Mona efimbo lokulesha nolokukonakona

“Longifeni nawa efimbo, osheshi omafiku omai.”—OVAEFESO 5:16.

1. Omolwashike shi li pandunge tu ninge eemhangela di na sha nokulongifa efimbo letu, nongahelipi onghedi omo hatu longifa efimbo letu tai holola oukwatya wetu?

OHAKU popiwa kutya “okuhoolola efimbo okuxupifa efimbo.” Omunhu oo ha tula po efimbo lonhumba kondadalunde omolwoinima oyo i na okulongwa luhapu oha mono ouwa wa wana mefimbo laye. Ohamba inaendunge Salomo oya shanga ya ti: “Ashishe shi notundi yasho ya pangelwa, noshinima keshe shokoshi yeulu oshi nefimbo lasho.” (Omuudifi 3:1) Atusheni otu na ouhapu wefimbo u fike pamwe momake etu; oshe likolela kufye vene kutya ohatu li longifa ngahelipi. Onghedi oyo hatu tula melandulafano oinima oyo ya fimana kufye nosho yo okutukula efimbo letu li na sha nayo otashi holola unene tuu kutya otu hole shike.—Mateus 6:21.

2. (a) MEudifo laye lokOmhunda, Jesus okwa ti ngahelipi shi nasha neemhumbwe detu dopamhepo? (b) Elikonakono mwene lilipi tali dulu okukala li li nawa?

² Ohatu longifa efimbo mokulya nomokukofa twa hala ile inatu hala molwaashi edi odo eemhumbwe dopalutu. Ndele mbela ongahelipi shi na sha neemhumbwe detu dopamhepo? Otu shi shii kutya nado odi na okuwanifwa po. MEudifo laye lokOmhunda, Jesus okwa ti: “Ovanelao [ovovo ve udite ovo, OB-1986] eehepele domhepo.” (Mateus 5:3) Hano omolwaashi “omupiya omudiinini nomunaendunge” ohe tu dimbulukifa alushe efimano lokulongifa efimbo mokulesha nokukonakona Ombibeli. (Mateus 24:45) Otashi dulika u shi shii kutya eshi osha fimana unene ndele ohashi dulika u kale u udite kutya efimbo lokukonakona ile lokulesha Ombibeli olo ashike u he na. Ngeenge osho shi li ngaho, natu konakone eenghedi dokulitulila po efimbo la wana monghalamwenyo yetu omolwokulesha, okukonakona paumwene nokudilonga Eendjovo daKalunga.

Okumona efimbo lokulesha Ombibeli nolokukonakona

3, 4. (a) Omuyapostoli Paulus okwa yandja omayele elipi e na sha nokulongifa efimbo letu, naashi osha kwatela mo shike? (b) Paulus okwa li a hala okutya shike eshi e tu ladipika tu ‘longife nawa efimbo’?

³ Mokutala kefimbo olo tu li mulo, atusheni otwa pumbwa okutambula ko elondwelo leendjovo domuyapostoli Paulus tadi ti: “Litaleni hano nawa nhumbi hamu ende, hangaashi omalai, ndelenee ngaashi ovanaendunge; longifeni nawa efimbo, osheshi omafiku [omai]. Onghee hano inamu kala mu he neendunge, ndele shiiveni ehalo lOmwene [olilipi].” (Ovaefeso 5:15-17) Doshili, omayele aa okwa kwatela mo oinima aishe yonghalamwenyo yetu tu li Ovakriste ve liyandja, mwa kwatelwa okumona efimbo lokwiilikana, lokukonakona, lokukala pokwoongala osho yo lokukufa ombinga iyadi mokuudifa “evangeli louhamba.”—Mateus 24:14; 28:19, 20.

⁴ Vahapu vomovapiya vaJehova kunena otava monika va fa ve na oudjuu wokulitulila po okulesha nokukonakona Ombibeli moule ku ninge oshitukulwa shonghalamwenyo yavo. Osha yela kutya itatu dulu okulepaleka efiku nande onovili imwe, omolwaashi omayele aPaulus oku na okukala taa ti shimwe shi lili. MOshigreka, outumbulilo “longifeni nawa efimbo” otau ti okulongifa efimbo olo kwa li u na okulongifa moshinima shimwe shi lili. Memboitya laye Expository Dictionary, W. E. Vine ota yandje eityo “okulongifa omhito keshe panghedi iwa unene ngaashi tashi dulika, nokulongifa omhito keshe opo i ku etele ouwa molwaashi ngeenge oya xutwifwa itai dulu vali okumonika.” Okushike ile openi hatu dulu okumona efimbo liwa lokulesha nolokukonakona Ombibeli?

