დაეხმარე ბიბლიის შემსწავლელებს, გახდნენ სამეფოს შესახებ სასიხარულო ცნობის მაუწყებლები
1 იესოს მიერ თავისი მოწაფეებისთვის მიცემული დავალება, რომელიც მათეს 28:19, 20-შია ჩაწერილი, ფართო მასშტაბებს მოიცავდა. ქრისტემ მათ დაავალა, რომ მოემოწაფებინათ რაც შეიძლება მეტი ადამიანი, რომლებიც შემდეგში თავადაც მიიღებდნენ მონაწილეობას მოწაფეების მომზადების საქმეში. ეს საფუძველს ჩაუყრიდა სამეფოს შესახებ სასიხარულო ცნობის საქმეს, რომელიც მთელი მსოფლიოს მასშტაბით საბოლოოდ შესრულდებოდა ამ ბოლო დღეებში, რომელშიც ჩვენ ვცხოვრობთ (მათ. 24:14).
2 ჩვენ შეიძლება ბიბლიას ვასწავლიდეთ ჩვენს შვილებს ან მათ, ვინც მზად არის ბიბლიის შესასწავლად. თითოეულ ჩვენგანს გულწრფელად გვსურს, დავეხმაროთ შემსწავლელებს, პირადად იგრძნონ პასუხისმგებლობა და დაეხმარონ სხვებს, გახდნენ იესო ქრისტეს მოწაფეები (ლუკ. 6:40).
3 მოამზადე ისინი საქადაგებლად: აღძარი შემსწავლელები, რომ ნასწავლი სხვებს გაუზიარონ. მოუყევი მათ მსახურებაში მომხდარი გამამხნევებელი შემთხვევები. შვილებს პატარაობიდანვე მიაღებინე მონაწილეობა მსახურებაში იმ ზომით, რამდენსაც შეძლებენ (ფსალმ. 148:12, 13). სიტყვითა და საქმით აჩვენე, რომ მსახურება შენთვის ძალიან მნიშვნელოვანია (1 ტიმ. 1:12).
4 იეჰოვა მსახურებისთვის იყენებს მხოლოდ მათ, რომლებიც ემორჩილებიან მის სამართლიან ნორმებს. მართალია, ახალ მაუწყებელს იმდენი გამოცდილება არა აქვს, რამდენიც მიძღვნილსა და მონათლულ მსახურს, მაგრამ მას უნდა სწამდეს ბიბლიის ძირითადი სწავლებები და შეეძლოს სხვებისთვის მათი ახსნა (იხილე წიგნი „ორგანიზებული“, გვ. 79—82). ისინი სრულიად უნდა იყვნენ გამოყოფილნი „დიდი ბაბილონიდან“, არ უნდა ერეოდნენ პოლიტიკაში და რეგულარულად უნდა ესწრებოდნენ კრების შეხვედრებს (გამოცხ. 18:2, 4; იოან. 17:16; ებრ. 10:24, 25).
5 თუ დაინახავ, რომ შემსწავლელი შეესაბამება მოუნათლავ მაუწყებლად მსახურების მოთხოვნებს, ამის შესახებ აცნობე თავმჯდომარე ზედამხედველს. ის ორგანიზებას გაუწევს იმას, რომ ორი უხუცესი შენთან ერთად შეხვდეს ბიბლიის შემსწავლელს, რათა განსაზღვრონ შეესაბამება თუ არა ის კრებასთან ერთად სასიხარულო ცნობის მაუწყებლად მსახურების მოთხოვნებს. თუ ის მოუნათლავი მაუწყებელი გახდება, მასთან ერთად იარე მსახურებაში და, ასეთი სახით, კვლავაც გააგრძელე მისი სწავლება.