საოლქო კონგრესი — სიხარულით თაყვანისცემის დრო
1. რით ჰგავს ძველი ისრაელის დღესასწაულები საოლქო კონგრესს?
1 იოსები, მარიამი, მათი შვილები და სხვა იუდეველები რეგულარულად დადიოდნენ იერუსალიმში ყოველწლიურ დღესასწაულებზე. ამ განსაკუთრებული მოვლენების დროს ისინი ივიწყებდნენ ყოველდღიურ საზრუნავს და ფიქრობდნენ უფრო მნიშვნელოვანზე — სულიერ საკითხებზე. დღესასწაულების დროს მათ შესაძლებლობა ეძლეოდათ, ელაპარაკათ იეჰოვას სიკეთეზე და მის კანონებზე ეფიქრათ. მსგავსად, მოახლოებული საოლქო კონგრესი შესაძლებლობას გვაძლევს, რომ სიხარულით ვცეთ თაყვანი იეჰოვას.
2. როგორ უნდა მოვემზადოთ მომავალი საოლქო კონგრესისთვის?
2 მომზადება: ნაზარეთიდან იერუსალიმში მისასვლელად და უკან დასაბრუნებლად იესოს ოჯახს დაახლოებით 200 კილომეტრის გავლა უწევდა. ზუსტად არ ვიცით, რამდენი და- ძმა ჰყავდა იესოს, მაგრამ შეგვიძლია წარმოვიდგინოთ, რა ძალისხმევის ფასად დაუჯდებოდათ იოსებსა და მარიამს შვილებთან ერთად დღესასწაულებზე დასწრება. დაიწყეთ უკვე საოლქო კონგრესის სამივე დღეზე დასასწრებად მზადება? შეიძლება შვებულების აღება, დამსაქმებელთან დალაპარაკება ან სკოლიდან ბავშვების დათხოვნა გახდეს საჭირო. ფიქრობ წინასწარ, აუცილებლობის შემთხვევაში სად დარჩები კონგრესის პერიოდში? შეგიძლია კონგრესზე დასწრებაში დაეხმარო კრების იმ წევრებს, რომელთაც განსაკუთრებით სჭირდებათ დახმარება? (1 იოან. 3:17, 18).
3. როგორ აძლევდა დღესასწაულები ისრაელებს გამამხნევებელი ურთიერთობის შესაძლებლობას?
3 გამამხნევებელი ურთიერთობა: დღესასწაულები იუდეველებს გამამხნევებელი ურთიერთობის შესაძლებლობას აძლევდა. იესოს ოჯახს ალბათ ერთი სული ჰქონდა, როდის შეხვდებოდნენ დიდი ხნის მეგობრებს. მათ აგრეთვე შეეძლოთ ახალი მეგობრები შეეძინათ იუდეველებსა და პროზელიტებს შორის, რომლებიც იერუსალიმიდან ან სხვა მხარეებიდან იყვნენ.
4. როგორ შეგვიძლია ვაჩვენოთ, რომ ვაფასებთ ქრისტიანულ საძმოს?
4 ის ინფორმაცია, რომელსაც საოლქო კონგრესებზე ვისმენთ, ერთგულ და გონიერ მონას შეეძლო ჩვენთვის დაბეჭდილი სახით მოეწოდებინა, მაგრამ ერთ-ერთი მიზეზი, რის გამოც ერთად გვკრებს, ერთმანეთის გამხნევებაა (ებრ. 10:24, 25). ამიტომ ისე დაგეგმეთ, რომ ყოველ დღეს ცოტა ადრე მიხვიდეთ, რათა შეძლოთ თანამორწმუნეებთან ურთიერთობა მანამ, სანამ მუსიკა დაიწყება, რაც იმის ნიშანია, რომ ადგილები უნდა დავიკავოთ. ნაცვლად იმისა, რომ ნაშუადღევს საკვების შესაძენად საკონგრესო ტერიტორია დატოვოთ, თან წამოიღეთ ის, რომ სადილობის შემდეგ მეტი დრო გქონდეთ ურთიერთობისთვის. ჩვენი ქრისტიანული საძმო იეჰოვას მიერ ბოძებული ძღვენია, რომელიც ყოველთვის უნდა დავაფასოთ (მიქ. 2:12).
