Ovalumenhu ovanyasha, ongahelipi tamu dulu okukala mwe lineekelwa kuvamwe?

1. Oushili ulipi tu na u na sha novamwatate ovanyasha?

OVAMWATATE ovanyasha, otamu dulu okulonga shihapu meongalo. Vahapu vomunye omu na oukolele nomu na eenghono dihapu. (Omayel. 20:29) Omu li ekwafo linene keongalo. Omwa teelela nodjuulufi efimbo li fike mu nangekwe po mu li ovayakuliongalo. Kakele kaasho, vamwe otashi dulika ve mu tala ko mu vanini natango, ile muhe na owino wokulineekelelwa oinakuwanifwa oyo ya fimana. Nonande omu li ovanyasha, ope na oinima imwe oyo tamu dulu okuninga paife, opo mu kale mwe lineekelwa nomwa fimanekwa keongalo.

2. Oshike hatu ka kundafana moshitukulwa eshi?

² Moshitukulwa eshi ohatu ka tala konghalamwenyo yohamba David. Ohatu ka tala yo pauxupi koiningwanima yomonghalamwenyo yeehamba mbali daJuda, Asa naJosafat. Ohatu ka konakona omashongo oo ovalumenhu ovo vatatu va li va taalela, nghee ve li nyenga kuo nonghee ovamwatate ovanyasha tava dulu okulihonga koihopaenenwa yavo.

OSHO HATU LIHONGO KOHAMBA DAVID

3. Omonghedi imwe ilipi omo ovanyasha tava dulu okukwafela ovanamido meongalo?

³ Eshi David a li omunyasha okwa li a kulika ounghulungu, oo vamwe va li va lenga. Osho otashi ulike kutya okwa li e na ekwatafano lopofingo naJehova, a li e na ounghulungu wokwiimba, nokwa li ha longifa ounghulungu oo opo a kwafele Saul, ohamba oyo ya li ya nangekwa po kuKalunga. (1 Sam. 16:16, 23) Ovalumenhu ovanyasha mbela omu na ngoo ounghulungu oo tau dulu okweetela vamwe ouwa meongalo? Vahapu vomunye omu na ounghulungu wa tya ngaho. Pashihopaenenwa, otashi dulika mwa didilika kutya ovanamido vamwe ohave mu pandula ngeenge tamu va kwafele nghee ve na okulongifa outableta vavo nosho yo oikwaelektronika ikwao, opo va dule okuninga ekonakono lopaumwene nokulilongekidila okwoongala. Ounghulungu weni u na sha noikwaelektronika otau dulu okweetela ouwa muhapu ovanamido va tya ngaho.

4. Ngaashi David, omaukwatya elipi ovamwatate ovanyasha ve na okukulika? (Tala efano kombada yoshifo.)

⁴ David okwa li alushe ha ulike kutya oku li omulineekelwa. Pashihopaenenwa, eshi a li omunyasha okwa li ha longo noudiinini opo a file oshisho eedi daxe. Osho osha li oshinakuwanifwa sha kwata moiti. Lwanima David okwa ka yelifila ohamba Saul a ti: “Omupiya woye okwa li koufita weedi daxe, ndele onghoshi ile emwangha eshi le uya ndee tali kwata mo odi ndee tali i nayo. Ame nde i shikula ndele handi i denge poshi ndele handi i nakula mokanya kalo.” (1 Sam. 17:34, 35) David okwa li e udite e na oshinakuwanifwa shokwaamena eedi, nokwa li a tula ombuda moshixwa opo e di amene. Ovamwatate ovanyasha otava dulu okuhopaenenwa David mokuwanifa po noudiinini oshinakuwanifwa keshe osho va pewa.

