Poi na lugar di otus
Prubléma
Si nu konsentra txeu na diferénsa entri nos i otus algen, nu pode fika ta pensa ma kes diferénsa é fadjas ô defetu ki es ten. Pamodi kel-li nu pode atxa ma nos é más inportanti ki es, i asi ta fika más difísil poi na lugar di otus.
Prinsípiu di Bíblia
‘Nhos fika kontenti ku kes ki sta kontenti; nhos txora ku kes ki sta ta txora.’ — ROMANOS 12:15.
Kuzê ki kel-li krê fla? Kel prinsípiu di Bíblia li krê fla: poi na lugar di otus ô xinti kuzê ki otus algen sta ta xinti.
Modi ki poi na lugar di otus ta djuda-nu
Poi na lugar di otu algen ta djuda-nu odja ma nu ten txeu kuza kuazi igual ku el. Nu ta da kónta ma kel algen pode xinti i reaji di mésmu manera ki nos. Poi na lugar di otus ta djuda-nu odja ma nos tudu é un família, ka ta nporta di undi ki nu ben. Óras ki nu konsentra más txeu na kes kuza ki nu ten igual ku otus algen, ta fika más difísil nu ten ideias mariadu sobri es.
Poi na lugar di otus tanbê ta djuda-nu ruspeta otus algen. Odja izénplu di Anne-Marie, di Senegal. El ta disprezaba algen di un grupu ki txeu algen ta atxaba ma ka tinha txeu valor. El fla modi ki poi na lugar di otus djuda-l: “Kantu N odja prublémas ki kes algen tinha, N pergunta nha kabésa modi ki N ta xintiba si N staba na ses lugar. N da kónta ma N ka éra más inportanti ki es, i ma N ka faze nada pa N ser más inportanti ki es.” Óras ki nu ta sforsa pa ntende prublémas di otus algen, ta fika más fásil nu poi na ses lugar envês di kritika-s.
Kuzê ki bu pode faze
Si bu ten ideias mariadu sobri un grupu, ka bu konsentra na kes kuza diferenti ki nhos ten ku kunpanheru, má konsentra na kes kuza ki nhos ten igual. Pur izénplu, tenta imajina modi ki kes algen ta xinti óras ki es ta
Poi na lugar di otus ta djuda-nu ntende ma nos tudu nu ta faze párti di mésmu família
kume djuntu ku ses família
txiga kaza dipôs di un dia di trabadju kansadu
pasa ténpu ku amigus
obi múzika ki más es gosta
Dipôs, tenta poi na ses lugar. Pergunta bu kabésa:
‘Modi ki N ta reajiba si un algen trata-m di un manera ki ta pô-m ta xinti sen valor?’
‘Modi ki N ta xintiba si otus algen julga-m antis di es konxe-m?’
‘Si N ta fazeba párti di kel grupu, modi ki N ta gostaba pa otus algen trata-m?’