Qachaabʼilobʼresihaq li qatij

1. Kʼaru naraj li Jehobʼa naq tqabʼaanu? (Chaawil ebʼ li jalam u).

RIKʼIN ANI toopatzʼoq wi naqaj xkʼojobʼankil qachʼool ut qanaʼlebʼ? Chʼolchʼo chiqu li xsumenkil: kaʼajwiʼ chiru li Jehobʼa naru tootijoq. Ut aʼan naraj naq tqabʼaanu. Naqanaw aʼin xbʼaan naq naxye qe: «Junelik chextijoq» (1 Tes. 5:17). Naru nokootijok chi maakʼaʼ qaxiw ut xtzʼaamankil re li qatenqʼ re naq us toonaʼlebʼaq saʼ li qayuʼam (Prov. 3:5, 6). Xbʼaan naq chaabʼil xnaʼlebʼ li Jehobʼa, naru nokootijok chiru yalaq joqʼe.

2. Kʼaru tqil saʼ li tzolom aʼin?

² Li tijok aʼan jun nimla maatan li naqoxloqʼi. Usta joʼkan, wank sut nachʼaʼajkoʼk chiqu risinkil qahoonal re aatinak rikʼin li Jehobʼa. Maare naqakʼoxla naq tqachaabʼilobʼresi li qatij. Abʼan li Santil Hu nokooxtenqʼa. Saʼ li tzolom aʼin tqil li eetalil li kixkanabʼ li Jesús ut chanru tqasikʼ qahoonal re tijok. Joʼkan ajwiʼ tqil oobʼ li naʼlebʼ li tooxtenqʼa re xchaabʼilobʼresinkil li qatij.

LI JESÚS KIXSIKʼ XHOONAL RE TIJOK

3. Kʼaru naxnaw chaq li Jesús?

³ Li Jesús naxnaw naq li tij jwal wank xwankil chiru li Jehobʼa. Naq toj maajiʼ nachalk saʼ Ruuchichʼochʼ, li Jesús kiril chanru naq li Jehobʼa kixsume li xtij ebʼ li xmoos. Jun eetalil, kiril chanru li Jehobʼa kixsume li xtij li xʼAna, laj David, laj Elías ut naabʼal chik xmoos (1 Sam. 1:10, 11, 20; 1 Rey. 19:4-6; Sal. 32:5). Joʼkan peʼ kixye rehebʼ li xtzolom naq teʼtijoq chi maakʼaʼebʼ xxiw ut rajlal kutan (Mat. 7:7-11).

4. Kʼaru chaabʼil eetalil kixkanabʼ qe li Jesús?

⁴ Li Jesús kixkʼe rehebʼ li xtzolom jun chaabʼil eetalil. Naabʼal sut kitijok naq kiwank saʼ Ruuchichʼochʼ chi xbʼaanunkil li xkʼanjel. Kixsikʼ li xhoonal re tijok xbʼaan naq rajlal laatzʼ ru ut naabʼalebʼ nekeʼtaqenk re (Mar. 6:31, 45, 46). Eqʼla chiʼus nawakliik re aatinak rikʼin Xyuwaʼ (Mar. 1:35). Naqanaw naq saʼ jun kutan kitijok chixjunil li qʼoqyink naq ok re xbʼaanunkil jun xnimal ru kʼanjel (Luc. 6:12, 13). Jun qʼoqyink chik ma nakamk, li Jesús kitijok naabʼal sut xbʼaan naq naxnaw naq ok re xbʼaanunkil li xnimal ru kʼanjel kʼebʼil re xbʼaan li Jehobʼa (Mat. 26:39, 42, 44).

