Ovakalele vonghundana iwa

JEHOVA okwe tu pa oshihopaenenwa sha denga mbada shOmona waye, Jesus Kristus. (1 Pet. 2:21) Ngeenge umwe okwa ningi omushikuli waJesus, oha udifa onghundana iwa e li omukalele waKalunga. Jesus okwa popya kutya osho otashi tulumukifa pamhepo eshi a ti: ‘Ileni kwaame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kwaame, osheshi Aame omunambili, momutima onde lininipika; ndele tamu monene eemwenyo deni etulumuko.’ (Mat. 11:28, 29) Aveshe ovo va tambula ko eshivo laye ova wanifilwa eudaneko olo.

² E li Omukalele Munene waKalunga, Jesus okwa li a ifana oohandimwe va ninge ovashikuli vaye. (Mat. 9:9; Joh. 1:43) Okwa li e va deula moukalele noku va tuma va ka longe oilonga ya faafana naayo a li ta longo. (Mat. 10:1–11:1; 20:28; Luk. 4:43) Lwanima, okwa li a tuma vali vakwao 70 va ka udife onghundana iwa i na sha nOuhamba waKalunga. (Luk. 10:1, 8-11) Eshi Jesus a tuma ovashikuli vaye ovo, okwa li e va lombwela a ti: “Ou te mu udu, ota udu nge, naau te mu dini, ota dini nge, naau ta dini nge, ye ota dini ou a tuma nge.” (Luk. 10:16) Kungaho, Jesus okwa li a ulika kutya oshinakuwanifwa osho a pa ovahongwa vaye osha fimanenena. Ova li ve na okukalela po Jesus naKalunga Omukombadambada. Kunena, aveshe ovo va tambula ko eshivo laJesus olo tali ti: ‘Ila u shikule nge’ navo osho hava ningi ngaho. (Luk. 18:22; 2 Kor. 2:17) Ove na oshinakuwanifwa shokuudifa onghundana iwa yOuhamba nokuninga ovanhu ovahongwa. — Mat. 24:14; 28:19, 20.

³ Eshi twa tambula ko eshivo laJesus loku mu shikula, otwa nangekwa noupuna ‘mokushiiva’ Jehova Kalunga naJesus Kristus. (Joh. 17:3) Otwa hongwa eendjila daJehova. Kekwafo laye, otwa dula okulundulula omadiladilo etu, okudjala ounhu mupe nokulihumbata metwokumwe nomifikamhango daJehova douyuki. (Rom. 12:1, 2; Ef. 4:22-24; Kol. 3:9, 10) Olupandu letu ole tu linyengifa tu yapulile Jehova onghalamwenyo yetu noku shi ulika mokuninginifwa momeva. Peninginifo letu, ohatu ningi ovakalele va yapulwa.

⁴ Kaleka alushe momadiladilo kutya otu na okulongela Kalunga nomake inaa nyata nonomutima wa yela. (Eps. 24:3, 4; Jes. 52:11; 2 Kor. 6:14–7:1) Omolweitavelo muJesus Kristus, otu na eliudo la koshoka. (Heb. 10:19-23, 35, 36; Eh. 7:9, 10, 14) Omuyapostoli Paulus okwa kumaida Ovakriste va kale tava fimanekifa Kalunga moinima aishe opo vaha pundukife vamwe. Omuyapostoli Petrus okwa popya kutya osha fimana okukala tu na elihumbato li shii okuhopaenenwa opo tu nanene moshili ovo vehe fi ovaitaveli. (1 Kor. 10:31, 33; 1 Pet. 3:1) Ongahelipi to dulu okukwafela umwe a kale a wana oku tu waimina e li omukalele wonghundana iwa?

