აფასებ იმას, რაც წმინდაა?

¹ რომ გვკითხონ, ვაფასებთ თუ არა იმას, რაც წმინდაა, ალბათ, მაშინვე ვუპასუხებდით, რომ ვაფასებთ! რა არის ის ზოგი წმინდა რამ, რითაც ღმერთმა უზრუნველგვყო და რასაც ჩვენ ვაფასებთ?

² ჩვენ დიდად ვაფასებთ იმ პირად ურთიერთობას, რომლის დამყარების უფლებაც გვაქვს ჩვენს ზეციერ მამასთან! ის გვარწმუნებს იმაში, რომ, თუ ‘მივუახლოვდებით, ისიც მოგვიახლოვდება’ (იაკ. 4:8). იესო ქრისტეს გამომსყიდველური მსხვერპლის გარეშე, ვერც ერთი ადამიანი ვერ მიიღებს მარადიულ სიცოცხლეს (იოან. 3:16). გულითადი მადლიერების გრძნობით ყოველდღე გამოვთქვამთ ლოცვებში ჩვენს ღრმა მადლიერებას ღვთის ამ ძვირფასი ძღვნისთვის.

³ ღვთის ინსპირირებული სიტყვა, ბიბლიაც, წმინდაა ჩვენთვის, აგრეთვე წმინდაა ჩვენთვის იეჰოვას მიწიერი ორგანიზაცია. სათანადო მადლიერებას ამ ყველაფრისთვის, რაც იეჰოვასგან მომდინარეობს, იმით ვავლენთ, რომ ვცხოვრობთ ბიბლიური პრინციპებით, ვაძლიერებთ ძმური სიყვარულის კვანძებს, გულდასმით ვიცავთ თეოკრატიულ წესრიგს და ვთანამშრომლობთ მათთან, ვინც თავის თავზე იღებს ხელმძღვანელობას (1 პეტ. 1:22).

⁴ ერთგული და გონიერი მონის მეშვეობით უხვად ვიღებთ სულიერ საზრდოს. ეს სიტყვები კიდევ ერთხელ გამართლდება საოლქო კონგრესზე, დევიზით „ღვთის სიტყვის შემსრულებლები“. იქ ჩვენ მივიღებთ მნიშვნელოვან დარიგებებს და გვექნება თბილი ურთიერთობა თანამორწმუნეებთან, რაც უაღრესად საჭიროა. როგორ შეგვიძლია გულითადი მადლიერების გამოვლენა ამ წმინდა ღონისძიების გამო?

⁵ არ მიატოვო იეჰოვას სახლი. მათ, ვინც მძიმედ შრომობდა იერუსალიმის კედლების აღსადგენად, ნეემია შეაგონებდა, ‘არ მიეტოვებინათ თავიანთი ღვთის სახლი’ (ნეემ. 10:39). დღეს იეჰოვას „სახლი“ მის თაყვანისცემასთან დაკავშირებულ ღონისძიებას წარმოადგენს. ჩვენი საოლქო კონგრესები ამ ღონისძიების ნაწილია. ეს ღონისძიება რომ არ უგულებელვყოთ, უნდა დავესწროთ კონგრესს და დიდი ყურადღებით მოვუსმინოთ, რითაც იეჰოვას დავანახვებთ, რომ დიდად ვაფასებთ მის მზრუნველობას (ებრ. 10:24, 25). რა გეგმები უნდა დავისახოთ ახლა, რათა ცხადვყოთ, რომ სრულიად ვაფასებთ ამ წმინდა მოვლენას?

