NDEERETI HAMWE NA MŨIRA WA JEHOVA
Hihi Aira a Jehova nĩ Metĩkĩtie Jesu?
Gĩcunjĩ gĩkĩ nĩ kĩonereria kĩa ndeereti ĩrĩa Mũira wa Jehova angĩkorũo nayo hamwe na mũndũ ũngĩ. Ta reke tũtue atĩ Mũira wa Jehova wĩtagwo Peter nĩ aaceera mũciĩ wa mũndũ wĩtagwo John.
GWĨTĨKIA JESU NĨ KWA BATA
Peter: Ĩĩ, John. Nĩ ndakena nĩ gũgũkora.
John: Wĩ mũnyite ũgeni mũno.
Peter: Nĩ ngatho, nĩ ndakũrehera ngathĩti cia ica ikuhĩ cia Mũrangĩri na Amkeni! Ndĩ na ma nĩ ũgũkenera gũcithoma.
John: Ta maka o na nĩ weka wega nĩ gũũka, tondũ harĩ kĩũria ndĩrenda gũkũũria.
Peter: Ũria.
John: Ira tũraaragia na mũndũ tũrutithanagia wĩra nake. Ndĩramũgwetera kaũndũ kega ndĩrathomire ngathĩti-inĩ iria wĩrĩga kũndigĩra. Nowe aranjĩra atĩ ndikanacithome rĩngĩ tondũ Aira a Jehova matiĩtĩkĩtie Jesu. Ndĩramwĩrire nĩ ngaakũũria woka. Rĩu kĩnjĩre kana ũcio nĩ ũhoro wa ma.
Peter: Nĩ weka wega nĩ kũũria kĩũria kĩu. Andũ aingĩ mena kĩũria ta kĩu, moragia andũ angĩ makaheo ũhoro wa maheeni. No wee nĩ weka wega nĩ gũtuĩria kuuma kũrĩ ene guo.
John: Nĩkĩo ndĩroigire ngweterera nginya ũũke.
Peter: Ũhoro wa ma nĩ atĩ, Aira a Jehova nĩ metĩkĩtie Jesu. Twĩtĩkĩtie atĩ mũndũ angĩaga gwĩtĩkia Jesu, ndangĩona muoyo wa tene na tene.
John: Reke njuge nĩ nyonaga ta mũmwĩtĩkĩtie, no rĩrĩa mũndũ ũcio aranjĩrire ũguo ndĩroiga ngũũrie. O na tũtirĩ twarĩrĩria ũhoro ũcio nawe.
Peter: Nĩ ma! Harĩ Maandĩko maigana ũna ma Bibilia Aira a Jehova mahũthagĩra kuonania bata wa gwĩtĩkia Jesu. No wende nguonie Maandĩko macio?
John: Ĩĩ, no nyende.
Peter: No twambĩrĩrie na ciugo cia Jesu we mwene, thĩinĩ wa Johana 14:6. Jesu nĩ kwaria aaragia na mũrutwo ũmwe wake. Rĩandĩko rĩu rĩroiga ũũ: “Nake Jesu akĩmwĩra atĩrĩ, Nĩ niĩ njĩra, na nĩ niĩ ũhoro-ũrĩa-wa-ma, na nĩ niĩ muoyo; gũtirĩ mũndũ ũkinyaga gwĩ Ithe witũ, atokĩire harĩ niĩ.” Kũringana na mũhari ũcio-rĩ, njĩra iki ĩrĩa tũngĩkinyĩra Ithe witũ nayo nĩ ĩrĩkũ?
John: Nĩ kũgerera Jesu.
Peter: Nĩ ma. Na ũguo nĩguo Aira a Jehova metĩkĩtie. Reke ngũũrie atĩrĩrĩ: Kũringana na ũrĩa ũĩ-rĩ, Ngai endaga tũmũhoe kũgerera rĩĩtwa rĩa ũ?
John: Rĩa Jesu.
Peter: Ũcio nĩ ũhoro wa ma. Na nĩkĩo hĩndĩ ciothe hoyaga kũgerera rĩĩtwa rĩa Jesu. Na ũguo nĩguo Aira a Jehova othe mekaga.
John: Na ũguo nĩguo kwagĩrĩire.
Peter: Rĩandĩko rĩngĩ tũhũthagĩra nĩ Johana 3:16. Rĩandĩko rĩrĩ nĩ rĩa mwanya mũno ũũ atĩ andũ amwe marĩtaga Injiri nini. Marĩtaga ũguo tondũ maũndũ mothe marĩa Jesu eekire arĩ gũkũ thĩ no mataarĩrio nĩ rĩandĩko rĩu rĩmwe. No wende kũrĩthoma?
John: No thome. Rĩroiga ũũ: “Amu Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete ndakore, no agĩe muoyo wa tene na tene.”
