„ჩვენ არაერთხელ დავამუშავეთ ჩვენი უბანი!“
1 ხომ არ გიფიქრია ოდესმე, რომ შენი უბანი მრავალჯერ არის დამუშავებული და იქ აღარ დარჩნენ ცხვრისმაგვარი ადამიანები? შეიძლება ფიქრობ: „ვიცი, როგორ გამომეხმაურება ხალხი. რატომ მივაკითხო ხელმეორედ მათ, ვისაც არ აინტერესებს?“. მართალია, მრავალი უბანი ხშირად მუშავდება. მიუხედავად ამისა, ამ ფაქტს უნდა მივუდგეთ დადებითი და არა უარყოფითი თვალსაზრისით. რატომ? ყურადღება მიაქციე ქვემოთ მოცემულ ოთხ მიზეზს.
2 ჩვენს ლოცვებს პასუხი გაეცა. იესომ თქვა: „სამკალი ბევრია, მუშაკი — ცოტა. ამიტომ ევედრეთ სამკლის პატრონს, რომ გამოგზავნოს მუშაკნი თავის სამკალში“ (ლუკ. 10:2). ათწლეულების მანძილზე ჩვენ იეჰოვას ვთხოვდით დახმარებას. ბევრგან ახლა უფრო მეტი მუშაკი გვყავს და უბნებიც უფრო ხშირად მუშავდება. ნუთუ სასიხარულო არ არის, რომ იეჰოვამ უპასუხა ჩვენს ლოცვებს?
3 შეუპოვრობას კარგი შედეგები მოაქვს. იმ უბნებზეც კი, რომლებიც ხშირად მუშავდება, ადამიანები ეხმაურებიან სამეფოს ცნობას და ჭეშმარიტების შემეცნებას იღებენ. ამიტომაც უფრო მეტი გულწრფელი ადამიანის პოვნის იმედით კვლავ უნდა განვაგრძოთ ხელახლა მიკითხება (ეს. 6:8—11). იესოს ადრეული მოწაფეების მსგავსად, „წადით“ თქვენს უბანზე მცხოვრებ ადამიანებთან და ეცადეთ, ღვთის სამეფოსადმი ინტერესი აღუძრათ მათ (მათ. 10:6, 7).
4 პორტუგალიაში მრავალი კრება ყოველკვირეულად ამუშავებს თავის ტერიტორიას, მაგრამ ჯერ კიდევ პოულობენ ცხვრისმაგვარ ადამიანებს. განსაკუთრებით ერთ დას აქვს ძალიან დადებითი განწყობილება. ის ამბობს: „ყოველ დილით მსახურებაში წასვლამდე იეჰოვას ლოცვით ვთხოვ, რომ დამეხმაროს მათ პოვნაში, ვისაც ბიბლიის შესწავლა აინტერესებს“. ერთხელაც მან შესწავლა დაიწყო საპარიკმახეროს თანამშრომლებთან. თუმცა მოგვიანებით მხოლოდ ერთმა მათგანმა განაგრძო შესწავლა. მან განაცხადა: „სხვებს არ აინტერესებთ, მე კი მაინტერესებს“. თავის მხრივ, მან იმავე თვეში ბიბლიის ორი შესწავლა დაიწყო. მალე ის მოინათლა და, მოგვიანებით, პიონერული მსახურება დაიწყო!
5 სამუშაო სრულდება. კეთილი ცნობის შესახებ ქადაგება მიმდინარეობს ისე, როგორც ეს იესომ იწინასწარმეტყველა (მათ. 24:14). იქაც კი, სადაც ადამიანებს ‘არ სურთ მოსმენა’, გაფრთხილებული იქნებიან სამქადაგებლო საქმიანობით. ვიცით, რომ ზოგიერთი არ გამოგვეხმაურება ან წინააღმდეგობასაც კი გაუწევს ჭეშმარიტებას. თუმცა ასეთები სათანადოდ უნდა იყვნენ გაფრთხილებული იეჰოვას მომავალი სამსჯავროს შესახებ (ეზეკ. 2:4, 5; 3:7, 8, 19).