Otu na okupitifa komesho oinima oyo ya fimana

5. Omolwashike nongahelipi hatu dulu “okutongola oinima oyo i na oshilonga unene”?

⁵ Kakele koinakuwanifwa yetu yopaumwene noyokoilonga, otu na oinima ihapu yopamhepo oyo tu na okuwanifa po. Tu li ovapiya vaJehova ve liyandja, otu na okukala “ovaladi moilonga yOmwene.” (1 Ovakorinto 15:58) Omolwetomheno eli, Paulus a lombwela Ovakriste muFilippi va “shiive okutongola oinima oyo i na oshilonga unene.” (Ovafilippi 1:10, OB-1986) Eshi osha hala okutya oinima ei ya fimana oi na okupitifwa komesho. Oinima yopamhepo oi na alushe okukala ya pitifwa komesho yaai yopamaliko. (Mateus 6:31-33) Natango, ondjele oya pumbiwa mokuwanifa po oinakuwanifwa yetu yopamhepo. Ongahelipi hatu tukula efimbo letu moinima yetu i lili naku lili yonghalamwenyo yetu yopaKriste? Ovapashukili ovaendi ova hokolola kutya mokati ‘koinima oyo i na oshilonga unene’ oyo Omukriste e na okupashukila, ngaashi ekonakono lopaumwene nelesho lOmbibeli otai monika i he niwe ko nasha nayo.

6. Okulongifa nawa efimbo okwa kwatela mo shike ngeenge tashi ya poilonga yokulikongela omboloto ile oilonga yomeumbo?

⁶ Ngaashi twe shi mona nale, okulongifa nawa efimbo osha kwatela mo “okulongifa omhito keshe panghedi iwa unene ngaashi tashi dulika” nosho yo ‘okulongifa omhito keshe i ku etele ouwa.’ Ngeenge eenghedindjikilile detu dokulesha Ombibeli nokukonakona oda nghundipala, otashi ka kala shi li pandunge tu ninge elikonakono lopaumwene tu tale nghee hatu longifa efimbo letu. Ngeenge oilonga yetu yokulikongela omboloto otai pula unene shihapu, nokulya po efimbo lihapu neenghono detu, otu na okwiilikana kuJehova. (Epsalme 55:23) Otashi dulika tu dule okuninga omalunduluko oo tae ke tu kaleka nefimbo la wana molwoinima ya fimana i na sha nokulongela Jehova, mwa kwatelwa ekonakono nelesho lOmbibeli. Okwa popiwa sha yuka kutya oilonga yomukainhu ihai pu nande. Hano ovamwameme Ovakriste ove na yo okupitifa komesho oinima oyo ya fimana nokukaleka po efimbo lokondadalunde lokulesha nokukonakona Ombibeli kwa kwata moiti.

7, 8. (a) Luhapu omomalipyakidilo elipi hatu dulu okumona efimbo lokulesha nokukonakona? (b) Elalakano lomalihafifo oshike, nongahelipi okudimbuluka eshi tashi tu kwafele okupitifa komesho oinima ei ya fimana?

⁷ Mwaaishe, vahapu vomufye otava dulu okumona efimbo lokukonakona ponhele yomalipyakidilo oo inaa fimana. Ohatu dulu okulipula fye vene: ‘Efimbo li fike peni handi longifa mokulesha oifo yomounyuni ile oifokundaneki, okutala eeprograma dotelevisi, okupwilikina komusika ile okudana omaudano ovideo? Mbela ohandi longifa efimbo lihapu pokombiyuta li dulife pwaalo handi longifa mokulesha Ombibeli?’ Paulus okwa ti: “Inamu kala mu he neendunge, ndele shiiveni ehalo lOmwene [olilipi].” (Ovaefeso 5:17) Elongifo lotelevisi li he li pandjele olo etomheno la kula eshi Eendombwedi dihapu ihadi mono efimbo la wana mokukonakona paumwene nokulesha Ombibeli.—Epsalme 101:3; 119:37, 47, 48.