OVAUDIFI VAPE

⁵ Ngeenge to hovele okukonakona Ombiibeli nomunhu oo e na ohokwe, mu ladipika a kale ha lombwele vamwe kombinga yaasho te li hongo. Ota dulu okukala ha popi novapambele, ookaume, ovanailonga vakwao nosho tuu. Oyo oyo onghatu ya fimana mokuhonga ovo vape va ninge ovashikuli vaJesus Kristus ve li ovakalele vonghundana iwa. (Mat. 9:9; Luk. 6:40) Eshi ovo vape tava ende tava kulu pamhepo nokumona eshiivo lokuyandja oundombwedi wohangelela, nopehe na omalimbililo otava ka kala va hala okukufa ombinga moukalele.

OITEELELWA OYO VA PUMBWA OKUWANIFA PO

⁶ Ofimbo ino shiva omunhu a ka udife eumbo neumbo oshikando shotete, ou na okushilipaleka kutya okwa wanifa po oiteelelwa yonhumba. Omunhu oo ha longo pamwe nafye moukalele oha ulike moipafi kutya oha endafana nEendombwedi daJehova. Onghee hano, oshi na okukala shi liwetikile kutya oha kala metwokumwe nomifikamhango daJehova douyuki nota dulu okuninga omuudifi ina ninginifwa.

⁷ Eshi to konakona nomunhu nokukundafana naye omafinamhango Ombiibeli, otashi dulika u shiive eenghalo daye. Otashi dulika wa didilika kutya oha kala metwokumwe naasho e lihonga. Ashike ope na oinima imwe ya pamba onghalamwenyo yomukonakoni oyo ovakulunhuongalo tava ka kala va hala okukundafana naye naave u li po.

⁸ Omuunganeki wolutu lovakulunhuongalo oha unganeke ovakulunhuongalo vavali (umwe oshilyo shokomitiye yoilonga) va kundafane oinima oyo nomukonakonimbiibeli naave u li po. Momaongalo omo mu na ovakulunhuongalo vanini, omukulunhuongalo nomuyakuliongalo oo a wana otava dulu okuninga ngaho. Ovamwatate ovo va hoololwa ove na okuninga eenghundafana odo nopehe na okwoongaonga. Ngeenge ova udu kutya omukonakoni okwa hala okuninga omuudifi fimbo ve li kokwoongala, otava dulu va popye nomukonakoni naave u li po konima yokwoongala. Eenghundafana odo odi na okuningwa nombili. Ofimbo omukonakoni ina tambulwa ko e li omuudifi ina ninginifwa, oku na okuwanifa po oiteelelwa tai landula:

1. (1) Oku na okukala a itavela kutya Ombiibeli Eendjovo daKalunga da nwefwa mo. — 2 Tim. 3:16.

2. (2) Oku na okukala e shii nokwa itavela omahovelohongo Omishangwa. Ngeenge ta pulwa omapulo, oku na okunyamukula metwokumwe nOmbiibeli, ndele hametwokumwe nomahongo omalongelokalunga oipupulu ile paudeko laye mwene. — Mat. 7:21-23; 2 Tim. 2:15.

3. (3) Oku na okukala ha dulika koshipango shOmbiibeli shi na sha nokweendafana noshiwana shaJehova pokwoongala ngeenge ota dulu. — Eps. 122:1; Heb. 10:24, 25.

4. (4) Oku na okukala e shii kutya Ombiibeli otai hongo shike kombinga yoluhaelo, mwa kwatelwa okunyona ohombo, okuhombola ombada noushenge, nokukala ha dulika kuyo. Ngeenge omunhu oku li pamwe nomunhu woukashike kookanhu wa yooloka ko kuwaye oo ehe fi omupambele waye, ove na okukala va hombola paveta. — Mat. 19:9; 1 Kor. 6:9, 10; 1 Tim. 3:2, 12; Heb. 13:4.

5. (5) Oku na okukala ha dulika koshipango shOmbiibeli osho sha indika okukolwa nokulidilika oingangamifi nakeshe osho tashi dulu okukufa omadiladilo omunhu ponhele. — 2 Kor. 7:1; Ef. 5:18; 1 Pet. 4:3, 4.