⁶ დაესწარი სამივე დღეს. თითოეულმა ჩვენგანმა უნდა დაგეგმოს, რომ კონგრესის სამივე დღეს დაესწროს. გეგმავ თუ არა ყოველდღე დილით ადრე მისვლას და ბოლომდე დარჩენას — ბოლო ლოცვამდე, კვირას? თუ ასეთი გეგმები გაქვს, შენ უდიდესი კურთხევები გელის. კონგრესზე დასწრება შეიძლება ყოველთვის ადვილი არ არის. ქვეყნიურ სამუშაოზე საქმეების მოწესრიგება შეიძლება სიმტკიცეს მოითხოვს. ტრანსპორტი ყოველთვის არ არის ხელმისაწვდომი. მაგრამ ნება არ დართო ყოველივე ამას, ხელი შეგიშალოს კონგრესზე დასწრებაში.

⁷ ყურადღება მიაქციე ამ შესანიშნავ მაგალითს. შარშან ძმების ჯგუფი აფრიკის ერთ-ერთი ქვეყნიდან, სადაც არეულობა იყო, საოლქო კონგრესზე მიდიოდა და ჯარისკაცებს გადაეყარა. ძმებს ჰკითხეს: „ვინ ხართ და სად მიდიხართ?“. მათ უპასუხეს: „ჩვენ იეჰოვას მოწმეები ვართ და კონგრესზე მივდივართ“. ერთ-ერთმა ჯარისკაცმა აღნიშნა: „თქვენ, იეჰოვას მოწმეებს, არაფრისა გეშინიათ. წადით, თქვენი კონგრესი უპრობლემოდ ჩატარდება. მაგრამ იცოდეთ, რომ მრავალ ჯარისკაცს შეხვდებით. ყოველთვის შუა გზაზე იარეთ! თუ ბევრ ხალხს დაინახავთ ერთად, სიარული განაგრძეთ შუა გზაზე!“ ისინი ასეც მოიქცნენ და უსაფრთხოდ მივიდნენ კონგრესზე. ეს ძმები დაჯილდოვდნენ, რადგან წმინდა საკითხებისადმი თავიანთი მადლიერება გამოავლინეს.

⁸ ჩვენი აფრიკელი ძმების მსგავსად, ჩვენც ვაწყდებით გარკვეულ სიძნელეებს. ნამდვილად, ჩვენც შეგვიძლია მივბაძოთ მათ რწმენას და გადავწყვიტოთ, სამივე დღეს დავესწროთ საოლქო კონგრესს. თუ ცვლილებებია საჭირო, იეჰოვას მიმართე ხელმძღვანელობისთვის და გახსოვდეს, რომ ის აკურთხებს მთლიან პროგრამაზე დასწრების ჩვენს ძალისხმევას.

⁹ მოიმკე კურთხევები. ჩვენ ვილტვით ღვთის სიტყვისკენ, რადგან გვესმის, რომ გადარჩენის მიღწევას მისი მეშვეობით შევძლებთ (1 პეტ. 2:2). საოლქო კონგრესზე დასწრება და პროგრამის მოსმენა თითოეულ ჩვენგანს დაეხმარება ამ სიტყვისადმი რწმენის განმტკიცებაში და, ამგვარად, უკეთ გავუძლებთ სატანის თავდასხმებს. ასეთი მოქმედებით ვაჩვენებთ იეჰოვას და მათ, ვინც გვაკვირდება, რომ სრულიად ვაფასებთ წმინდა საკითხებს და „უკან მიქცეულთაგანნი კი არ ვართ... არამედ მორწმუნენი სულის სახსნელად“ (ებრ. 10:39; 12:16; იგავ. 27:11).

¹⁰ შეგვიძლია ველოდოთ იმას, რომ იეჰოვა ღმერთი გახსნის ცის საქანელთ და აუწყველად გადმოგვიცლის სულიერ კურთხევებს (მალ. 3:10). მიზნად დაისახე, რომ დაესწრო საოლქო კონგრესს „ღვთის სიტყვის შემსრულებლები“, პროგრამის დაწყებიდან, პარასკევს დილით, კვირას ნაშუადღევის ბოლო ლოცვისა და „ამინის!“ ჩათვლით. უეჭველად, გაიხარებ, რომ ასე მოიქეცი!