5. რა დაგვეხმარება, რომ სრულად ვისარგებლოთ კონგრესის პროგრამით?
5 სწავლის დრო: იესო პატარაობიდანვე ესწრებოდა დღესასწაულებს და ზეციერი მამისგან სწავლობდა (ლუკ. 2:41—49). რა დაგვეხმარება, რომ კონგრესის პროგრამიდან სრულად ვისარგებლოთ? პროგრამის მსვლელობისას ნუ დატოვებ შენს ადგილს და თუ საჭირო არ არის, ნუ ილაპარაკებ. შენმა მობილურმა ტელეფონმა ან სხვა მოწყობილობებმა ხელი არ უნდა შეგიშალოს არც შენ და არც სხვებს თემების მოსმენაში. შეეცადე, მომხსენებელს უყურო და მოკლე ჩანაწერები გააკეთო. ოჯახი ერთად დასხედით და დარწმუნდით, რომ ბავშვები ყურადღებით ისმენენ პროგრამას. ყოველი დღის ბოლოს სხვებთან ერთად იმსჯელე, ყველაზე მეტად რა მოგეწონა მოსმენილიდან.
6. რა უნდა გვახსოვდეს ჩაცმულობასა და გარეგნობასთან დაკავშირებით?
6 ჩაცმულობა და გარეგნობა: გზად მიმავალი უცხოელი ვაჭრები ადვილად მიხვდებოდნენ, ვინ იყვნენ იესოს ოჯახი და სხვა იუდეველი მორწმუნეები, რომელთაც ტანსაცმლის კალთის ბოლოებზე ფოჩები და ლურჯი თასმა ჰქონდათ გაკეთებული და იერუსალიმში მიდიოდნენ ან უკან ბრუნდებოდნენ (რიცხ. 15:37—41). მართალია ქრისტიანები განსაკუთრებულ ტანსაცმელს არ ვატარებთ, მაგრამ ჩვენც ადვილად გვცნობენ მოკრძალებული და სუფთა ჩაცმულობით. განსაკუთრებული ყურადღება უნდა მივაქციოთ ჩვენს გარეგნობას, როცა კონგრესზე მივდივართ, უკან ვბრუნდებით ან პროგრამის შემდეგ იმავე ქალაქში გვიწევს სიარული. მაშინაც კი, თუ კონგრესის შემდეგ ტანსაცმელს გამოვიცვლით, ღირსეულად უნდა გვეცვას და სამკერდე ნიშანი უნდა გვეკეთოს. ასეთი სახით ჩვენ გამორჩეულები ვიქნებით მათგან, ვინც მოწმეები არ არიან და კარგ შთაბეჭდილებას მოვახდენთ სხვებზე.
7. რატომ უნდა ვიმსახუროთ კონგრესზე მოხალისედ?
7 მოხალისეების მხარდაჭერა: კონგრესმა შეუფერხებლად რომ ჩაიაროს ბევრი მოხალისეა საჭირო. შეგიძლია დახმარების გაწევა? (ფსალმ. 110:3). კონგრესზე გასაკეთებელი საქმე წმინდა მსახურების ნაწილია და კარგი დამოწმების შესაძლებლობას გვაძლევს. ერთი შენობის მენეჯერზე იმდენად დიდი შთაბეჭდილება მოახდინეს მოხალისეებმა, რომლებიც შენობას ასუფთავებდნენ, რომ მან დაწერა: „მინდა დიდი მადლობა გადაგიხადოთ ამ შესანიშნავი ღონისძიებისთვის, რომლის მსგავსიც ამ შენობაში არ ჩატარებულა. ყოველთვის მესმოდა, რომ იეჰოვას მოწმეები დიდი ხანია კარგი რეპუტაციით სარგებლობენ და შენობას იმაზე სუფთად ტოვებენ, ვიდრე ხვდებათ. თქვენ და თქვენმა ორგანიზაციამ ეს შენობა საზოგადოებისთვის უკეთეს ადგილად აქციეთ და ეს გააკეთა იმ შესანიშნავი ადამიანების ჯგუფმა, ვისთანაც ჩვენ შეხება გვქონდა“.
