◼ პროგრამის განრიგი: შესვლა შესაძლებელი იქნება 8:00 საათიდან. 09:20-ზე, როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები. პარასკევს და შაბათს პროგრამა 16:55-ზე დასრულდება, ხოლო კვირას — 15:50-ზე.
◼ საერთაშორისო კონგრესები: ზოგი ქვეყანა საერთაშორისო კონგრესებს უმასპინძლებს. არ დაგავიწყდეთ, რომ მასპინძელი ქვეყნის ფილიალმა კონკრეტული კრებები თუ უცხოელი დელეგატები დასაჯდომი ადგილების, მანქანის სადგომებისა და სასტუმრო ოთახების რაოდენობის მიხედვით მიიწვია. კონგრესის ტერიტორია შეიძლება ძალიან გადაიტვირთოს, თუ იქ ის მაუწყებლებიც მივლენ, რომლებიც არ არიან მიწვეულები საერთაშორისო კონგრესზე. თუ შენი მდგომარეობიდან გამომდინარე საკუთარ კონგრესს ვერ ესწრები და გიწევს სხვა კონგრესზე დასწრება, ნუ წახვალ საერთაშორისო კონგრესზე.
◼ პარკინგი: გთხოვთ, ნუ გააჩერებთ ტრანსპორტს საკონგრესო დარბაზის შესასვლელთან მგზავრების ჩამოსასმელად, გარდა შეზღუდული შესაძლებლობების მქონე და ხანში შესული მგზავრებისა, რომელთაც უჭირთ გადაადგილება. ვინაიდან მდგომარეობა ყველგან განსხვავებულია, წესრიგის შესანარჩუნებლად მძღოლები უნდა დაემორჩილონ მომწესრიგებლების მითითებებს. როგორც წესი, ტრანსპორტის დასაყენებელი ადგილები შეზღუდულია, ამიტომ ავტოსადგომი რომ არ გადაიტვირთოს, კარგი იქნება, თუ ყველა საკუთარი ავტომობილით არ წამოვა და სხვებთან შეამხანაგდება.
◼ ადგილების დაკავება: ყოველ დილას, როცა საკონგრესო დარბაზის კარი გაიღება, ძალიან სწრაფად ნუ დაიკავებთ თქვენთვის სასურველ ადგილებს; ისეთი შთაბეჭდილება არ უნდა შეიქმნას, რომ თანამორწმუნეებს ადგილების დაკავებაში ეჯიბრებით. თავგანწირვის სული, რომელიც გვკარნახობს, რომ უპირველესად სხვების კეთილდღეობაზე ვიზრუნოთ, ჭეშმარიტი ქრისტიანების დამახასიათებელი ნიშანია, რაც სხვებს ღვთის განდიდებისკენ აღძრავს (იოან. 13:34, 35; 1 კორ. 13:4, 5; 1 პეტ. 2:12). ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით ან ვისაც ბიბლიას ასწავლით.
◼ საკვები შუადღის შესვენებისთვის: გთხოვთ, თან წაიღეთ საჭმელი, რათა შუადღეს, შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის წაღება, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრებისა და მინის ჭურჭლის მიტანა.
◼ შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ იმით, რომ ნებაყოფლობითი შესაწირავი გავიღოთ მსოფლიო საქმისთვის. ამის გაკეთება შეიძლება, როგორც ჩვენს სამეფო დარბაზში, ისე კონგრესის ჩატარების ადგილზე.
◼ უსაფრთხოების ზომები: გთხოვთ, განსაკუთრებულად იფრთხილოთ, რომ არ წაბორძიკდეთ და ფეხი რამეზე არ მოგიცურდეთ. ზოგი შეუფერებელ ფეხსაცმელს იცვამს და იყო შემთხვევები, როცა მათ ტრავმები მიიღეს იმის გამო, რომ ფეხი გადაუბრუნდათ ან წაიქცნენ. კარგი იქნება, თუ მოკრძალებულ და მოხერხებულ ფეხსაცმელს ჩაიცვამთ, რომ თავისუფლად იაროთ კონგრესის ტერიტორიაზე.
◼ ჩამწერი აპარატურა: არანაირი ჩამწერი საშუალების შეერთება არ შეიძლება ელექტროქსელში ან ხმის გამაძლიერებელ სისტემაში. ჩამწერი აპარატურა ისე უნდა გამოიყენოთ, რომ სხვებს ხელი არ შეუშალოთ.
◼ საბავშვო ეტლები და დასაკეცი სკამები: მშობლებმა კონგრესზე არ უნდა წაიღონ საბავშვო ეტლები და დასაკეცი სკამები. თუმცა მათ შეიძლება წაიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება სკამის საზურგეზე.
◼ სუნამოების გამოყენება: ზოგან კონგრესი დახურულ სივრცეში ტარდება და დარბაზი საკმარისად არ ნიავდება. ამიტომ, ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
◼ მონახულების ბლანკი: თუ საოლქო კონგრესის პერიოდში მაუწყებელი არაფორმალურად იქადაგებს და ვინმე ინტერესს გამოავლენს, მან უნდა შეავსოს ბლანკი „გთხოვთ მოინახულოთ“ (S-43). შევსებული ბლანკი შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს.
◼ დაბინავება: როდესაც შეკვეთას აკეთებთ ბინასა თუ კერძო სახლში დაბინავებაზე, გაითვალისწინეთ შემდეგი:
გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5a);
გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა;
უყურადღებოდ არ დატოვოთ შვილები;
როდესაც თანამორწმუნეების სტუმართმოყვარეობით სარგებლობთ, გამოავლინეთ მათ მიმართ მადლიერება;
თუ რაიმე მიზეზის გამო გიწევთ შეკვეთის გაუქმება, რაც შეიძლება მალე შეატყობინეთ თქვენი კრების მდივანს.
◼ მოხალისეთა სამსახური: კონგრესი უფრო მეტ სიხარულს მოგვანიჭებს, თუ სურვილს გამოვთქვამთ და ძმებს კონგრესთან დაკავშირებული აუცილებელი საქმეების შესრულებაში დავეხმარებით (საქ. 20:35). მსურველებმა უნდა მიმართონ მოხალისეთა სამსახურის განყოფილებას. 16 წლამდე ბავშვებსაც შეუძლიათ თავიანთი წვლილი შეიტანონ ამ საქმეში მშობლების ან სხვა უფროსი ასაკის ქრისტიანთა მეთვალყურეობით.