გახსენების საღამოს მოსაწვევების გავრცელება 2 აპრილს დაიწყება

1. როდის გავავრცელებთ წელს გახსენების საღამოს მოსაწვევებს და რატომ არის ეს ყოველწლიური კამპანია მნიშვნელოვანი?

¹ წლის ყველაზე მნიშვნელოვანი მოვლენის — ქრისტეს სიკვდილის გახსენების საღამოს — მოსაწვევებს 2-დან 17 აპრილის ჩათვლით გავავრცელებთ. გასულ წლებში ამ ყოველწლიურ კამპანიას მრავალი გამოეხმაურა. მაგალითად, გახსენების საღამოს დღეს ერთმა ქალმა ფილიალში დარეკა და თქვა: „სახლში რომ მოვედი, კართან მოსაწვევი დამხვდა. მინდა დავესწრო, მაგრამ არ ვიცი, რომელ საათზე იწყება“. ძმამ აუხსნა, რომ დრო მოსაწვევზე იყო მითითებული. საუბრის ბოლოს ეს ქალი ძმას შეჰპირდა, რომ ამ საღამოს აუცილებლად დაესწრებოდა.

2. როგორ შევთავაზოთ მოსაწვევი?

² როგორ გავავრცელოთ მოსაწვევები: კარგი იქნება, თუ გავაკეთებთ მოკლე შეთავაზებას, ვინაიდან დრო შეზღუდულია და გვინდა, რომ ჩვენი კრების ტერიტორიაზე ყველასთან მოვასწროთ მისვლა. შეგვეძლო გვეთქვა: „გამარჯობათ. გვინდა თქვენი ოჯახი დავპატიჟოთ მნიშვნელოვან ყოველწლიურ ღონისძიებაზე, რომელიც მთელ მსოფლიოში ჩატარდება კვირას, 17 აპრილს. [მიაწოდე მობინადრეს მოსაწვევი.] სწორედ ამ დღეს მოკვდა იესო. წარმოითქმება ბიბლიური მოხსენება, რომელშიც ახსნილი იქნება, თუ რა უნდა გავაკეთოთ იმისათვის, რომ ქრისტეს გამომსყიდველურმა მსხვერპლმა სარგებლობა მოგვიტანოს. ამ მოსაწვევზე მითითებულია, სად და როდის ჩატარდება ეს შეხვედრა“.

3. როგორ მოვიწვიოთ რაც შეიძლება მეტი ადამიანი?

³ თუ თქვენი კრების ტერიტორია დიდია, უხუცესებმა შეიძლება გადაწყვიტონ, რომ მათ, ვინც სახლში არ დაგხვდებათ, კართან დაუტოვოთ მოსაწვევი. კარგი იქნება, თუ ეს მოსაწვევი არ მიიქცევს გამვლელთა ყურადღებას. შეგიძლიათ მოიწვიოთ ნათესავები, თანამშრომლები, თანაკლასელები, ნაცნობები და ყველა, ვისთანაც განმეორებითი მონახულებები გაქვთ. შაბათ-კვირას, მოსაწვევებთან ერთად შეგიძლიათ ჟურნალებიც შესთავაზოთ, თუ სიტუაცია ამის საშუალებას გაძლევთ. შეგიძლიათ იმსახუროთ დამხმარე პიონერად აპრილში, რათა უფრო სრული მონაწილეობა მიიღოთ ამ სიხარულის მომგვრელ კამპანიაში?

4. რატომ გვსურს, რომ დაინტერესებულები დაესწრონ გახსენების საღამოს?

⁴ მართლაც, რა დიდებულ დამოწმებას მიიღებენ გახსენების საღამოზე მოსულები! ისინი მოისმენენ იმის შესახებ, თუ რა დიდი სიყვარული გამოავლინა იეჰოვამ, როდესაც გამოსასყიდი გაიღო (იოან. 3:16). გაიგებენ, რა კურთხევებს მოუტანს ღვთის სამეფო კაცობრიობას (ეს. 65:21—23). მეტი ინფორმაციის მისაღებად, დამსწრეებს შეუძლიათ, მომწესრიგებლებს ბიბლიის შესწავლა სთხოვონ. ვლოცულობთ, რომ მრავალი გულწრფელი ადამიანი გამოეხმაუროს ამ კამპანიას და დაესწროს გახსენების საღამოს!