6. (6) Oku na okukala e shii kutya osha fimana okuhenuka ookaume vai. — 1 Kor. 15:33.

7. (7) Na kale ehe fi vali oshilyo shomalongelokalunga oipupulu aeshe oo tashi dulika a li muo. Na kale a efa po okuya komaudifo ao nokukufa ombinga muo ile okuyambidida oilonga yao. — 2 Kor. 6:14-18; Eh. 18:4.

8. (8) Na kale a efa po okukufa ombinga meepolotika dounyuni. — Joh. 6:15; 15:19; Jak. 1:27.

9. (9) Na kale a itavela noha dulika keendjovo odo di li muJesaja 2:4 di na sha nokuhakufa ombinga meenhamanana doiwana.

10. (10) Na kale a hala shili okuninga Ondombwedi yaJehova. — Eps. 110:3.

⁹ Ngeenge ovakulunhuongalo kave wete lela kutya omukonakoni okwa fikama peni shi na sha noinima oyo, otava dulu oku mu pula, tashi dulika tava longifa omishangwa odo da ulikwa moitwa ya tetekela. Osha fimana okukala e udite ko kutya aveshe ovo hava udifa pamwe nEendombwedi daJehova ove na okukaleka onghalamwenyo yavo metwokumwe noiteelelwa yopaMishangwa. Osho ta popi otashi ka kwafela ovakulunhuongalo va mone ngeenge oku shii ngoo osho a teelelika a ninge nongeenge okwa wana okuhovela okukufa ombinga moukalele.

¹⁰ Ovakulunhuongalo ove na okushiivifila diva omukonakoni kutya okwa wana ile hasho. Luhapu oshiwa oku shi ninga pexulilo leenghundafana. Ngeenge okwa wana, ovakulunhuongalo ove na oku mu tambula ko nohamu e li omuudifi. (Rom. 15:7) Oku na okuladipikwa a hovele okuya moukalele diva ngaashi tashi dulika nokuyandja olaporta yaye komufilo womwedi. Ovakulunhuongalo ove na okuyelifila omukonakoni kutya ngeenge omunhu okwa ningi omuudifi ina ninginifwa nokwa yandja olaporta yaye yotete, oha ningilwa okakalata kovaudifi haka ifanwa Congregation’s Publisher Record noha ka kala meefaila deongalo. Ovakulunhuongalo otava ka kufa ouyelele womuudifi opo ehangano li twikile okufila oshisho oilonga yEendombwedi daJehova mounyuni aushe nosho yo a dule okukufa ombinga moilonga nokupewa ekwafo lopamhepo. Natango, ovakulunhuongalo otava dulu okudimbulukifa omuudifi kutya ouyelele waye wopaumwene otau ka ungaungiwa nao metwokumwe no-Global Data Protection Policy yEendombwedi daJehova oyo i li ko jw.org.

¹¹ Ngeenge otwa shiiva nawa omuudifi mupe nokuulika kutya otu na ko nasha naasho ta longo, otashi dulu oku mu twa omukumo. Otashi dulu oku mu linyengifa a kale ta yandje olaporta yaye pandjikilile nokuninga eenghendabala da mana mo opo a longele Jehova. — Fil. 2:4; Heb. 13:2.

¹² Ngeenge ovakulunhuongalo ova mono kutya omukonakoni okwa wana okuya moukalele, ota dulu okupewa embo Nghee twa unganekwa tu longe ehalo laJehova. Ngeenge a yandje olaporta yaye oshikando shotete, eongalo ohali shiivifilwa kutya okwa ninga omuudifi ina ninginifwa.

NGHEE OUNONA VE NA OKUKWAFELWA

¹³ Ounona navo otava dulu okukala va wana okuninga ovaudifi vonghundana iwa. Jesus okwa li a tambula ko ounona noku va nangeka noupuna. (Mat. 19:13-15; 21:15, 16) Ngeenge ou li omudali, oshihopaenenwa shoye shiwa shomoukalele otashi dulu okutwa omukumo ounona voye va kale ovaladi moilonga yaKalunga. Ngeenge okaana oko ke li oshihopaenenwa shiwa melihumbato lako oke linyengifwa tashi di komutima ka lombwele vamwe eitavelo lako, ekwafo lilipi taka dulu okupewa?

