NAʼLEBʼ RE TZOLOK 21
Chanru naxsume li Jehobʼa li qatij?
«Naqanaw ajwiʼ naq ak wank qikʼin li kʼaru xqatzʼaama chiru» (1 JUAN 5:15).
BʼICH 41 Chaawabʼi taxaq lintij
RUʼUJIL LI TZOLOMa
1, 2. Kʼaru naru naqakʼoxla rix?
MA XAAKʼOXLA junsutaq chanru li Jehobʼa kixsume laatij? Wi joʼkan moko wankat ta aajunes. Naabʼalebʼ li hermaan nekeʼkʼoxlak ajwiʼ chi joʼkaʼin, qʼaxal wiʼ chik naq yookebʼ xnumsinkil li chʼaʼajkilal. Maare nachʼaʼajkoʼk chiqu rilbʼal chanru li Jehobʼa naxsume li qatij wi yooko xnumsinkil junaq li rahilal.
2 Saʼ li tzolom aʼin, tqil kʼaʼut naq chʼolchʼo chiqu naq li Jehobʼa naxsume li qatij (1 Juan 5:15). Tqil ajwiʼ kʼaʼut naq wank sut chanchan tawiʼ naq li Jehobʼa inkʼaʼ naxsume li qatij ut chanru naxsume.
MAARE LI JEHOBʼA INKʼAʼ TIXSUME LI QATIJ JOʼ NAQAJ
3. Kʼaʼut naraj li Jehobʼa naq tootijoq chiru?
3 Li Santil Hu naxkʼut chiqu naq li Jehobʼa nokooxra ut oxloqʼo chiru (Ageo 2:7; 1 Juan 4:10). Joʼkan naq naxye qe naq tootijoq chiru re xtzʼaamankil li qatenqʼ (1 Ped. 5:6, 7). Naraj qatenqʼankil re naq toojiloq chixkʼatq ut tqaqʼax ru ebʼ li chʼaʼajkilal li yooko xnumsinkil.
Li Jehobʼa kixsume xtij laj David naq kixkol chiru li xikʼ nekeʼilok re. (Chaawil li raqal 5).
4. Chankiru naqanaw naq li Jehobʼa naxsume xtij laj kʼanjel chiru? (Chaawil li jalam u).
4 Saʼ li Santil Hu wank naabʼal resil chanru li Jehobʼa kixsume li xtij ebʼ li xmoos li xeʼwank junxil. Maare nachalk saʼ qachʼool li kixkʼul li awabʼej David. Naabʼal li kristiʼaan xikʼ nekeʼilok re ut junelik kixsikʼ xtenqʼ li Jehobʼa. Saʼ jun kutan kixye: «At Qaawaʼ, chawabʼi taxaq lintij, chakʼe reetal li nintzʼaama chawu, chinaasume taxaq xbʼaan xtiikilal laachʼool» (Sal. 143:1). Li Jehobʼa kixsume li xtij ut kixkol (1 Sam. 19:10, 18-20; 2 Sam. 5:17-25). Joʼkan naq laj David kixye chi anchal xchʼool: «Nachʼ wank li Qaawaʼ rikʼinebʼ li nekeʼyaabʼank li xkʼabʼaʼ». Chʼolchʼo ajwiʼ chiqu aʼin (Sal. 145:18).
Li Jehobʼa kixsume xtij laj Pablo naq kixkʼe xmetzʼew re naq tixkuy li yook xnumsinkil. (Chaawil li raqal 4).
5. Ma junelik kixsume li xtij ebʼ li xmoos li Jehobʼa joʼ chanru xeʼraj? Kʼe jun eetalil. (Chaawil li jalam u).
5 Maare li Jehobʼa inkʼaʼ naxsume li qatij joʼ chanru naqaj. Aʼan kixkʼul li apóstol Pablo. Kixtzʼaama re li Jehobʼa naq trisi «li tiqʼlebʼ» saʼ xjunxaqalil. Kixtzʼaama re li Jehobʼa oxibʼ sut naq trisi li rahilal aʼin. Ma kixsume li xtij? Joʼkan, abʼan maawaʼ joʼ chanru naroybʼeni laj Pablo. Li Jehobʼa moko kirisi ta li xchʼaʼajkilal, kixkʼe bʼan xkawilal re naq yooq chi kʼanjelak chiru chi anchal xchʼool (2 Cor. 12:7-10).
