სულიერად გამომაცოცხლებელი სამი დღე
1. რის მოლოდინი შეგვიძლია გვქონდეს წლევანდელი საოლქო კონგრესიდან?
1 სულიერად გადამწვარ სატანის ამ ქვეყნიერებაში იეჰოვა კვლავ განაგრძობს თავისი მსახურების გამოცოცხლებას (ეს. 58:11). ერთ-ერთი საშუალება, რითაც იეჰოვა ძალებს გვაძლევს, ყოველწლიური საოლქო კონგრესია. ახლა, როცა წლევანდელი კონგრესი ახლოვდება, როგორ შეგვიძლია მოვემზადოთ, რომ სულიერად გავმხნევდეთ და სხვებიც გავამხნევოთ? (იგავ. 21:5).
2. რა უნდა დაგეგმო წინასწარ?
2 თუ ეს ჯერ არ გაგიკეთებია, დღესვე შეგიძლია პირად თუ სამსახურის გეგმებში შეიტანო ცვლილებები ისე, რომ კონგრესის სამივე დღეს დაესწრო. წინასწარ განსაზღვრე, რა დრო გჭირდება კონგრესზე მისასვლელად, რომ დროულად მიხვიდე და პროგრამის დაწყებამდე შეძლო ადგილის პოვნა. ჩვენ ნამდვილად არ გვინდა, რომ იეჰოვას მიერ მომზადებული გამომაცოცხლებელი სულიერი საზრდოდან რამე გამოგვრჩეს! (ეს. 65:13, 14). უკვე იცი, როგორ მიხვალ კონგრესზე და სად გაათევ ღამეს?
3. რა რჩევები დაგვეხმარება ჩვენ და ჩვენს ოჯახებს, რომ სრული სარგებლობა მივიღოთ კონგრესის პროგრამიდან?
3 რა დაგეხმარება, რომ ყურადღება არ გაგეფანტოს მთელი კონგრესის განმავლობაში? თუ შესაძლებელია, კონგრესის დღეებში საკმარისი დრო გამონახე დასვენებისთვის. უყურე მომხსენებელს. თვალი გაადევნე წაკითხულ მუხლებს შენს ბიბლიაში. გააკეთე მოკლე ჩანაწერები. მთელი ოჯახი ერთად დასხედით. მშობლებო დაეხმარეთ შვილებს ყურადღებით მოსმენაში (იგავ. 29:15). საღამოობით ოჯახის წევრებთან ერთად შეგიძლიათ განიხილოთ, ვის რა მოეწონა. კონგრესი შენი ოჯახისთვის გამომაცოცხლებელი იქნება პროგრამის დამთავრების შემდეგაც, თუ ოჯახთან ერთად თაყვანისცემის საღამოზე დროს გამოუყოფ ამ კონგრესიდან იმ საკითხების განხილვას, რომელიც შენს ოჯახს ეხება.
4. როგორ შეგვიძლია დავეხმაროთ კრების წევრებს, რომ შეძლონ კონგრესზე დასწრება?
4 დაეხმარე სხვებსაც, რომ სულიერად გამოცოცხლდნენ: ჩვენი სურვილია, რომ სულიერად სხვებიც გამოცოცხლდნენ. არიან კრებაში ხანდაზმული მაუწყებლები ან სხვები, რომელთაც დახმარება სჭირდებათ იმისათვის, რომ კონგრესს დაესწრონ? პირადად შენ, შეგიძლია მათ დაეხმარო? (1 იოან. 3:17, 18). უხუცესებმა, განსაკუთრებით ჯგუფის ზედამხედველებმა, უნდა იზრუნონ იმაზე, რომ ასეთმა მაუწყებლებმა საჭირო დახმარება მიიღონ.
5. როგორ შეგვიძლია კარგი მანერების გამოვლენა კონგრესის დროს?
