სულიერი კვებისა და სიხარულის დრო
1. როგორ ზრუნავს იეჰოვა თავისი მსახურების სულიერ მოთხოვნილებებზე?
1 იეჰოვა სიყვარულით ზრუნავს თავისი მსახურების სულიერ მოთხოვნილებებზე. მაშინ როცა ქვეყნიერება მთლიანობაში სულიერად შიმშილობს, ჩვენ მართლაც რომ შესანიშნავად ვიკვებებით (ეს. 65:13). ერთ-ერთი საშუალება, რითაც იეჰოვა სულიერად გვკვებავს, არის ჩვენი ყოველწლიური საოლქო კონგრესები. ემზადები წინასწარ, რომ საოლქო კონგრესის სამივე დღეს დაესწრო? ჩვენთვის გემრიელი და ნოყიერი სულიერი ნადიმი მზადდება კონგრესზე სახელწოდებით „მიჰყევით ღვთის სულის ხელმძღვანელობას!“
2. რა უნდა დავგეგმოთ წინასწარ?
2 წინასწარ დაგეგმე: „მუყაითის გეგმები წარმატებულია“ (იგავ. 21:5). ამიტომ, თუ კონგრესის დღეებში სამუშაოდან გათავისუფლება გჭირდება იმისათვის, რომ სამივე დღეს დაესწრო, ნუ გადადებ დამსაქმებელთან დალაპარაკებას. თუ ღამის გასათევი დაგჭირდება, აგვარებ ამ საკითხს წინასწარ? თადარიგი დაიჭირე იმაზე, რომ შესვენების დროს საკვების მისაღებად კონგრესის ტერიტორიის დატოვება არ მოგიწიოს და შეგეძლოს ძმებთან ურთიერთობა. დაგეგმე, ყოველდღე ადრე მიხვიდე კონგრესზე, ისე რომ სიმღერისა და ლოცვის დროს უკვე შენს ადგილზე იყო.
3. როგორ უნდა გვეცვას კონგრესზე?
3 ჩვენი ტანსაცმელი მოკრძალებული და სათანადოდ შერჩეული უნდა იყოს (1 ტიმ. 2:9, 10). საოლქო კონგრესი გარშემო მცხოვრები ხალხისთვის დამოწმების შესანიშნავ შესაძლებლობას გვაძლევს. სამკერდე ნიშნებითა და ღირსეული გარეგნობით ჩვენ გამოვირჩევით სხვებისგან და გარეშეებს კარგ შთაბეჭდილებას ვუტოვებთ.
4. რა დაგვეხმარება, რომ ოჯახის წევრებთან ერთად მაქსიმალური სარგებლობა მივიღოთ კონგრესის პროგრამიდან?
4 ყურადღებით მოუსმინე პროგრამას: ჩვენ ნამდვილად არ გვსურს, რომ ამ სულიერ ნადიმზე რომელიმე „ლუკმა“ გამოვტოვოთ! (იგავ. 22:17, 18). სცენიდან წაკითხული ბიბლიური მუხლებისთვის თვალის მიდევნება და მოკლე ჩანაწერების გაკეთება დაგვეხმარება, რომ პროგრამაზე ვიყოთ კონცენტრირებულნი და ყურადღება არ გაგვეფანტოს. საღამოთი ჩვენი ჩანაწერების გამოყენებით შეგვიძლია სხვებთან ერთად ვიმსჯელოთ იმ მთავარ აზრებზე, რომლებიც მოვისმინეთ. გასულ წლებში შეინიშნა, რომ ზოგი ახალგაზრდა პროგრამის მსვლელობის დროს ერთად იჯდა და ლაპარაკობდა ან მობილური ტელეფონით SMS-ებს აგზავნიდა. თუ შვილები გყავთ, თუნდაც ისინი უკვე მოზარდები იყვნენ, უმჯობესი იქნება, რომ მთელი ოჯახი ერთად ისხდეთ და უსმენდეთ პროგრამას, ვიდრე ახალგაზრდები სხვა თანატოლებთან ერთად ისხდნენ ცალკე.
5. როგორ შეგვიძლია, რომ კონგრესზე დასწრება უფრო სასიამოვნო გავხადოთ?
5 ისიამოვნე და-ძმებთან ურთიერთობით: გემრიელი საკვების მიღება მაშინ უფრო სასიამოვნოა, როცა მეგობრებთან ერთად ვიმყოფებით (იგავ. 15:17). მსგავსადვე, და-ძმებთან ურთიერთობა კონგრესს ჩვენთვის უფრო სასიამოვნოს ხდის. ამიტომ, სანამ პროგრამა დაიწყება, კარგი იქნება, თუ ინიციატივას ავიღებთ, გავეცნობით კონგრესის სხვა დელეგატებს და დავტკბებით მათთან ურთიერთობით (ფსალმ. 133:1). როდესაც თავმჯდომარე თავაზიანად გვთხოვს, მუსიკის დაწყებამდე დავიკავოთ ადგილები, მალევე უნდა დავასრულოთ საუბარი და პროგრამის დაწყებისას უკვე ჩვენ-ჩვენს ადგილებზე უნდა ვისხდეთ.
6. მოყევი, თუ რა სიტუაციაში მოგეცა პირადად შენ დამოწმების შესაძლებლობა.