Peter: Nĩ ngatho. Hihi ũrĩ waigua rĩandĩko rĩu?
John: Ĩĩ, ndanarĩigua o na ngarĩona rĩandĩkĩtwo kũndũ kũingĩ.
Peter: Nĩ rĩandĩko rĩũĩkaine mũno. Ta rĩrore rĩngĩ wone ũrĩa Jesu aroiga. Oigire atĩ wendo wa Ngai nĩguo ũgaatũma andũ matũũre tene na tene. No nĩ thutha wao gwĩka atĩa?
John: Kũmwĩhoka.
Peter: Nĩ ngatho. Na makĩria nĩ kwĩhoka kana kũgĩa na wĩtĩkio harĩ Jesu Kristo. Ũhoro ũcio wa atĩ wĩtĩkio harĩ Jesu nĩ ũgaatũma andũ magĩe na muoyo wa tene na tene, nĩ wonanĩtio haha karatathi-inĩ ga kerĩ ka ngathĩti ĩno ngũkũreheire. Muoroto ũmwe wa ngathĩti ĩno ya Mũrangĩri o ta ũrĩa haha haroiga nĩ atĩ “ĩkĩraga andũ ngoro metĩkie Jesu Kristo, ũrĩa wakuire nĩgetha tũgĩe na muoyo wa tene na tene na ũrĩa rĩu arathana arĩ Mũthamaki wa Ũthamaki wa Ngai.”
John: Nĩ ma nĩ ndona Aira a Jehova nĩ metĩkĩtie Jesu. O na ngathĩti yanyu nĩ ĩronania ũguo.
Peter: Ũcio nĩ ũhoro wa ma.
John: No nĩkĩ gĩtũmaga andũ moige atĩ mũtiĩtĩkĩtie Jesu?
Peter: No moige ũguo nĩ ũndũ wa itũmi itiganĩte. Amwe moigaga ũguo tondũ maanaigua andũ makiuga ũguo. Angĩ nao moigaga ũguo tondũ nĩguo marutagwo kanitha-inĩ.
John: To gũkorũo amwe moigaga ũguo tondũ mwĩĩtaga Aira a Jehova handũ ha Aira a Jesu?
Peter: No kũhoteke.
John: Nĩ kĩĩ gĩtũmaga mũgwete Jehova kaingĩ ũguo?
‘NĨ NDĨMAMENYITHĨTIE RĨĨTWA RĨAKU’
Peter: Nĩ tuonaga ũrĩ ũndũ wa bata mũno kũhũthĩra rĩĩtwa rĩa Ngai, Jehova, o ta ũrĩa Mũrũ wake, Jesu, eekire. Ta rora wone ũrĩa Jesu eerire Ithe mahoya-inĩ thĩinĩ wa Johana 17:26. No wende gũthoma rĩandĩko rĩu?
John: Ĩĩ. Rĩroiga ũũ: “Na niĩ ngĩmamenyithia rĩĩtwa rĩaku, na no ndĩĩmamenyithagia rĩo; nĩ getha wendani ũrĩa ũnyendete naguo ũikarage thĩinĩ wao, o na niĩ njikarage thĩinĩ wao.”
Peter: Nĩ ngatho. Nĩ wona Jesu oigire atĩ nĩ aamenyithanirie rĩĩtwa rĩa Ngai. Ũgwĩciria nĩ kĩĩ gĩatũmire eke ũguo?
John: Ndiũĩ.
No mũhaka tũgĩe na wĩtĩkio harĩ Jesu nĩguo tũkaahonoka
Peter: Reke tuone gĩtũmi thĩinĩ wa rĩandĩko rĩngĩ. Nĩ tũthome gĩcunjĩ kĩa mbere kĩa Joeli 2:32. Rĩandĩko rĩu rĩroiga ũũ: “Na nĩgũgakinya atĩrĩ, atĩ mũndũ o wothe ũrĩa ũgakaĩra rĩĩtwa rĩa Jehova nĩakahonoka.” Ndĩ na ma angĩkorũo no mũhaka andũ makaĩre rĩĩtwa rĩa Jehova nĩguo makaahonokio-rĩ, Jesu nĩ aamenyaga ũguo. Githĩ tiguo?
John: Ĩĩ, nĩguo.
Peter: Kwoguo Jesu eendaga arutwo ake makaahonoka na nĩkĩo aamarutire rĩĩtwa rĩa Ngai nĩguo marĩhũthagĩre. O na ithuĩ nĩ twendaga gũkaahonoka, na nĩkĩo tũhũthagĩra rĩĩtwa Jehova kaingĩ ũguo. Nĩ tuonaga arĩ ũndũ wa bata mũno kũmenyithia andũ rĩĩtwa rĩa Ngai nĩ getha o nao marĩkayagĩre.