5 კარგი მანერები გამომაცოცხლებელია: დღეს მრავალი ადამიანი საკუთარი თავის მოყვარულია და სხვის გრძნობებს არ ითვალისწინებს. მათგან განსხვავებით, რამდენად გამომაცოცხლებელია, ვიყოთ თანაქრისტიანებს შორის, რომლებიც კარგი მანერების გამოვლენას ცდილობენ (2 ტიმ. 3:2). კარგ მანერებს გამოვავლენთ, თუ დილის რვა საათის შემდეგ საკონგრესო ტერიტორიაზე წყნარად და მოწესრიგებულად შევალთ; აგრეთვე ადგილებს დავიკავებთ მხოლოდ მათთვის, ვინც ჩვენთან ერთად ცხოვრობს ან მგზავრობს ავტომობილით ან, ვისაც ბიბლიას ვასწავლით. გავითვალისწინოთ პროგრამის თავმჯდომარის თხოვნა და მუსიკის დაწყების შემდეგ დავიკავოთ ჩვენი ადგილები. კარგი მანერების გამოვლენა იქნება ისიც, თუ მობილურ ტელეფონებს გამოვრთავთ ან უხმო რეჟიმზე გადავიყვანთ, რომ სხვებს ხელი არ შევუშალოთ. თუ პროგრამის დროს არ ვისაუბრებთ, არ გავაგზავნით მოკლე ტექსტურ შეტყობინებებს, არ შევჭამთ, ან აუცილებლობის გარეშე აქეთ-იქით არ ვივლით, ესეც კარგი მანერების გამოვლენა იქნება.
6. როგორ შეგვიძლია გავმხნევდეთ და გავამხნევოთ სხვები?
6 გამამხნევებელი ურთიერთობა: კონგრესები კარგ საშუალებას გვაძლევს, ვისიამოვნოთ და გავმხნევდეთ ქრისტიანული ერთობით (ფსალმ. 133:1—3). გამოავლინე ინიციატივა, „გაფართოვდი“ და გაიცანი და-ძმები სხვა კრებებიდან (2 კორ. 6:13). მიზნად დაისახე, დღეში, სულ მცირე, ერთი ადამიანი ან ერთი ოჯახი გაიცნო. ამის გაკეთება შესვენების დროს შეიძლება. თან იქონიე მსუბუქი სადილი, რათა არ მოგიწიოს საკვების საყიდლად წასვლა. ეს სხვებთან ურთიერთობის საშუალებას მოგცემს. ასეთი ურთიერთობა შეიძლება ხანგრძლივ მეგობრობაში გადაიზარდოს.
7. რატომ უნდა ვიმსახუროთ კონგრესზე მოხალისედ და როგორ შეიძლება ამის გაკეთება?
7 თანაქრისტიანებთან ერთად წმინდა მსახურებაში მონაწილეობა გამომაცოცხლებელია. შეგიძლია რომელიმე განყოფილებაში მოხალისედ იმსახურო ან კრებასთან ერთად მიიღო მონაწილეობა საკონგრესო ტერიტორიის დასუფთავებაში? (ფსალმ. 110:3). თუ ჯერ არანაირი დავალება არ მიგიღია, მიმართე კონგრესზე მოხალისეთა სამსახურის განყოფილებას. რაც უფრო მეტია მოხალისე, მით უფრო სახალისო და მსუბუქია მუშაობა.
8. რატომ უნდა მივაქციოთ განსაკუთრებული ყურადღება კონგრესის დროს ჩვენს გარეგნობასა და ყოფაქცევას?
8 ჩვენი ყოფაქცევა სხვებზე გამამხნევებლად მოქმედებს: ჩვენ კონგრესის დელეგატები არა მარტო უშუალოდ კონგრესის მსვლელობისას ვართ, არამედ მთელი სამი დღის განმავლობაში. ქალაქში, სადაც კონგრესი ტარდება, შეუმჩნეველი არ რჩებათ, თუ რამდენად განსხვავდებიან იეჰოვას მოწმეები სხვებისგან (1 პეტ. 2:12). კონგრესზე, ღამის თევის ადგილას თუ სხვაგან ჩვენი ჩაცმულობა და გარეგნობა განადიდებს იეჰოვას (1 ტიმ. 2:9, 10). თუ სამკერდე ნიშანი გვიკეთია, სხვები ადვილად მიხვდებიან, რომ იეჰოვას მოწმეები ვართ. ეს შესაძლებლობას მოგვცემს, მოვუყვეთ ჩვენი კონგრესის შესახებ და ვუქადაგოთ.
9. რომელი შემთხვევები მოწმობს, რომ ჩვენი ქრისტიანული საქციელი სხვებზე კარგ შთაბეჭდილებას ახდენს?
