ღირსეული მიზანი ახალი სამსახურებრივი წლისთვის
1. რა მიზნის დასახვა შეგვიძლია ახალი სამსახურებრივი წლისთვის?
1 თუ გვსურს, რომ სულიერად წინ წავიწიოთ, მიზნები უნდა დავისახოთ. რა მიზნებს ისახავ ახალი სამსახურებრივი წლისთვის? ერთ-ერთი შესანიშნავი მიზანი ის იქნებოდა, თუ ერთი ან მეტი თვის განმავლობაში დამხმარე პიონერად იმსახურებდი. რამდენადაც ასეთი სასიხარულო მსახურება, ჩვეულებრივ, წინასწარ დაგეგმვას საჭიროებს, სწორედ ახლავე უნდა დაიწყო ფიქრი ამაზე. რატომ უნდა დავისახოთ მიზნად დამხმარე პიონერად მსახურება?
2. რა მიზეზები გვაქვს იმისთვის, რომ დამხმარე პიონერად ვიმსახუროთ?
2 რატომ ღირს დამხმარე პიონერად მსახურება? დამხმარე პიონერად მსახურება საშუალებას გვაძლევს, უფრო მეტი დრო დავუთმოთ მსახურებას და, ამგვარად, „უფრო სრულად“ ვასიამოვნოთ ჩვენს ზეციერ მამას (1 თეს. 4:1). როდესაც ვფიქრობთ იმ ყოველივეზე, რასაც იეჰოვა ჩვენთვის აკეთებს, გული აღგვძრავს, რომ სხვებსაც ვესაუბროთ მის შესახებ (ფსალმ. 34:1, 2). იეჰოვა ხედავს და აფასებს იმ მსხვერპლს, რასაც თითოეული ვიღებთ იმისთვის, რომ მეტი გავაკეთოთ მსახურებაში (ებრ. 6:10). გვახარებს იმის ცოდნა, რომ იეჰოვას სიამოვნებს ჩვენი თავდაუზოგავი მსახურება (1 მატ. 29:9).
3, 4. რით არის ჩვენთვის სასარგებლო დამხმარე პიონერად მსახურება?
3 ჩვეულებრივ, რაც უფრო ხშირად აკეთებ რაიმე საქმეს, უფრო გიადვილდება მისი კეთება და ის შენთვის უფრო სასიამოვნოც ხდება. რაც უფრო მეტ დროს დაუთმობ მსახურებას, კარდაკარ უფრო დაჯერებულად იგრძნობ თავს, უფრო მეტად დახელოვნდები საუბრის დაწყებაში და ბიბლიასაც უფრო ეფექტურად გამოიყენებ. რწმენა მით უფრო გაგიძლიერდება, რაც უფრო ხშირად ისაუბრებ მასზე. ბევრმა, ვისაც ადრე ბიბლიის შესწავლა არ ჰქონდა, დამხმარე პიონერად მსახურების დროს შეძლო ბიბლიის შესწავლის დაწყება.
4 თუ გრძნობ, რომ შენი მსახურება ერთფეროვანი გახდა, დამხმარე პიონერობა გამოგაცოცხლებს და ხალისს შეგმატებს. ერთი ძმა, რომელსაც შეწყვეტილი ჰქონდა პიონერული მსახურება, მიხვდა, რომ ძალიან დიდ დროს უთმობდა სამსახურს, და გადაწყვიტა, ერთი თვე მაინც ემსახურა დამხმარე პიონერად. მან თქვა: „ვერც კი წარმოვიდგენდი, თუ ეს ერთი თვე ასე გამაძლიერებდა სულიერად! გადავწყვიტე, რომ განუსაზღვრელი დროით მემსახურა დამხმარე პიონერად, რისი წყალობითაც კვლავ დავიწყე პიონერად მსახურება“.
5. როგორ შეგვიძლია დავძლიოთ ის გრძნობა, თითქოს მზად არა ვართ დამხმარე პიონერობისთვის?
5 ხელის შემშლელი ფაქტორების დაძლევა: ზოგი ვერ ბედავს დამხმარე პიონერად მსახურების დაწყებას, რადგან თვლის, რომ არც ისე კარგი მქადაგებელია. თუ შენც ამის გამო იკავებ თავს მსახურების დაწყებისგან, იეჰოვა ისევე დაგეხმარება, როგორც იერემიას დაეხმარა (იერ. 1:6—10). მიუხედავად იმისა, რომ მოსე „ბაგემძიმე და ენამძიმე“ იყო, იეჰოვამ ის თავისი ნების შესასრულებლად გამოიყენა (გამ. 4:10—12). თუ ფიქრობ, რომ მზად არა ხარ დამხმარე პიონერად მსახურებისთვის, სთხოვე იეჰოვას, გაბედულება შეგმატოს.
6. როგორ არის შესაძლებელი დამხმარე პიონერად მსახურება სუსტი ჯანმრთელობისა თუ გადატვირთული განრიგის მიუხედავად?
6 სუსტი ჯანმრთელობის ან გადატვირთული განრიგის გამო ხომ არ ამბობ უარს დამხმარე პიონერობაზე? თუ სუსტი ჯანმრთელობა გაქვს, დამხმარე პიონერად მსახურების დაწყებაში დაგეხმარება ისეთი გეგმის შედგენა, რომელიც არ გადაგტვირთავს. თუ ძალიან დაკავებული ხარ, შენ შეგიძლია თვალი გადაავლო შენს განრიგს და ზოგი ნაკლებად მნიშვნელოვანი საქმე შემდეგ თვეში გადადო. ზოგმა, ვინც სრულ განაკვეთზე მუშაობს, დამხმარე პიონერობისთვის დრო იმით გამოისყიდა, რომ ერთი ან ორი დღე შვებულება აიღო (კოლ. 4:5).
