Kontinua ku alegria timenti bu ta kuida di un algen ki bu ta ama

1-2. Modi ki Jeová ta xinti si bu sta ta kuida di un algen ki dja sta di idadi ô ki sta duenti? (Provérbios 19:17) (Odja imajens.)

UN IRMON di Koreia ki txoma Jinyeol, fla: “Mi ku nha mudjer dja nu ten más ki 32 anu kazadu. Dja ten sinku anu ki N sta ta kuida di el. El ta sufri di duénsa di Parkinson i é difísil el mexe korpu. N ta ama nha mudjer txeu i N gosta di kuida di el. Tudu noti, el ta durmi na un kama di ospital na nos kaza. N ta durmi na se ladu i nu ta pega kunpanheru na mô timenti nu ta durmi.”

² Bu sta ta kuida di algun algen di bu família ô un amigu ki sta duenti ô ki dja sta algen di idadi? Di serteza, bu sta kontenti di djuda-l pamodi bu ta ama-l txeu. I óras ki bu ta kuida di kes algen ki bu ta ama, bu ta mostra ma bu ta ama Jeová. (1 Tim. 5:4, 8; Tia. 1:27) Má simé, bu ta pasa pa prubléma ki otus algen ka ta da kónta. Alvês, bu pode xinti ma ningen ka ta intende ma bu ta pasa pa txeu prubléma. Óras ki bu ta sta djuntu ku algen bu ta sta ta ri, má óras ki bu ta sta bo sô, bu ta sta tristi i ta txora. (Sal. 6:6) Enbóra otus pode ka sabe modi ki bu sta xinti, Jeová sénpri sabe i el ta intende-u. (Konpara ku Ézudu 3:7.) Bus lágua i sakrifisiu ki bu ta faze ten txeu valor pa el. (Sal. 56:8; 126:5) El ta odja tudu kuza ki bu ta faze pa djuda kel algen ki bu ta ama. El ta xinti ma el sta ta debe-u i el promete ma el ta rekonpensa-u. — Lé Provérbios 19:17.

3. Ki difikuldadis Abraon ku Sara talvês pasa pa el timenti es staba ta kuida di Tera?

³ Bíblia ten txeu izénplu di ómi ku mudjer ki ta kuidaba di algen di idadi ô ki staba duenti. Odja izénplu di Abraon ku Sara. Kantu es sai di Ur, Tera, ki éra ses pai, dja tinha uns 200 anu. Má simé, el bai ku es. Es viaja uns 960 kilómetru (600 milha) ti txiga na Aran. (Jén. 11:31, 32) Di serteza Abraon ku Sara ta amaba Tera, má imajina modi ki foi difísil pa es kuida di el duránti kel viajen. Tanbê es ta viajaba na kamelu i na buru, i kel-li éra difísil pa Tera ki dja staba algen grandi. Pode ser ki alvês Abraon ku Sara fika kansadu. Ka ta inporta kal ki éra ses situason, di serteza Jeová da-s kel forsa ki es staba ta meste. Sima Jeová djuda Abraon ku Sara, el ta djuda-u i el ta da-u forsa. — Sal. 55:22.

4. Kuzê ki nu sta ben odja na kel studu li?

⁴ Ta ser más fásil bu kontinua ta kuida di un algen ki bu ta ama si bu sta kontenti. (Pro. 15:13) Un algen kontenti ta pode kontinua filís sikrê ku prublémas. (Tia. 1:2, 3) Kuzê ki pode djuda-u sta kontenti? Un di kes kuza é óras ki bu ta ora pa Jeová pa el djuda-u kontinua ku un atitudi puzitivu. Na es studu, nu sta ben odja otus kuza ki kes algen ki ta kuida di kes algen ki es ta ama pode faze pa es kontinua kontenti. Tanbê nu ta ben odja modi ki otus algen pode djuda-s. Primeru, nu ben odja pamodi ki kes algen ki ta kuida di otus meste kontinua ku alegria i pamodi ki kel-li pode ser difísil.

PAMODI KI PODE SER DIFÍSIL STA KONTENTI?

5. Pamodi ki ken ki ta kuida di un algen ki el ta ama meste sta kontenti?

⁵ Si kes algen ki ta kuida di un algen ki es ta ama perde ses alegria, pode ser más fásil es fika kansadu. (Pro. 24:10) I óras ki es sta kansadu, pode ser más difísil es mostra bondadi i djuda sima es ta krê. Ki kuzas pode poi ken ki ta kuida di un algen ki el ta ama ta perde alegria?