9 რა შთაბეჭდილებას ახდენს კონგრესის დროს ჩვენი კარგი ყოფაქცევა სხვებზე? მენეჯერმა, რომელსაც კონგრესთან დაკავშირებით იეჰოვას მოწმეებთან შეხება ჰქონდა, ერთ გაზეთში დაწერა: „ისინი ძალიან თავაზიანები არიან. მათ დიდი სიამოვნებით მივიღებდით ყოველ წელს“. გასულ წელს სასტუმროში, სადაც იეჰოვას მოწმეები იყვნენ გაჩერებული, ერთმა მამაკაცმა, რომელიც იეჰოვას მოწმე არ იყო, საფულე დაკარგა. იეჰოვას მოწმეებმა სასტუმროს მენეჯერს საფულე დაუბრუნეს ისე, რომ არაფერი დაკარგულა. მენეჯერმა საფულის პატრონს უთხრა: „გაგიმართლა, რომ იეჰოვას მოწმეებს კონგრესი აქვთ და მთელი სასტუმრო მათ აქვთ დაკავებული. სხვა შემთხვევაში საფულეს, ალბათ, არავინ დაგიბრუნებდათ“.
10. რა უნდა იყოს ჩვენი მიზანი და რატომ?
10 წლევანდელი კონგრესი სწრაფად ახლოვდება. დიდი დრო და ძალისხმევა მოხმარდა იმას, რომ მომზადებულიყო როგორც კონგრესის პროგრამა, ისე კონგრესის ჩატარების ადგილიც. მიზნად დაისახე, სამივე დღეს დაესწრო და მზად იყავი, რომ მიიღო ყველაფერი, რაც იეჰოვამ და მისმა ორგანიზაციამ შენთვის მოამზადა. კარგი მანერებით, გამამხნევებელი ურთიერთობითა და სამაგალითო ყოფაქცევით იყავი სხვებისთვის გამომაცოცხლებელი! მაშინ შეიძლება ისეთივე გრძნობა დაგეუფლოს, როგორიც შარშანდელი კონგრესის ერთ-ერთ დელეგატს. მან დაწერა: „ასეთი კმაყოფილება არასდროს განმიცდია!“
[ჩანართი 6 გვერდზე]
კონგრესზე, ღამის თევის ადგილას თუ სხვაგან ჩვენი ჩაცმულობა და გარეგნობა განადიდებს იეჰოვას
[ჩანართი 7 გვერდზე]
კარგი მანერებით, გამამხნევებელი ურთიერთობითა და სამაგალითო ყოფაქცევით იყავი სხვებისთვის გამომაცოცხლებელი
[ჩარჩო 4-7 გვერდებზე]
შეხსენებები 2011 წლის საოლქო კონგრესთან დაკავშირებით
◼ პროგრამის განრიგი: პროგრამა სამივე დღეს 9:20-ზე დაიწყება. შესვლა შესაძლებელი იქნება 8:00 საათიდან. როცა შესავალი მუსიკა ჩაირთვება, ყველამ უნდა დავიკავოთ ადგილები, რათა პროგრამა სათანადოდ დაიწყოს. პარასკევს და შაბათს პროგრამა 16:55-ზე დასრულდება, ხოლო კვირას — 15:40-ზე.
◼ ტრანსპორტის დასაყენებელი ადგილი: გთხოვთ, ნუ გააჩერებთ ტრანსპორტს საკონგრესო დარბაზის შესასვლელთან მგზავრების ჩამოსასმელად ან ასაყვანად, გარდა ინვალიდი და მოხუცი მგზავრებისა, რომელთაც უჭირთ გადაადგილება. ვინაიდან მდგომარეობა ყველგან განსხვავებულია, წესრიგის შესანარჩუნებლად მძღოლები უნდა დაემორჩილონ მომწესრიგებლების მითითებებს. როგორც წესი, ტრანსპორტის დასაყენებელი ადგილები შეზღუდულია, ამიტომ ავტოსადგომი რომ არ გადაიტვირთოს, კარგი იქნება, თუ ცარიელი ავტომობილით არ იმგზავრებთ და სხვებსაც ჩაისვამთ.
◼ ადგილების დაკავება: ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით ან ვისაც ბიბლიას ასწავლით (1 კორ. 13:5).
◼ საკვები შესვენებისთვის: გთხოვთ, თან წაიღოთ საჭმელი, რათა შუადღეს, შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის წაღება, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრებისა და მინის ჭურჭლის მიტანა.
