შეხსენებები კონგრესთან დაკავშირებით
პროგრამის განრიგი: შესვლა შესაძლებელი იქნება 8:00 საათიდან. 09:20-ზე, როცა შესავალი მუსიკა ჩაირთვება, ყველამ უნდა დავიკავოთ ჩვენი ადგილები. პარასკევს და შაბათს პროგრამა 17:00-ზე დასრულდება, ხოლო კვირას — 16:00-ზე.
სიმღერით ხოტბა შეასხით იეჰოვას: უხსოვარი დროიდან ღვთის ხალხი სიმღერით ხოტბას ასხამდა იეჰოვას. მუსიკას ჭეშმარიტ თაყვანისმცემლობაში დღემდე მნიშვნელოვანი ადგილი უკავია (ფსალმ. 28:7). რეგიონულ კონგრესზე პროგრამის ორივე ნაწილი მუსიკით იწყება. ეს მუსიკა მხოლოდ ფონი როდია, ის სპეციალურად იმისათვის მომზადდა, რომ ვისწავლოთ და თაყვანი ვცეთ იეჰოვას. ამიტომ, როდესაც შეხვედრის თავმჯდომარე განცხადებას გააკეთებს იმის თაობაზე, რომ მუსიკა უნდა ჩაირთოს, კარგია, თუ დავიკავებთ ადგილებს, მადლიერებით მოვუსმენთ მუსიკას და არ ვისაუბრებთ. ასეთი სახით, ცხადვყოფთ, რომ ვაფასებთ შრომას ჩვენი და-ძმებისა, რომლებიც „საგუშაგო კოშკის“ ორკესტრში უკრავენ. წელიწადში ორჯერ ეს და-ძმები თავიანთი ხარჯებით ჩადიან პატერსონში (ნიუ-იორკი), რათა ჩვენი სიამოვნებისთვის შექმნან ლამაზი მელოდია. მუსიკის ყურადღებით მოსმენის შემდეგ ყველამ ერთხმად უნდა ვიმღეროთ ჩვენი სამეფო სიმღერები და ამგვარად ხოტბა შევასხათ იეჰოვას.
პარკინგი: გთხოვთ, ნუ გააჩერებთ ტრანსპორტს საკონგრესო დარბაზის შესასვლელთან მგზავრების ჩამოსასმელად, გარდა შეზღუდული შესაძლებლობების მქონე და ხანში შესული მგზავრებისა, რომელთაც უჭირთ გადაადგილება. ვინაიდან მდგომარეობა ყველგან განსხვავებულია, წესრიგის შესანარჩუნებლად მძღოლები უნდა დაემორჩილონ მომწესრიგებლების მითითებებს. როგორც წესი, ტრანსპორტის დასაყენებელი ადგილები შეზღუდულია, ამიტომ ავტოსადგომი რომ არ გადაიტვირთოს, კარგი იქნება, თუ ყველა საკუთარი ავტომობილით არ წამოვა და სხვებთან შეამხანაგდება.
ადგილების დაკავება: ყოველ დილას, როცა საკონგრესო დარბაზის კარი გაიღება, ძალიან სწრაფად ნუ დაიკავებთ ადგილებს; ისეთი შთაბეჭდილება არ უნდა შეიქმნას, რომ თანამორწმუნეებს ადგილების დაკავებაში ეჯიბრებით. გთხოვთ, ყურადღება გამოავლინოთ სხვების მიმართ; საჭიროების შემთხვევაში, თქვენთვის სასურველი ადგილები და-ძმებს დაუთმეთ. თავგანწირვის სული ჭეშმარიტი ქრისტიანების დამახასიათებელი ნიშანია, რაც სხვებს ღვთის განდიდებისკენ აღძრავს (იოან. 13:34, 35; 1 კორ. 13:5; 1 პეტ. 2:12). ადგილების დაკავება შეიძლება მხოლოდ ოჯახის წევრებისა და მათთვის, ვინც თქვენთან ერთად მგზავრობს ავტომობილით ან ვისაც ბიბლიას ასწავლით. გთხოვთ, არ დაალაგოთ ნივთები თქვენ გარშემო სკამებზე. თუ გაითვალისწინებთ ამ რჩევას, ეს სხვებს თავისუფალი ადგილების მონახვის საშუალებას მისცემს.