5. Chanru tqakʼam qe rikʼin li Jesús?

⁵ Li eetalil li kixkanabʼ li Jesús naxkʼut chiqu naq aajel ru risinkil qahoonal re tijok chiru li Jehobʼa, usta jwal laatzʼ qu. Joʼ li Jesús maare naru naq tqasikʼ qahoonal joqʼe tootijoq: maare naru naq toowakliiq eqʼla re tijok chiru li Jehobʼa malaj naru toowarq najt qʼoqyink. Chi joʼkan naqakʼut chiru li Jehobʼa naq qʼaxal oxloqʼ chiqu li maatan li naxkʼe qe. Li xLynne naxjultika naq kitochʼeʼk xchʼool naq kixnaw naq naru chi tijok chiru li Jehobʼa. Aʼan naxye: «Naq xintzol naq li Jehobʼa narabʼi lintij yalaq joqʼe, xinʼok saʼ amiiwil rikʼin ut kixbʼaanu naq tinchaabʼilobʼresi lintij». Chʼolchʼo naq naabʼal qe naqekʼa qibʼ joʼ aʼan. Anaqwan qilaq oobʼ li naʼlebʼ li naru tqaye saʼ li qatij.

OOBʼ LI NAʼLEBʼ LI NARU TQAYE SAʼ LI QATIJ

6. Joʼ naxye Apocalipsis 4:10, 11, kʼaru xkʼulubʼ li Jehobʼa?

⁶ Qanimaq ru li Jehobʼa. Saʼ jun li moy u li apóstol Juan kiril 24 li cheekel winq li nekeʼxloqʼoni ru li Jehobʼa saʼ choxa. Yookebʼ xloqʼoninkil ru li Yos ut nekeʼxnaw naq xkʼulubʼ xkʼulbʼal li loqʼal, li loqʼonink ut li wankilal (taayaabʼasi Apocalipsis 4:10, 11). Joʼkan ajwiʼ wank naabʼal xyaalal kʼaʼut naq ebʼ li ánjel nekeʼxloqʼoni ru li Jehobʼa. Wankebʼ saʼ choxa rikʼin ut nekeʼxnaw ru chiʼus. Nekeʼril xchaabʼilal xnaʼlebʼ saʼ chixjunil li naxbʼaanu ut naʼalaak saʼ xchʼoolebʼ xloqʼoninkil ru (Job 38:4-7).

7. Chanru naqaloqʼoni ru li Jehobʼa saʼebʼ li qatij?

⁷ Naru ajwiʼ naqaloqʼoni ru li Jehobʼa naq nokooʼaatinak rikʼin. Naqabʼaanu aʼin naq naqaye re li nawulak chiqu li naxbʼaanu ut kʼaʼut naq naqakʼe qachʼool chirix. Naq naqayaabʼasi ut naqatzol li Santil Hu, qayalaq qaqʼe chi xtawbʼal li xnaʼlebʼ li Jehobʼa li nawulak chiqu (Job 37:23; Rom. 11:33). Moqon qayehaq re, li naqekʼa chirix li xchaabʼil naʼlebʼ li naqil. Naru naqaloqʼoni ajwiʼ ru li Jehobʼa naq nokooxtenqʼa ut naq naxtenqʼahebʼ li qahermaan. Yoʼon wank qikʼin ut nokooxkol (1 Sam. 1:27; 2:1, 2).

8. Kʼaru junjunq li naʼlebʼ li tooruuq xbʼanyoxinkil re li Jehobʼa? (1 Tesalonicenses 5:18).

⁸ Choobʼanyoxinq chiru li Jehobʼa. Saʼebʼ li qatij naru naqakʼutbʼesi chiru li Jehobʼa naq naqabʼanyoxi chixjunil li naxkʼe qe (taayaabʼasi 1 Tesalonicenses 5:18). Qabʼanyoxihaq chiru chixjunil li wank qe xbʼaan naq chixjunil chalenaq rikʼin (Sant. 1:17). Naru naqabʼanyoxi re, li Ruuchichʼochʼ, li yobʼtesihom, li qayuʼam, li qajunkabʼal, ebʼ li qamiiw ut li qoybʼenihom. Naru ajwiʼ naqabʼanyoxi re li Jehobʼa naq wanko saʼ amiiwil rikʼin.

