ურია

[ჩემი სინათლეა იეჰოვა].

1. ბათ-შებას ხეთელი ქმარი. დავითის უცხოტომელი მეომარი (2სმ. 23:39; 1მტ. 11:41). მისი სიტყვა თუ საქმე და ის ფაქტი, რომ ებრაელ ქალზე დაქორწინდა და იერუსალიმში მეფის სასახლის ახლოს ცხოვრობდა, იმაზე მიუთითებს, რომ ის იეჰოვას თაყვანისმცემელი, წინადაცვეთილი პროზელიტი იყო (2სმ. 11:3, 6—11).

როცა ურია რაბაში ამონელებს ებრძოდა, დავითმა მის ცოლთან, ბათ-შებასთან იმრუშა. ამის შემდეგ დავითმა ურია იერუსალიმში მოაყვანინა, ბრძოლის ამბავი გამოჰკითხა და სახლში ცოლთან გაუშვა, რათა ისეთი შთაბეჭდილება შექმნილიყო, რომ ბათ-შება ქმრისგან დაფეხმძიმდა. მაგრამ ურიამ შინ წასვლაზე უარი თქვა, რადგან ისრაელის ჯარი ველად ეგულებოდა (კნ. 23:9—11; შდრ. 1სმ. 21:5). ის შინ არც მაშინ წასულა, როცა დავითმა დაათრო (2სმ. 11:1—13). დავითმა ესეც არ იკმარა და ურია ბრძოლის ველზე დააბრუნა, თან იოაბთან წერილი გაატანა, რომელშიც ეწერა, რომ იოაბს ურია ბრძოლის წინა ხაზზე უნდა დაეყენებინა, რათა უეჭველად მომკვდარიყო (2სმ. 11:14—26). ურია ისე მოკვდა, რომ ცოლის ღალატის შესახებ არაფერი გაუგია.

2. მღვდელი, რომელიც იუდას მეფე ახაზის დროს მსახურობდა (ძვ. წ. 761—746 წწ.). ტიგლათფილესერ III-თვის ხარკის მისატანად დამასკოში ჩასულმა ახაზმა ურიას იქ ნანახი დიდი სამსხვერპლოს გეგმა და ნიმუში გაუგზავნა და ასეთივეს აგება დაავალა. მოგვიანებით მეფემ იეჰოვას სამსხვერპლოს ამ სამსხვერპლოთი ჩანაცვლება ბრძანა და ურიამაც შეასრულა მეფის ბრძანება (2მფ. 16:8—16). ურია იყო მათ შორის, ვინც ესაიამ დაიმოწმა, როცა ფილაზე თავისი ვაჟის მაჰერ-შალალ-ხაშ-ბაზის სახელი დაწერა (ეს. 8:1, 2). ურიას შესახებ პირდაპირ არ წერია, რომ მღვდელმთავარი იყო, თუმცა თუ გავითვალისწინებთ მის მაღალ მდგომარეობას და იმას, რომ მღვდელმთავრის ტიტულით მაშინ სხვა არავინ მოიხსენიებოდა, ის სავარაუდოდ მღვდელმთავარი იყო.

3. იეჰოვას წინასწარმეტყველი, შემაიას ძე, კირით-იეარიმიდან. იეჰოიაკიმის მეფობის დროს იერემიას მსგავსად ისიც იუდასა და იერუსალიმის წინააღმდეგ წინასწარმეტყველებდა. იგი ეგვიპტეში გაიქცა, როცა გაიგო, რომ იეჰოიაკიმი მოკვლას უპირებდა. მეფის ბრძანებით ის ეგვიპტიდან წამოიყვანეს და მოკლეს, მისი გვამი კი საერთო სასაფლაოზე დააგდეს (იერ. 26:20—23).

4. სავარაუდოდ მღვდელი, ერთ-ერთი მათგანი, ვინც ეზრას მარჯვნივ იდგა, როცა ის კანონს უკითხავდა იერუსალიმში წყლის კარიბჭესთან შეკრებილ ტყვეობიდან დაბრუნებულ ხალხს (ნემ. 8:1—4).

5. ჰაკოცის ვაჟი, მღვდელი. მისი ვაჟი მერემოთი იმ მღვდლებს შორის იყო, რომლებსაც ეზრამ იერუსალიმში წამოღებული ოქრო-ვერცხლი და ტაძრის ნივთები ჩააბარა. მოგვიანებით მერემოთმა იერუსალიმის გალავნის აღდგენაში მიიღო მონაწილეობა (ეზრ. 8:33; ნემ. 3:4, 21).