Sugunda Timótiu
3 Má, fika ta sabe ma na ténpu di fin, situason ta fika konplikadu i difísil di aguenta. 2 Pamodi ómis ta ben ama sô ses kabésa, ta ama dinheru, ta ser konvensidu, aroganti, ta pâpia kóntra Deus, ka ta obi ku pai ku mai, ta ser ingratu, disleal, 3 sen amor pa ningen, ka ta krê konkorda ku otus, ta ser kaluniador, diskontroladu, runhu, ka ta ama kuzas dretu, 4 traidoris, temozus, xeiu di orgulhu, es ta krê sô pasa sábi envês di ama Deus 5 i es ta finji ma es ta adora Deus, má es ka ta mostra kel-li na ses manera di vive.* Fika lonji di kes tipu di algen li. 6 Na ses meiu ta parse ómis ki ta entra na família ku spertéza i es ta ingana kes mudjer fraku, ki sta karegadu di pekadu i ki ta dexa lebadu pa dizejus, 7 i ki sta sénpri ta prende, má nunka es ka ta konsigi ten un konhisimentu izatu di verdadi.
8 Sima Janis i Janbris fika kóntra Muizés, es tanbê es ta kontinua ta fika kóntra verdadi. Kes ómi li tene menti tudu stragadu i Deus ka ta aprova-s, dja ki es ka sta anda di akordu ku fé. 9 Má es ka ta bai mutu lonji, pamodi tudu algen ta da kónta di ses falta di juís,* sima kontise ku kes dôs ómi. 10 Má abo bu sigi ku atenson kes kuza ki N ta inxina, nha manera di vive, nha obijetivu na vida, nha fé, nha paxénxa, nha amor, nha kapasidadi di aguenta firmi, 11 nhas pirsigison i nhas sufrimentu, sima kes ki N pasa na Antiokia, na Ikóniu i na Listra. N aguenta kes pirsigison li, i Sinhor libra-m di tudu es. 12 Na verdadi, tudu kes ki krê vive ta sigi Kristu Jizus i ta adora Deus, tanbê ta pirsigidu. 13 Má, kes algen mau i kes ki ta ingana algen ta ben bira kada bês más piór, ta ingana otus i ta ser inganadu.
14 Má abo, kontinua na kes kuza ki bu prende i ki bu fika konvensidu pa kridita na es, pamodi bu sabe di ken ki bu prende-s 15 i ki désdi ki bu nase* bu konxe kes skritura sagradu, ki pode da-u sabedoria pa salvason através di fé na Kristu Jizus. 16 Tudu ki sta na Skritura ben di Deus, i el ta sirbi pa inxina, pa koriji,* pa poi kuzas na kaminhu, pa disiplina ku justisa, 17 asi pa ómi di Deus ser totalmenti kapás i ben priparadu pa tudu bon óbra.