6. Pamodi ki alguns algen ki ta kuida di kes algen ki es ta ama ta fika kansadu dimás?

⁶ Bu pode fika kansadu dimás. Un irman ki txoma Lea fla: “Mésmu óras ki tudu kuza sta bai dretu, na fin di dia N ta sta kansadu i sen forsa. Alvês, nen N ka ta ten forsa pa N responde un mensajen.” Otus algen nen ka ta ten ténpu pa diskansa ô pa kume. Un irman ki txoma Inês fla: “N ka ta durmi dretu. Txeu bês di noti N ten ki labanta di dôs en dôs óra pa N kuida di nha sógra. I dja ten txeu anu ki mi ku nha maridu nu ka konsigi toma féria.” Alguns algen ka ta konsigi pasa ténpu ku ses amigu ô faze alguns kuza na sirvisu pa Jeová, pamodi es ten ki kuida di kes algen ki es ta ama dia interu. Pur isu, alguns pode xinti es sô i tristi pamodi es ka ta konsigi faze alguns kuza ki es ta gostaba.

7. Pamodi ki alguns algen ki ta kuida di kes algen ki es ta ama ta xinti kulpadu i tristi?

⁷ Bu pode xinti kulpadu i tristi. Un irman ki txoma Jésika fla: “Txeu bês N ta xinti ma N debe fazeba más pa N kuida di nha pai. Kel-li ta pô-m ta xinti kulpadu i ma N ta pensa sô na nha kabésa.” Alguns algen ki ta kuida di un algen ki es ta ama ta xinti kulpadu pamodi es ta xinti tristi ku kel situason ki es sta na el. Otus ta fika preokupadu pamodi es ta atxa ma kel ki es sta ta faze ka ta txiga. Inda otus ta xinti kulpadu pamodi kantu ki es staba kansadu, es fla ô es faze algun kuza ki magua kel algen ki es sta ta kuida di el. (Tia. 3:2) Tanbê alguns pode fika tristi óras ki es ta odja kel algen ki es ta ama ta piora kada bês más. Un irman ki txoma Bárbara fla: “Un di kes kuza ki más ta due-m é odja nha amiga ta ba ta piora tudu dia.”

8. Modi ki alguns algen ta xinti óras ki otus algen ta agradese-s pa kuzas ki es faze?

⁸ Bu pode xinti ma otus algen ka ta mostra gratidon pa kuzê ki bu ta faze. Pamodi? Pamodi txeu algen ka ta agradese-u ô ilojia-u pa trabadju i sakrifisiu ki bu ta faze. Nton, óras ki un algen ta fla-u obrigadu pa tudu kuza ki bu ta faze, bu ta xinti inkorajadu. (1 Tes. 5:18) Un irman ki txoma Melisa fla: “Alvês, N ta txora pamodi N ta sta kansadu i dizanimadu. Má N ta xinti filís óras ki kes algen ki N ta kuida di es ta fla-m: ‘Obrigada pa tudu kuza ki bu faze pa mi!’ Kes kuza ki es ta fla-m ta pô-m ta labanta na kel otu dia prontu pa kuida di es otu bês.” Un irmon ki txoma Amadu, fla modi ki kes kuza ki algen ta fla pa agradese-l ta pô-l ta xinti. El ku se mudjer ta kuida di ses subrinha ki ta vive ku es i ki ta sufri di epilepsia. El fla: “Enbóra el ka ta intende dretu tudu sforsu ki nu ta faze pa djuda-l, nu ta fika kontenti óras ki el ta fla-nu obrigadu ô ma el ta ama-nu.”

MODI KI BU PODE KONTINUA KONTENTI?

9. Modi ki ken ki ta kuida di un algen ki el ta ama pode seta se limitason?

⁹ Seta bus limitason. (Pro. 11:2) Nen sénpri nu ka ta ten ténpu ô forsa pa faze tudu kuza ki nu krê. Pur isu, bu ten ki disidi kuzê ki bu ta pode faze. I alvês bu ten ki fla nau. I ka ten prubléma bu faze kel-li! Bu sta ta mostra ma bu ta seta bus limitason. I si otus algen oferese pa djuda-u, seta ses ajuda ku alegria. Un irmon ki txoma Jay fla: “Nu ta pode faze sô un kuza di kada bês. Si bu seta bus limitason i bu ka faze más di ki kel ki bu ta pode kel-li ta djuda-u kontinua filís.”

