სამქადაგებლო მსახურების შეხვედრები
1. რატომ გავდივართ სამქადაგებლო მსახურებაში ორგანიზებულად?
1 იესო საუკეთესოდ უწევდა ორგანიზებას სამქადაგებლო საქმიანობას, რითაც შესანიშნავი მაგალითი დაგვიტოვა. სამქადაგებლო მსახურებაზე პასუხისმგებელი ძმები ყოველმხრივ ცდილობენ მიჰყვნენ იესოს მაგალითს. მთელ მსოფლიოში არსებულ კრებებში ტარდება სამქადაგებლო მსახურების შეხვედრები, რათა ორგანიზება გაეწიოს ჯგუფურ ქადაგებას (მათ. 24:45—47; 25:21; ლუკ. 10:1—7).
2. როგორ უნდა ჩატარდეს სამქადაგებლო მსახურების შეხვედრა?
2 შესანიშნავი ღონისძიება: სამქადაგებლო მსახურების შეხვედრაზე ღვთის მსახურები იღებენ გამხნევებას და ეძლევათ პრაქტიკული მითითებები, თუ როგორ იქადაგონ ეფექტურად და რა რჩევები გამოიყენონ მსახურებაში. ამ შეხვედრაზე შეიძლება მოკლედ იყოს განხილული ყოველდღიური მუხლი, თუ მასში მოცემული რჩევები სამქადაგებლო მსახურებაში იქნება დამხმარე. ზოგჯერ მქადაგებლებისთვის სასარგებლო იქნება, თუ ძმა განიხილავს რჩევებს ისეთი პუბლიკაციებიდან, როგორიცაა „ჩვენი სამეფო მსახურება“, „მსჯელობა“ ან „თეოკრატიული მსახურების სკოლა“, რათა ეფექტურად დაამოწმონ იმ დღეს. აგრეთვე შესაძლებელია მოკლე ინსცენირების გაკეთება იმ პუბლიკაციიდან, რომელსაც მაუწყებლები იმ დღეს გაავრცელებენ. სანამ შეხვედრა დამთავრდება ლოცვით, ყველამ უნდა იცოდეს, ვისთან გავა მსახურებაში და რომელ ტერიტორიაზე იქადაგებს. შეხვედრა არ უნდა გაგრძელდეს 15 წუთზე მეტხანს. მისი დამთავრების შემდეგ მაუწყებლები მალევე უნდა გავიდნენ მსახურებაში.
3. ვინ არიან პასუხისმგებლები სამქადაგებლო მსახურების შეხვედრის ჩატარებაზე?
3 ვინ უწევს ორგანიზებას სამქადაგებლო შეხვედრებს? სამსახურებრივი ზედამხედველი ორგანიზებას უწევს სამქადაგებლო მსახურების შეხვედრებს. ჯგუფის ზედამხედველი ან მისი დამხმარე ჯგუფთან ერთად უნდა გავიდეს შაბათ-კვირას მსახურებაში. ზოგმა ზედამხედველმა ან მომსახურემ შეიძლება მოახერხოს ჯგუფთან ერთად შუა კვირაში ქადაგება. ჯგუფის ზედამხედველი თანამშრომლობს სამსახურებრივ ზედამხედველთან, რომ საკმარისი უბნები ჰქონდეთ შაბათ-კვირას კარდაკარ მსახურებისთვის. სამსახურებრივი ზედამხედველი გაანაწილებს ძმებს, რომ ისინი კვირის განმავლობაში ჯგუფთან ერთად გავიდნენ მსახურებაში.
4—6. ა) რატომ უნდა ტარდებოდეს სამქადაგებლო მსახურების შეხვედრები კრებისთვის მოსახერხებელ ადგილას? ბ) რა დაგეხმარებათ იმის განსაზღვრაში, სად და როდის ჩაატაროთ მსახურების შეხვედრები?
