მიბაძე იეჰოვას მიუკერძოებლობას

¹ იეჰოვა ზრუნავს ხალხზე. ის მიუკერძოებლად ავლენს კეთილგანწყობილებას ყველასადმი, ვინც მის ნებას იქმს (საქ. 10:34, 35). იესოც მიუკერძოებელი იყო ქადაგებისას (ლუკ. 20:21). ჩვენც მათს მაგალითს უნდა მივბაძოთ, როგორც პავლე აკეთებდა ამას, რომელმაც დაწერა: „ერთი უფალი არის ყველაზე. ის უხვია ყველასათვის, ვინც მას მოუხმობს“ (რომ. 10:12).

² ღვთის სამეფოს შესახებ კეთილი ცნობის გაცხადებას ყველასთვის, ვისაც ვხვდებით, ღვთისთვის დიდება მოაქვს. ჩვენ უნდა განვაგრძოთ სხვებისთვის ამ შესანიშნავი ცნობის გაზიარება — მათი რასის, სოციალური და ფინანსური მდგომარეობისა თუ განათლების მიუხედავად (რომ. 10:11—13). ეს ნიშნავს, ვუქადაგოთ მათ, ვინც მოგვისმენს, — კაცსა და ქალს, ახალგაზრდასა და ხნიერს. ჩვენ არც ერთი კარი არ უნდა გამოვტოვოთ, რომ თითოეულ მობინადრეს მივცეთ ჭეშმარიტების მოსმენის საშუალება.

³ ყველათი დაინტერესდი. ჩვენი მიზანია, ვისთანაც შევძლებთ, ყველას დავუკავშირდეთ. ამ მიზნით ზოგი მაუწყებელი წარმატებით ქადაგებს ექიმთა კაბინეტებში, საავადმყოფოებში, მოხუცებულთა სახლებში, სოციალური უზრუნველყოფის დაწესებულებებსა და სარეაბილიტაციო ცენტრებში. გარდა ამისა, მაუწყებლები უქადაგებენ დამკრძალავი ბიუროების თანამშრომლებს, სკოლის ინსპექტორებსა და კონსულტანტებს, აგრეთვე მოსამართლეებს. როცა თანამდებობის პირებთან მივდივართ, მართებულია, მადლიერება გამოვხატოთ მათდამი იმ სასარგებლო მომსახურებისთვის, რომლითაც ჩვენს დასახლებას უზრუნველყოფენ. იყავი თავაზიანი და შეარჩიე დროული სტატიები, რომლებიც განსაკუთრებით მათს საქმიანობასა და ამ საქმიანობასთან დაკავშირებულ პრობლემებს ეხება.

⁴ ერთხელ დამ მოახერხა მოსამართლესთან საუბარი მისსავე კაბინეტში. ცოცხალი საუბრის შემდეგ მოსამართლემ უთხრა: „იცით, რა მომწონს იეჰოვას მოწმეებში? მათ საფუძვლიანი პრინციპები აქვთ, რომლებსაც არასოდეს უხვევენ“. ამ გავლენიან პირს შესანიშნავად ექადაგა.

⁵ ჩვენ არ შეგვიძლია ხალხის გულების ამოცნობა. მიუხედავად ამისა, ყველა შემხვედრთან საუბრით რწმენას ვავლენთ ღვთის უნარისადმი — უხელმძღვანელოს ჩვენს საქმიანობას. გარდა ამისა, ეს საშუალებას აძლევს ხალხს, მოისმინონ და გამოეხმაურონ იმედის მომცემ ცნობას (1 ტიმ. 2:3, 4). მოდი გონივრულად გამოვიყენოთ ჩვენი დრო და ვეცადოთ, მივბაძოთ იეჰოვას მიუკერძოებლობას იმით, რომ კეთილ ცნობას შეძლებისდაგვარად ყველას მივაწვდენთ (რომ. 2:11; ეფეს. 5:1, 2).