9. Kʼaʼut naq wank sut nachʼaʼajkoʼk chiqu bʼanyoxink?

⁹ Kʼaru xyaalal wank, re naq toobʼanyoxinq chiru li Jehobʼa? Wank sut chʼaʼaj rilbʼal aʼin xbʼaan naq ebʼ li kristiʼaan maakʼaʼ nekeʼxbʼanyoxi. Ebʼ li poyanam naxik xchʼoolebʼ chirix li nekeʼraj ut inkʼaʼ chirix xbʼanyoxinkil li wank rehebʼ. Wi tqabʼon raj qibʼ rikʼinebʼ, saʼ li qatij kaʼajwiʼ li naqaj raj tqatzʼaama re li Jehobʼa. Re naq tooyoxinq tento naq tqakʼoxla chixjunil li naxkʼe qe li Jehobʼa (Luc. 6:45).

10. Chanru kitenqʼank re jun li hermaan naq nabʼanyoxink? (Chaawil li jalam u).

¹⁰ Li bʼanyoxink nokooxtenqʼa re naq tqakuy ebʼ li chʼaʼajkilal. Saʼ li hu Laj Kʼaakʼalehom 15 re enero 2015, maakʼaʼ saʼ qʼeqchiʼ tqil li kixkʼul li xKyung-sook. Xeʼxye re naq wank xkanser saʼ xpospoʼoy li ak kixjekʼi ribʼ. Kixye: «Jwal kirahoʼk saʼ inchʼool xnawbʼal naq wank inyajel. Xinkʼoxla naq maakʼaʼ chik rusilal linyuʼam ut kʼajoʼ xinxuwak». Kʼaru kitenqʼank re? Aʼan naxjultika naq rajlal qʼoqyink naxik saʼ xbʼeen li rochoch ut naxbʼanyoxi oobʼ li naʼlebʼ li kixkʼe li Jehobʼa re chiru li kutan aʼan. Aʼin kixtuqubʼ ru xchʼool ut kixye re li Jehobʼa naq kʼajoʼ naxra. Aʼan kixkʼe reetal naq li Jehobʼa nokooxtenqʼa naq naqanumsi li chʼaʼajkilal, kixkʼe reetal naq saʼ li qayuʼam wank naabʼal li osobʼtesihom li naqakʼul, chiru li rahilal. Joʼ li xKyung-sook, wank naabʼal li naʼlebʼ li naru naqabʼanyoxi re li Jehobʼa usta yooko xnumsinkil li rahilal. Xbʼanyoxinkil re li Jehobʼa nokooxtenqʼa re xkuybʼal li rahilal ut naxtuqubʼ ru qachʼool.

11. Kʼaʼut naʼajmank naq inkʼaʼ teʼxuwaq li xtzolom li Jesús?

¹¹ Qatzʼaamaq re li Jehobʼa naq tooxtenqʼa re naq moko yook ta qaxiw naq naqaye li chaabʼil esil. Naq ak xik re li Jesús saʼ choxa, kixye rehebʼ li xtzolom naq teʼxye li chaabʼil esil «Jerusalén, saʼ chixjunil Judea joʼwiʼ Samaria, ut toj saʼ xmaril li ruuchichʼochʼ» (Hech. 1:8; Luc. 24:46-48). Chirix chik aʼan, ebʼ laj kʼamolbʼe rehebʼ laj judiiy keʼxkʼam laj Pedro ut laj Juan chiru li Sanedrín, naraj naxye, li raqlebʼaal aatin rehebʼ laj judiiy. Xeʼxye rehebʼ naq teʼxkanabʼ xyeebʼal resil li chaabʼil esil ut xeʼyeeheʼk xkamsinkil (Hech. 4:18, 21). Chanru xeʼnaʼlebʼak li wiibʼ chi apóstol aʼin?

12. Joʼ naxye Hechos 4:29, 31, kʼaru xeʼxbʼaanu ebʼ li apóstol?

¹² Laj Pedro ut laj Juan xeʼxye rehebʼ: «Kʼoxlahomaq laaʼex kʼaru us chiru li Yos: ma eepaabʼankil laaʼex malaj xpaabʼankil li Yos? Laaʼo inkʼaʼ naru tqakanabʼ aatinak chirix li qilom ut qabʼihom» (Hech. 4:19, 20). Naq ebʼ laj kʼamolbʼe saʼ xpaabʼal laj judiiy xeʼxkanabʼ chi xik li wiibʼ chi apóstol, ebʼ aʼin xeʼxchʼutubʼ ribʼ rikʼinebʼ li junchʼol chik chi apóstol. Ut xeʼtijok saʼ komonil re xpatzʼbʼal re li Jehobʼa naq tixtenqʼahebʼ chi xbʼaanunkil li rajom. Xeʼxye: «Chakʼe taxaq rehebʼ laj kʼanjel chawu xpuktesinkil laawaatin chi kawebʼ xchʼool». Ut li Jehobʼa kixsume li xtij (taayaabʼasi Hechos 4:29, 31).

