Mathayo
9 Kwoguo, Jesu akĩhaica gatarũ, akĩringa mũrĩmo ũrĩa ũngĩ na akĩingĩra taũni ya kwao. 2 Nao andũ makĩmũrehera mũndũ wakuĩte ciĩga akometio karĩrĩ-inĩ. Na rĩrĩa Jesu onire wĩtĩkio wao, akĩra mũndũ ũcio wakuĩte ciĩga atĩrĩ: “Mũrũ wakwa, ndũgetigĩre! Nĩ woherũo mehia maku.” 3 Na andĩki-Watho amwe makĩĩrana atĩrĩ: “Mũndũ ũyũ nĩ araruma Ngai.” 4 Nake Jesu amenya meciria mao, akĩmoria ũũ: “Mũreciria maũndũ moru thĩinĩ wa ngoro cianyu nĩkĩ? 5 Nĩ ũndũ ũrĩkũ mũhũthũ, nĩ kuuga, ‘Nĩ woherũo mehia maku-ĩ,’ kana nĩ kuuga, ‘Ũkĩra wĩtware’? 6 No nĩguo mũmenye atĩ Mũrũ wa mũndũ arĩ na wathani wa kuohanĩra mehia gũkũ thĩ—” agĩcoka akĩra mũndũ ũcio wakuĩte ciĩga atĩrĩ: “Ũkĩra, woe karĩrĩ gaku, na ũinũke.” 7 Nake mũndũ ũcio agĩũkĩra na akĩinũka. 8 Na rĩrĩa kĩrĩndĩ kĩoonire ũguo, gĩkĩmaka, gĩkĩgooca Ngai, o we waheete andũ ũhoti ta ũcio.
9 Na rĩrĩa Jesu aathiaga, akĩona mũndũ wetagwo Mathayo aikarĩte wabici-inĩ ya kũrĩhĩra igooti, akĩmwĩra atĩrĩ: “Tuĩka mũrũmĩrĩri wakwa.” Nake agĩũkĩra na akĩmũrũmĩrĩra. 10 Thutha ũcio, rĩrĩa Jesu aaikarĩte thĩ metha-inĩ, etia aingĩ a mbeca cia igooti na ehia magĩũka makĩambĩrĩria kũrĩanĩra hamwe na Jesu na arutwo ake. 11 No rĩrĩa Afarisai moonire ũndũ ũcio, makĩũria arutwo ake ũũ: “Mũrutani wanyu arĩanagĩra na etia a mbeca cia igooti na ehia nĩkĩ?” 12 Rĩrĩa Jesu aaiguire ũguo, akiuga atĩrĩ: “Andũ arĩa matarĩ arwaru matibataraga ndagĩtarĩ, no arĩa arwaru nĩo mamũbataraga. 13 Nĩ ũndũ ũcio-rĩ, thiĩi mũgatuĩrie ũrĩa ciugo ici ciugĩte: ‘Ngwenda muonanagie tha no ti mũndutagĩre magongona.’ Tondũ ndiokire gwĩta arĩa athingu, no ndokire gwĩta ehia.”
14 Nao arutwo a Johana magĩthiĩ kũrĩ we makĩmũũria atĩrĩ: “Nĩ kĩĩ gĩtũmaga ithuĩ na Afarisai twĩhinge no arutwo aku matiĩhingaga?” 15 Nake Jesu akĩmeera: “Arata a mũhikania matikoragwo na gĩtũmi gĩa gũcakaya hĩndĩ ĩrĩa yothe mũhikania arĩ hamwe nao. No matukũ nĩ marĩũka rĩrĩa mũhikania akeeherio kũrĩ o, na hĩndĩ ĩyo nĩ makeehinga. 16 Gũtirĩ mũndũ ũtumagĩrĩra kĩraka kĩa nguo njerũ igũrũ rĩa nguo ngũrũ, tondũ angĩka ũguo, kĩraka kĩu kĩerũ kĩngĩgucia nguo ĩyo, nayo ĩtarũke makĩria. 17 O na andũ mationoragĩria ndibei ĩragagata thĩinĩ wa mondo ngũrũ cia ndibei. Mangĩka ũguo, mondo icio nĩ itumũkaga na ndibei ĩgaitĩka nacio mondo igathũka. Ĩndĩ andũ monoragĩria ndibei ĩragagata thĩinĩ wa mondo njerũ cia ndibei, na hĩndĩ ĩyo gũtirĩ kĩndũ kĩũraga.”
