20 ოქტომბრიდან 16 ნოემბრის ჩათვლით ჩატარდება ტრაქტატების გავრცელების სპეციალური კამპანია!

¹ ოცი ოქტომბრიდან დაწყებული ოთხი კვირის განმავლობაში გავავრცელებთ ახალ ტრაქტატს „გინდათ იცოდეთ სიმართლე?“. ვიმედოვნებთ, რომ ეს სპეციალური კამპანია, რომელიც მთელ მსოფლიოში ჩატარდება, დაეხმარება მრავალს, რომ გაიგონ ღვთის სიტყვაში მოცემული ჭეშმარიტება (იოან. 17:17).

² ტრაქტატში მოკლედაა გაცემული პასუხები შემდეგ ექვს მნიშვნელოვან კითხვაზე: „სულერთია ღმერთისთვის ის, რაც ჩვენ გარშემო ხდება?“, „მოეღება ოდესმე ბოლო ომებსა და ადამიანთა ტანჯვას?“, „რა ხდება სიკვდილის შემდეგ?“, „ვნახავთ ოდესმე ჩვენს გარდაცვლილ ახლობლებს?“, „როგორ ვილოცოთ, ღვთისგან პასუხი რომ მივიღოთ?“ და „რა სჭირდება ადამიანს ნამდვილი ბედნიერებისთვის?“. ქრისტიანული სამყაროს ეკლესიები დამაკმაყოფილებელ პასუხებს ვერ სცემენ ასეთ კითხვებს. მათაც კი, რომლებიც თავს ქრისტიანებად არ თვლიან, აინტერესებთ ზემოთ მოცემულ კითხვებზე პასუხები. მათ შეიძლება არც კი იციან, რომ ბიბლია იძლევა ნათელ პასუხებს. ვფიქრობთ, რომ მრავალს დააინტერესებს ეს ტრაქტატი.

³ კარგად დაამუშავე შენი უბანი: ეცადე, რომ რაც შეიძლება მეტი უბანი დაამუშავო. თუ დიდი უბანი გაქვს, შესაძლოა უხუცესებმა გირჩიონ, რომ ტრაქტატის ერთი ეგზემპლარი დატოვო მათ კარებთან, რომლებიც სახლში არ დაგხვდებიან. არ დაგავიწყდეს, რომ ტრაქტატები მისცე მეზობლებს, ნათესავებს, თანამშრომლებს, თანაკლასელებს ან მათ, ვისაც რეგულარულად ინახულებ. შესაძლოა, მოახერხო კიდეც ისე მოაგვარო საქმეები, რომ ოქტომბერში ან ნოემბერში დამხმარე პიონერად იმსახურო. გყავს შვილები ან ბიბლიის ისეთი შემსწავლელები, რომლებიც სულიერად მიიწევენ წინ და შეესაბამებიან მოუნათლავ მაუწყებლად მსახურების მოთხოვნებს? თუ ასეა, ამის შესახებ აცნობე უხუცესებს, რომ მათაც შეძლონ, ჩვენთან ერთად მიიღონ მონაწილეობა ამ კამპანიაში.

⁴ როგორ შევთავაზოთ ტრაქტატი: კარგი იქნება, თუ მოკლე შეთავაზებას გავაკეთებთ, რადგან ეს შესაძლებლობას მოგვცემს, უფრო მეტ ადამიანს გავუზიაროთ ტრაქტატში მოცემული ცნობა. გარეკანზე მოცემული ექვსი კითხვიდან ერთ-ერთი დაუსვი მობინადრეს და შემდეგ პასუხიც ტრაქტატიდან უჩვენე. ეს დაეხმარება მაუწყებლებს, რომ თავიანთი შეთავაზება უბანზე მცხოვრები ადამიანების საჭიროებების შესაბამისად გააკეთონ. თუ ვინმე გამოავლენს ინტერესს, ჩანაწერებში აღნიშნე ეს და განმეორებით მიაკითხე. შაბათ-კვირას შეგვიძლია მობინადრეს ტრაქტატთან ერთად შევთავაზოთ მიმდინარე თვის ჟურნალები. კამპანიის დამთავრების შემდეგ, 17 ნოემბრიდან, გავავრცელებთ წიგნს „რას გვასწავლის ბიბლია?“. დარჩენილ ტრაქტატებს სხვა ტრაქტატების მსგავსად გავავრცელებთ.

⁵ დაიწყე ბიბლიის შესწავლები: ეს ტრაქტატი სპეციალურადაა შედგენილი ისე, რომ შევძლოთ ბიბლიის შესწავლების დაწყება. როდესაც განმეორებით მოინახულებ იმ მობინადრეს, რომელმაც ინტერესი გამოავლინა, შეგიძლია ჰკითხო, ტრაქტატში განხილული აზრებიდან, რომელი იყო მისთვის მანუგეშებელი. უჩვენე მას ტრაქტატის ბოლო გვერდი, სადაც ყურადღება გამახვილებულია ბიბლიის შესწავლაზე. შემდეგ მიაწოდე წიგნი „რას გვასწავლის ბიბლია?“ და თუ შესაძლებელია, მოკლედ განიხილე ერთი ან ორი აბზაცი წიგნიდან იმ საკითხზე, რომლითაც მობინადრე დაინტერესდა.

⁶ იეჰოვა ეძებს მათ, რომლებიც გამოავლენენ იმის სურვილს, რომ „სულითა და ჭეშმარიტებით“ სცენ მას თაყვანი (იოან. 4:23). მოდი, ყველამ მივიღოთ მონაწილეობა ამ სპეციალურ კამპანიაში, რომ დავეხმაროთ ხალხს ჭეშმარიტების გაგებაში!