Valũa wa Kelĩ kwa Timotheo

3 Ĩndĩ manya ũũ kana mĩthenyanĩ ya mũminũkĩlyo kũkeethĩwa mavinda ma mũisyo na momũ. 2 Nũndũ andũ makeethĩwa makĩyenda ene, makyenda mbesa, me na mĩyono, me na mĩngʼathĩlĩĩlyo, aumani, matewʼaa asyai, mate mũvea, mate aĩkĩĩku, 3 mate na wendo, mate na wĩwʼano, asukani, matesiĩĩaa, ai, matendete ũseo, 4 avũnyanĩi, me na ngũlũ, me na mĩtũlyo, * endi ma motanu ma nthĩ vandũ va kũmwenda Ngai, 5 monekaa ta me na kĩkĩo kya Ngai ĩndĩ meko moo nĩmeũleana nakyo; ĩvathane na andũ asu. 6 Amwe moo nĩmalikaa na ũseleke mĩsyĩnĩ na kũkenga aka ala onzu ala makuĩte mĩio ya naĩ, matongoewʼe nĩ mawendi me kĩvathũkanyʼo, 7 na memanyĩasya mavinda onthe ĩndĩ mayĩsaa kũkwata ũmanyi wa wʼo ĩũlũ wa ũla wʼo.

8 Na o tondũ Yane na Yambale mamũvĩngie Mose, nowʼo maendeeaa kũvĩnga ũla wʼo. Andũ asu me na ilĩko nthũku, na mayĩsa kwĩtĩkĩlĩka mũĩkĩĩonĩ. 9 Ĩndĩ maikaendeea mbee wa vau, nũndũ ũtumanu woo ũkamanyĩka nĩ andũ, o tondũ aũme asu elĩ mamanyĩkie. 10 Ĩndĩ we nĩwĩthĩĩtwe ũyĩatĩĩa nesa momanyĩsyo makwa, mwĩkalĩle wakwa, kĩeleelo kyakwa, mũĩkĩĩo wakwa, wũmĩĩsyo wakwa, wendo wakwa, ũlũmu wakwa, 11 na mathĩna na monyamao ta ala mangwatie nĩ Andiokia, Ikonio, na Lisitela. Ĩndĩ nĩnoomĩĩisye na Mwĩaĩi ambonokya kuma mathĩnanĩ asu onthe. 12 Nĩ wʼo kana onthe ala mendaa kwĩkala me na kĩkĩo kya Ngai na me ngwatanĩo vamwe na Klĩsto Yesũ makathĩnwʼa. 13 Ĩndĩ andũ athũku na akengani makaendeea kũthũkĩĩa, maikengana na kũkengwa.

14 Ĩndĩ we endeea kũatĩĩa maũndũ ala wamanyĩiwʼe na waĩkĩĩthwʼa kana nĩ ma wʼo, nũndũ nĩwĩsĩ ala weemanyĩisye kuma kwoo, 15 na kuma wĩ kana kanini nĩwamanyie maandĩko matheu ala matonya kũtuma wĩthĩwa wĩ mũĩ kwondũ wa ũtangĩĩo nĩkwĩthĩwa nũmũĩkĩĩĩte Klĩsto Yesũ. 16 Maandĩko onthe nĩmaveveeiwe nĩ Ngai na nĩmaĩlĩte kwondũ wa kũmanyĩsya, kũkanyʼa, kũlũnga maũndũ, na kũtũngĩĩa kwa nzĩa ya ũlũngalu, 17 nĩ kana mũndũ wa Ngai ethĩwe e na ũtonyi wĩanĩtye, na eyũmbanĩtye vyũ kũtethya kĩla wĩa mũseo.