6. Kʼaʼut wank sut naʼilmank naq chanchan tawiʼ li Jehobʼa inkʼaʼ naxsume li qatij?
6 Maare wank sut li xsumenkil li qatij maawaʼ li naqoybʼeni. Abʼan chʼolchʼo chiqu naq li Jehobʼa naxnaw chiʼus kʼaru naʼajmank chiqu. Naru «xbʼaanunkil chixjunil chi numtajenaq chik chiru li naqatzʼaama malaj naqakʼoxla» (Efes. 3:20). Joʼkan naq, li xsumenkil li qatij naru nachalk saʼ li hoonal malaj saʼ junaq li naʼlebʼ li inkʼaʼ naqoybʼeni.
7. Kʼaʼut wank sut tqajal li naqaye re li Jehobʼa saʼ li qatij? Kʼe jun eetalil.
7 Maare naʼajmank naq tqajal li qatij naq naqataw ru chiʼus li rajom li Jehobʼa. Qilaq li kixkʼul li hermaan Martin Poetzinger. Naq tojeʼaq xsumlajik xeʼxkʼe saʼ tzʼalam re nazi. Kixpatzʼ re li Jehobʼa naq t-elq saʼ tzʼalam re naq truuq wanq rikʼin li rixaqil ut saʼ li puktesink. Abʼan kinumeʼk wiibʼ xamaan ut chanchan tawiʼ naq li Jehobʼa inkʼaʼ naxsume li xtij. Joʼkan naq kixye: «At Jehobʼa kʼut chiwu li nakaawaj naq tinbʼaanu». Kiʼok xkʼoxlankil li yookebʼ xnumsinkil ebʼ li hermaan saʼ li tzʼalam. Naabʼal rehebʼ yookebʼ xkʼaʼuxl chirixebʼ li rixaqil ut ebʼ li xkokʼal. Joʼkan naq li hermaan Poetzinger kixye re li Jehobʼa: «Bʼanyox linʼakʼ kʼanjel. Tenqʼahin re xkawresinkil ut xwaklesinkil xchʼool ebʼ li hermaan». Ut aʼan kixbʼaanu naq kiwank bʼeleebʼ chihabʼ saʼ tzʼalam.
8. Kʼaru tqajultika naq nokootijok?
8 Tento tqajultika naq li Jehobʼa tixbʼaanu li rajom saʼ li hoonal li kixxaqabʼ. Saʼ xyanq aʼin wank xsachbʼal chixjunil li chʼaʼajkilal joʼ li rahilal, li yajel ut li kamk. Li Jehobʼa troksi li Xʼawabʼejilal re xbʼaanunkil li kixyeechiʼi (Dan. 2:44; Apoc. 21:3, 4). Abʼan toj anaqwan naxkanabʼ naq laj Tza tixjolomi li ruuchichʼochʼ (Juan 12:31; Apoc. 12:9).b Wi li Jehobʼa tixsach chixjunil li chʼaʼajkilal li yooko xnumsinkil, tkʼutunq naq chanchan tawiʼ naq moko yibʼ ta ru li yook xbʼaanunkil laj Tza. Usta yooko roybʼeninkil naq li Jehobʼa tixbʼaanu li naxyeechiʼi, moko naraj ta xyeebʼal naq nokooxkanabʼ qajunes. Qilaq wiibʼ oxibʼ li naʼlebʼ li naxbʼaanu li Jehobʼa re qatenqʼankil.