John: No nyonaga o na angĩkorũo andũ matiũĩ kana matigwetaga rĩĩtwa rĩa Ngai-rĩ, nĩ mamenyaga nĩ Ngai ũrĩkũ marahoya na makaaria ũhoro wake.
Peter: No gũkorũo. O na kũrĩ ũguo, Ngai nĩ atwĩrĩte rĩĩtwa rĩake, na kũrĩmenya nĩ gũtũmaga tũmũkuhĩrĩrie.
John: Ndirakũnyita.
Peter: Ta wĩcirie na njĩra ĩno: To mũhaka tũngĩamenyithirio rĩĩtwa rĩa Musa. Nĩ tũngĩaiganĩire kũmũmenya tu ta mũndũ ũrĩa waringirie Aisiraeli Iria Rĩrĩa Itune kana ũrĩa waheirwo Maathani Marĩa Ikũmi. O na Nuhu to mũhaka tũngĩamenyithirio rĩĩtwa rĩake. Nĩ tũngĩataarĩirio ũhoro wake ta mũndũ ũrĩa waakire thabina na akĩhonokia famĩlĩ yake o hamwe na nyamũ. Hakĩrĩ ũguo-rĩ, na githĩ o na Jesu Kristo tũtingĩataarĩirio ũhoro wake ta mũndũ ũrĩa wakuire nĩ ũndũ wa mehia maitũ?
John: Ngwĩciria nĩguo.
Peter: No Ngai aatigĩrĩire atĩ nĩ twamenya marĩĩtwa ma andũ acio othe. Kũmenya marĩĩtwa mao o na nĩ gũtũmaga tũmetĩkie. O na gũtuĩka tũtirĩ twacemania na Musa, Nuhu kana Jesu-rĩ, kũmenya marĩĩtwa mao nĩ gũtũmaga tuone atĩ nĩ andũ maatũũraga kuo.
John: Ta maka ndirĩ ndeciria ũguo, no rĩu nĩ ndanyita.
Peter: Kĩu nĩ gĩtũmi kĩngĩ gĩtũmaga Aira a Jehova mahũthĩre rĩĩtwa rĩa Ngai kaingĩ. Twendaga andũ magĩe na wĩtĩkio harĩ Jehova Ngai, na mamũkuhĩrĩrie. O na kũrĩ ũguo, nĩ tũtĩtĩrithagĩria andũ atĩ nĩ getha makaahonoka, no mũhaka metĩkie Jesu. Reke tũrĩkĩrĩrie na rĩandĩko rĩmwe rĩkĩraga ũhoro ũcio mũkonde.
John: Hatirĩ na thĩna.
Peter: Nĩ tũgũthomete rĩandĩko rĩa Johana 14:6. No ũririkane Jesu oigire atĩ nĩwe ‘njĩra, na nĩwe ũhoro-ũrĩa-wa-ma, na nĩwe muoyo.’ Reke tũcoke thutha mĩhari ĩigana ũna ũigue ciugo ciake thĩinĩ wa Johana 14:1. Ta thoma gĩcunjĩ kĩa mũthia kĩa mũhari ũcio.
John: Kĩroiga ũũ: “Nĩmwĩhokete Ngai, na niĩ mwĩĩ’hoke.”
Peter: Nĩ ngatho. Ũkuona atĩa? Hihi wĩtĩkio ũrĩa wa ma nĩ harĩ Jehova kana Jesu-ĩ, kana nĩ harĩ othe eerĩ?
John: Jesu oigĩte nĩ harĩ othe eerĩ.
Peter: Nĩ ma. No kuuga tu na kanua atĩ nĩ twĩtĩkĩtie Ngai na Jesu ti kũiganu. Na githĩ mũtũũrĩre witũ ndwagĩrĩirũo kuonania atĩ nĩ tũmetĩkĩtie?
John: Nĩguo.
Peter: No mũndũ angĩonania atĩa atĩ kũna arĩ na wĩtĩkio harĩ Ngai na harĩ Jesu? No wende ngoka hĩndĩ ĩyo ĩngĩ tũcokie kĩũria kĩu?a
John: Thiĩ ũgooka.
Hihi nĩ harĩ kĩũria kĩgiĩ Bibilia waneyũria? Kana hihi no wende kũmenya kĩrĩa gĩtũmaga Aira a Jehova metĩkie kana gwĩka ũndũ mũna? Angĩkorũo nĩguo, ũria Mũira wa Jehova o wothe agũtaarĩrie. Nĩ egũkena mũno kwaranĩria nawe.
a Nĩguo wone ũhoro makĩria, thoma gĩcunjĩ gĩa 12 kĩa ibuku rĩa Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova. Ningĩ no ũrĩone thĩinĩ wa www.jw.org/ki.