6 ჩვენ ჯერ არ დაგვიმთავრებია. ჩვენი გადასაწყვეტი არ არის, თუ როდის უნდა შეწყდეს სამქადაგებლო საქმიანობა. იეჰოვამ ზუსტად იცის მისი დასრულების დრო. მან იცის, არიან თუ არა ჩვენს უბანზე ადამიანები, რომლებიც შეიძლება ჯერ კიდევ გამოეხმაურონ კეთილ ცნობას. დღესდღეობით ზოგი ამბობს, რომ არ აინტერესებს, მაგრამ ცხოვრებაში ძირეული ცვლილებების — სამუშაოს დაკარგვის, სერიოზული ავადმყოფობის, საყვარელი ადამიანის სიკვდილის — გამო მომავალში შეიძლება გამოეხმაურონ ამ ცნობას. წინასწარშექმნილი აზრის ან იმის გამო, რომ, უბრალოდ, არ სცალიათ მოსასმენად, მრავალ ადამიანს არასდროს სმენია, თუ რას ვქადაგებთ სინამდვილეში. თუ განმეორებით კეთილგანწყობით მივაკითხავთ მათ, შეიძლება ყურადღება მოგვაქციონ და მოგვისმინონ.
7 ისინი, ვინც ამ ბოლო წლებში წამოიზარდა და ახლა საკუთარი ოჯახი აქვთ, ცხოვრებას მეტი სერიოზულობით ეკიდებიან და ებადებათ კითხვები, რომლებზეც მხოლოდ ღვთის სიტყვას შეუძლია პასუხის გაცემა. ერთმა ახალგაზრდა დედამ ორი მოწმე შეიპატიჟა სახლში და უთხრა: „როცა პატარა ვიყავი, ვერასდროს ვიგებდი, დედაჩემი უარს რატომ ეუბნებოდა მოწმეებს და აცხადებდა, რომ არ აინტერესებდა, მაშინ როცა ყველა მათგანს ჩვენთან მხოლოდ ბიბლიის შესახებ სურდა საუბარი. გადავწყვიტე, რომ, როცა გავიზრდებოდი, გავთხოვდებოდი და საკუთარი ოჯახი მექნებოდა, მოვიწვევდი იეჰოვას მოწმეებს და ვთხოვდი, ბიბლია აეხსნათ ჩემთვის“. ის ასეც მოიქცა მათთან მისული მოწმეების გასახარად.
8 შეგიძლია უფრო ეფექტური იყო? უბნის ხშირად დამუშავება რთული ყოველთვის იმ ადამიანების გამო არ არის, რომლებსაც ვაკითხავთ. ხანდახან მიზეზი ჩვენ ვართ. ქადაგებას უარყოფითი აზრებით ხომ არ ვიწყებთ? ამან შეიძლება იმოქმედოს ჩვენს განწყობილებაზე, აგრეთვე ჩვენი ხმის ტონსა და სახის გამომეტყველებაზე. შეინარჩუნე დადებითი განწყობილება და სახის სასიამოვნო გამომეტყველება. ეცადე, სხვა კუთხით მიუდგე მათ. გაამრავალფეროვნე და გააუმჯობესე შენი შეთავაზებები. შეგიძლია შეცვალო კითხვა, რომლითაც შეთავაზებას იწყებ ან საუბრისას სხვა ბიბლიური მუხლი გამოიყენო. ჰკითხე სხვა და-ძმებს, უბნის დამუშავების დროს რა იყო მათთვის უფრო შედეგიანი. იმსახურე სხვადასხვა მაუწყებელთან და პიონერთან და დაიმახსოვრე, თუ როგორ ახერხებენ ისინი ეფექტურად მსახურებას.
9 სამეფოს შესახებ ქადაგების საქმიანობას იეჰოვა იწონებს და აკურთხებს; მასში მონაწილეობით მის და მოყვასის მიმართ სიყვარულს ვადასტურებთ (მათ. 22:37—39). დაე, ბოლომდე მივიყვანოთ ჩვენი საქმე და ნუ დავიღლებით სამქადაგებლო უბნის არაერთხელ დამუშავებით.