¹⁴ Otashi ka kala shiwa komudali a ye kuumwe womovakulunhuongalo oo e li mOkomitiye yOilonga yEongalo va kundafane ngeenge okaana oka wana okuninga omuudifi ile hasho. Omuunganeki wolutu lovakulunhuongalo ota dulu okuunganeka ovakulunhuongalo vavali (umwe oshilyo shokomitiye) va kundafane nokaana novadali vako ovo ve li ovaitaveli ile oo te ka tekula. Ngeenge okaana oke shii omahovelohongo oshili yOmbiibeli notaka ulike kutya oka hala okukala haka kufa ombinga moukalele, osho otashi ulike kutya oka ninga exumokomesho liwa. Konima eshi mwa kundafana oinima oyo naikwao oyo hai kundafanwa novakulunhu, ovakulunhuongalo vavali otava dulu okumona ngeenge okaana otaka dulu okuninga omuudifi ina ninginifwa ile hasho. (Luk. 6:45; Rom. 10:10) Ngeenge tamu kundafana nokaana, inashi pumbiwa okukwatela mo oinima imwe oyo hai kundafanwa novakulunhu, oyo inai yeleka okupulwa ounona.

¹⁵ Pefimbo leenghundafana, ovakulunhuongalo ove na okupandula okaana eshi ka ninga exumokomesho noku ka twa omukumo ke litulile po elalakano lokuninginifwa. Nopehe na omalimbililo, ovadali ova longa noudiinini opo va findile oshili mokaana kavo, nomolwaasho navo ova pumbwa okupandulwa. Ovakulunhuongalo ove na okukundafana “Etumwalaka kovadali Ovakriste” olo li li pepandja 179-181 opo va kwafele ovadali va twikile okukwafela okaana kavo.

ELIYAPULO NENINGINIFO

¹⁶ Ngeenge owa shiiva Jehova nowa ulika kutya ou mu hole mokuwanifa po oiteelelwa yopamishangwa noho kufa ombinga moukalele, twikila okupameka ekwatafano loye naye. Ngahelipi mbela? Omoku mu yapulila onghalamwenyo yoye nokuninginifwa momeva. — Mat. 28:19, 20.

¹⁷ Okuyapula otashi ti okulitulila oshinima omolwelalakano liyapuki. Ngeenge omunhu te liyapulile Kalunga, ohe mu lombwele meilikano noku mu udanekela tashi di komutima kutya okwa hala okulongifa onghalamwenyo yaye moilonga yaye nokweenda meendjila daye. Otashi ti yo okwa tokola oku mu longela oye aeke fiyo alushe. (Deut. 5:9) Omunhu oye mwene ha tokola okuliyapulila Jehova; kape na oo ta dulu oku mu tokolela.

¹⁸ Ashike owa pumbwa okuninga shihapu shihe fi ashike okulombwela Jehova paumwene kutya owa hala oku mu longela. Owa pumbwa okuulikila vamwe kutya owe liyapulila Kalunga. Osho ou na oku shi ulika mokuninginifwa momeva, ngaashi Jesus a ninga. (1 Pet. 2:21; 3:21) Ngeenge owa tokola okulongela Jehova nowa hala okuninginifwa, ou na okuninga po shike? Ou na okulombwela omuunganeki wolutu lovakulunhuongalo. Oku na okuunganeka ovakulunhuongalo va yoolokafana va kundafane naave opo va shilipaleke kutya owa wanifa po oiteelelwa yopamishangwa yeninginifo. Opo u mone ouyelele muhapu, alikana lesha “Etumwalaka kovaudifi ovo inava ninginifwa,” li li pepandja 182-184, nosho yo “Omapulo oo e na okupulwa ovo va hala okuninginifwa,” e li pepandja 185-207.

