Domingo 27 re julio
Re xwaklesinkilebʼ xchʼool ebʼ li qas qiitzʼin [ . . . ] ut re xkʼutbʼal chiruhebʼ naq yookebʼ chi paltoʼk (Tito 1:9).
Re naq tatkawuuq saʼ laapaabʼal, naʼajmank naq taatzol junjunq ebʼ li naʼlebʼ li tatxtenqʼa. Aʼin tatxtenqʼa re naq taakʼulubʼa ebʼ li kʼanjel saʼ li chʼuut, re naq taataw junaq li kʼanjel li tatxwenteni malaj tixwenteni laajunkabʼal ut re naq taakʼam aawibʼ saʼ usilal rikʼinebʼ li junchʼol. Jun eetalil, tzol ilok ru hu ut tzʼiibʼak chi chaabʼil. Li Santil Hu naxye naq li winq li sa xchʼool ut us naʼelk naxyaabʼasi li Santil Hu wulaj wulaj ut naxnaʼlebʼa rix (Sal. 1:1-3). Chi joʼkan, naxnaw chanru nakʼoxlak li Jehobʼa ut aʼin naxtenqʼa re naq tkʼoxlaq chiʼus (Prov. 1:3, 4). Ebʼ li hermaan winq ut ixq naʼajmank naq teʼkʼuteʼq ut teʼkʼeheʼq re li chaabʼil naʼlebʼ rikʼin li Santil Hu xbʼaanebʼ li hermaan winq. Wi nakaanaw ilok ru hu ut tzʼiibʼak chi chaabʼil tatruuq xkawresinkil ebʼ li seeraqʼ ut ebʼ li chaabʼil sumenk li tixkawubʼresi xpaabʼalebʼ li junchʼol. Joʼkan ajwiʼ, tatruuq xtzʼiibʼankil ebʼ li chaabʼil naʼlebʼ li tatxtenqʼa re xkawubʼresinkil laapaabʼal ut xwaklesinkil xchʼoolebʼ li hermaan. w23.12 26,27 raqal 9-11
Lunes 28 re julio
Li wank saʼ junajil eerikʼin qʼaxal nim chiru li wank saʼ junajil rikʼin li ruuchichʼochʼ (1 Juan 4:4).
Naq t-oq aaxiw, naʼlebʼa rix li tixbʼaanu li Jehobʼa saʼ li kutan chalk re naq maaʼanihaq chik laj Tza. Saʼ li nimla chʼutam re oxibʼ kutan re 2014 kiwank jun li kʼutbʼesink bʼarwiʼ jun li hermaan naʼaatinak rikʼin li xjunkabʼal chirix li tixye raj 2 Timoteo 3:1-5 wi aʼin raj jun li propesiiy chirix li Chʼinaʼusil Naʼajej: «Saʼ li akʼ ruuchichʼochʼ twanq li sahil chʼoolejil. Xbʼaan naq ebʼ li kristiʼaan teʼxra li ras riitzʼin, teʼxra li xkʼutum li Yos, chʼolchʼooq chiruhebʼ li nekeʼruuk ut li inkʼaʼ nekeʼruuk xbʼaanunkil, teʼxkubʼsi ribʼ ut teʼroxloqʼi ru li Yos, teʼabʼinq chiru li xnaʼ xyuwaʼ, teʼbʼanyoxinq ut inkʼaʼ teʼxtzʼeqtaana li Yos, makachʼin naq teʼxra li xjunkabʼal, teʼruuq xkʼambʼal ribʼ saʼ usilal, junelik teʼxye chaabʼil aatin chirix li junchʼol, teʼxkuy ribʼ, qʼunaqebʼ xchʼool, teʼxra li chaabʼilal, paabʼajelaq raatinebʼ ut wanqebʼ xnaʼlebʼ, moko teʼxqʼetqʼeti ta ribʼ, teʼxra li Yos chiru xraabʼal li narataw li tibʼelej ut chi anchalebʼ xchʼool teʼxloqʼoni ru li Yos. Junelik wankat rikʼinebʼ». Ma nokooʼaatinak rikʼin li qajunkabʼal malaj rikʼinebʼ li hermaan chirix chanruhaq li yuʼam saʼ li akʼ ruuchichʼochʼ? w24.01 6 raqal 13, 14
Martes 29 re julio
Laaʼat nakaasahobʼresi linchʼool (Luc. 3:22).
Qʼaxal us xnawbʼal naq «li Qaawaʼ naxra li xtenamit»! (Sal. 149:4). Abʼanan, maare wank sut wankebʼ nekeʼchʼinaak xchʼool ut nekeʼxkʼoxla: «Yaal naq li Jehobʼa sa xchʼool rikʼin ebʼ laj kʼanjel chiru joʼ chʼuut abʼan, ma sa tawiʼ xchʼool wikʼin?». Naabʼal re laj kʼanjel chiru li Yos re najter qʼe kutan wank sut keʼchʼaʼajkoʼk chiru xpaabʼankil naq li Yos narusila ruhebʼ (1 Sam. 1:6-10; Job 29:2, 4; Sal. 51:13). Li Santil Hu chi chʼolchʼo ru naxye naq usta laaʼo aj maak, li Jehobʼa truuq rusilankil qu. Kʼaru tento tqabʼaanu? Xkʼutbʼesinkil naq naqapaabʼ li Jesukriist ut naq tkubʼeeq qahaʼ (Juan 3:16). Chi joʼkan tqakʼutbʼesi rehebʼ li junchʼol naq ak xqayotʼ qachʼool ut naq xqayeechiʼi re li Yos naq tqabʼaanu li rajom (Hech. 2:38; 3:19). Jwal nasahoʼk saʼ xchʼool li Jehobʼa naq naqabʼaanu aʼin re wank choʼq ramiiw. Wi naqakʼe qachʼool chi xbʼaanunkil li xqayeechiʼi re naq xqaqʼaxtesi li qayuʼam chiru, li Jehobʼa trusila qu ut twanq choʼq qamiiw (Sal. 25:14). w24.03 26 raqal 1, 2