მალქია

[ჩემი მეფე იეჰოვაა].

1. ლევიანი; გერშომის შთამომავალი და მგალობელი ასაფის წინაპარი (1მტ. 6:39—43).

2. აარონის შთამომავალი; დავითის მიერ დაყენებული მღვდლების 24 დანაყოფიდან მეხუთის ხელმძღვანელი (1მტ. 24:1, 9).

3. მღვდელი; ფაშხურის მამა (1მტ. 9:12; ნემ. 11:12; იერ. 21:1; 38:1).

4. „მეფის ძე“, რომლის ჭაშიც იერემია ჩააგდეს (იერ. 38:6). როგორც ჩანს, ის „მეფის ძედ“ იმიტომ კი არ მოიხსენიება, რომ მეფის უშუალო შთამომავალს წარმოადგენდა, არამედ იმიტომ, რომ სამეფო კართან დაახლოებული პირი ან სამეფო კარის დიდგვაროვანი მოხელე იყო (იხ. იერახმეელი №3).

5. ისრაელი; ფაროშის ძე; ეზრას თანამედროვე, რომელმაც უცხოელი ცოლი გაუშვა (ეზრ. 10:25, 44).

6. ფაროშის კიდევ ერთი ძე, რომელმაც უცხოელი ცოლი გაუშვა (ეზრ. 10:25, 44). სეპტუაგინტაში სახელ „მალქიას“ ნაცვლად „ხაშაბია“ წერია.

7. ისრაელი; ხარიმის ძე; ეზრას თანამედროვე, რომელმაც თავისი უცხოელი ცოლი ვაჟებთან ერთად გაუშვა (ეზრ. 10:31, 44).

8. ისრაელი; ხარიმის ძე; ბაბილონის ტყვეობიდან დაბრუნებულმა ხაშუბთან ერთად იერუსალიმის გალავნის ერთი ნაწილი და საცხობ ღუმელთა კოშკი აღადგინა (ნემ. 3:11). შესაძლოა იგივე №7.

9. რექაბის ვაჟი; ბეთ-ჰაქერემის ოლქის მთავარი, რომელმაც ნეემიას გამგებლობის დროს ნაცრის კარიბჭე აღადგინა (ნემ. 3:14).

10. ოქრომჭედელთა ამქრის წევრი, რომელმაც ნეემიას გამგებლობის დროს იერუსალიმის გალავნის გარკვეული ნაწილი აღადგინა (ნემ. 3:31).

11. მღვდელი, რომელიც ეზრას მარჯვნივ იდგა, როცა იგი აღდგენილ იერუსალიმში ისრაელებს მოსეს კანონს უკითხავდა (ნემ. 8:4).

12. მღვდელი ან იმ კაცის წინაპარი, რომელმაც ბეჭდის დასმით დაადასტურა ნეემიას გამგებლობის დროს დადებული „მტკიცე შეთანხმება“ (ნემ. 9:38—10:3).

13. მღვდელი, რომელიც მონაწილეობას იღებდა ნეემიას ხელმძღვანელობით აღდგენილი იერუსალიმის გალავნის მიძღვნის აღსანიშნავად გამართულ ღონისძიებაში (ნემ. 12:40—42). შესაძლოა იგივე №11.