Kwosana na Yoana
3 Na kwaĩ Mũvalisi ũmwe weetawa Nikotemo, na aĩ ũmwe wa atongoi ma Ayuti. 2 Mũndũ ũsu nĩwookie vala ve Yesũ ũtukũ na amwĩa: “Lavai, nĩtwĩsĩ wumĩte kwa Ngai ta mũmanyĩsya, nũndũ vaiĩ mũndũ ũtonya kwĩka syama ila ũkwĩka Ngai ate vamwe nake.” 3 Nake Yesũ amũsũngĩa: “Nĩũtavya wʼo ki kana, mũndũ o na wĩva atasyaĩtwe ĩngĩ, * ndesa kwona Ũsumbĩ wa Ngai.” 4 Na Nikotemo amũkũlya: “Mũndũ atonya kũsyawa ata e mũkũũ? We no alike ĩvunĩ ya inyia wake na aisyawa ĩngĩ?” 5 Yesũ amũsũngĩa: “Nĩũtavya wʼo ki kana, mũndũ o na wĩva atasyaĩtwe kwĩsĩla kĩwʼũ na veva, ndatonya kũlika Ũsumbĩnĩ wa Ngai. 6 Kĩla kĩsyaĩtwe kwĩsĩla mwĩĩ nĩ mwĩĩ, na kĩla kĩsyaĩtwe kwĩsĩla veva nĩ veva. 7 Ndũkasengʼe nũndũ nakwĩa: Inywʼĩ no nginya mũsyawe ĩngĩ. 8 Kĩseve nĩkĩuutanaa kĩendete vala kĩkwenda na nĩwĩwʼaa wasya wakyo, ĩndĩ ndũmanyaa vala kyumĩte na vala kĩendete. Ũu nowʼo kwĩthĩawa kwa kĩla mũndũ ũsyaĩtwe kwĩsĩla veva.”
9 Nake Nikotemo amũkũlya: “Maũndũ asu matonyeka ata?” 10 Yesũ amũsũngĩa: “We wĩ mũmanyĩsya wa Isilaeli na ndwĩsĩ maũndũ asu? 11 Nĩũtavya wʼo ki kana, kĩla twĩsĩ nĩtũneenaa na kĩla twonete nĩtumĩasya ũkũsĩ, ĩndĩ mũyĩtĩkĩlaa ũkũsĩ ũla tumasya. 12 Ethĩwa nĩnĩmũtavĩtye maũndũ ma kũũ nthĩ na mũiũmaĩkĩĩa, mũkaĩkĩĩa ata yĩla nĩmũtavya maũndũ ma ĩtunĩ? 13 O na ĩngĩ, vaiĩ mũndũ waambata ĩtunĩ, ate o ũla watheeie kuma ĩtunĩ, nake nĩ Mwana wa mũndũ. 14 Na o tondũ Mose wookĩlilye ĩla nzoka weũnĩ, o ta ũu no nginya Mwana wa mũndũ okĩlwʼe, 15 nĩ kana kĩla mũndũ ũmũĩkĩĩaa atonye kũkwata thayũ wa tene na tene.
16 “Nũndũ Ngai nĩwendete nthĩ mũno, nĩwanenganie Mwana wake e ũmwe, nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene. 17 Nĩkwĩthĩwa Ngai ndaatũma Mwana wake ĩũlũ wa nthĩ nĩ kana asilĩle nthĩ, ĩndĩ nĩ kana nthĩ ĩtangĩĩwe kwĩsĩla kwake. 18 Mũndũ o na wĩva ũla ũmũĩkĩĩaa ndakasilĩlwa. Ĩndĩ mũndũ o na wĩva ũla ũtamũĩkĩĩaa nĩ mũsilĩle o na yu, nũndũ ndaĩkĩĩaa ĩsyĩtwa ya ũla Mwana wa Ngai e ũmwe. 19 Andũ makasilĩlwa nĩkwĩthĩwa kyeni nĩkyookie ĩũlũ wa nthĩ, ĩndĩ andũ menda kĩvindu vandũ va kyeni, nũndũ mawĩa moo maĩ mathũku. 20 Nũndũ mũndũ o na wĩva ũla wĩkaa maũndũ mathũku nũmenaa kyeni na ndokaa kyeninĩ, nĩ kana mawĩa make maikese kũvuanwʼa. 21 Ĩndĩ mũndũ o na wĩva ũla wĩkaa kĩla kya wʼo nĩwũkaa kyeninĩ, nĩ kana mawĩa make methĩwe matonya kwoneka kana nĩmekĩtwe kwosana na kwenda kwa Ngai.”
22 Ĩtina wa ũu Yesũ na amanyĩwʼa make nĩmaendie kĩsionĩ kya Yutia, na ekala namo kũu kwa ĩvinda yĩana ũna na nĩwavatisaa. 23 Ĩndĩ Yoana nake avatisĩaa Ainoni vakuvĩ na Salimu, nũndũ vau vaĩ kĩwʼũ kingĩ, na andũ nĩmookaa na maivatiswa; 24 nũndũ Yoana ndaĩ anamba kwĩkwʼa yela.
25 Na amanyĩwʼa ma Yoana maĩ na ngananĩo na Mũyuti ũmwe ĩũlũ wa kwĩthesya. 26 Kwoou mooka vala ve Yoana na mamwĩa: “Lavai, mũndũ ũla ũnaĩ nake mũingo wa Yolotani, ũla ũnaumisye ũkũsĩ ĩũlũ wake, sisya, o nake nũkũvatisa, na andũ onthe maendeee kũthi vala ũĩ.” 27 Nake Yoana asũngĩa asya: “Mũndũ ndatonya kũkwata kĩndũ o na kĩmwe ate o anengetwe kuma ĩtunĩ. 28 Inywʼĩ ene nĩmũũkũsĩĩa kana naisye, ‘Tinyie Klĩsto, ĩndĩ nĩtũmĩtwe nũke mbee wake.’ 29 Mũndũ o na wĩva ũla wĩ na mũtwawa nĩwe mũtwaani. Ĩndĩ yĩla mũnyanyae wa mũtwaani waũngama na amwĩwʼa aineena, ethĩawa na ũtanu mwingĩ nũndũ wa wasya wa mũtwaani. Kwoou ũtanu wakwa nĩwusũĩte. 30 Ũsu eendeea kwongeleka, ĩndĩ nyie nĩendeea kũoleka.”
31 Ũla wumĩte ĩũlũ e ĩũlũ wa ala angĩ onthe. Ũla wumĩte kũũ nthĩ aumĩte kũũ nthĩ na aneenaa maũndũ ma kũũ nthĩ. Ũla wumĩte ĩtunĩ e ĩũlũ wa ala angĩ onthe. 32 Aumasya ũkũsĩ wa kĩla wonete na akewʼa, ĩndĩ vaiĩ mũndũ wĩtĩkĩlaa ũkũsĩ wake. 33 Mũndũ o na wĩva ũla wĩtĩkĩlĩte ũkũsĩ wake nũĩkĩĩthĩtye * kana Ngai nĩ wa wʼo. 34 Nũndũ ũla Ngai ũtũmĩte aneenaa ndeto sya Ngai, nũndũ Ngai ndanenganae veva athimĩte. 35 Asa nũmwendete Mwana na nũmũnengete syĩndũ syonthe. 36 Ũla ũmũĩkĩĩaa Mwana e na thayũ wa tene na tene; ũla ũtamwĩwʼaa Mwana ndakona thayũ, ĩndĩ ũthilĩku wa Ngai ũtũaa ĩũlũ wake.