18 Na rĩrĩa aameeraga maũndũ macio, mũtongoria ũmwe agĩũka harĩ we akĩmũinamĩrĩra, akĩmwĩra: “No mũhaka mwarĩ wakwa akorũo rĩu nĩ mũkuũ, no ũka ũmũigĩrĩre guoko, na nĩ egũcoka muoyo.”
19 Nake Jesu agĩũkĩra na akĩmũrũmĩrĩra; na arutwo ake o nao makĩmũrũmĩrĩra. 20 Na atĩrĩ, mũtumia watũũraga oiraga thakame mĩaka ikũmi na ĩĩrĩ agĩthiĩ thutha wake na akĩhutia gĩcũrĩ kĩa nguo yake ya igũrũ, 21 tondũ oigaga na ngoro atĩrĩ: “Ingĩhutia tu nguo yake ya igũrũ, nĩ ngũhona.” 22 Jesu akĩĩhũgũra, na amuona, akĩmwĩra: “Ndũgetigĩre, mwarĩ wakwa! Wĩtĩkio waku nĩ watũma ũhone.” Na kuuma hĩndĩ ĩyo mũtumia ũcio akĩhona.
23 Na rĩrĩa Jesu aakinyire kwa mũtongoria ũcio nyũmba na akĩona ahuhi a mĩtũrirũ na kĩrĩndĩ gĩkĩrĩra kĩanĩrĩire, 24 akĩmeera atĩrĩ: “Umai, tondũ kairĩtu gaka ti gũkua gakuĩte, ĩndĩ nĩ gũkoma gakomete.” Maigua ũguo, makĩambĩrĩria kũmũthekerera na kĩnyũrũri. 25 Kĩrĩndĩ kĩoima nja, agĩthiĩ na akĩnyita kairĩtu kau guoko, nako gagĩũkĩra. 26 Hatarĩ nganja, ũhoro ũcio nĩ wamenyekire kũndũ kũu guothe.
27 Rĩrĩa Jesu oimaga kũu, andũ erĩ atumumu makĩmũrũmĩrĩra, makĩanagĩrĩra ũũ: “Tũiguĩre tha, Mũrũ wa Daudi.” 28 Jesu aingĩra nyũmba, andũ acio atumumu magĩthiĩ harĩ we, nake akĩmoria: “Hihi mũrĩ na wĩtĩkio atĩ no hote kũmũhonia?” Makĩmũcokeria: “Ĩĩ, tũrĩ na wĩtĩkio Mwathani.” 29 Agĩcoka akĩhutia maitho mao, akiuga: “O ta ũrĩa muonania wĩtĩkio, reke gũtuĩke o ũguo.” 30 Nao makĩhota kuona. Ningĩ, Jesu akĩmahe mũkaana mũrũmu, akĩmeera ũũ: “Menyererai mũtikere mũndũ o na ũrĩkũ.” 31 Ĩndĩ, moima nja, makĩmemerekia ũhoro ũcio wĩgiĩ Jesu kũndũ kũu guothe.
32 Na rĩrĩa andũ acio mooimaga kũu, andũ makĩmũrehera mũndũ ũtaahotaga kwaria na warĩ na ndaimono, 33 na thutha wa kũrutwo ndaimono, mũndũ ũcio akĩhota kwaria. Kĩrĩndĩ gĩkĩgega mũno na gĩkiuga ũũ: “Ũndũ ta ũyũ ndũrĩ woneka Isiraeli.” 34 Ĩndĩ Afarisai makĩambĩrĩria kuuga: “Aingataga ndaimono na hinya wa mũnene wa ndaimono.”
35 Na Jesu agĩthiĩ mataũni-inĩ na matũũra-inĩ mothe, akĩrutanaga thĩinĩ wa thunagogi na akĩhunjagia ũhoro ũrĩa mwega wa Ũthamaki na akĩhonagia andũ mĩrimũ ya mĩthemba yothe. 36 Rĩrĩa onire kĩrĩndĩ, akĩringwo nĩ tha tondũ nĩ gĩatihangĩtio na gĩgatiganĩrio ta ngʼondu itarĩ na mũrĩithi. 37 Agĩcoka akĩra arutwo ake atĩrĩ: “Magetha nĩ maingĩ, no aruti wĩra nĩ anini. 38 Kwoguo-rĩ, hoyai Mwene magetha atũme aruti wĩra magetha-inĩ make.”