შეკითხვების ყუთი

◼ უნდა გაავრცელონ იეჰოვას მოწმეებმა მოხსენებების აუდიოჩანაწერები ან ხელნაწერები?

ბიბლიური მოხსენებები სულიერად გვაძლიერებს და გვამხნევებს (საქ. 15:32). ამიტომ ბუნებრივია, გვსურს, ეს გამამხნევებელი ინფორმაცია მათაც გავუზიაროთ, ვინც შეხვედრას ვერ დაესწრო. რამდენადაც დღეს მრავალი ჩამწერი საშუალება არსებობს, მოხსენების ჩაწერა და გავრცელება ძალიან ადვილია. ზოგს ბევრი მოხსენების აუდიოჩანაწერი აქვს, მათ შორის ისეთები, რომლებიც წლების წინ წარმოითქვა. კარგი მოტივებიდან გამომდინარე, ისინი ამ ჩანაწერებს ზოგჯერ მეგობრებს აძლევენ. ზოგიერთებმა ვებ-გვერდები შექმნეს, რომლებზეც განათავსეს მოხსენებები, რომელთა გადაწერა ყველას შეუძლია.

ბუნებრივია, ცუდი არაფერია იმაში, თუ მოხსენებას პირადად ჩვენთვის ან ოჯახის წევრებისთვის ჩავიწერთ. გარდა ამისა, უხუცესებმა შეიძლება მოხსენების აუდიოჩანაწერი გააკეთონ კრების იმ წევრებისთვის, რომლებიც ავადმყოფობის გამო შეხვედრებს ვერ ესწრებიან. მაგრამ არსებობს საფუძვლიანი მიზეზები, რის გამოც არ უნდა გავავრცელოთ მოხსენებების აუდიოჩანაწერები ან ხელნაწერები.

იმის გამო, რომ მოხსენებები ადგილობრივი მოთხოვნების შესაბამისად წარმოითქმება, ჩვენ შეიძლება არასწორად აღვიქვათ მოხსენების ჩანაწერში მოსმენილი ესა თუ ის აზრი, რადგან არა ვართ გაცნობილი იმ მდგომარეობას, რისი გათვალისწინებითაც ის წარმოითქვა. რამდენადაც რთულია იმის დადგენა, თუ ვინ და როდის წარმოთქვა ეს მოხსენება, ძნელია იმის განსაზღვრა, რამდენად ზუსტია ეს ინფორმაცია და შეესაბამება თუ არა თანამედროვე გაგებას (ლუკ. 1:1—4). გარდა ამისა, მოხსენების ხელნაწერების ან აუდიოჩანაწერების გავრცელება შეიძლება ცდუნება აღმოჩნდეს მსმენელისთვის, რომ ზედმეტი ყურადღება გამოიჩინოს მომხსენებლის მიმართ და პატივი მიაგოს მას, ან თავად მომხსენებლისთვის (1 კორ. 3:5—7).

ერთგული და გონიერი მონა ბევრს შრომობს, რომ ზომიერად და „დროულად მისცეს“ სულიერი საზრდო ღვთის ხალხს (ლუკ. 12:42). ამაში შედის იეჰოვას მოწმეთა კრებებში წარმოსათქმელი მოხსენებების გეგმები და აუდიოჩანაწერები, რომელთა გადმოწერაც მოწმეების ოფიციალური ვებ-გვერდიდან არის შესაძლებელი (www.pr2711.com). შეგვიძლია დარწმუნებული ვიყოთ, რომ ერთგული და გონიერი მონა და ხელმძღვანელი საბჭო უზრუნველგვყოფს ყველაფრით, რაც რწმენის განსამტკიცებლად გვჭირდება (საქ. 16:4, 5).