5. Metwokumwe nEpsalme 25:14, oshinima sha fimanenena shilipi ovamwatate ovanyasha ve na okuninga?

⁵ Eshi David a li omunyasha okwa li e na ekwatafano lopofingo naJehova. Ekwatafano la tya ngaho, ola li la fimana unene kuDavid li dulife ouladi ile ounghulungu waye wokushika okahumbafeta. Jehova ka li ashike Kalunga kaDavid, ndele okwa li yo Kaume kaye kopofingo. (Lesha Epsalme 25:14.) Ovamwatate ovanyasha, oshinima sha fimanenena osho tamu dulu okuninga, okupameka ekwatafano leni naTate yetu womeulu. Osho otashi ke mu kwafela mu dule okupewa oinakuwanifwa ya wedwa po.

6. Vamwe ova li ve na omataleko a puka elipi e na sha naDavid?

⁶ David okwa li e na okufinda omataleko a puka avamwe e na sha naye. Pashihopaenenwa, eshi David a li e liyamba a ka lwife Goliat, ohamba Saul oya li ya kendabala oku mu shololifa ya ti: “Ove omunyasha.” (1 Sam. 17:31-33) Omumwainamati waDavid okwa li e mu ula kutya ke fi omulineekelwa. (1 Sam. 17:26-30) Ashike Jehova ka li a tala ko David munini ile ehe shii okulineekelwa. Jehova okwa li e shii nawa omulumenhu oo omunyasha. Onghee hano, David okwa li a dula okudipaa Goliat molwaashi okwa li e lineekela Kaume kaye, Jehova, e mu pameke. — 1 Sam. 17:45, 48-51.

7. Oshike hatu lihongo mehokololo limwe li na sha naDavid?

⁷ Oshike hatu lihongo moshimoniwa shaDavid? Ohatu lihongo kutya otwa pumbwa okukala ovalididimiki. Otashi dulika shi pule efimbo kwaavo ve ku shii okudja kounona opo ve ku tale ko u li omukulunhu. Ashike oto dulu okukala noushili kutya Jehova iha yandje ashike elitulemo keholokepo loye lokombada. Oku shii kutya ove omunhu a tya ngahelipi noku shii okudula kwoye. (1 Sam. 16:7) Pameka ekwatafano loye naKalunga. David okwa li ha konakona noukeka eshito laJehova. Okwa li ha diladila moule kunghee oilonga ya tya ngaho tai mu hongo kombinga yOmushiti. (Eps. 8:3, 4; 139:14; Rom. 1:20) Oshinima shimwe vali to dulu okuninga, okupula Jehova e ku pameke. Pashihopaenenwa, mbela ovanafikola vakweni ohave ku sheke molwaashi u li umwe womEendombwedi daJehova? Ngenge osho, ilikana kuJehova e ku kwafele u dule okuungaunga neshongo la tya ngaho. Tula moilonga omayele oo taa hangwa mEendjovo daye, mouvidio nosho yo moishangomwa oyo ya kanghamena kOmbiibeli. Efimbo keshe to didilike nghee Jehova e ku kwafela u ungaunge neshongo lonhumba, ohashi ku kwafele u kale we mu lineekela neenghono. Shikwao vali, vamwe ngeenge ova mono kutya owe lineekela muJehova, otava ka kala ve ku lineekela.

8-9. Oshike sha kwafela David a teelele nelididimiko fiyo osheshi a ninga ohamba, noshike ovamwatate ovanyasha tave lihongo koshihopaenenwa shaye?

⁸ Natu ka kundafaneni eshongo limwe olo David a li a taalela. Konima eshi David a vaekwa a ninge ohamba, okwa li e na okuteelela pa pite omido dihapu opo a nangekwe po e li ohamba yOvajuda. (1 Sam. 16:13; 2 Sam. 2:3, 4) Oshike sha li she mu kwafela a teelele nelididimiko momukokomoko wefimbo olo? Ponhele yokweefa a teka omukumo, okwa li a yandja elitulemo kwaasho a li ta dulu okuninga po. Pashihopaenenwa, eshi a li onhauki moshitukulwa shOvafilisti, David okwa li a longifa omhito oyo opo a lwife ovatondi vOvaisrael. Kungaho, okwa li a dula okwaamena eengaba doshitukulwa shaJuda. — 1 Sam. 27:1-12.

