ახალი სარაიონო კონგრესის პროგრამა
1 ამ ცვალებად წუთისოფელში რწმენაში რომ მტკიცედ ვიდგეთ, იეჰოვაზე მინდობა გვესაჭიროება. როგორ ვლინდება ეს ჩვენს ცხოვრებაში? რა გავლენას ახდენს იეჰოვაზე მინდობა ჩვენს პირად თუ ოჯახურ ცხოვრებაზე? როგორ გვაძლევს ეს სატანის წუთისოფლის ზეგავლენისთვის წინააღმდეგობის გაწევის საშუალებას? ამ კითხვებზე პასუხს 2003 სამსახურებრივი წლის სარაიონო კონგრესის პროგრამა გაგვცემს. კონგრესის სახელწოდება იქნება „მიენდეთ იეჰოვას და აკეთეთ სიკეთე“ (ფსალმ. 36:3).
2 იეჰოვასადმი ნდობას მხოლოდ განსაკუთრებული შემთხვევების დროს ან გაჭირვების ჟამს არ ვავლენთ. ის ჩვენი ყოველდღიური ცხოვრების ნებისმიერ სფეროზე ახდენს გავლენას. ეს ხაზგასმული იქნება შესავალ მოხსენებაში: „მიენდეთ იეჰოვას ყოველჟამს“ (ფსალმ. 61:9). ოთხნაწილიან მოხსენებათა სერიაში „ნდობა გამოავლინეთ იეჰოვასადმი“ ახსნილი იქნება, თუ როგორ მოვძებნოთ და გამოვიყენოთ ბიბლიაზე დაფუძნებული ინფორმაცია, რომელიც ოჯახურ ცხოვრებაში წარმატების მიღწევაში, ოჯახში წამოჭრილ პრობლემებთან გამკლავებასა და მატერიალური მოთხოვნილებების დაკმაყოფილებაში დაგვეხმარება.
3 სატანის წუთისოფელი ცდილობს, დამახინჯებული წარმოდგენა შეგვიქმნას სიკეთესა და ბოროტებაზე და თავგზა აგვიბნიოს იმასთან დაკავშირებით, თუ რა არის მნიშვნელოვანი და რა — არა (ეს. 5:20). მოხსენებები „თავი დაიცავით ცხოვრების ამაოებისგან“ და „გაექეცით ბოროტებას და აკეთეთ სიკეთე“ იეჰოვას მაღალი ნორმების დაცვის სურვილს განგვიმტკიცებს (ამოს. 5:14).
4 ღვთის მსახურებს იეჰოვაზე სრული მინდობა დასჭირდებათ, როდესაც ის ბოლოს მოუღებს ახლანდელ ბოროტ წუთისოფელს. ეს საკითხი გაშუქებული იქნება მოხსენებაში „წუთისოფლის გასაჭირიდან ხსნა ახლოსაა“. შემდეგ კი მოვისმენთ დამაფიქრებელ მოხსენებას „იქნები ღვთის სამეფოს ღირსი?“. პროგრამა დასრულდება მოწოდებით: „ენდეთ იეჰოვას აღთქმებს“.
5 მოხსენება ნათლობის კანდიდატებისთვის ყოველი კონგრესის კულმინაციური მომენტია. ნათლობის მსურველებმა რაც შეიძლება მალე უნდა აცნობონ თავმჯდომარე ზედამხედველს თავიანთი სურვილის შესახებ, რათა სათანადო ზომები იქნეს მიღებული.
6 ამ ცვალებად დროში, იეჰოვა ერთადერთი სანდო და მყარი საყრდენია ჩვენთვის (ფსალმ. 117:8, 9). მოდი სარაიონო კონგრესის მთელ პროგრამაზე დასწრებით განვამტკიცოთ ჩვენი ნდობა მისადმი.