CHANRU LI JEHOBʼA NAXSUME LI QATIJ
9. Chanru nokooxtenqʼa li Jehobʼa re xsikʼbʼal li naqaj xbʼaanunkil saʼ li qayuʼam? Kʼe jun eetalil.
9 Naxkʼe qanaʼlebʼ. Li Jehobʼa naxye qe naq tixkʼe li qanaʼlebʼ re naq us tooʼelq saʼ li qayuʼam. Naʼajmank xtenqʼ li Jehobʼa naq yooko xsikʼbʼal xbʼaanunkil junaq li naʼlebʼ saʼ li qayuʼam, joʼ ma toosumlaaq malaj inkʼaʼ (Sant. 1:5). Qilaq li kixkʼul li xMaría li toj wank xjunes.c Sa xchʼool chi kʼanjelak joʼ aj kʼamolbʼe saʼ li puktesink naq kixnaw ru jun li hermaan. Aʼan naxye: «Xooʼok chi wank joʼ amiiw ut xooʼok xraabʼal qibʼ. Ninnaw naq tento tinsikʼ kʼaru tinbʼaanu. Joʼkan naq xintijok chirix li naʼlebʼ aʼin. Nawaj li xtenqʼ li Jehobʼa abʼan, ninnaw naq laaʼin tento tinsikʼ kʼaru tinbʼaanu». Li xMaría kirekʼa naq li Jehobʼa kixsume li xtij. Chanru? Kixsikʼ xkomon xnaʼlebʼ saʼ li qatasal hu ut kixtaw junjunq li tzolom li kixtenqʼa xsumenkil li xpatzʼom. Kixkʼe ajwiʼ xchʼool chi xyuʼaminkil li kiyeeheʼk re xbʼaan li xnaʼ li wank joʼ aj Testiiw, ut aʼan kitenqʼank re li xMaría re xtzʼilbʼal rix li narekʼa. Joʼkan naq li xMaría chaabʼil kinaʼlebʼak.
Chankiru naxkʼe qametzʼew li Jehobʼa re xkuybʼal li yooko xnumsinkil? (Chaawil li raqal 10).
10. Joʼ naxye Filipenses 4:13, kʼaru naxbʼaanu li Jehobʼa re xtenqʼankil ebʼ laj kʼanjel chiru? Kʼe jun eetalil. (Chaawil li jalam u).
10 Li Jehobʼa naxkʼe li qakawilal. Joʼ kixbʼaanu rikʼin li apóstol Pablo, li Jehobʼa naxkʼe li qakawilal re naq tooruuq xqʼaxbʼal ebʼ li chʼaʼajkilal (taayaabʼasi Filipenses 4:13). Qilaq chanru li Jehobʼa kixtenqʼa laj Benjamin, li kixnumsi naabʼal li chʼaʼajkilal. Chalen chaq saʼ li xkachʼinal laj Benjamin ut li xjunkabʼal xeʼwank saʼ li naʼaj bʼarwiʼ wankebʼ li xeʼxkanabʼ li xtenamit chiru naabʼal chihabʼ saʼ África. Naxye: «Rajlal nintijok chiru li Jehobʼa ut nintzʼaama re naq tinxtenqʼa xbʼaanunkil li us. Li Jehobʼa kixsume lintij, kixkʼe xtuqtuukilal inchʼool, naq inkʼaʼ yook inxiw chi puktesink ut ebʼ li qatasal hu re xkawresinkil linpaabʼal». Naxye ajwiʼ: «Xyaabʼasinkil li resil li xyuʼamebʼ li wechpaabʼanel ut rilbʼal chankiru li Jehobʼa kixtenqʼahebʼ, kixkawresi linchʼool re naq tiikaq inchʼool chiru li Jehobʼa».
Ma xaakʼe reetal chanru li Jehobʼa naroksi ebʼ li qechpaabʼanel re aatenqʼankil? (Chaawil li raqal 11 ut 12).d
11, 12. Chankiru truuq li Jehobʼa roksinkil li qechpaabʼanel re xsumenkil li qatij? (Chaawil li jalam u).
11 Naroksi li qechpaabʼanel. Jun qʼoqyink chik ma nakamk, li Jesús kitijok chi anchal xchʼool. Kixtzʼaama re li Jehobʼa naq ebʼ li junchʼol inkʼaʼ teʼxkʼoxla naq kixtzʼeqtaana li Jehobʼa. Abʼan li Jehobʼa kixtaqla chaq jun li ánjel re xtenqʼankil li Jesús (Luc. 22:42, 43). Joʼkan ajwiʼ li Jehobʼa naru nokooxtenqʼa re naq ebʼ li qechpaabʼanel, tooʼeʼxbʼoq malaj tooʼeʼrulaʼani re xwaklesinkil qachʼool. Chiqajunilo naru naqasikʼ li hoonal re xyeebʼal «li chaabʼil aatin» rehebʼ li qechpaabʼanel (Prov. 12:25).