7. რატომ უნდა ვილოცოთ რეგულარულად დამხმარე პიონერად მსახურების თაობაზე?
7 რა დაგეხმარება დამხმარე პიონერად მსახურებაში? ლოცვით მიმართე იეჰოვას და სთხოვე, რომ აკურთხოს შენი ძალისხმევა, რათა იმსახურო დამხმარე პიონერად (რომ. 12:11, 12). ის დაგეხმარება, რომ გონივრული ცვლილებები შეიტანო შენს განრიგში (იაკ. 1:5). თუ მაინცდამაინც არ გსურს დამხმარე პიონერად მსახურება, სთხოვე იეჰოვას, რომ სიხარული პოვო სამქადაგებლო საქმიანობაში (ლუკ. 10:1, 17).
8. როგორ შეიძლება დაგეხმაროს იგავების 15:22 დამხმარე პიონერად მსახურების დაწყებაში?
8 ოჯახმა ერთად იმსჯელეთ დამხმარე პიონერად მსახურების მიზანზე (იგავ. 15:22). შესაძლოა ოჯახის წევრთა მხარდაჭერით ერთმა მაინც შეძლოს დამხმარე პიონერად მსახურება. შენს მიზანზე ისაუბრე კრების წევრებთან, განსაკუთრებით კი მათთან, ვისაც ისეთივე მდგომარეობა აქვს, როგორიც შენ. ამან შეიძლება უფრო გააღვივოს შენში დამხმარე პიონერად მსახურების სურვილი.
9. რომელ თვე(ებ)ში შეგიძლია დამხმარე პიონერად მსახურება?
9 გადახედე შენს თეოკრატიულ კალენდარს და დაფიქრდი, როდის შეძლებდი ახალ სამსახურებრივ წელს დამხმარე პიონერად მსახურებას. თუ სრულ განაკვეთზე მუშაობ ან სკოლაში სწავლობ, შეიძლება ისეთი თვეები აარჩიო, რომლებშიც დასვენების დღეებია ან ხუთი შაბათი და კვირაა. მაგალითად, სექტემბერში, დეკემბერში, მარტსა და აგვისტოში ხუთი შაბათ-კვირაა. რაც შეეხება სხვა თვეებს, მაისში ხუთი შაბათია, ივნისში კი ხუთი კვირაა. თუ სუსტი ჯანმრთელობა გაქვს, მსახურებისთვის ისეთი თვეები შეარჩიე, როდესაც, ჩვეულებრივ, კარგი ამინდებია. ან შეიძლება დამხმარე პიონერად მსახურება იმ დროს დაგეგმო, როდესაც სარაიონო ზედამხედველი მოინახულებს თქვენს კრებას. გახსენების საღამო მომავალ წელს 22 მარტს აღინიშნება, ამიტომ მარტი, აპრილი და მაისი შესანიშნავი დროა დამხმარე პიონერად მსახურებისთვის. თუ უკვე გადაწყვიტე, რომელ თვე(ებ)ში იმსახურებ დამხმარე პიონერად, დაიწყე გეგმის შედგენა, რომელიც დაგეხმარება საათების ნორმის შესრულებაში.
10. რისი გაკეთება შეგიძლია, თუ დამხმარე პიონერად ვერ მსახურობ?
10 მაშინაც კი, თუ ფიქრობ, რომ ახალ სამსახურებრივ წელს ვერ შეძლებ დამხმარე პიონერად მსახურებას, შენ ის მაინც შეგიძლია, რომ პიონერული სული შეინარჩუნო. შეძლებისდაგვარად კვლავაც ყველაფერი აკეთე მსახურებაში. გჯეროდეს, იეჰოვას მოსწონს, როდესაც ხედავს, რომ ძალისხმევას არ იშურებ მის მსახურებაში (გალ. 6:4). მხარი დაუჭირე და გაამხნევე ისინი, ვისაც დამხმარე პიონერად მსახურება შეუძლია. შენს განრიგში, შესაძლოა, ცვლილებები შეიტანო და ყოველკვირა დამატებითი დრო გამოყო მსახურებისთვის, რათა მათთან ერთად ითანამშრომლო, ვინც დამხმარე პიონერად მსახურობს.
11. რატომ არის საჭირო გადაუდებელი მოქმედება?
11 იეჰოვას ხალხს ესმის, რომ დაუყოვნებელი მოქმედებაა საჭირო. სასიხარულო ცნობის ქადაგების საქმე ჯერ კიდევ შესასრულებელია. ადამიანების სიცოცხლე საფრთხეშია და დროც იწურება (1 კორ. 7:29—31). ღვთისა და მოყვასისადმი სიყვარული აღგვძრავს, რომ ყველაფერი გავაკეთოთ მსახურებაში. თუ ძალ-ღონეს არ დავიშურებთ და კარგ გეგმას შევადგენთ, შესაძლოა ახალ სამსახურებრივ წელს ერთი თვე მაინც შევძლოთ დამხმარე პიონერებად მსახურება — ეს კი მართლაც ღირსეული მიზანია!