13. Kʼaru naqatzol rikʼin li kixkʼul laj Jin-hyuk?

¹³ Naru tqakʼam qe rikʼinebʼ li apóstol usta ebʼ li awabʼej teʼxye qe naq tqakanabʼ puktesink. Aʼan kixbʼaanu laj Jin-hyuk, jun li hermaan li wank saʼ tzʼalam saʼ xkʼabʼaʼ xpaabʼal. Aran xeʼxye re naq trilebʼ li preex li xeʼkʼameʼk xjunes. Kaʼajwiʼ naru raatinankilebʼ re xpatzʼbʼal kʼaru naʼajmank chiruhebʼ. Ut yeebʼil re naq inkʼaʼ naru t-aatinaq chirix li Santil Hu. Abʼan kitijok chiru li Jehobʼa re xtzʼaamankil xtenqʼ, re naq truuq chi aatinak saʼ qʼunil ut chi maakʼaʼ xxiw rikʼinebʼ li preex naq tixkʼe ribʼ chiru (Hech. 5:29). Aʼan kixye: «Li Jehobʼa kixsume lintij, kixkʼe xkawilal inchʼool ut linnaʼlebʼ. Xinruuk chi xtikibʼankil naabʼal li tzolom chirix li Santil Hu chiru oobʼ kʼasal saʼ li tzʼalam. Saʼ li qʼoqyink nintzʼiibʼa li esilhu re xqʼaxtesinkil rehebʼ li preex wulajaq chik». Joʼ laj Jin-hyuk, chʼolchʼo chiqu naq li Jehobʼa tooxtenqʼa chi xbʼaanunkil li qakʼanjel ut naru naq tqatzʼaama chiru li xkawilal qachʼool ut li qanaʼlebʼ.

14. Kʼaru tatxtenqʼa re xqʼaxbʼal ruhebʼ li chʼaʼajkilal? (Salmo 37:3, 5).

¹⁴ Qatzʼaamaq re li Jehobʼa naq tooxtenqʼa xqʼaxbʼal ruhebʼ li chʼaʼajkilal. Naabʼal qe yooko xnumsinkil li rahilal xbʼaan naq kikamk junaq li qakomon malaj qamiiw, li rahobʼtesiik malaj li chʼaʼajkilal saʼ li qajunxaqalil, qakʼaʼuxl ut li qajunkabʼal. Ut aʼin kinumtaak saʼ xkʼabʼaʼ li nimla yajel ut ebʼ li yalok u. Joʼkan naq ye re li Jehobʼa chixjunil li nakaawekʼa. Te laachʼool chiru joʼ taabʼaanu raj rikʼin junaq laawamiiw. Chʼolchʼooq chaawu naq li Jehobʼa tatxtenqʼa (taayaabʼasi Salmo 37:3, 5).