4 სად და როდის უნდა ჩატარდეს შეხვედრები? ნაცვლად იმისა, რომ სამქადაგებლო მსახურების შეხვედრები ყოველთვის ერთ ადგილზე ჩატარდეს, უკეთესია შეირჩეს მოსახერხებელი ადგილები, მაგალითად კერძო სახლები, საიდანაც ადვილი იქნება კრების უბნების დამუშავება. ამ მიზნისთვის სამეფო დარბაზის გამოყენებაც შეიძლება. მრავალი კრება საჯარო მოხსენებისა და „საგუშაგო კოშკის“ შესწავლის დამთავრებისთანავე სამეფო დარბაზში ატარებს მსახურების შეხვედრას. ყველანაირად უნდა ეცადოთ, შეხვედრების ჩასატარებლად ისეთი ადგილი შეარჩიოთ, რომ უბნებზე მისასვლელად დრო დაზოგოთ. დროდადრო განხილული უნდა იყოს, რამდენად მოსახერხებელია უბნების დასამუშავებლად ის ადგილები, სადაც შეხვედრები ტარდება.
5 მსახურების შეხვედრების ჩასატარებლად საუკეთესო დრო უნდა შეირჩეს. კრების ტერიტორიაზე არსებული სიტუაციის შესაბამისად უნდა განისაზღვროს კვირის ან დღის განმავლობაში რამდენჯერ შეიძლება შეხვედრების ჩატარება. შემდეგ აბზაცში მოყვანილი კითხვები დაგეხმარებათ, განსაზღვროთ, სად და როდის ჩაატაროთ მსახურების შეხვედრები.
6 რომელ უბნებს სჭირდება უფრო მეტად დამუშავება? რომელია კარდაკარ მსახურებისთვის საუკეთესო დრო? საღამოს საათებში კარდაკარ ქადაგება უფრო პრაქტიკულია თუ განმეორებითი მონახულება? სამქადაგებლო მსახურებასთან დაკავშირებული ნებისმიერი სიახლე კრების საინფორმაციო დაფაზე უნდა გამოაკრათ. თითოეულმა მაუწყებელმა ისე გულმოდგინედ უნდა დავამუშაოთ უბნები, რომ პავლე მოციქულის მსგავსად ვთქვათ: „აღარ დამრჩა . . . ისეთი ადგილი, სადაც არ მიქადაგია“ (რომ. 15:23).
7. რა პასუხისმგებლობა ეკისრება შეხვედრის ჩამტარებელს?
7 როგორ უნდა ჩატარდეს სამქადაგებლო მსახურების შეხვედრა? ვისაც ამ შეხვედრის ჩატარება დაევალება, კარგად უნდა მოემზადოს, რადგან ამით პატივისცემას გამოავლენს ამ თეოკრატიული ღონისძიებისადმი. შეხვედრა თავის დროზე უნდა დაიწყოს და 10-15 წუთი გაგრძელდეს. მასზე განხილული უნდა იყოს ისეთი აზრები, რომლებიც მაუწყებლებს მსახურებაში გამოადგებათ. ჩამტარებელს შეხვედრის დაწყებამდე უნდა ჰქონდეს უბნები, რომლებსაც ჯგუფი დაამუშავებს. აუცილებელი არ არის, შეხვედრის დამთავრების შემდეგ დაელოდოთ მათ, ვინც აგვიანებს მოსვლას, თუმცა შეიძლება კარგი იყოს, შეატყობინოთ, სად იქადაგებს ჯგუფი. შეხვედრის დასრულების შემდეგ ყველა დროულად უნდა წავიდეს თავის უბანზე. კარგად ორგანიზებული და ნაყოფიერი შეხვედრა უდავოდ დაეხმარება დამსწრეებს, რომ შეასრულონ მსახურება (იგავ. 11:14).
8. როგორ შეუძლიათ მაუწყებლებს ითანამშრომლონ შეხვედრის ჩამტარებელთან?
