ბიბლიის შესწავლები ადვილად შეიძლება დავიწყოთ მათთან, ვისთანაც რეგულარულად მიგვაქვს ჟურნალები
1. რატომ მოუწოდებს დიდი ხნის განმავლობაში იეჰოვას ორგანიზაცია მაუწყებლებს, რომ რეგულარულად მიუტანონ ჟურნალები ხალხს?
1 ბევრი, ვისაც ბიბლიის შესწავლა არ სურს, სიამოვნებით კითხულობს ჩვენს ჟურნალებს. სწორედ ამიტომ იეჰოვას ორგანიზაცია დიდი ხნის განმავლობაში მოუწოდებს მაუწყებლებს, რომ რეგულარულად მიუტანონ ჟურნალები ასეთ ადამიანებს. როდესაც ადამიანები რეგულარულად კითხულობენ ჩვენს ჟურნალებს, უფრო მეტად ესწრაფვიან ღვთის სიტყვას (1 პეტ. 2:2). დროის გასვლის შემდეგ შესაძლოა მათ წაკითხულმა ბიბლიის შესწავლის სურვილი აღუძრას.
2. როგორ გავუღვივოთ ინტერესი მათ, ვისთანაც რეგულარულად მიგვაქვს ჟურნალები?
2 „მორწყე“ ჭეშმარიტების თესლი. უბრალოდ ნუ მიუტან ჟურნალებს მობინადრეს, შეეცადე, საუბარში ჩააბა ის, რომ თქვენს შორის კარგი ურთიერთობა დამყარდეს. ეს დაგეხმარება, ჩასწვდე მის მდგომარეობას და გაიგო მისი ინტერესები, მრწამსი და შეხედულებები (იგავ. 16:23). მოემზადე თითოეული განმეორებითი მონახულებისთვის. თუ შესაძლებელია, საუბარში მოკლედ აღნიშნე შენ მიერ მიტანილ ჟურნალებში მოცემული კონკრეტული საკითხები და ამ საკითხებთან დაკავშირებული ბიბლიური მუხლები; ამგვარად „მორწყავ“ მის გულში ჩათესილ ჭეშმარიტების თესლს (1 კორ. 3:6). ჩაიწერე, როდის მოინახულე მობინადრე, რა ლიტერატურა დაუტოვე და რომელ საკითხებზე და რომელ ბიბლიურ მუხლებზე ესაუბრე.
3. რამდენად ხშირად უნდა მოვინახულოთ ისინი, ვისთანაც რეგულარულად მიგვაქვს ჟურნალები?
3 რამდენად ხშირად უნდა მოინახულო? როცა ვინმესთან რეგულარულად მიგვაქვს ჟურნალები, მას, როგორც წესი, თვეში ერთხელ ვაკითხავთ. თუმცა ჩვენი მდგომარეობიდან და მობინადრის ინტერესებიდან გამომდინარე, შეგვიძლია მას უფრო ხშირადაც მივაკითხოთ. მაგალითად, შეგვიძლია ჟურნალების დატოვებიდან ერთ ან ორ კვირაში შევუაროთ და ასეთი რამ ვუთხრათ: „ცოტა ხნით შემოგირბინეთ. იმ ჟურნალებში, წინაზე რომ დაგიტოვეთ, რაღაც საკითხებზე მინდოდა ორი სიტყვა მეთქვა“. ეს მას მადას აღუძრავს რომელიმე კონკრეტული სტატიის წასაკითხად. ხოლო იმ შემთხვევაში, თუ აღმოჩნდა, რომ წაკითხული აქვს ის სტატია, რომელზედაც ჩვენ გვსურდა ყურადღების გამახვილება, შეგვიძლია გავიგოთ მისი აზრი წაკითხულზე და ამგვარად მოკლედ მიმოვიხილოთ ის. თუ მობინადრე დიდი სიამოვნებით კითხულობს ჩვენს ლიტერატურას, შეგვიძლია მას იმ თვეში გასავრცელებელი ტრაქტატი, ბროშურა ან წიგნიც მივუტანოთ.
4. რის გაკეთება შეგვიძლია დროდადრო იმის გასაგებად, სურს თუ არა ადამიანს ბიბლიის შესწავლის დაწყება?
4 ნუ დაელოდები იმ დროს, როცა მობინადრე თავად გამოთქვამს ბიბლიის შესწავლის სურვილს. გამოიჩინე ინიციატივა. იმის მიუხედავად, ადრე უარი გითხრა თუ არა მან ბიბლიის შესწავლაზე, დროდადრო შეგიძლია შესთავაზო ჟურნალ „საგუშაგო კოშკში“ მოცემული რუბრიკის „პასუხები ბიბლიურ კითხვებზე“ განხილვა. ბიბლიის შესწავლა შეიძლება კართან დავიწყოთ. მაგრამ, თუ ბიბლიის შესწავლას ვერ ვიწყებთ, კარგი იქნება, რომ ინტერესის გასაღვივებლად არ შევწყვიტოთ მისთვის ჟურნალების მიტანა.