ღირსეული საქციელით მიჰყევი ქრისტეს
1. როგორ უკავშირდება ღირსეულად მოქმედება წლევანდელი საოლქო კონგრესის სახელწოდებას?
1 ბიბლიაში სამყაროს უზენაესი ღმერთის, იეჰოვას შესახებ ნათქვამია, რომ ის ღირსებით არის მოსილი (ფსალმ. 104:1). იესო ყოველთვის ისე ლაპარაკობდა და იქცეოდა, რომ პატივს მიაგებდა მამას და პატივისცემით ეკიდებოდა ყველაფერს, რასაც მამა აკეთებდა (იოან. 17:4). თითოეულ ჩვენგანს შესაძლებლობა მოგვეცემა, მივბაძოთ ქრისტეს და დიდება მივაგოთ იეჰოვას მოახლოებულ საოლქო კონგრესზე სახელწოდებით „მიჰყევით ქრისტეს!“
2. როგორ მიაგებს პატივს იეჰოვას ის, თუ როგორ ვემზადებით კონგრესის თითოეულ ნაწილზე დასასწრებად?
2 ღირსეული თაყვანისცემა: ჩვენ შეგვიძლია პატივი მივაგოთ იეჰოვას იმით, რომ დავესწროთ სულიერ ნადიმს, რომელსაც ის გვიმზადებს. უკვე შეუთანხმდი შენს დამსაქმებელს, რომ კონგრესს სამივე დღეს, პარასკევის ჩათვლით, დაესწრო? გეგმავ, ადრე მიხვიდე კონგრესზე, ისე რომ სიმღერისა და ლოცვის დროს შენს ადგილზე იყო? აპირებ, რომ საჭმელი თან გქონდეს, რათა შესვენებისას კონგრესის ტერიტორიის დატოვება არ მოგიწიოს, რაც თავის მხრივ ძმებთან ურთიერთობის დროს წაგართმევდა? პროგრამის თითოეული ნაწილის დაწყებამდე, როდესაც თავმჯდომარე თავაზიანად გვთხოვს, მუსიკის დაწყებამდე დავიკავოთ ადგილები, მალევე უნდა დავასრულოთ საუბარი და პროგრამის დაწყებისას უკვე ჩვენ-ჩვენს ადგილებზე უნდა ვისხდეთ.
3. როგორ ხდის ღირსეულს ჩვენს თაყვანისმცემლობას პროგრამის მსვლელობისას ყურადღებით ყოფნა?
3 პროგრამის მსვლელობისას ყურადღებით ყოფნაც პატივს მიაგებს ჩვენს ზეციერ მამას. ერთმა ჟურნალისტმა, რომელიც საოლქო კონგრესს ესწრებოდა, აღნიშნა, რომ ნებისმიერზე მოახდენდა შთაბეჭდილებას „დამსწრეთა სამაგალითო ქცევა, რომლებიც პატივისცემით ეკიდებოდნენ მითითებებს, ყურადღებით ისმენდნენ პროგრამას და სულიერი საკითხებისადმი აშკარა ინტერესს ავლენდნენ“; ჟურნალისტმა აგრეთვე აღნიშნა, რომ „თითქმის ყველა ბავშვი . . . კარგი ყოფაქცევით გამოირჩეოდა, რაც იშვიათობას წარმოადგენს. ისინი სცენიდან მოსმენილ მუხლებს გულმოდგინედ ეძებდნენ ბიბლიაში“. პროგრამის მსვლელობისას შეუფერებელია ლაპარაკი, SMS-ის წერა, ჭამა ან სიარული. ბავშვები მშობლებთან უნდა ისხდნენ, რათა მშობლები დაეხმარონ, რომ კონგრესის პროგრამა სასარგებლო იყოს მათთვის (კან. 31:12; იგავ. 29:15). ყოველი ასეთი მოქმედება ცხადყოფს, რომ პატივს ვცემთ სხვებს და ვაფასებთ სულიერ საზრდოს, რომელიც ჩვენთვის სასიცოცხლოდ მნიშვნელოვანია.
4. რატომ უნდა გამოვიყურებოდეთ ღირსეულად კონგრესზე?
4 ღირსეული გარეგნობა: ბევრმა გამოხატა მადლიერება იმ შეხსენებებისთვის, რომლებმაც გაიჟღერა გასული წლის საოლქო კონგრესზე წარმოთქმულ ერთ-ერთ თემაში სახელწოდებით „ყოველთვის ღირსეულად მოიქეცით“. ამ მოხსენებაში ყურადღება ექცეოდა იმას, რომ ღვთის მსახურები თავიანთი ჩაცმულობითა და გარეგნობით ქრისტიანულ ღირსებას უნდა ავლენდნენ. წელსაც დიდი ყურადღება უნდა მივაქციოთ ამ საკითხს. ჩვენი გარეგნობიდან ჩანს, თუ რამდენად გვიყვარს იეჰოვა და რამდენად ვაფასებთ იმას, რომ მისი მოწმეები ვართ. ჩვენ ყოველთვის ისე უნდა გვეცვას, როგორც მათ, „რომლებიც ამბობენ, რომ ღვთისმოშიშები არიან“ (1 ტიმ. 2:9, 10).
5. როგორ შეგვიძლია ღირსეულად გამოვიყურებოდეთ მაშინაც კი, როცა კონგრესის შემდეგ ქალაქში გავდივართ?