10. Óras ki bu ta kuida di un algen kuzê ki bu meste intende? (Provérbios 19:11)

¹⁰ Tenta intende kel algen. (Lé Provérbios 19:11.) Si bu faze si, ta ser más fásil bu kontinua kalmu, óras ki kel algen ki bu ta kuida di el fla ô faze algun kuza ki magua-u. Tenta intende pamodi ki kel algen sta ta aji di kel manera la. Alguns duénsa ta poi algen ta fla kuzas ki normalmenti el ka ta flaba. (Ecl. 7:7) Pur izénplu, normalmenti un algen ki ta pâpia i ki ta aji ku bondadi pode kumesa ta diskuti ku bo. Ô el pode kumesa ta kexa txeu i ta xatia ku bo. Si bu sta ta kuida di un algen ki ten un duénsa gravi, ta sérba bon bu tenta sabe más sobri kel duénsa. Intende se duénsa ta djuda-u odja ma kes kuza ki el ta fla i kel ta faze é ka pamodi el krê, má é pamodi se duénsa. — Pro. 14:29.

11. Ki kuzas inportanti un algen ki ta kuida di un otu algen meste tra ténpu pa faze tudu dia? (Salmo 132:4, 5)

¹¹ Tra ténpu pa bu bira bu amizadi ku Jeová más fórti. Alvês bu meste poi alguns kuza di ladu pa bu pode kuida di kes kuza ki é “más inportanti”. (Flp. 1:10) Pur izénplu, un di kes kuza más inportanti é bira bu amizadi ku Jeová más fórti. Davidi éra un rei okupadu, má el poi adorason pa Jeová na primeru lugar na se vida. (Lé Salmo 132:4, 5.) Di mésmu manera, é inportanti pa bu tra ténpu tudu dia pa bu lé Bíblia i faze orason. Un irman ki txoma Elizaa fla: “Óras ki N ta faze orason pa Jeová, N ta lé salmus i N ta midita na kes kuza ki N lé, N ta xinti kalmu i filís. Faze orason pa Jeová é kuza ki más ta djuda-m. N ta ora pa Jeová txeu bês por dia i N ta pidi-l pa el djuda-m fika kalmu.”

12. Pamodi ki é inportanti pa un algen ki ta kuida di otu algen tanbê kuida di se saúdi?

¹² Tra ténpu pa bu kuida di bu saúdi. Pesoas ki ta sta okupadu sima kes ki ten ki kuida di otus algen pode atxa difísil kume kumida ki é bon pa saúdi. Kel-li ta kontise pamodi es ten poku ténpu pa es bai kunpra produtus frésku i pa es faze kumida ki é bon pa saúdi. Má pa bu kontinua ku un bon saúdi bu ta meste kume kumida ki é bon pa saúdi i faze izersísiu sénpri. Pur isu, uza dretu kel poku ténpu ki bu ten pa bu kume kumida ki é bon pa saúdi i faze izersísiu sénpri. (Efé. 5:15, 16) Tanbê, tenta durmi kel ki bu korpu meste. (Ecl. 4:6) Alguns dotor ki ta studa nos sérbru, splika ma durmi ta djuda nos sérbru rekupera otu bês. Un artigu di un revista sobri saúdi ta fla ma óras ki un algen ta durmi kel ki se korpu meste, el ta xinti ménus preokupadu i é más fásil el mante kalmu na situasons difísil. Tanbê, bu meste tra ténpu pa bu divirti. (Ecl. 8:15) Un irman fla kuzê ki ta djuda-l kontinua filís. El fla: “Óras ki sta bon ténpu, N ta tenta sai di kaza i toma un bokadinhu di sol. I peloménus un bês pa mês, N ta tra un dia pa N faze algun kuza ki N gosta ku nhas amiga.”

13. Pamodi ki é bon ri? (Provérbios 17:22)

¹³ Ri di kuzas ki pode kontise. (Lé Provérbios 17:22; Ecl. 3:1, 4) Ri é bon pa menti i pa korpu. Óras ki bu ta kuida di un algen, txeu bês, kuzas ka ta kontise sima bu sta ta spera. Má óras ki bu ta ri di kel situason, é más fásil bu fika ménus xatiadu. I óras ki bu ta ri djuntu ku kel algen ki bu sta kuida di el, nhos amor pa kunpanheru ta fika más fórti.

14. Modi ki pâpia ku un amigu di kunfiansa pode djuda-u?

¹⁴ Pâpia ku un amigu di kunfiansa. Sikrê bu faze bu midjór pa bu sta kontenti, alvês bu ta ba xinti txeu preokupadu. Óras ki kel-li kontise, é bon bu pâpia ku un amigu ki ka ta ba pô-u ta xinti mal ku kuzê ki bu sta fla. (Pro. 17:17) Envês di kel-li, el sta ba obi-u i da-u koraji. I kel-li pode ser kel ki bu sta meste pa bu xinti filís otu bês. — Pro. 12:25.