◼ შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ იმით, რომ ნებაყოფლობითი შესაწირავი გავიღოთ მსოფლიო საქმისთვის. ამის გაკეთება შეიძლება როგორც ჩვენს სამეფო დარბაზში, ისე კონგრესის ჩატარების ადგილზე.
◼ უბედური შემთხვევები და სასწრაფო დახმარება: თუ კონგრესზე სამედიცინო დახმარება დაგჭირდათ, გთხოვთ, უთხარით თქვენ გვერდით მჯდომს, რათა ის დაუყოვნებლივ დაუკავშირდეს კონგრესის პირველი დახმარების განყოფილებას. გამოცდილი და-ძმები შეაფასებენ მდგომარეობის სერიოზულობას და აღმოგიჩენენ დახმარებას. აუცილებლობის შემთხვევაში ისინი თავად გამოიძახებენ სასწრაფო დახმარებას. ამგვარად, უმნიშვნელო მიზეზების გამო აღარ გამოვიძახებთ სასწრაფო დახმარებას.
◼ ფეხსაცმელი: კონგრესზე ზოგი შეუფერებელ ფეხსაცმელს იცვამს და იყო შემთხვევები, როცა მათ ტრავმები მიიღეს იმის გამო, რომ ფეხი გადაუბრუნდათ ან წაიქცნენ. კარგი იქნება, თუ მოკრძალებულ და მოხერხებულ ფეხსაცმელს ჩაიცვამთ, რომ თავისუფლად იაროთ კონგრესის ტერიტორიაზე, კიბეებზე და ა.შ.
◼ ჩამწერი აპარატურა: არანაირი ჩამწერი საშუალების შეერთება არ შეიძლება ელექტროქსელში ან ხმის გამაძლიერებელ სისტემაში. ჩამწერი აპარატურა ისე უნდა გამოიყენოთ, რომ სხვებს ხელი არ შეუშალოთ.
◼ საბავშვო ეტლები და დასაკეცი სკამები: მშობლებმა კონგრესზე არ უნდა წამოიღონ საბავშვო ეტლები და დასაკეცი სკამები. თუმცა მათ შეუძლიათ წამოიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება სკამის საზურგეზე.
◼ სუნამოების გამოყენება: ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და დაინახავს, რომ ვინმე ინტერესს ავლენს, მან უნდა გამოიყენოს ბლანკი „გთხოვთ მოინახულოთ“ (S-43). მაუწყებლებს თან უნდა ჰქონდეთ კონგრესზე ერთი-ორი ასეთი ბლანკი. შევსებული ბლანკები შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს. იხილეთ 2009 წლის ნოემბრის „ჩვენი სამეფო მსახურება“, გვ. 4.
◼ დაბინავება: როდესაც შეკვეთას აკეთებთ ბინასა თუ კერძო სახლში დაბინავების შესახებ, გაითვალისწინეთ შემდეგი: 1) გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5); 2) არავის მისცეთ დაბინავების ბლანკი „დაბინავება“ (CO-4), სადაც მოცემულია ინფორმაცია თქვენს საცხოვრებელ ადგილთან დაკავშირებით; 3) გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა; 4) უყურადღებოდ არ დატოვოთ თქვენი შვილები; 5) როდესაც თანამორწმუნეების სტუმართმოყვარეობით სარგებლობთ, გამოავლინეთ მათ მიმართ მადლიერება და გახსოვდეთ საქმეების 20:35-ში მოცემული პრინციპი; 6) თუ რაიმე მიზეზის გამო გიწევთ თქვენი შეკვეთის გაუქმება, რაც შეიძლება მალე შეატყობინეთ დაბინავების განყოფილებას.
◼ მოხალისეთა სამსახური: კონგრესი უფრო მეტ სიხარულს მოგვანიჭებს, თუ სურვილს გამოვთქვამთ და ძმებს კონგრესთან დაკავშირებული აუცილებელი საქმეების შესრულებაში დავეხმარებით (საქ. 20:35). ვინც ამის სურვილს გამოთქვამს, შეუძლია კონგრესზე მოხალისეთა სამსახურის განყოფილებას მიმართოს. 16-წლამდე ასაკის ბავშვებსაც შეუძლიათ თავიანთი წვლილი შეიტანონ ამ საქმეში მშობლების ან სხვა უფროსი ასაკის ქრისტიანების მეთვალყურეობით.