5 მხოლოდ პროგრამის დროს უნდა გამოვიყურებოდეთ ღირსეულად? არ დაგვავიწყდეს, რომ იქ, სადაც კონგრესი ტარდება, ბევრი გვაკვირდება, რადგან სამკერდე ნიშნებს ვატარებთ. გარეგნობით ჩვენ სხვებისგან უნდა გამოვირჩეოდეთ. ამიტომ, პროგრამის შემდეგაც კი, თავისუფალ დროს, მაგალითად, როცა საჭმელად მივდივართ, ისე უნდა გვეცვას, როგორც შეეფერება ღვთის მსახურებს, რომლებიც ქრისტიანულ კონგრესზე დასასწრებად იმყოფებიან; ამიტომ, არ უნდა გვეცვას ისეთი ტანსაცმელი, როგორიცაა ჯინსები, შორტები და მაისურები. ეს მართლაც კარგი დამოწმება იქნება სხვებისთვის. იეჰოვას სიამოვნებს, როდესაც ჩვენი გარეგნობით ვაჩვენებთ, რომ მისი მსახურები ვართ.
6. რა დადებითი შედეგები მოჰყვება ქრისტიანული ღირსების გამოვლენას?
6 დადებითი შედეგები: საოლქო კონგრესის პერიოდში ჩვენი ღირსეული გარეგნობა და ქცევა არაფორმალურად ქადაგების შესაძლებლობას გვაძლევს და სხვებსაც კარგ შთაბეჭდილებას უტოვებს. ერთ-ერთი საოლქო კონგრესის დასასრულს ერთმა თანამდებობის პირმა აღნიშნა: „არასოდეს შევხვედრივართ ასეთი კარგი ყოფაქცევის ხალხს. თქვენ ნამდვილად შეესაბამებით ღვთის მოთხოვნებს“. ღირსეული მოქცევით პატივისცემასა და სიყვარულს ვავლენთ ერთმანეთის მიმართ და განვადიდებთ იეჰოვას (1 პეტ. 2:12). აგრეთვე ამით ღვთისმოშიშებას გამოვხატავთ და ვაჩვენებთ, რომ მადლიერნი ვართ ჩვენი ზეციერი მამისგან მომდინარე სწავლებისთვის (ებრ. 12:28). მოდი ყველანაირად ვეცადოთ, რომ ღირსეულად მოვიქცეთ საოლქო კონგრესზე სახელწოდებით „მიჰყევით ქრისტეს“!
[ჩარჩო 5 გვერდზე]
შეხსენებები საოლქო კონგრესთან დაკავშირებით
◼ პროგრამის განრიგი: პროგრამა სამივე დღეს 9:20-ზე დაიწყება. შესვლა შესაძლებელი იქნება 8:00 საათიდან. როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები, რათა პროგრამა სათანადოდ დაიწყოს. პარასკევს და შაბათს პროგრამა 17:05-ზე დასრულდება, ხოლო კვირას — 16:10-ზე.
◼ მანქანების დასაყენებელი ადგილი: მიჰყევით მომწესრიგებლების მითითებებს.
◼ ადგილების დაკავება: ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით.
◼ საკვები შუადღის შესვენებისთვის: გთხოვთ, თან მოიტანეთ საჭმელი, რათა შუადღის შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის მოტანა, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრების, მინის ჭურჭლისა და ალკოჰოლური სასმელების მოტანა.
◼ შესაწირავები: საოლქო კონგრესის ორგანიზებაზე საკმაოდ დიდი თანხა იხარჯება. ჩვენ შეგვიძლია მადლიერების გამოვლენა მსოფლიო საქმისთვის ნებაყოფლობითი შესაწირავის გაღებით. ამის გაკეთება შეიძლება როგორც ჩვენს სამეფო დარბაზში, ისე კონგრესის ჩატარების ადგილზე.
◼ უბედური შემთხვევები და სასწრაფო დახმარება: სასწრაფო დახმარების სამსახურის პერსონალი ხშირად ჩივის, რომ მათ უმნიშვნელო პრობლემების გამო იძახებენ. თუ კონგრესზე სამედიცინო დახმარება დაგჭირდათ, გთხოვთ უთხარით თქვეს გვერდზე მჯდომს, რათა ის დაუყოვნებლივ დაუკავშირდეს კონგრესზე განთავსებულ პირველი დახმარების განყოფილებას. გამოცდილი და-ძმები შეაფასებენ მდგომარეობის სერიოზულობას და აღმოგიჩენენ დახმარებას. აუცილებლობის შემთხვევაში ისინი თავად გამოიძახებენ სასწრაფო დახმარებას.
◼ ჩამწერი აპარატურა: არანაირი ჩამწერი საშუალებების შეერთება არ შეიძლება ელექტროქსელში ან ხმის გამაძლიერებელ სისტემაში. ჩამწერი აპარატურა ისე უნდა გამოიყენოთ, რომ სხვებს ხელი არ შეუშალოთ.
◼ სუნამოების გამოყენება: ზოგჯერ კონგრესები დახურულ დარბაზებში ტარდება, სადაც ჰაერის ვენტილაციაა საჭირო. ამიტომ, ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და დაინახავს, რომ ვინმე ინტერესს ავლენს, მან უნდა გამოიყენოს ბლანკი „გთხოვთ მოინახულოთ“ (S-43). მაუწყებლებს თან უნდა ჰქონდეთ კონგრესზე ერთი-ორი ასეთი ბლანკი. კონგრესზე ამ ბლანკების მისაღებად აგრეთვე შეგიძლიათ მიაკითხოთ პასუხისმგებელ ძმებს. შევსებული ბლანკები შეიძლება გადაეცეს ამავე განყოფილებას ან კონგრესიდან დაბრუნების შემდეგ თქვენი კრების მდივანს. იხილეთ 2005 წლის თებერვლის „ჩვენი სამეფო მსახურება“, გვ. 6.