ბიბლია სინამდვილეში. ამიტომ, ძალისხმევა მოახმარე, რომ დაიწყო ბიბლიის შესწავლა მასთან, ვისაც ჟურნალებს უტოვებ. ამგვარად, ჩვენ დავემორჩილებით იესოს მითითებას, რომ ‘მოწაფეებად მოვამზადოთ ხალხი და ვასწავლოთ მათ’ (მათ. 28:19, 20).