ემზადები სულიერი ნადიმისთვის?
1. რა სახის მომზადებაა საჭირო ნადიმის გასამართავად?
1 ნადიმის გასამართავად კარგი მომზადებაა საჭირო. აუცილებელია პროდუქტის შეძენა, მომზადება და სუფრაზე მიტანა. სუფრის მომსახურება კარგ ორგანიზებას მოითხოვს. გარდა ამისა, ადგილის შერჩევა და მოწესრიგებაა საჭირო. სტუმრებიც სათანადოდ უნდა მოემზადონ, განსაკუთრებით თუ შორი მანძილიდან მოდიან. მიუხედავად იმისა, რომ ნადიმის გამართვა დიდ შრომასა და ძალისხმევას მოითხოვს, ძალიან სასიამოვნოა მეგობრებთან და ოჯახის წევრებთან ერთად გემრიელი და ნოყიერი საკვების მირთმევა. მალე იეჰოვას მოწმეები მთელ მსოფლიოში დიდ თუ პატარა ჯგუფებად შეიკრიბებიან, რომ საოლქო კონგრესზე, რომლის დევიზიცაა „იფხიზლეთ!“, დატკბნენ სულიერი ნადიმით. კონგრესის სათანადოდ ჩასატარებლად ბევრი რამ კეთდება. ჩვენ ყველანი მიწვეულნი ვართ ამ კონგრესზე. მთლიან პროგრამას რომ დავესწროთ და სრულად ვისარგებლოთ ამ ღონისძიებით, საჭიროა, ჩვენც კარგად მოვემზადოთ (იგავ. 21:5).
2. რა არის საჭირო იმისთვის, რომ პროგრამის ყველა ნაწილს დავესწროთ?
2 სრულად ისარგებლე პროგრამით: აკეთებ ყველაფერს იმისთვის, რომ პროგრამის თითოეულ ნაწილს დაესწრო? თუ საჭიროა, აცნობე შენს დამსაქმებელს, რომ შენთვის კონგრესის ყველა დღეზე დასწრება მნიშვნელოვანია, მათ შორის პირველ დღეზეც. დროულად მოაგვარე ტრანსპორტირებისა და დაბინავების საკითხი. უხუცესებმა უნდა იზრუნონ ხანდაზმულებსა და მათზე, ვისაც ფიზიკური უძლურების გამო დახმარება სჭირდება (იერ. 23:4; გალ. 6:10).
3. რატომ არ უნდა დავესწროთ იმ საერთაშორისო კონგრესს, რომელზეც არა ვართ მიწვეულნი?
3 ზოგ ქვეყანაში საერთაშორისო კონგრესები ჩატარდება. გახსოვდეს, რომ ამ კონგრესებზე კონკრეტული კრებები და უცხოელი დელეგატები არიან მიწვეულნი. ფილიალს წინასწარ აქვს განსაზღვრული, რამდენი დელეგატი მიიწვიოს საერთაშორისო კონგრესზე იმის გათვალისწინებით, თუ რა რაოდენობის დასაჯდომი ადგილია საკონგრესო ტერიტორიაზე და რამდენი ადამიანის დაბინავებაა შესაძლებელი. თუ მაუწყებლები იმ საერთაშორისო კონგრესს დაესწრებიან, რომელზეც მათი კრება არ არის მიწვეული, ამან შეიძლება ხალხმრავლობის გამო სირთულეები შექმნას.
4. რა უნდა გავითვალისწინოთ კონგრესის თითოეული დღის დაწყებამდე?
4 შეეცადე, კონგრესის ტერიტორიაზე თითოეულ დღეს ისეთ დროს მიხვიდე, რომ პროგრამის დაწყებამდე შეძლო ადგილის მონახვა. ვიდრე მუსიკა ჩაირთვება, თვალი გადაავლე დაბეჭდილ პროგრამას. ეს დაგეხმარება, გული განაწყო თემების მოსასმენად (ეზრ. 7:10). როდესაც პროგრამის წამყვანი შეხვედრას მუსიკით გახსნის, შენი ადგილიდან მოუსმინე მას და განეწყვე სიმღერისა და ლოცვისთვის.
5. როგორ შეუძლია ოჯახს, ყურადღებით მოისმინონ პროგრამა?
5 თუ ოჯახი ერთად დაჯდება, მშობლები უკეთ მიაქცევენ ყურადღებას შვილებს, რომ პროგრამა გულდასმით მოისმინონ (კან. 31:12). მოგიწოდებთ, რომ სცენიდან წაკითხულ მუხლებს შენს ბიბლიაში მიადევნო თვალი. თუ მოკლე ჩანაწერებს გააკეთებ, პროგრამას ყურადღებით მოისმენ. ასეთი ჩანაწერები მოგვიანებით მთავარი აზრების გახსენებაში დაგეხმარება. თუ ამის აუცილებლობა არ არის, პროგრამის მსვლელობისას მოერიდე ლაპარაკს და ნუ დატოვებ შენს ადგილს. მობილურმა ტელეფონმა ხელი არ უნდა შეგვიშალოს არც ჩვენ და არც სხვებს თემების მოსმენაში. კარგი იქნება, თუ ყოველი დღის ბოლოს სხვებთან ერთად იმსჯელებ, ყველაზე მეტად რა მოგეწონა პროგრამიდან.