12 Qilaq li kixkʼul li xMíriam. Wiibʼ oxibʼ xamaan xkamik li xbʼeelom wank saʼ rochoch xjunes ra saʼ xchʼool ut inkʼaʼ naxnaw kʼaru xbʼaanunkil. Moko naxkanabʼ ta yaabʼak ut naraj aatinak rikʼin jun li rechpaabʼanel. Kixye: «Maaʼani nawaj xbʼoqbʼal, joʼkan naq xintijok chiru li Jehobʼa. Naq yookin chi yaabʼak ut tijok kiʼekʼank li selular. Aʼan jun cheekel winq, jun chaabʼil amiiw». Rochbʼeen li rixaqil xeʼxkʼojobʼ xchʼool li xMíriam, chʼolchʼo chiru li xMíriam naq li Jehobʼa kixbʼaanu naq li hermaan tbʼoqoq re.
Chanru naroksi li Jehobʼa li maawaʼebʼ aj Testiiw re qatenqʼankil? (Chaawil li raqal 13 ut 14).
13. Ye jun eetalil chirix chankiru li Jehobʼa naroksi ebʼ li kristiʼaan li inkʼaʼ nekeʼloqʼonink re xsumenkil li qatij.
13 Naru naroksi ebʼ li inkʼaʼ nekeʼxloqʼoni ru (Prov. 21:1). Wank sut li Jehobʼa naxsume li xtijebʼ li xtenamit naq naroksi li kristiʼaan li maawaʼebʼ aj paabʼanel. Jun eetalil, kixbʼaanu naq li awabʼej Artajerjes tixkanabʼ naq laj Nehemías taaxik Jerusalén ut kixtenqʼa re xkabʼlankil wiʼ chik li tenamit (Neh. 2:3-6). Saʼ li qakutan li Jehobʼa naru ajwiʼ naroksi li maawaʼebʼ aj paabʼanel re qatenqʼankil naq naʼajmank chiqu.
14. Chankiru naxkawresi laachʼool li kixkʼul li xSoo Hing? (Chaawil li jalam u).
14 Li xSoo Hing kirekʼa naq li Jehobʼa kiroksi jun laj bʼanonel re xtenqʼankil. Wank xyajel li xkʼaʼuxl li xyum ut kixkʼul jun li rahilal li jayeʼq kixkamsi. Joʼkan naq li xSoo Hing ut li xbʼeelom xeʼxkanabʼ kʼanjelak re rilbʼal. Ut aʼin kixkʼam chaq li chʼaʼajkilal rikʼin li tumin. Chʼaʼaj li yook xkʼulbʼal. Joʼkan naq li xSoo Hing kixye naq inkʼaʼ chik naru, maakʼaʼ chik li xmetzʼew. Chi anchal xchʼool kixtzʼaama xtenqʼ li Jehobʼa. Laj bʼanonel kixsikʼ chanru xtenqʼankil ut xbʼaan aʼin li awabʼej kixtenqʼahebʼ ut xeʼxtaw jun li ochoch li moko terto ta xtzʼaq. Li xSoo Hing naxye: «Xqil chankiru li Jehobʼa xooxtenqʼa. Joʼkan naq chi anchal qachʼool naqanaw naq aʼan narabʼi “li qatij”» (Sal. 65:3).
NAʼAJMANK NAQ KAWAQ QAPAABʼAL RE RILBʼAL UT XKʼULUBʼANKIL LI XSUMENKIL LI QATIJ
15. Kʼaru kitenqʼank re jun li hermaan chi xkʼebʼal reetal naq li Jehobʼa kixsume li xtij?
15 Li Jehobʼa moko junelik ta naxsume li qatij joʼ chanru naqaj. Abʼan naq naqakʼul li xsumenkil li qatij, aʼan li naʼajmank chiqu re naq tiikaq qachʼool chiru li Jehobʼa. Joʼkan naq ajʼajaq qu chi rilbʼal chanru li Jehobʼa naxsume li qatij. Li xYoko naxkʼoxla naq li Jehobʼa inkʼaʼ naxsume li xtij. Joʼkan naq kiʼok xtzʼiibʼankil chixjunil li kixtzʼaama re li Jehobʼa. Naq ak xnumeʼk naabʼal kutan kiril li kixtzʼiibʼa ut kixkʼe reetal naq li Jehobʼa ak kixsume li xtij ut saʼ xyanq aʼin wank li moko naxjultika ta. Aajel ru naq tqakʼe qahoonal chi xkʼoxlankil chankiru li Jehobʼa naxsume li qatij (Sal. 66:19, 20).