8. დამოწმების რა შესაძლებლობა შეიძლება მოგვეცეს პროგრამის შემდეგ?
8 დამოწმების შესაძლებლობა: მრავალ ქალაქში, სადაც კონგრესები ტარდება, შეუმჩნეველი არ რჩებათ კარგად და სუფთად ჩაცმული სტუმრები, რომელთაც კონგრესის სამკერდე ნიშნები უკეთიათ. ამან შეიძლება ხალხს ცნობისმოყვარეობა აღუძრას და კონგრესის შესახებ საუბრის შესაძლებლობა მოგვეცეს. ოთხი წლის ბიჭუნამ, რომელიც პროგრამის შემდეგ მშობლებთან ერთად რესტორანში შევიდა, ოფიციანტს ახლად გამოცემული პუბლიკაცია აჩვენა. ბიჭის მშობლებმა საუბრის შემდეგ ეს ქალბატონი კონგრესზე დაპატიჟეს.
9. იესოს ოჯახის მსგავსად, როგორ შეგვიძლია დავაფასოთ სულიერი ღონისძიებები?
9 ძველ დროს იუდეველები, რომლებსაც უნდოდათ, იეჰოვას შესახებ მეტი გაეგოთ, სულმოუთქმელად ელოდებოდნენ ამ სასიხარულო დღესასწაულებს (კან. 16:15). იესოს ოჯახი სიხარულით იღებდა ნებისმიერ მსხვერპლს, რათა ამ ღონისძიებებს დასწრებოდა. ჩვენც მადლიერები ვართ საოლქო კონგრესებისთვის და ვთვლით, რომ ის ჩვენი მოსიყვარულე ზეციერი მამისგან ბოძებული ძღვენია (იაკ. 1:17). ახლავე უნდა დავიწყოთ მზადება ამ ყოველწლიური შეხვედრისთვის, სადაც იეჰოვას სიხარულით ვცემთ თაყვანს!
[ჩარჩო 6, 7 გვერდებზე]
შეხსენებები საოლქო კონგრესთან დაკავშირებით
◼ პროგრამის განრიგი: პროგრამა სამივე დღეს 9:20-ზე დაიწყება. შესვლა შესაძლებელი იქნება 8:00 საათიდან. როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები, რათა პროგრამა სათანადოდ დაიწყოს. პარასკევს და შაბათს პროგრამა 16:55-ზე დასრულდება, ხოლო კვირას — 16:00-ზე.
◼ ტრანსპორტის დასაყენებელი ადგილი: გთხოვთ, ნუ გააჩერებთ ტრანსპორტს საკონგრესო დარბაზის შესასვლელთან მგზავრების ჩამოსასმელად ან ასაყვანად, გარდა ინვალიდი და მოხუცი მგზავრებისა, რომელთაც უჭირთ გადაადგილება. ვინაიდან მდგომარეობა ყველგან განსხვავებულია, წესრიგის შესანარჩუნებლად მძღოლები უნდა დაემორჩილონ მომწესრიგებლების მითითებებს. როგორც წესი, ტრანსპორტის დასაყენებელი ადგილები შეზღუდულია, ამიტომ ავტოსადგომი რომ არ გადაიტვირთოს, კარგი იქნება, თუ ცარიელი ავტომობილით არ იმგზავრებთ და სხვებსაც ჩაისვამთ.
◼ ადგილების დაკავება: ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით ან ვისაც ბიბლიას ასწავლით (1 კორ. 13:5).
◼ საკვები შუადღის შესვენებისთვის: გთხოვთ, თან წაიღეთ საჭმელი, რათა შუადღეს, შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის წაღება, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრებისა და მინის ჭურჭლის მიტანა.
◼ შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ იმით, რომ ნებაყოფლობითი შესაწირავი გავიღოთ მსოფლიო საქმისთვის. ამის გაკეთება შეიძლება როგორც ჩვენს სამეფო დარბაზში, ისე კონგრესის ჩატარების ადგილზე.