6. რის შესაძლებლობას გვაძლევს საოლქო კონგრესი და რა დაგვეხმარება, რომ სრულად გავიხაროთ და-ძმებთან ურთიერთობით?
6 საოლქო კონგრესზე შესაძლებლობა მოგვეცემა, გავიხაროთ და-ძმებთან ახლო ურთიერთობით, რასაც ეს ქვეყნიერება მოკლებულია (ფსალმ. 133:1—3; მარ. 10:29, 30). შესვენების დროს შეგიძლია გაიცნო გვერდით მსხდომნი და გამოელაპარაკო მათ. ამას კი იმ შემთხვევაში შეძლებ, თუ შესვენებისას წასახემსებლად კონგრესის ტერიტორიას არ დატოვებ. ასეთი ურთიერთობა ყველასთვის გამამხნევებელი იქნება (რომ. 1:11, 12).
7. რა უნდა გავითვალისწინოთ ტანსაცმლის შერჩევისას?
7 ჩაცმულობა: იეჰოვამ ისრაელებს უბრძანა, რომ ტანსაცმლის კალთის ფოჩებზე ლურჯი თასმები გაეკეთებინათ (რიცხ. 15:37—41). ეს შეახსენებდა მათ, რომ სხვა ერებისგან გამორჩეული ხალხი იყო და იეჰოვასთვის უნდა ეცათ თაყვანი. კონგრესის პერიოდში ჩვენი ღირსეული და მოკრძალებული ჩაცმულობით ცხადვყოფთ, რომ ამ ქვეყნიერებისგან გამორჩეულნი ვართ. როდესაც პროგრამის შემდეგ ქალაქში გავდივართ, ჩვენი ჩაცმულობით შეგვიძლია სხვებზე კარგი შთაბეჭდილება მოვახდინოთ; ამიტომ კონგრესისთვის შესაფერისი ტანსაცმელი შეარჩიე.
8. როგორ შეგვიძლია დავუმოწმოთ სხვებს კონგრესის პერიოდში?
8 ხელიდან არ გაუშვა დამოწმების შესაძლებლობა: თუ მიზნად გვექნება დასახული, ჩვენ შევძლებთ დავუმოწმოთ იმ ტერიტორიაზე მცხოვრებ ხალხს, სადაც კონგრესი ტარდება. ერთი ძმა მეუღლესთან ერთად პროგრამის შემდეგ რესტორანში წავიდა. მან ოფიციანტს თავის სამკერდე ნიშანზე მიუთითა და ჰკითხა: „შენიშნეთ, რომ ბევრს უკეთია ასეთი ნიშანი?“ ოფიციანტმა უპასუხა, რომ შენიშნა და აინტერესებდა, რატომ ეკეთათ ეს სამკერდე ნიშნები. ძმას დამოწმების შესაძლებლობა მიეცა, ბოლოს კი ოფიციანტი კონგრესზე დაპატიჟა.
9. როგორ შეგვიძლია მადლიერება გამოვხატოთ ჩვენი მასპინძლისადმი, იეჰოვასადმი?
9 მართალია, ძმები წარმოადგენენ თემებს, ინტერვიუებსა და ინსცენირებებს, მაგრამ ამ სულიერი ნადიმით ყოველწლიურად ჩვენი ზეციერი მამა, იეჰოვა გვიმასპინძლდება (ეს. 65:13, 14). მასპინძლისადმი მადლიერებას იმ შემთხვევაში გამოვავლენთ, თუ კონგრესის თითოეულ დღეს დავესწრებით და „გემოს გავუსინჯავთ ყველა კერძს“. უკვე ემზადები სულიერი ნადიმისთვის?
[ჩარჩო 6 გვერდზე]
შეხსენებები საოლქო კონგრესთან დაკავშირებით
◼ პროგრამის განრიგი: პროგრამა სამივე დღეს 9:20-ზე დაიწყება. შესვლა შესაძლებელი იქნება 8:00 საათიდან. როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები, რათა პროგრამა სათანადოდ დაიწყოს. პარასკევს და შაბათს პროგრამა 16:55-ზე დასრულდება, ხოლო კვირას — 16:00-ზე. საერთაშორისო კონგრესის პროგრამა ხუთშაბათს დაიწყება 13:20-ზე და დასრულდება 16:45-ზე.