15. Chanru nokooxtenqʼa li tij naq yooko xnumsinkil li rahilal? Kʼe jun eetalil.

¹⁵ Li tijok naru nokooxtenqʼa naq naqanumsi ebʼ li chʼaʼajkilal (Rom. 12:12). Li Jehobʼa naxnaw li rahilal li nekeʼxnumsi ebʼ laj kʼanjel chiru ut «narabʼi li xyaabʼ xkuxebʼ» (Sal. 145:18, 19). Li xKristie, jun laj kʼamolbʼe saʼ li puktesink li wank 29 chihabʼ re, kixkʼe reetal naq yaal aʼin. Chi maakʼaʼ saʼ xchʼool kiʼok chi yajerk. Ut xbʼaan aʼin kirahoʼk saʼ xchʼool. Moqon chik kixnaw naq li xnaʼ tkamq saʼ xkʼabʼaʼ jun li yajel. Aʼan naxye: «Xintzʼaama chi anchal inchʼool chiru li Jehobʼa naq tixkʼe inmetzʼew re xnumsinkil li kutan. Xinkʼe inchʼool chi kʼanjelak chiru li Jehobʼa: maajun li chʼutam ninkol ut nintzolok saʼ junesal». Naxye ajwiʼ: «Li tijok xinxtenqʼa re xnumsinkil li chʼaʼajkilal. Xnawbʼal naq li Jehobʼa junelik nikinxtenqʼa naxkʼojobʼ inchʼool. Usta inkʼaʼ xinkʼiraak saʼ junpaat, abʼan li Jehobʼa xsume lintij ut aʼin kixtuqubʼ linchʼool». Misach saʼ qachʼool naq «li Yos naxnaw xkolbʼalebʼ laj paabʼanel chiru li aaleek» (2 Ped. 2:9).

16. Kʼaʼut aajel ru naq li Jehobʼa tooxtenqʼa re xqʼaxbʼal ru li maak?

¹⁶ Qatzʼaamaq re li Jehobʼa naq tooxtenqʼa re xtzʼeqtaanankil li maak. Saʼ xkʼabʼaʼ naq laaʼo aj maak tento tqayal qaqʼe chi xtzʼeqtaanankil li maak. Laj Tza naxbʼaanu chixjunil li wank saʼ ruqʼ re naq tchʼaʼajkoʼq chiqu xtzʼeqtaanankil li maak. Joʼ eetalil, naxyal xtzʼajninkil li qakʼaʼuxl rikʼin li ajsibʼaal u li moko us ta. Rikʼin li ajsibʼaal u aʼin naxbʼaanu naq ttzʼajniiq li qakʼaʼuxl ut aʼin naxbʼaanu naq toomaakobʼq ut moko saqaqo ta chik chiru li Jehobʼa (Mar. 7:21-23; Sant. 1:14, 15).

17. Naq ak xqatzʼaama li qatenqʼ, kʼaru chik tento tqabʼaanu? (Chaawil ebʼ li jalam u).

¹⁷ Inkʼaʼ tooruuq xqʼaxbʼal ru li yibʼru aj naʼlebʼ qajunes wi li Jehobʼa inkʼaʼ tooxtenqʼa. Li Jesús kixye aʼin saʼ li xtij: «Moohaakanabʼ chi tʼaneʼk saʼ li aaleek, choohaakol bʼan chiru li maaʼus» (Mat. 6:13). Li Jehobʼa naraj qatenqʼankil abʼan tento tqatzʼaama re. Abʼanan moko tzʼaqal ta rikʼin tijok. Joʼkan ajwiʼ tento tqayal qaqʼe re xtzʼeqtaanankil li yibʼru aj naʼlebʼ li wank saʼ li qasutam (Sal. 97:10). Re naq chaabʼilaq li qakʼaʼuxl, aajel ru naq tqatzol li Santil Hu, xik saʼebʼ li chʼutam ut tzʼaqonk saʼ li puktesink. Li Jehobʼa naxye naq maajunwa tixkanabʼ naq tqakʼul junaq li rahilal li inkʼaʼ tooruuq xkuybʼal (1 Cor. 10:12, 13).

18. Kʼaru tento tqabʼaanu chiqajunilo?

¹⁸ Re naq tiikaq qachʼool anaqwan naq wanko saʼ rosoʼjik li kutan tento naq tqayal qaqʼe chi tijok. Li Jehobʼa naraj naq tqate «[qa]chʼool chiru» (Sal. 62:9). Joʼkan naq, isi laahoonal re tijok chiru li Jehobʼa wulaj wulaj. Loqʼoni ru ut bʼanyoxi chiru xbʼaan chixjunil li xchaabʼilal. Tzʼaama chiru naq tatxtenqʼa saʼ li puktesink, re xtzʼeqtaanankil li maak ut re xqʼaxbʼal ru chixjunil li chʼaʼajkilal li taanumsi. Maakanabʼ naq kʼaruhaq malaj anihaq tixram chaawu tijok. Abʼan, chanru naxsume li qatij? Saʼ li jun chik tzolom tqil li xsumenkil li patzʼom aʼin.