დავიხვეწოთ ქადაგებაში — რეგულარულად მივუტანოთ ჟურნალები დაინტერესებულებს

რატომ არის მნიშვნელოვანი. ბევრს, ვინც სიამოვნებით კითხულობს ჩვენს ჟურნალებს, ბიბლიის შესწავლის დაწყება არ უნდა. ამის მიზეზი შესაძლოა ის იყოს, რომ მათ არ სურთ რელიგიის შეცვლა ან ფიქრობენ, რომ ბიბლიის შესასწავლად დრო არ აქვთ. თუმცა, თუ ისინი რეგულარულად გაეცნობიან ჩვენს ჟურნალებს, შესაძლოა მათ ღვთის სიტყვის გაგების სურვილი გაუჩნდეთ (1 პეტ. 2:2). მაგალითად, მათ გულს შესაძლოა განსაკუთრებით ჩასწვდეს რომელიმე სტატია ან მდგომარეობა შეეცვალოთ. თუ რეგულარულად მოვინახულებთ მათ მცირე ხნით, ისინი ჩვენთან თავს უფრო თავისუფლად იგრძნობენ და შესაბამისად, ჩვენც გაგვიადვილდება იმის გაგება, თუ რა აინტერესებთ ან რა აწუხებთ. საბოლოოდ კი, მათთან შეიძლება ბიბლიის შესწავლა დავიწყოთ.

როგორ მოვიქცეთ:

ყოველთვიურად დაგეგმე, როდის მიუტან დაინტერესებულს ჟურნალების, „საგუშაგო კოშკი“ და „გამოიღვიძეთ!“, მიმდინარე ნომრებს. შეგიძლია თვის განმავლობაში სხვა დროსაც მიაკითხო ამ ადამიანს, რათა უფრო მეტად გაუღვივო ინტერესი, წაიკითხოს რომელიმე სტატია იმ ჟურნალებიდან, რომელიც დაუტოვე; მას შეგიძლია იმ მიზნითაც მიაკითხო, რომ მიმდინარე თვეში გასავრცელებელი პუბლიკაცია შესთავაზო. გააკეთე კარგი ჩანაწერები (იხილე 2014 წლის იანვრის „ჩვენი სამეფო მსახურება“, გვ. 3).
მოემზადე თითოეული მონახულებისთვის. უბრალოდ არ დაუტოვო ჟურნალები მობინადრეს; ჩააბი ის საუბარში და შექმენი მეგობრული ატმოსფერო, რათა მას ჭეშმარიტებისადმი ინტერესი გაუღვივო.
იყავი დაკვირვებული და როგორც კი შესაძლებლობა მოგეცემა, დაიწყე ბიბლიის შესწავლა. თუ იმ ადამიანს, ვისთანაც ჟურნალები რეგულარულად მიგაქვს, დააინტერესებს ბიბლიის თვალსაზრისი ამა თუ იმ საკითხზე, მიუტანე ბიბლიის შესწავლაში დამხმარე სახელმძღვანელო, რომელშიც პასუხი ეცემა მის მიერ დასმულ კითხვას და შემდეგ ერთად განიხილეთ ეს საკითხი. წამოსვლამდე ღიად დატოვე შეკითხვა, რომელიც განხილულ საკითხს უკავშირდება და მასზე მომდევნო შეხვედრაზე ისაუბრეთ. თუ ამ ადამიანს ბიბლიისა და ბიბლიის შესწავლაში დამხმარე პუბლიკაციების მეშვეობით რეგულარულად ესაუბრები, თუნდაც მცირე ხნით, შეიძლება ითქვას, რომ შენ მასთან ბიბლიის შესწავლას ატარებ. შეგითავაზებია ოდესმე მობინადრისთვის ბროშურა „სასიხარულო ცნობა“ ან გიჩვენებია მისთვის, როგორ ტარდება ბიბლიის შესწავლა? ანდა გქონია ხელსაყრელი შემთხვევა, რომ მისთვის ვიდეორგოლები, „რატომ ვსწავლობთ ბიბლიას?“ და „როგორ ტარდება ბიბლიის შესწავლა?“, გეჩვენებინა? იმ შემთხვევაშიც კი, თუ ვინმემ ბიბლიის შესწავლაზე ადრე უარი გითხრა, არ დაგავიწყდეს, რომ ადამიანების ცხოვრებაში ცვლილებები ხდება. ამიტომ, ხომ არ აჯობებს, რომ ასეთ ადამიანს ხელახლა შესთავაზო ბიბლიის შესწავლა?

კარგი იქნება, თუ ამ თვეში ასე მოიქცევი:

შეადგინე იმ ადამიანების სია, ვისთანაც შეიძლება ჟურნალების რეგულარულად მიტანა. შესთავაზე მათ მიმდინარე თვის ჟურნალები და უთხარი, რომ შემდეგ ნომრებსაც მიუტან.