15. Modi ki pâpia sobri Paraízu pode pô-u ta xinti filís?

¹⁵ Imajina abo ku kel algen djuntu na Paraízu. Lenbra ma bu ka ta ben kontinua ta kuida di kel algen di idadi ô kel algen ki sta duenti pa tudu ténpu. Jeová nunka ka kreba pa nu faze kes tipu di trabadju li. (2 Kor. 4:16-18) “Kel vida di verdadi” sta pa ben. (1 Tim. 6:19) Talvês bu ta xinti txeu alegria si bu pâpia ku kel algen ki bu ta ama sobri kuzas ki nhos ta ben faze djuntu na Paraízu. (Isa. 33:24; 65:21) Un irman ki txoma Edna fla: “Txeu bês N ta fla kes algen ki N ta kuida di es ma ka ta dura nu ta ben faze txeu kuza djuntu, sima koze, kóre i anda di bisikléta djuntu. Nu ta ben faze pon i kumida sábi pa kes algen ki nu krê txeu ki ta ben resusitadu. Dipôs, nu ta faze orason djuntu pa nu agradese Jeová pa kel speransa ki el da-nu.”

MODI KI NU PODE DJUDA KES ALGEN KI TA KUIDA DI UN ALGEN KI ES TA AMA?

16. Modi ki nu pode djuda un algen di nos kongregason ki ta kuida di un algen di idadi ô un algen ki sta duenti? (Odja imajen.)

¹⁶ Nu pode djuda-s tra ténpu pa es diskansa. Irmons ku irmans pode oferese pa pasa algun ténpu ku kel algen di idadi ô ki sta duenti. (Gál. 6:2) Asi, kel algen ki ta kuida di el ta pode diskansa un bokadinhu i el ta ten ténpu pa kuida di ses asuntu. Alguns irmon ku irmans faze un planu pa sabe kenha ki pode djuda kada simana. Un irman ki txoma Natália, ki ta kuida di se maridu ki é paralizadu, fla: “Un irmon di nha kongregason ta ben un ô dôs bês pa simana pa pasa ténpu ku nha maridu. Es ta prega djuntu, es ta pâpia i ti es ta odja filmi. Nha maridu gosta txeu di kes momentu li i N ta ten ténpu pa N diskansa i pa N faze kuzas ki N gosta, sima faze kaminhada.” Na alguns situason, alguns irmon na kongregason pode oferese pa kuida di kel algen di noti asi pa kel irmon ô irman ki ta kuida di kel algen pode durmi dretu.

17. Modi ki nu pode djuda kes algen ki ta kuida di un algen di idadi ô un algen ki sta duenti duránti runion?

¹⁷ Nu pode djuda-s duránti runion. Kes ki ta kuida di otus algen ka ta konsigi presta atenson na runion, na asenbleia i na kongrésu pamodi es ta sta okupadu ta kuida di kes algen ki es ta ama. Irmons na kongregason pode oferese pa xinta djuntu ku kel algen di idadi ô kel algen ki sta duenti duránti runion interu ô duránti un párti di el. Si kel algen di idadi ô kel algen duenti ka ta konsigi sai di kaza, nu pode oferese pa ba sisti un runion ku el pa internet asi pa kel algen ki ta kuida di el pode ba sisti runion na Salon di Reinu.

18. Kuzê más ki nu pode faze pa kes algen ki ta kuida di otus algen?

¹⁸ Nu pode ilojia kes irmon ki ta kuida di otus algen i ora pa es. Ansions sénpri debe inkoraja kes irmon ki ta kuida di otus algen. (Pro. 27:23) I nos tudu nu debe kontinua ta fla kes algen ki ta kuida di otus algen ma nu ta ama-s i nu ta da valor pa tudu kel ki es ta faze. Tanbê nu pode pidi Jeová pa kontinua ta da-s forsa i pa djuda-s kontinua ku ses alegria. — 2 Kor. 1:11.

19. Ki speransa nu ten pa futuru?

¹⁹ Ka ta dura, Jeová ta ben kaba ku tudu sufrimentu i tristéza. Duénsa i mórti ka ta ben ten más. (Apo. 21:3, 4) ‘Kes algen manku ta ben salta sima viadu’. (Isa. 35:5, 6) Dipôs nu ka ta ben sufri más pamodi bedjisa ô di odja kes algen ki nu ta ama ta fika bédju ô duense. Kes kuza li ta ben faze párti di ‘kes kuza ki ka ta ben lenbradu más’. (Isa. 65:17) Mésmu gósi, timenti nu sta ta spera pa Jeová kunpri ses promésa nu pode ten tudu serteza ma sénpri el ta ben djuda-nu. Si nu kontinua ta kunfia na se forsa, el ta ben djuda-nu “aguenta firmi na tudu kuza, ku paxénxa i alegria.” — Kol. 1:11.