EENGHUNDANA DI NA SHA NEXUMOKOMESHO MOUKALELE

¹⁹ Oule womido, oshiwana shaJehova osha kala hashi tuwa omukumo okuuda nghee elongelokalunga la koshoka la kala tali tamunuka mo mounyuni aushe. Okudja kefimbo olo Jesus Kristus a li a lombwela ovahongwa vaye kutya onghundana iwa otai ka udifilwa ounyuni aushe, Ovakriste vashili ova kala va halelela okushiiva kutya osho otashi ka wanifwa ngahelipi. — Mat. 28:19, 20; Mark. 13:10; Oil. 1:8.

²⁰ Ovashikuli vaJesus vonale ova li hava hafele okuuda nghee oilonga yokuudifa ya li tai xumu komesho. (Mark. 6:30) Oilonga yovayapostoli oya popya kutya eshi omhepo iyapuki ya li ya tililwa ovahongwa pOpentekoste 33 O.P, opa li ovanhu 120. Diva omuvalu wovahongwa owa li wa hapupala fiyo 3 000 lwaapo, nosho yo 5 000 lwaapo. Okwa li kwa kundanwa kutya “keshe efiku Omwene a wedela mo mongudu yavo ava tava xupifwa” nonokutya ‘ongudu inene yomovapristeli oya dulika keitavelo.’ (Oil. 1:15; 2:5-11, 41, 47; 4:4; 6:7) Onghundana oyo itunhula i na sha nehapupalo kaya li tuu ya twa omukumo ovahongwa! Oi na okukala ya li ye ve linyengifa va twikile okulonga oshilonga osho va pewa kuKalunga, nonande opa li omahepeko manene oo a li a etifwa kovawiliki vomalongelokalunga Oshijuda.

²¹ Mo 60-61 O.P. lwaapo, Paulus okwa li a popya monhumwafo yaye oyo a li a shangela Ovakolossi kutya onghundana iwa oya li ya tandavela ‘mounyuni aushe ndele tai imi oiimati’ noya kala tai “udifilwa ovashitwa aveshe vokoshi yeulu.” (Kol. 1:5, 6, 23) Ovakriste vonale ova li hava dulika kEendjovo daKalunga, nomhepo iyapuki oya li ye va pa eenghono opo va wanife po oshilonga shinene shokuudifa ofimbo exulilo longhalelo yoinima yOshijuda la li inali fika mo 70 O.P. Kasha li tuu tashi tu omukumo kOvakriste ovo ovadiinini okuuda eenghundana da tya ngaho!

²² Monghedi ya faafana, ehangano laJehova kunena ohali kendabala okudidilika oilonga oyo ya longwa eshi taku wanifwa po Mateus 24:14, oo ta ti: ‘Evaengeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.’ Tu li ovapiya vaKalunga ve mu liyapulila, otu na oilonga ya endelela twa pumbwa oku i longa. Otu na okukala tu na ohokwe okuuda nghee oilonga youkalele tai xumu komesho ofimbo exulilo inali uya. Jehova ota ka shilipaleka kutya oilonga oyo oya pwa filufilu, nongeenge otwa kufa ombinga, ote ke tu nangeka noupuna. — Hes. 3:18-21.

OLAPORTA YOYE YOILONGA YOMOMAPYA

²³ Oshike naanaa tu na okulopota? Olaporta yoilonga yomomapya oyo ya longekidwa kehangano ohai ulike ouyelele oo wa pumbwa okulopotwa. Ashike ouyelele tau landula otau dulu okukwafela.

²⁴ Mokakololo oko ke li opo pa shangwa “Oishangomwa (mwa kwatelwa yopaelektronika)” yadeka mo omuvalu woishangomwa aishe oyo wa yandja kovanhu ovo vehe fi Eendombwedi. Opo pa shangwa “Ouvidio ovo wa ulika” yadeka mo omuvalu woikando oyo wa ulika okavidio keshe.

