კითხვების დასმითა და მოსმენით გამოავლინე პირადი ინტერესი

¹ ადამიანთა უმრავლესობას სიამოვნებს საკუთარი შეხედულებების გამოთქმა, მაგრამ, როდესაც საკუთარ აზრებს თავს ახვევენ ან „დაკითხვას უწყობენ“, ეს მათ არ მოსწონთ. ამიტომ ჩვენ, ქრისტიანმა მსახურებმა, ადამიანთა თვალსაზრისის გასაგებად უნდა ვისწავლოთ კითხვების ოსტატურად დასმა (იგავ. 20:5).

² ჩვენ მიერ დასმული კითხვები შემაცბუნებელი კი არ უნდა იყოს, არამედ დამაფიქრებელი. მაგალითად, კარდაკარ ქადაგებისას ერთი ძმა სვამს კითხვას: „დადგება ოდესმე ისეთი დრო, როდესაც ადამიანები ერთმანეთს ღირსეულად და პატივისცემით მოეპყრობიან?“ ის პასუხის შესაბამისად განაგრძობს: „როგორ ფიქრობთ, შესაძლებელი იქნება ამის მიღწევა?“ ან „რატომ ფიქრობთ ასე?“. სხვა ძმა კი საზოგადოებრივი თავშეყრის ადგილებში და არაფორმალურად ქადაგებისას ასეთ კითხვას უსვამს მშობლებს: „როგორც მშობელს, ყველაზე მეტად რა გახარებთ?“ შემდეგ ის დამატებით კითხვას სვამს: „რა არის თქვენი უმთავრესი საზრუნავი?“. ყურადღება მიაქციეთ, რომ ეს კითხვები ადამიანებს საკუთარი აზრების გამოთქმის საშუალებას აძლევს ყოველგვარი უხერხულობის გარეშე. რამდენადაც ყველას მდგომარეობა განსხვავებულია, ჩვენ ისეთი თემა უნდა შევარჩიოთ და ისეთი კითხვები უნდა დავსვათ, რომ მოვარგოთ ჩვენს ტერიტორიაზე მცხოვრები ადამიანების მდგომარეობას.

³ ადამიანთა გულისნადების გაგება: თუ ადამიანებს სურთ საკუთარი აზრების გაზიარება, მოთმინებით მოუსმინე და ნუ გააწყვეტინებ ლაპარაკს (იაკ. 1:19). აზრის გამოთქმისთვის გულთბილად გადაუხადე მადლობა (კოლ. 4:6). შეგიძლია უბრალოდ უთხრა: „მართლაც საინტერესოა. გმადლობთ, რომ ეს გამიზიარეთ“. გულწრფელად შეაქე. თავაზიანად დაუსვი დამატებითი კითხვები, რათა მათი გულისნადები გაიგო, ამასთანავე, საერთო ენა გამონახე. როდესაც გსურს, მათი ყურადღება ბიბლიური მუხლისკენ მიმართო, შეგიძლია უთხრა: „გიფიქრიათ ოდესმე ამაზე?“ ნუ იქნები დოგმატური და მოერიდე კამათს (2 ტიმ. 2:24, 25).

⁴ ის, თუ რა რეაგირებას მოახდენენ სხვები ჩვენს კითხვებზე, დამოკიდებულია იმაზე, თუ როგორ ვუსმენთ მათ. ადამიანები კარგად ხედავენ, ვუსმენთ თუ არა მთელი გულით. ერთმა მიმომსვლელმა ზედამხედველმა აღნიშნა: „როდესაც მოთმინებითა და ინტერესით ვუსმენთ ადამიანებს, ამას დიდი ძალა აქვს, რადგან გრძნობენ მათ მიმართ გამოვლენილ სითბოსა და ყურადღებას. ეს კი ძალიან იზიდავთ ადამიანებს“. როდესაც სხვებს პატივისცემით ვუსმენთ, ისინი შესაძლოა აღიძრან სასიხარულო ცნობის მოსასმენად (რომ. 12:10).