გამოიყენე პრაქტიკული მიდგომა
1. რა შეგვიძლია ვისწავლოთ იქიდან, თუ როგორ მიდგომებს იყენებდნენ პირველი ქრისტიანები?
1 პირველი ქრისტიანები სასიხარულო ცნობას გადასცემდნენ სხვადასხვა კულტურისა და რელიგიის ადამიანებს (კოლ. 1:23). ცნობა, რომელსაც ისინი გადასცემდნენ, იყო ერთი და იგივე — ცნობა სამეფოს შესახებ, მაგრამ მათი მიდგომა განსხვავდებოდა იქიდან გამომდინარე, თუ ვინ იყო მსმენელი. მაგალითად, როცა პეტრე იუდეველების წინაშე წარდგა, მან თემა იოელის წინასწარმეტყველების ციტირებით დაიწყო, ვინაიდან ისინი დიდ პატივს სცემდნენ წმინდა წერილებს (საქ. 2:14—17). მაგრამ პავლემ ბერძნებთან საუბრისას სულ სხვა მიდგომა გამოიყენა, როგორც ეს საქმეების 17:22—31-შია ჩაწერილი. დღეს ზოგან ხალხი აფასებს წმინდა წერილებს და ჩვენ თავისუფლად შეგვიძლია ბიბლიის გამოყენება კარდაკარ მსახურებისას. მაგრამ წინდახედულება გვმართებს, როდესაც ვსაუბრობთ მათთან, ვისაც არ აინტერესებს ბიბლია ან რელიგია, ან არ არის ქრისტიანული რელიგიის მიმდევარი.
2. როგორ შევთავაზოთ ლიტერატურა მათ, ვინც აფასებს ბიბლიას და მათ, ვინც არ აფასებს მას?
2 გამოიყენე ლიტერატურა უფრო ეფექტურად. ამ სამსახურებრივი წლიდან გასავრცელებელი ლიტერატურა ყოველ ორ თვეში შეიცვლება და განსაკუთრებული ყურადღება გამახვილდება ჟურნალების, ტრაქტატებისა და ბროშურების გავრცელებაზე. თუ ჩვენს ტერიტორიაზე ხალხს არ აინტერესებს ბიბლია, შეგვიძლია მისთვის საინტერესო თემაზე შევთავაზოთ პუბლიკაცია. თუ პირველივე მონახულებისას არ წავიკითხავთ მუხლს ან საერთოდ არ ვახსენებთ ბიბლიას, მაგრამ მობინადრე გამოავლენს ინტერესს, კარგი იქნება, თუ განმეორებითი მონახულებისას მიზნად დავისახავთ, დავეხმაროთ მობინადრეს, განივითაროს რწმენა შემოქმედისა და მისი შთაგონებული სიტყვისადმი. ხოლო თუ მათთან ვქადაგებთ, ვინც ღვთის სიტყვას აფასებს, შეგვიძლია გამოვიყენოთ შესაფერისი ლიტერატურა და მიდგომა. არ აქვს მნიშვნელობა, რა პუბლიკაცია ვრცელდება იმ თვეს, ნებისმიერ დროს შეგვიძლია შევთავაზოთ წიგნი „რას გვასწავლის ბიბლია?“ ან ბროშურები „მოუსმინეთ ღმერთს“ და „მოუსმინეთ ღმერთს და იცხოვრეთ მარადიულად“. ჩვენი მიზანია, გამოვიყენოთ მიდგომა, რომელიც უფრო ეფექტური იქნება.
3. რა გაგებით ჰგავს ჩვენს ტერიტორიაზე მცხოვრები ადამიანების გულები ნიადაგს?
3 მოამზადე ნიადაგი. ადამიანის გული ჰგავს ნიადაგს (ლუკ. 8:15). ზოგიერთ „ნიადაგს“ მეტი მომზადება სჭირდება, სანამ ბიბლიური ჭეშმარიტების მარცვალი ფესვს გაიდგამს და გაიზრდება. პირველი საუკუნის მქადაგებლები თესლს წარმატებით თესავდნენ ყველანაირ ნიადაგში, რასაც მათთვის კმაყოფილება და სიხარული მოჰქონდა (საქ. 13:48, 52). ჩვენც მივაღწევთ მსგავს წარმატებებს, თუ ვიფიქრებთ ჩვენს მიდგომებზე.