პირველივე მონახულებისას აჩვენე მობინადრეს, როგორ ტარდება ბიბლიის შესწავლა

როდესაც მობინადრეს ბიბლიის შესწავლას ვთავაზობთ, ზოგი ამბობს, რომ არ აინტერესებთ ან ბიბლიას ეკლესიაში სწავლობენ. ბევრმა არ იცის, როგორ ვასწავლით ხალხს ბიბლიას, ამიტომ წარმოდგენაც კი არა აქვთ, რამდენად სასიამოვნოა ბიბლიის შესწავლა და როგორ ცოდნას აძლევს ადამიანს. ამიტომ, ნაცვლად იმისა, რომ პირველივე მონახულებისას მობინადრეს უბრალოდ შესწავლა შესთავაზო, შეგიძლია, რამდენიმე წუთი გამოყო და აჩვენო, როგორ ტარდება შესწავლა. მაგალითად, რა იქნება უკეთესი, ვინმეს უთხრა, რომ კარგი მზარეული ხარ, მაგრამ შესთავაზო, რომ საჭმელს მოგვიანებით მიუტან, თუ მაშინვე გაასინჯო გემო? ამისათვის შენ მხოლოდ რამდენიმე წუთი დაგჭირდება, თუ გამოიყენებ 2006 წლის იანვრის „ჩვენი სამეფო მსახურების“ მე-5 გვერდზე მოცემულ რჩევას.

„თქვენი აზრით, ოდესმე დადგება ისეთი დრო, როცა ეს სიტყვები შესრულდება? [წაიკითხე ესაიას 33:24 და დაელოდე, გიპასუხოს] ამ საკითხის შესახებ მსურს, მნიშვნელოვანი აზრი წაგიკითხოთ“. მიაწოდე მობინადრეს წიგნი „რას გვასწავლის ბიბლია?“ და ყურადღება გაუმახვილე 36-ე გვერდზე მოცემულ 22-ე აბზაცზე. წაიკითხე აბზაცთან დასმული შეკითხვა და სთხოვე, მოძებნოს პასუხი, როცა ამ აბზაცს წაიკითხავ. შემდეგ კითხვა გაიმეორე და მოუსმინე მობინადრის პასუხს. რომელიმე მუხლი ერთად წაიკითხეთ. ბოლოს წამოჭერი კითხვა, რომელსაც განმეორებითი მონახულებისას უპასუხებ და უთხარი, როდის მიაკითხავ. შენ უკვე ბიბლიის შესწავლა დაიწყე!