16. Chanru nokooxtenqʼa li qapaabʼal naq nokootijok? (Hebreos 11:6).
16 Moko kaʼaj tawiʼ wanq qapaabʼal re tijok chiru li Jehobʼa, tento tqakʼulubʼa li xsumenkil li qatij maakʼaʼ naxye chanru naxsume (taayaabʼasi Hebreos 11:6). Qilaq li xeʼxkʼul laj Mike ut li xChrissy, li sumal aʼin xeʼraj kʼanjelak Betel. Laj Mike kixye: «Xqataqla naabʼal sut li qahu ut xootijok rajlal chiru li Jehobʼa chirix li naʼlebʼ aʼin, abʼan maajunwa xooʼeʼxbʼoq». Laj Mike ut li xChrissy inkʼaʼ xeʼxkanabʼ xkʼojobʼankil xchʼool rikʼin li Jehobʼa xbʼaan naq aʼan naxnaw bʼar naʼajmank li xtenqʼ. Xeʼxbʼaanu chixjunil re kʼanjelak chiru li Jehobʼa: xeʼwank joʼ aj kʼamolbʼe saʼ li puktesink bʼarwiʼ naʼajmank li tenqʼ, ut xeʼtenqʼank re xkabʼlankil li ochoch li naʼoksimank re xloqʼoninkil ru li Jehobʼa. Anaqwan wankebʼ joʼ li cheekel winq li naʼulaʼanink chʼuut. Laj Mike naxye: «Li Jehobʼa moko junelik ta naxsume li qatij joʼ chanru naqaj, abʼan naxsume joʼ maajunwa naqakʼoxla».
17, 18. Joʼ naxye Salmo 86:6, 7, kʼaru chʼolchʼo chiqu?
17 (Taayaabʼasi Salmo 86:6, 7). Naxnaw laj David naq li Jehobʼa narabʼi ut naxsume li xtij. Joʼkan ajwiʼ naru nakaawekʼa laaʼat. Ebʼ li eetalil li xooʼaatinak wiʼ saʼ li tzolom aʼin naxkʼut chiqu naq li Jehobʼa naru naxkʼe qe li qanaʼlebʼ ut li qametzʼew re xkuybʼal. Xqil ajwiʼ naq naru naroksi ebʼ li qechpaabʼanel malaj li inkʼaʼ nekeʼxloqʼoni ru, re naq tooʼeʼxtenqʼa.
18 Maare li Jehobʼa moko junelik ta naxsume li qatij joʼ chanru naqaj abʼan tixsume. Tixkʼe li naʼajmank chiqu ut saʼ li hoonal bʼarwiʼ naʼajmank. Joʼkan bʼiʼ, miqakanabʼ tijok chi anchal qachʼool, chʼolchʼo chiqu naq li Jehobʼa tooxkʼaakʼale ut saʼ li akʼ ruuchichʼochʼ tixkʼojobʼ «xchʼool chixjunilebʼ!» (Sal. 145:16).
BʼICH 49 Qasahobʼresihaq li xchʼool li Jehobʼa
a Li Jehobʼa naxye naq tixsume li qatij wi naxchap ribʼ rikʼin li rajom. Naq yooko xnumsinkil li rahilal chʼolchʼo chiqu naq li Jehobʼa tooxtenqʼa re naq tiikaq qachʼool chiru. Saʼ li tzolom aʼin tqil chanru li Jehobʼa naxsume li qatij.
b Re xnawbʼal kʼaʼut naq li Jehobʼa naxkʼulubʼa naq laj Tza tixjolomi li ruuchichʼochʼ taawil li naʼlebʼ li naʼaatinak chirix li xkʼulubʼ li Jehobʼa chi awabʼejink, saʼ li hu Laj Kʼaakʼalehom junio 2017, maakʼaʼ saʼ qʼeqchiʼ.
c Xjalmank wiibʼ oxibʼ li kʼabʼaʼej.
d XCHʼOLOBʼANKIL LI JALAM U: Jun naʼbʼej rochbʼeen li xchʼina koʼ nekeʼwulak saʼ jalan chik tenamit, saʼ li naʼaj bʼarwiʼ wankebʼ li xeʼxkanabʼ li xtenamit. Ebʼ li hermaan nekeʼxkʼul chi anchalebʼ xchʼool ut nekeʼxtenqʼa.