6 მზად იყავი დასამოწმებლად: ჩვეულებრივ, კონგრესი დამოწმების კარგ შესაძლებლობას გვაძლევს. კონგრესის მრავალ დელეგატს პროგრამის შემდეგ ხშირად ქუჩაში აჩერებენ და ეკითხებიან, რას ნიშნავს სამკერდე ნიშანზე დაწერილი კონგრესის სახელწოდება. ეს კი საუბრისა და ჭეშმარიტების შესახებ დამოწმების კარგ შესაძლებლობას იძლევა. ზოგი მათგანი, ვინც ასეთი საუბრის შემდეგ კონგრესზე დაპატიჟეს, დაესწრო კონგრესს.
7. რატომ უნდა დავესწროთ მომავალ საოლქო კონგრესს?
7 ათასობით საათი სჭირდება პროგრამის მომზადებას, საკონგრესო ადგილების მოწესრიგებას, იმ განყოფილებების ორგანიზებას, რომლებიც კონგრესზე ფუნქციონირებს, და მოხსენებების მომზადებას. სიყვარულით გაწეული მთელი ის შრომა, რომელიც სულიერი ნადიმის მომზადებას ხმარდება, მეტყველებს იმაზე, თუ რა სათუთად ზრუნავს იეჰოვა თავის ხალხზე. მოდი ყველა დავესწროთ ამ სულიერ ნადიმს და ვისიამოვნოთ მისით! თუ ასე მოვიქცევით, ქვეყნიერებისგან განსხვავებით, ‘სიხარულით შევძახებთ მხიარული გულის გამო’ (ეს. 65:14).
[ჩარჩო 4 გვერდზე]
შეხსენებები საოლქო კონგრესთან დაკავშირებით
◼ პროგრამის განრიგი: პროგრამა სამივე დღეს 9:20-ზე დაიწყება. შესვლა შესაძლებელი იქნება 8:00 საათიდან. როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები, რათა პროგრამა სათანადოდ დაიწყოს. პარასკევს და შაბათს პროგრამა 17:05-ზე დასრულდება, ხოლო კვირას — 16:10-ზე.
◼ მანქანების დასაყენებელი ადგილი: მიჰყევით მომწესრიგებლების მითითებებს.
◼ ადგილების დაკავება: ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით.
◼ საკვები შუადღის შესვენებისთვის: გთხოვთ, თან მოიტანეთ საჭმელი, რათა შუადღის შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის მოტანა, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრების, მინის ჭურჭლისა და ალკოჰოლური სასმელების მოტანა.
◼ შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ მსოფლიო საქმისთვის ნებაყოფლობითი შესაწირავის გაღებით. ამის გაკეთება შეიძლება როგორც ჩვენს სამეფო დარბაზში, ისე კონგრესის ჩატარების ადგილზე.
◼ უბედური შემთხვევები და სასწრაფო დახმარება: თუ კონგრესზე სამედიცინო დახმარება დაგჭირდათ, გთხოვთ უთხარით თქვენს გვერდზე მჯდომს, რათა ის დაუყოვნებლივ დაუკავშირდეს კონგრესზე განთავსებულ პირველი დახმარების განყოფილებას. გამოცდილი და-ძმები შეაფასებენ მდგომარეობის სერიოზულობას და აღმოგიჩენენ დახმარებას. აუცილებლობის შემთხვევაში ისინი თავად გამოიძახებენ სასწრაფო დახმარებას.
◼ საბავშვო ეტლები და დასაკეცი სკამები: მშობლებმა კონგრესზე არ უნდა წამოიღონ საბავშვო ეტლები და დასაკეცი სკამები. თუმცა, მათ შეუძლიათ წამოიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება ზურგიან სკამებზე, მშობლის გვერდით.
◼ სუნამოების გამოყენება: ზოგჯერ კონგრესები დახურულ დარბაზებში ტარდება, სადაც ჰაერის ვენტილაციაა საჭირო. ამიტომ, ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და დაინახავს, რომ ვინმე ინტერესს ავლენს, მან უნდა გამოიყენოს ბლანკი „გთხოვთ მოინახულოთ“ (S-43). მაუწყებლებს თან უნდა ჰქონდეთ კონგრესზე ერთი-ორი ასეთი ბლანკი. შევსებული ბლანკები შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს. იხილეთ 2005 წლის თებერვლის „ჩვენი სამეფო მსახურება“, გვ. 6.
◼ დაბინავება: როდესაც შეკვეთას აკეთებთ ბინასა თუ კერძო სახლში დაბინავებასთან დაკავშირებით, გაითვალისწინეთ შემდეგი: 1) გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5); 2) არავის არ გადასცეთ დაბინავების ბლანკი „ბინა“ (CO-4), სადაც მოცემულია ინფორმაცია თქვენს საცხოვრებელ ადგილთან დაკავშირებით; 3) გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა; 4) უყურადღებოდ არ დატოვოთ თქვენი შვილები; 5) როდესაც თანამორწმუნეების სტუმართმოყვარეობით სარგებლობთ, გამოავლინეთ მათ მიმართ მადლიერება და გახსოვდეთ საქმეების 20:35-ში მოცემული პრინციპი; 6) თუ რაიმე მიზეზის გამო გიწევთ თქვენი შეკვეთის გაუქმება, აუცილებლად შეატყობინეთ დაბინავების განყოფილებას.