²⁵ Opo pa shangwa “Omalishuneko,” yadeka po oikando aishe oyo wa shuna kovanhu ovo vehe fi Eendombwedi, nova ulika ohokwe. Okuninga elishuneko kashi fi ashike okuya keumbo lomunhu ndele oto dulu yo oku mu shangela ombapila, oku mu dengela ongodi, oku mu tumina etumwalaka ile o-email nosho yo oku mu twaalela oishangomwa. Oshikando keshe taku ningwa ekonakonombiibeli, otaku dulu okuvalulwa elishuneko. Omudali ota dulu okuvalula elishuneko limwe oshivike keshe ta kwatele komesho Elongelokalunga lOukwaneumbo ngeenge ope na okaana inaka ninginifwa.

²⁶ Nonande ekonakonombiibeli luhapu ohali ningwa oshivike keshe, ohali valulwa ashike ekonakonombiibeli limwe omwedi keshe. Omuudifi oku na okuyadeka mokakololo oko ke li opo pa shangwa “Ovakonakonimbibeli ovo wa konakona navo” mOlaporta yoilonga yomomapya omuvalu wovakonakonimbiibeli va yoolokafana ovo a konakona navo momwedi. Omuvalu wovakonakonimbiibeli ovo tava lopotwa otau dulu okukwatela mo ovanhu ovo vehe fi Eendombwedi de liyapulila Jehova. Oto dulu yo okuvalula ekonakonombiibeli olo hali ningwa nomumwatate, ile nomumwameme oo ine lipyakidila vali, ile nomunhu oo opo a ninginifwa, ndele ina mana ko embo Nghee to dulu okuhafela onghalamwenyo fiyo alushe! ngeenge owa pulwa u shi ninge koshilyo shokomitiye yoilonga.

²⁷ Osha fimana alushe okulopota omuvalu ‘wEevili’ u li mondjila. Efimbo olo oleli wa kala to longo eumbo neumbo moukalele, to ningi omalishuneko, to ningi ekonakonombiibeli, ile to yandje oundombwedi wohangelela ile to udifa moipafi yovanhu ovo vehe fi Eendombwedi. Ngeenge ovaudifi vavali tava longo pamwe, aveshe otava dulu okuvalula efimbo, ndele omuudifi ashike umwe womuvo ha valula elishuneko ile ekonakonombiibeli olo va ninga ngeenge olaye. Ovadali aveshe ovo hava kwafele ounona vavo pElongelokalunga lOukwaneumbo otava dulu okuvalula ovili imwe moshivike. Ovamwatate otava dulu okuvalula efimbo olo va kala tava yandje oshipopiwa shomoipafi. Omutoloki woshipopiwa shomoipafi naye ota dulu okuvalula efimbo olo a kala ta toloka. Ope na omalipyakidilo amwe ita tu dulu okuvalula efimbo lao, ngaashi okulilongekidila oilonga yomomapya, okukala pelongekido loilonga yomomapya, okupita meefitola nosho tuu.

²⁸ Omuudifi keshe oku na okuwilikwa keliudo laye la deulwa kOmbiibeli ngeenge ta tokola pamwe neilikano kutya efimbo naanaa li fike peni a longa moukalele. Oitukulwa oya yoolokafana, novaudifi ove na etaleko la yoolokafana li na sha noukalele. Olutuwiliki ihali fininikile eliudo lalo momaongalo mounyuni aushe nghee e na okuvalula efimbo olo ovaudifi va kala moilonga yomomapya, nokape na oo e na oufemba wokutokolela vamwe moshinima osho. — Mat. 6:1; 7:1; 1 Tim. 1:5.