⁸ Vamwe otashi dulika va tye kutya itava dulu okukonakona efimbo alishe, ova pumbwa omalihafifo onhumba. Nande eshi oshoshili, otashi ka kala shiwa okutala kefimbo olo hatu longifa momalihafifo noku li yelekanifa naalo hatu longifa mokukonakona ile mokulesha Ombibeli. Oshidjemo otashi dulika shi ka kale shikumwifi. Omalihafifo nande a pumbiwa, oku na okutulwa ponhele yao ya wapala. Elalakano lao olo oku tu pepaleka opo tu shiive okutwikila noilonga ipe yopamhepo. Eeprograma dihapu dotelevisi nosho yo omaudano ovideo otaa dulu okufiya omunhu a loloka, ofimbo okulesha nokukonakona Eendjovo daKalunga ohaku talaleke nohaku nghonopaleke.—Epsalme 19:8, 9.

Nghee vamwe va tula po efimbo lokukonakona

9. Ouwa washike tau ka dja mokushikula omayele a yandjwa mokambo Konakona Omishangwa Keshe Efiku—1999?

⁹ Eenhetekelindjovo mokambo Konakona Omishangwa Keshe Efiku ko 1999 otadi ti: “Otashi ka kala shiwa unene okukonakona omushangwa wefiku keshe neekomenda mokambo aka efimbo longula. Oto ka kala u udite wa fa Jehova, Omuhongi Munenenene, te ku pendula nomalombwelo aye. Jesus Kristus okwa popiwa paxunganeko kutya okwa mona ouwa momalombwelo aJehova ongula keshe: ‘[Jehova] Oye ta pendula nge keshe ongula, ta pendula okutwi kwange, opo ndi ude ko panghedi yovalongwa.’ Omalombwelo a tya ngaho okwa pa Jesus ‘elaka laavo va hongwa’ opo ‘a kale e nounongo okuyakula nokutwa ouladi ava va loloka.’ (Jes. 30:20, NW; 50:4; Mat. 11:28-30) Okupendulwa komayele e li pefimbo okudja mEendjovo daKalunga ongula keshe itaku ku kwafa ashike okupondola omaupyakadi oye mwene ndele otaku ku pe yo “elaka laavo va hongwa” okukwafela vamwe.”a

10. Ongahelipi vamwe hava tula po efimbo lokulesha nokukonakona Ombibeli, nova mona omauwa ashike?

¹⁰ Ovakriste vahapu ohava shikula omayele aa, mokulesha omushangwa wefiku neekomenda nohava lesha yo Ombibeli ile okukonakona ongula inene. MuFransa, omukokolindjila omudiinini oha penduka ongula keshe noha longifa ominute 30 okulesha Ombibeli. Mbela oshike she mu kwafela opo a dule oku shi ninga eedula adishe? Okwa ti: “Ohandi kala nehalo linene loku shi ninga, kashi na nee mbudi kutya oshike tashi holoka po ohandi kala nda kanyatela kelandulafano lange lokulesha!” Kashi na nee mbudi kutya efimbo lilipi twa hoolola mefiku, oshinima osho sha fimana osheshi kutya otu na okukanyatela kelandulafano letu. René Mica, oo a kala moilonga youkokolindjila oule weedula di dule 40 muEuropa nomuAfrika lokOlundume, okwa ti: “Okudja mo 1950 osha kala elalakano lange okulesha Ombibeli aishe odula keshe, nonde shi ninga paife oikando 49. Ondi udite kutya eshi osha fimana omolwokukaleka po ekwatafano lopofingo nOmushiti wange. Okudilonga kEendjovo daKalunga okwa kwafela nge ndi ude ko nawa ouyuki waJehova osho yo omaukwatya aye makwao nokwa kala ku li odjo ikumwifa omo nda mona eenghono.”b

‘Eendja pefimbo la wapala’

11, 12. (a) ‘Eendja dopamhepo’ dilipi da kala tadi yandjwa ‘komupiya omudiinini’? (b) Ongahelipi “eendja” da yandjwa pefimbo la wapala?

¹¹ Ngaashi ashike onghedi yokulya alushe hai eta oukolele muwa, elandulafano lokukonakona nokulesha Ombibeli ihali faula otali eta ouwa koukolele wopamhepo. MEvangeli laLukas, ohatu lesha eendjovo daJesus eshi a ti: “Olyelye hano elenga leumbo omudiinini nomunaendunge, Omwene waye e mu pa epangelo lovapiya vaye, e va pe eendja pefimbo [la wapala, NW]?” (Lukas 12:42, OB-1954) Paife eedula di dule 120, ‘eendja dopamhepo tadi yandjwa pefimbo la wapala’ oda yandjwa okupitila mOshungonangelo, osho yo momambo noileshomwa imwe ye likolelela kOmbibeli.