8 დაესწარი მსახურების შეხვედრას: თანამშრომლობა ძალიან მნიშვნელოვანია (ებრ. 13:17). რამდენადაც შესაძლებელია, შეხვედრის ჩამტარებელი დაეხმარება ნებისმიერს, ვისაც მსახურებაში მხარდაჭერა სჭირდება. კარგი იქნება, თუ გამოცდილი მაუწყებლები დაესწრებიან სამქადაგებლო შეხვედრას და ითანამშრომლებენ ახლებთან ან ნაკლებად გამოცდილებთან. თუ დროდადრო ისე იქნება, რომ გამოცდილები მათთან ერთად წავლენ მსახურებაში, ვისთანაც არ ყოფილან, ეს კარგ შედეგებს გამოიღებს (იგავ. 27:17; რომ. 15:1, 2). ყველა უნდა შეეცადოს, რომ პუნქტუალური იყოს. ამ თეოკრატიული ღონისძიებისა და და-ძმებისადმი პატივისცემა აღგვძრავს, ამ მხრივ საჭირო ცვლილებები მოვახდინოთ (2 კორ. 6:3, 4; ფილ. 2:4).
9. როგორ შეუძლიათ პიონერებს, მხარი დაუჭირონ სამქადაგებლო შეხვედრას?
9 პიონერებისგან მხარდაჭერა: სამქადაგებლო მსახურების შეხვედრაზე პიონერების დასწრება ძალიან გამამხნევებელია ყველასთვის. უდავოა, რომ პიონერებს ბევრი პასუხისმგებლობა აკისრიათ. ბიბლიის შესწავლების ჩატარებისა და განმეორებითი მონახულებების გაკეთების გარდა, მათ შეიძლება ყოველდღე უწევთ ოჯახზე ზრუნვა და მუშაობა. ამიტომ არ უნდა მოველოდეთ, რომ პიონერები მსახურების ყველა შეხვედრას დაესწრებიან, განსაკუთრებით, თუ ასეთი შეხვედრები ყოველდღე ტარდება. და მაინც, პიონერები ალბათ შეძლებენ, რომ ყოველკვირა მსახურების რამდენიმე შეხვედრას მაინც დაესწრონ. სამქადაგებლო მსახურების შეხვედრები გარკვეულწილად კრების მაუწყებლების სწავლებასა და სულიერ გაძლიერებას ემსახურება, ამიტომ პიონერების გამოცდილება დიდად დაეხმარება მათ. რეგულარული ქადაგებით ისინი დიდ გამოცდილებას იძენენ, რაც სხვებისთვისაც დამხმარე იქნება. მსახურებაში გულმოდგინე მონაწილეობით და სამქადაგებლო შეხვედრებზე დასწრებით ისინი მისაბაძ მაგალითს აძლევენ სხვებს. შეხვედრებზე პიონერების დასწრება ძალიან დასაფასებელია.
10. რატომ უნდა დაესწროს შეძლებისდაგვარად სამეფოს ყველა მაუწყებელი სამქადაგებლო შეხვედრებს?
10 ისევე, როგორც იესოსა და მისი მოწაფეების შემთხვევაში იყო, სამეფოს შესახებ ცნობის ქადაგების საქმე ძირითადად კარდაკარ მსახურებით სრულდება. სამქადაგებლო მსახურების შეხვედრა ამხნევებს და-ძმებს და ქადაგების ეფექტურ საშუალებას წარმოადგენს. რამდენადაც შესაძლებელია, სამეფოს ყველა მაუწყებელმა ამ თეოკრატიულ ღონისძიებას მხარი უნდა დაუჭიროს (საქ. 5:42; 20:20). კარგი იქნება, თუ საჭირო ცვლილებებს მოვახდენთ და დავესწრებით მსახურების შეხვედრებს. თუ ასე მოვიქცევით და ღვთის სამეფოს შესახებ სასიხარულო ცნობას ვიქადაგებთ, იეჰოვა უხვად გვაკურთხებს და ჩვენს წინამძღოლს, იესო ქრისტეს გულს გავუხარებთ (მათ. 25:34—40; 28:19, 20).