მოკრძალებული სამოსი: კონგრესის პერიოდში ჩვენი სამოსი უნდა იყოს შესაფერისი და მოკრძალებული. ის არ უნდა ირეკლავდეს ქვეყნიერებისთვის დამახასიათებელ ექსტრავაგანტულ სტილს (1 ტიმ. 2:9). ზედმეტად თავისუფლად ან უწესრიგოდ არც მაშინ უნდა გვეცვას, როცა კონგრესის პროგრამამდე და პროგრამის შემდეგ თავისუფალი დრო გვაქვს. აქედან გამომდინარე, ჩვენ არ შეგვრცხვება სამკერდე ნიშნით სიარული და ხელსაყრელ შემთხვევაში თავს არ შევიკავებთ ქადაგებისგან. კონგრესებზე ჩვენი გარეგნობითა და კარგი საქციელით არა მარტო ალალ-მართალ ადამიანებს მივიზიდავთ სასიცოცხლოდ მნიშვნელოვანი ბიბლიური ცნობისკენ, არამედ იეჰოვასაც მოვგვრით სიხარულს (სოფ. 3:17).
გამოავლინეთ თავაზიანობა ელექტრონული მოწყობილობებით სარგებლობისას: პროგრამის მსვლელობისას თავაზიანობას გამოვავლენთ, თუ ჩვენს მობილურ ტელეფონებსა და ელექტრონულ მოწყობილობებს ისეთ რეჟიმზე გადავიყვანთ, რომ სხვას მოსმენაში ხელი არ შეეშალოს. თუ იყენებთ ფოტოაპარატს, ვიდეოკამერას, პლანშეტს ან სხვა ელექტრონულ მოწყობილობას, ეცადეთ სხვებს არ ჩამოეფაროთ და ხელი არ შეუშალოთ. ჩვენ თავაზიანობას მაშინაც გამოვავლენთ, თუ პროგრამის მსვლელობისას არ დავიწყებთ არასაჭირო მოკლე ტექსტური შეტყობინებებისა თუ იმეილების დაგზავნას.
საკვები შუადღის შესვენებისთვის: გთხოვთ, თან წაიღეთ საჭმელი, რათა შუადღეს, შესვენების დროს არ მოგიწიოთ საკონგრესო ადგილის დატოვება საკვების საყიდლად. შეიძლება ისეთი პატარა სამგზავრო მაცივრის წაღება, რომლის მოთავსებაც შესაძლებელი იქნება თქვენი სკამის ქვეშ. კონგრესის ჩატარების ადგილზე არ შეიძლება დიდი ზომის სამგზავრო მაცივრებისა და მინის ჭურჭლის მიტანა.
შესაწირავები: ჩვენ შეგვიძლია კონგრესის ორგანიზებისთვის მადლიერება გამოვავლინოთ იმით, რომ ნებაყოფლობითი შესაწირავი გავიღოთ მსოფლიო საქმისთვის. ამის გაკეთება შეიძლება, როგორც ჩვენს სამეფო დარბაზში, ისე კონგრესის ჩატარების ადგილზე.
მედიკამენტები: თუ ისეთ მედიკამენტებს იღებთ, რომელიც მხოლოდ რეცეპტით გაიცემა, გთხოვთ, თან იქონიოთ მათი საკმარისი რაოდენობა, ვინაიდან კონგრესზე პირველი დახმარების პუნქტში ეს მედიკამენტები არ იქნება. ინსულინის ნემსები უნდა გადაიყაროს მედპუნქტში არსებულ სპეციალურ ურნაში და არა საკონგრესო დარბაზში განლაგებულ საერთო ურნებში.