¹² Didilika outumbulilo “pefimbo la wapala.” Okupitila mOmona waye nomongudu yomupiya, “Omuhongi Munenenene,” Jehova, okwa kala ta yandje ewiliko kovapiya vaye moinima yomahongo osho yo yopaenghedi pefimbo la wapala. Osha kala sha fa naanaa atusheni ongo tu uditeni ewi tali popi nafye ngaashi Jesaja ta ti: “Ndele fiku mwa hala okwaama kolulyo ile kolumosho, omatwi eni otaa ka uda ondjovo ei tai di konima yeni, tai ti: Apa ondjila, ei mu nokweenda nayo!” (Jesaja 30:20, 21) Kakele kaasho, ngeenge oohandimwe tava lesha Ombibeli nelitulemo nosho yo oishangomwa aishe yopaMbibeli, luhapu ohava kala ve udite kutya omadiladilo oo a popiwa mo okwe va yukilila kondadalunde. Heeno, omayele opakalunga osho yo ewiliko otali ya kufye pefimbo la wapala, notali tu kwafele tu kondjife omayeleko ile tu ninge etokolo lopandunge.

Kulika eenghedindjikilile diwa dokulipalula

13. Eenghedindjikilile dimwe dokulipalula pamhepo da nghundipala odilipi po?

¹³ Okumona ouwa wa wana po okudja ‘meendja’ edi da yandjwa pefimbo la wapala, otwa pumbwa eenghedindjikilile diwa dokulipalula. Osha fimana okukala tu na elandulafano lokulesha Ombibeli nokukonakona paumwene ihaku faula nokukanyatela kulo. Mbela ou na eenghedindjikilile diwa dokulipalula pamhepo osho yo efimbo ihali faula lokukonakona paumwene moule? Ile oho lesha ashike neendelelo oshitukulwa osho twe shi longekidilwa noukeka, to lile ofika, oku shi popya pafaneko, ile nokuli u nuke po oikulya imwe? Okuhelipalula pandjikilile okwa ningifa vamwe va nghundipale meitavelo—ile nokuli va we mo filufilu.—1 Timoteus 1:19; 4:15, 16.

14. Omolwashike shi na ouwa okulesha oshitukulwa noukeka nande otashi monika sha fa shi shiivike nale?

¹⁴ Vamwe otashi dulika va kale ve udite kutya ove shii nale omahongo a fimana nonokutya hashi tukulwa keshe hashi kala noshinima shipe naanaa. Onghee hano, ovanhu va tya ngaha ove udite kutya okukonakona nokukala pokwoongala ihaku faula inaku pumbiwa. Ndelenee Ombibeli otai ulike kutya otwa pumbwa okudimbulukifwa oinima oyo twe lihonga nale. (Epsalme 119:95, 99; 2 Petrus 3:1; Judas 5) Ngaashi ashike omuteleki muwa ha longekida oitelekifwomwa ya faafana mokuninga oikulya omulyo wa yoolokafana, ongudu yomupiya ohai longekida oikulya iwa yopamhepo meenghedi dihapu. Nokuli nomoitukulwa oyo i na oshinima hashi popiwa luhapu, ohamu kala mu na oitwa oyo inatu hala nande i tu pitilile po inatu i uda ko. Oushili oo ou kutya osho hatu mono mwaasho hatu lesha oshe likolelela kefimbo nokeenghendabala odo hatu longifa moku shi konakona.

Omauwa opamhepo otaa di mokulesha nokukonakona

15. Ongahelipi okulesha nokukonakona Ombibeli taku tu kwafele tu kale ovakalele vEendjovo daKalunga ve li xwepo?

¹⁵ Omauwa oo hatu mono okudja mokulesha nokukonakona Ombibeli kae shi kuyelekwa. Ohatu kwafelwa okuwanifa po shimwe shomoinakuwanifwa yetu yopaKriste, osho shi li, okukala “omulongi ita fi ohoni oshilonga shaye, e shii okutukula nawa ondjovo yoshili.” (2 Timoteus 2:15) Opo ngoo pe fike ouhapu wokulesha nokukonakona Ombibeli opo ngoo pe fike omadiladilo etu taa yadifwa nomadiladilo aKalunga. Opo nhee, ngaashi Paulus, ohatu ka dula ‘okutomha ovanhu nOmishangwa, oku va fatululila noku va ulikila’ oshili ikumwifa yomalalakano aJehova. (Oilonga 17:2, 3, yelekanifa OB-1986.) Ounongo wetu wokuhonga otau ka hapupalekwa, neenghundafana detu, okuyandja oipopiwa yetu osho yo omayele etu otaa ka kala taa tungu pamhepo.—Omayeletumbulo 1:5.