◼ უბედური შემთხვევები და სასწრაფო დახმარება: თუ კონგრესზე სამედიცინო დახმარება დაგჭირდათ, გთხოვთ, უთხარით თქვენ გვერდით მჯდომს, რათა ის დაუყოვნებლივ დაუკავშირდეს კონგრესის პირველი დახმარების განყოფილებას. გამოცდილი და-ძმები შეაფასებენ მდგომარეობის სერიოზულობას და აღმოგიჩენენ დახმარებას. აუცილებლობის შემთხვევაში ისინი თავად გამოიძახებენ სასწრაფო დახმარებას. ამგვარად, უმნიშვნელო მიზეზების გამო აღარ გამოვიძახებთ სასწრაფო დახმარებას.
◼ ფეხსაცმელი: კონგრესზე ზოგი შეუფერებელ ფეხსაცმელს იცვამს და იყო შემთხვევები, როცა მათ ტრავმები მიიღეს იმის გამო, რომ ფეხი გადაუბრუნდათ ან წაიქცნენ. კარგი იქნება, თუ მოკრძალებულ და მოხერხებულ ფეხსაცმელს ჩაიცვამთ, რომ თავისუფლად იაროთ კონგრესის ტერიტორიაზე, კიბეებზე და სხვა.
◼ ჩამწერი აპარატურა: არანაირი ჩამწერი საშუალების შეერთება არ შეიძლება ელექტროქსელში ან ხმის გამაძლიერებელ სისტემაში. ჩამწერი აპარატურა ისე უნდა გამოიყენოთ, რომ სხვებს ხელი არ შეუშალოთ.
◼ საბავშვო ეტლები და დასაკეცი სკამები: მშობლებმა კონგრესზე არ უნდა წამოიღონ საბავშვო ეტლები და დასაკეცი სკამები. თუმცა მათ შეუძლიათ წამოიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება სკამის საზურგეზე.
◼ სუნამოების გამოყენება: ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და დაინახავს, რომ ვინმე ინტერესს ავლენს, მან უნდა გამოიყენოს ბლანკი „გთხოვთ მოინახულოთ“ (S-43). მაუწყებლებს თან უნდა ჰქონდეთ კონგრესზე ერთი-ორი ასეთი ბლანკი. შევსებული ბლანკები შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს. იხილეთ 2009 წლის ნოემბრის „ჩვენი სამეფო მსახურება“, გვ. 4.
◼ დაბინავება: როდესაც შეკვეთას აკეთებთ ბინასა თუ კერძო სახლში დაბინავების შესახებ, გაითვალისწინეთ შემდეგი: 1) გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5); 2) არავის მისცეთ დაბინავების ბლანკი „დაბინავება“ (CO-4), სადაც მოცემულია ინფორმაცია თქვენს საცხოვრებელ ადგილთან დაკავშირებით; 3) გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა; 4) უყურადღებოდ არ დატოვოთ თქვენი შვილები; 5) როდესაც თანამორწმუნეების სტუმართმოყვარეობით სარგებლობთ, გამოავლინეთ მათ მიმართ მადლიერება და გახსოვდეთ საქმეების 20:35-ში მოცემული პრინციპი; 6) თუ რაიმე მიზეზის გამო გიწევთ თქვენი შეკვეთის გაუქმება, რაც შეიძლება მალე შეატყობინეთ დაბინავების განყოფილებას.
◼ მოხალისეთა სამსახური: კონგრესი უფრო მეტ სიხარულს მოგვანიჭებს, თუ სურვილს გამოვთქვამთ და ძმებს კონგრესთან დაკავშირებული აუცილებელი საქმეების შესრულებაში დავეხმარებით (საქ. 20:35). ვინც ამის სურვილს გამოთქვამს, შეუძლია კონგრესზე მოხალისეთა სამსახურის განყოფილებას მიმართოს. 16-წლამდე ასაკის ბავშვებსაც შეუძლიათ თავიანთი წვლილი შეიტანონ ამ საქმეში მშობლების ან სხვა უფროსი ასაკის ქრისტიანების მეთვალყურეობით.