◼ ტრანსპორტის დასაყენებელი ადგილი: გაითვალისწინეთ შემდეგი: 1) მიჰყევით მომწესრიგებლების მითითებებს. 2) კონგრესის ტერიტორიასთან მოძრაობა რომ არ შევაფერხოთ, მგზავრები ავტოსადგომზე უნდა გადმოვიდნენ ტრანსპორტიდან და პროგრამის შემდეგ ისევ ავტოსადგომზე უნდა ჩასხდნენ ტრანსპორტში. როგორც წესი ტრანსპორტის დასაყენებელი ადგილები შეზღუდულია, ამიტომ, ავტოსადგომი რომ არ გადაიტვირთოს, კარგი იქნება, თუ ცარიელი ავტომობილით არ იმგზავრებთ და სხვებსაც ჩაისვამთ.
◼ ადგილების დაკავება: ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით.
◼ საკვები შუადღის შესვენებისთვის: გთხოვთ, თან წაიღეთ საჭმელი, რათა შუადღეს, შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის წაღება, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრების, მინის ჭურჭლისა და ალკოჰოლური სასმელების მიტანა.
◼ შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ იმით, რომ ნებაყოფლობითი შესაწირავი გავიღოთ მსოფლიო საქმისთვის. ამის გაკეთება შეიძლება როგორც ჩვენს სამეფო დარბაზში, ისე კონგრესის ჩატარების ადგილზე.
◼ უბედური შემთხვევები და სასწრაფო დახმარება: სასწრაფო დახმარების სამსახურის პერსონალი ხშირად ჩივის, რომ მათ უმნიშვნელო პრობლემების გამო იძახებენ. თუ კონგრესზე სამედიცინო დახმარება დაგჭირდათ, გთხოვთ, უთხარით თქვენს გვერდით მჯდომს, რათა ის დაუყოვნებლივ დაუკავშირდეს კონგრესის პირველი დახმარების განყოფილებას. გამოცდილი და-ძმები შეაფასებენ მდგომარეობის სერიოზულობას და აღმოგიჩენენ დახმარებას. აუცილებლობის შემთხვევაში ისინი თავად გამოიძახებენ სასწრაფო დახმარებას.
◼ ფეხსაცმელი: კონგრესზე ზოგი შეუფერებელ ფეხსაცმელს იცვამს და იყო შემთხვევები, როცა მათ ტრავმები მიიღეს იმის გამო, რომ ფეხი გადაუბრუნდათ ან წაიქცნენ. კარგი იქნება, თუ მოკრძალებულ და მოხერხებულ ფეხსაცმელს ჩაიცვამთ, რომ თავისუფლად იაროთ კონგრესის ტერიტორიაზე, კიბეებზე და სხვა.
◼ ჩამწერი აპარატურა: არანაირი ჩამწერი საშუალების შეერთება არ შეიძლება ელექტროქსელში ან ხმის გამაძლიერებელ სისტემაში. ჩამწერი აპარატურა ისე უნდა გამოიყენოთ, რომ სხვებს ხელი არ შეუშალოთ.
◼ საბავშვო ეტლები და დასაკეცი სკამები: მშობლებმა კონგრესზე არ უნდა წამოიღონ საბავშვო ეტლები და დასაკეცი სკამები. თუმცა მათ შეუძლიათ წამოიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება სკამის საზურგეზე.
◼ სუნამოების გამოყენება: ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და დაინახავს, რომ ვინმე ინტერესს ავლენს, მან უნდა გამოიყენოს ბლანკი „გთხოვთ მოინახულოთ“ (S-43). მაუწყებლებს თან უნდა ჰქონდეთ კონგრესზე ერთი-ორი ასეთი ბლანკი. შევსებული ბლანკები შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს. იხილეთ 2005 წლის თებერვლის „ჩვენი სამეფო მსახურება“, გვ. 6.
◼ დაბინავება: როდესაც შეკვეთას აკეთებთ ბინასა თუ კერძო სახლში დაბინავების შესახებ, გაითვალისწინეთ შემდეგი: 1) გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5); 2) არავის მისცეთ დაბინავების ბლანკი „ბინა“ (CO-4), სადაც მოცემულია ინფორმაცია თქვენს საცხოვრებელ ადგილთან დაკავშირებით; 3) გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა; 4) უყურადღებოდ არ დატოვოთ თქვენი შვილები; 5) როდესაც თანამორწმუნეების სტუმართმოყვარეობით სარგებლობთ, გამოავლინეთ მათ მიმართ მადლიერება და გახსოვდეთ საქმეების 20:35-ში მოცემული პრინციპი; 6) თუ რაიმე მიზეზის გამო გიწევთ თქვენი შეკვეთის გაუქმება, რაც შეიძლება მალე შეატყობინეთ დაბინავების განყოფილებას.