16. Omeenghedi dilipi hatu dulu okumona ouwa paumwene okudja mokulesha nomokukonakona Eendjovo daKalunga?

¹⁶ Kakele kaasho, efimbo olo hatu longifa okukonakona Eendjovo daKalunga otali ke tu kwafa tu dule okutula onghalamwenyo yetu i kale lelalela metwokumwe neendjila daJehova. (Epsalme 25:4; 119:9, 10; Omayeletumbulo 6:20-23) Otaku pameke omaukwatya etu opamhepo, ngaashi elininipiko, oudiinini nosho yo elao. (Deuteronomion 17:19, 20; Ehololo 1:3) Ngeenge ohatu longifa eshiivo olo twa mona mokulesha nomokukonakona Ombibeli, omhepo yaKalunga otai ka kunguluka noupu monghalamwenyo yetu, notashi ka eta ehapupalo loiimati yomhepo mwaaishe oyo hatu ningi.—Ovagalati 5:22.

17. Ongahelipi ouhapu nosho yo ongushu yokulesha nokukonakona kwetu Ombibeli tai kumu ekwatafano letu naJehova?

¹⁷ Osho sha fimana unene, efimbo lomalipyakidilo amwe olo twa longifa po tu leshe nokukonakona Eendjovo daKalunga otali eta omauwa mahapu shi na sha nekwatafano letu naKalunga. Paulus okwa ilikana kutya Ovakriste vakwao va “yadifwe okushiiva ehalo [laKalunga] meendunge adishe nomounongo wopamhepo, okweenda kweni opo ku wapalele Omwene, mu mu hafife muaishe shili.” (Ovakolossi 1:9, 10) Sha faafana, opo ‘okweenda kwetu ku wapalele Omwene,’ natu ‘yadifwe okushiiva ehalo laye meendunge adishe nomounongo wopamhepo.’ Osha yela kutya okumona kwetu omanangeko noupuna aJehova nokuhokiwa kuye okwe likolelela unene kouhapu nokongushu yokulesha nokukonakona kwetu Ombibeli.

18. Omanangeko noupuna elipi taa dulu okukala etu ngeenge ohatu shikula eendjovo daJesus da shangwa muJohannes 17:3?

¹⁸ “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Ou oumwe womomishangwa odo hadi longifwa unene kEendombwedi daJehova okukwafela vamwe va ude ko efimano lokukonakona Eendjovo daKalunga. Doshili, kukeshe umwe womufye oku shi ninga paumwene kashi fi oshinima osho shi na okutalika ko inashi fimana. Eteelelo letu lashili lokukala fiyo alushe ole likolelela kokukula kwetu meshiivo lokushiiva Jehova nOmona waye, Jesus Kristus. Ndele diladila ashike eshi osho tashi ti. Itapa ka kala nande exulilo mokulihonga kwetu shihapu kombinga yaJehova—nohatu ka kala tu na oukwaalushe omo hatu ke lihonga kombinga yaye!—Omuudifi 3:11; Ovaroma 11:33.

Omapulo eendululo

• Onghedi yetu yokulongifa efimbo otai holola shike?

• Okomalipyakidilo elipi hatu dulu okumona efimbo lokulesha nolokukonakona Ombibeli?

• Omolwashike tu na okutala nawa eenghedindjikilile detu dokulipalula pamhepo?

• Omauwa elipi taa di mokulesha nomokukonakona Omishangwa?

[Omashangelo opedu]

[Efano pepandja 31]

Okulesha nokukonakona Ombibeli ihaku faula otaku tu kwafa tu ‘tukule nawa ondjovo yoshili’

[Efano pepandja 32]

Okutula po efimbo li fike pamwe monghalamwenyo yetu yomalipyakidilo e he fi opamhepo naao opamhepo otashi eta omauwa