²⁹ Efimbo olo la longwa moilonga yomomapya oli na okulopotwa meevili di yadi. Kakele ashike ngeenge omuudifi okwa ngabekwa omolwoukulupe, iha dulu okudja mo meumbo omolwounghundi, e li momaumbo ovakulupe ile e na oulema. Ovaudifi ovo otava dulu okulopota ominute 15, 30 nosho yo 45 ngeenge odo va longa moilonga yomomapya omwedi oo. Omuudifi oo oku na okutalwa ko e li omuudifi wOuhamba wondjikilile. Elongekido olo otali longo yo komuudifi oo e na omangabeko pakafimbo, tashi dulika ita dulu naanaa okweenda momukokomoko womwedi ile ta ehama sha kwata moiti ile a mona oshiponga. Efiloshisho olo olaavo ashike itava dulu okulonga shihapu. Okomitiye yoilonga oyo i na okutokola kutya omuudifi elipi a wana okulonga efimbo olo la ufilwa ovo ve na omangabeko.

OKAKALATA KOVAUDIFI HAKA IFANWA CONGREGATION’S PUBLISHER RECORD

³⁰ Olaporta yoye yoilonga yomomapya yomwedi keshe ohai didilikwa mokakalata kovaudifi haka ifanwa Congregation’s Publisher Record. Oukalata ovo oveongalo. Ngeenge owa tokola okutembukila keongalo limwe, shiivifila ovakulunhuongalo. Hamushanga weongalo ota ka tumina ouyelele woye keongalo oko to tembukile. Kungaho, ovakulunhuongalo vokeongalo oko wa ya otava ka dula oku ku tambula ko noku ku pa ekwafo lopamhepo olo wa pumbwa. Ngeenge owa dja po ashike efimbo inali konda peemwedi nhatu, twikila okutuma olaporta yoye yoilonga yomomapya keongalo leni.

OMOLWASHIKE TU NA OKULOPOTA OILONGA YETU YOMOMAPYA?

³¹ Mbela ope na omafimbo amwe ho dimbwa okuyandja olaporta yoye yoilonga yomomapya? Nopehe na omalimbililo, atushe otwa pumbwa okudimbulukifwa efimbo nefimbo. Ashike ngeenge otwa kulike oikala ya yuka i na sha nokuyandja olaporta nokuuda ko kutya omolwashike okuninga ngaho sha fimana, otashi ka kala shipu kufye okukala hatu dimbuluka okuyandja olaporta yetu yoilonga yomomapya.

³² Vamwe ohava pula tava ti: “Ngeenge Jehova oku shii nale osho handi longo moilonga yaye, omolwashike nda pumbwa vali okuyandja olaporta keongalo?” Oshoshili kutya Jehova oku shii osho hatu longo, noku shii kutya oilonga yetu ohatu i longo nomutima aushe ile ohatu longo ashike shimha hatu longo. Ndele dimbuluka kutya Jehova okwa shangifa omuvalu womafiku aeshe oo Noa a kala monguluwato nomuvalu weedula odo Ovaisrael va kala mombuwa. Kalunga okwa didilika omuvalu waavo va li ovadiinini naavo va li ihava dulika. Okwa didilika nghee sha enda opo Kanaan shi findwe nosho yo oilonga yovatokolipangeli ovadiinini vomuIsrael. Okwa didilika ouyelele muhapu u na sha noilonga yovapiya vaye. Okwa nwefa mo ovashangi vOmbiibeli va shange omauyelele oo, naasho otashi tu ulikile etaleko laye li na sha nokuninga omadidilikoshango e li mondjila.

³³ Ondjokonona yOmbiibeli otai ulike kutya omivalu noiningwanima oyo ya shangwa kovapiya vaJehova oi li paushili. Peemhito dihapu, omahokololo Ombiibeli itaa dulu okuhokololwa pauyadi nopehe na okutumbula omivalu dokondadalunde odo da kwatelwa mo. Tala koihopaenenwa tai landula: Genesis 46:27; Exodus 12:37; Ovatokolipangeli 7:7; 2 Eehamba 19:35; 2 Omafimbo 14:9-13; Johannes 6:10; 21:11; Oilonga 2:41; 19:19.