უსაფრთხოების ზომები: გთხოვთ, განსაკუთრებულად იფრთხილოთ, რომ არ წაბორძიკდეთ და ფეხი რამეზე არ მოგიცურდეთ. ზოგი შეუფერებელ ფეხსაცმელს იცვამს და იყო შემთხვევები, როცა მათ ტრავმები მიიღეს იმის გამო, რომ ფეხი გადაუბრუნდათ ან წაიქცნენ. კარგი იქნება, თუ მოკრძალებულ და მოხერხებულ ფეხსაცმელს ჩაიცვამთ, რომ თავისუფლად იაროთ კონგრესის ტერიტორიაზე.
სმენადაქვეითებულთათვის: ზოგ კონგრესზე პროგრამა რადიოტრანსლაციით გადაიცემა. პროგრამის მოსასმენად შეგიძლიათ თან იქონიოთ პატარა რადიომიმღები საყურისებით.
საბავშვო ეტლები და დასაკეცი სკამები: მშობლებმა კონგრესზე არ უნდა წაიღონ საბავშვო ეტლები და დასაკეცი სკამები. თუმცა მათ შეიძლება წაიღონ პატარა ბავშვებისთვის განკუთვნილი სკამები, რომელთა მიმაგრებაც შესაძლებელი იქნება სკამის საზურგეზე.
სუნამოების გამოყენება: ზოგან კონგრესი დახურულ სივრცეში ტარდება და დარბაზი საკმარისად არ ნიავდება. ამიტომ, ჩვენი მხრიდან პატივისცემის გამოვლენა იქნება, თუ ნაკლებად გამოვიყენებთ მძაფრ სუნამოებსა და ოდეკოლონებს, რომლებმაც შეიძლება ცუდად იმოქმედოს მათზე, ვისაც ამის გამო პრობლემები ექმნება (1 კორ. 10:24).
მონახულების ბლანკი: თუ რეგიონული კონგრესის პერიოდში მაუწყებელი არაფორმალურად იქადაგებს და ვინმე ინტერესს გამოავლენს, მან უნდა შეავსოს ბლანკი „გთხოვთ მოინახულოთ“ (S-43). შევსებული ბლანკი შეიძლება კონგრესზე გადაეცეს პასუხისმგებელ ძმებს ან კონგრესიდან დაბრუნების შემდეგ თქვენი კრების მდივანს.
დაბინავება:
გთხოვთ, ყველა შემთხვევაში შეკვეთისთვის გამოიყენოთ ბლანკი „განსაკუთრებული საჭიროებების მქონეთა განცხადება დაბინავებაზე“ (CO-5a);
გახსოვდეთ, რომ მხოლოდ კონგრესის განმავლობაში შეგიძლიათ აღნიშნული საცხოვრებლით სარგებლობა;
უყურადღებოდ არ დატოვოთ შვილები;
როდესაც თანამორწმუნეების სტუმართმოყვარეობით ისარგებლებთ, გამოავლინეთ მათ მიმართ მადლიერება;
თუ რაიმე მიზეზის გამო გიწევთ შეკვეთის გაუქმება, რაც შეიძლება მალე შეატყობინეთ თქვენი კრების მდივანს.
თუ რაიმე პრობლემა წარმოიქმნება იქ, სადაც დაბინავებული იქნებით, ამის შესახებ აცნობეთ დაბინავების განყოფილებას, რათა მათ საჭირო ზომებს მიმართონ.
მოხალისეთა სამსახური: კონგრესი უფრო მეტ სიხარულს მოგვანიჭებს, თუ მოხალისედ მსახურების სურვილს გამოვთქვამთ და მოხალისეთა სამსახურის განყოფილებას ვაცნობებთ, რომ გვსურს ჩვენი წვლილი შევიტანოთ კონგრესთან დაკავშირებული აუცილებელი საქმეების შესრულებაში. მსურველებმა უნდა მიმართონ მოხალისეთა სამსახურის განყოფილებას. 16 წლამდე ბავშვებსაც შეუძლიათ თავიანთი წვლილი შეიტანონ ამ საქმეში მშობლების ან სხვა უფროსი ასაკის ქრისტიანთა მეთვალყურეობით.