³⁴ Nonande eelaporta detu ihadi kala da kwatela mo ashishe osho twa ninga mokulongela Jehova kwetu, otadi wanifa po elalakano la fimana mehangano laJehova. Mefelemudo lotete, eshi ovayapostoli va li va aluka koshikonga shokuudifa, ova li va hokololela Jesus shi na sha ‘nakeshe osho ve shi ninga nakeshe osho ve shi longa.’ (Mark. 6:30) Omafimbo amwe, eelaporta otadi dulu okuulika kutya oinima imwe i na sha noukalele wetu oya pumbwa okupewa elitulemo. Omivalu otadi dulu okuulika kutya nonande opa ningwa exumokomesho moinima imwe, oinima imwe oya shuna pedu, ngaashi ehapupalo lovaudifi. Otashi dulika pa pumbiwa etwomukumo ile ekandulepo lomaupyakadi. Ovapashukili ovo ve na oshinakuwanifwa otava ka didilika olaporta nokukendabala okuyukifa onghalo oyo tashi dulika tai imbi oohandimwe ile eongalo li ninge exumokomesho.

³⁵ Ehangano otali dulu yo okumona mo ouwa meelaporta mokushiiva kutya openi pe na omhumbwe inene yovalongi vomomapya. Otali ka shiiva oinima ngaashi kutya: Oitukulwa ilipi tai shi endifa nawa? Openi pa ningwa exumokomesho linini? Oishangomwa ilipi ya pumbiwa opo i kwafele ovanhu ve lihonge oshili? Eelaporta ohadi kwafele ehangano li longekide oishangomwa oyo ya pumbiwa moilonga yokuudifa moitukulwa ya yoolokafana mounyuni nokutwikila okuya komesho naasho sha pumbiwa.

³⁶ Vahapu vomufye ohatu tuwa omukumo keelaporta. Mbela ihatu kala twa tunhukwa okuuda kombinga yoilonga yovamwatate oyo tava longo mokuudifa onghundana iwa mounyuni aushe? Eelaporta di na sha nehapupalo ohadi tu kwafele tu mone nghee ehangano laJehova tali tamunuka mo. Oimoniwa ohai shambula omitima detu nohai tu kwafele tu kale tu na ouladi, hai tu linyengifa tu kufe ombinga moilonga yokuudifa pauyadi. (Oil. 15:3) Elongelokumwe letu mokuyandja eelaporta di na sha noilonga yokuudifa ola fimana notali ulike kutya otu na ko nasha novamwatate mounyuni aushe. Mokuninga ngaho, ohatu ulike kutya ohatu dulika komilandu dehangano laJehova. — Luk. 16:10; Heb. 13:17.

LITULILA PO OMALALAKANO OPAUMWENE

³⁷ Inatu pumbwa okuyelekanifa oilonga yetu yomoukalele naayo yavamwe. (Gal. 5:26; 6:4) Eenghalo detu dopaumwene oda yoolokafana. Ashike ohatu dulu okumona ouwa muhapu ngeenge otwe litulile po omalalakano oo hatu dulu okuhanga shili opo tu ninge exumokomesho moukalele. Okuhanga omalalakano etu otashi dulu oku tu etela ehafo olo hali di mokupondola.

³⁸ Nopehe na omalimbililo, Jehova ota endelelifa okwoongelwa kwaavo ta ka xupifa pefimbo ‘loudjuu munene.’ Otu li pefimbo lewanifo lexunganeko laJesaja olo la ti: “Ou muningholi ota ka ninga eyovi, naau munini ota ningi oshiwana sha pama. Ame Omwene nda hala oku shi ninga diva pefimbo lasho.” (Eh 7:9, 14, yelekanifa no-NW; Jes 60:22) Kashi fi tuu oufembanghenda okukala ovakalele vonghundana iwa pefimbo e li lomafiku axuuninwa! — Mat 24:14.