⁹ Oshike ovamwatate ovanyasha tave lihongo koshihopaenenwa shaDavid? Longifa eemhito odo de ku yeulukila opo u kwafele ovamwaxo. Natu ka taleni koshimoniwa shomumwatate wedina Ricardo.b Okwa li e litulila po elalakano okudja kounona waye lokuninga omukokolindjila wondjikilile. Ashike ovakulunhuongalo ova li ve mu lombwela kutya ina wana natango okuninga omukokolindjila. Ponhele yokuteka omukumo ile a handuke, Ricardo okwa li ha longo efimbo lihapu moukalele. Okwa ti: “Ngeenge handi diladila konakudiwa, ondi wete kutya onda li nda pumbwa okuninga exumokomesho olo la pumbiwa. Onda li handi shilipaleke kutya onda ninga elishuneko kukeshe oo a ulika ohokwe, nokulilongekidila elishuneko keshe. Onda li nokuli nda ninga ekonakonombiibeli oshikando shange shotete. Eshi ngoo nda enda handi mono owino, osho ngoo nda enda handi di oumbada.” Ricardo paife oku li omukokolindjila wondjikilile ha pondola noku li omuyakuliongalo.

10. Pomhito imwe David okwa li a ninga shike ofimbo ina ninga etokolo la fimana?

¹⁰ Natu ka kundafaneni oshinima shimwe vali osho sha li sha ningwa monghalamwenyo yohamba David. Pefimbo opo David novalumenhu vaye va li eenhauki, ova li va fiya po omaukwaneumbo avo, opo va ye molwoodi. Ofimbo ovalumenhu ovo va li molwoodi, ovatondi vavo ova li va ponokela omaumbo avo, ndele tava kwata po oilyo yomaukwaneumbo avo ombabyona. David okwa li ta dulu okufika pexulifodiladilo kutya molwaashi oku li ependafule moita, ota dulu okuxupifa noupu aveshe ovo va kwatwa po ombabyona. Ponhele yaasho, okwa li a konga ewiliko kuJehova. David okwa li a pula Jehova okupitila momuprofeti Abjatar a ti: “Ame ohandi ka shikula tuu ongudu oyo?” Jehova okwa li a lombwela David a ninge ngaho, noku mu shilipaleka kutya ota ka findana. (1 Sam. 30:7-10) Oshike to lihongo moshiningwanima osho?

11. Oshike u na okuninga ofimbo ino ninga omatokolo?

¹¹ Kala ho pula omayele, ofimbo ino ninga omatokolo. Popya novadali voye. Ovakulunhuongalo ovo va pyokoka otava dulu yo oku ku pa omayele mawa. Jehova okwe lineekela ovalumenhu ovo, naave oto dulu okukala we ve lineekela. Jehova okwe va tala ko ve li “eeshali” keongalo. (Ef. 4:8) Oto dulu okumona ouwa mokuhopaenena eitavelo lavo nomokupwilikina omaetepo mawa oo tave ku pe. Paife natu ka kundafaneni osho hatu lihongo kohamba Asa.

OSHO HATU LIHONGO KOHAMBA ASA

12. Ohamba Asa oya li i na omaukwatya a tya ngahelipi eshi opo ya hovele okupangela?

¹² Eshi ohamba Asa ya li omunyasha, oya li i na elininipiko nosho yo ouladi. Pashihopaenenwa, eshi a li a nangekwa po ponhele yaxe, Abia, okwa li a ninga oshikonga shokuhanauna po oihongwafano. Okwa li yo a “lombwela Ovajuda va konge Omwene, Kalunga kooxe nokudiinina omhango noipango.” (2 Omaf. 14:1-7) Eshi Sera, Omuetiopia a li a ponokela Juda novakwaita 1 000 000, Asa okwa li a pula ekwafo kuJehova a ti: “Omwene, kape na nande umwe ta dulu okukwafa ngaashi Ove pokati komunaenghono naau ehe neenghono. Omwene Kalunga ketu, tu kwafa, shaashi hatu liameke kwoove.” Eendjovo odo diwa otadi ulike kutya Asa okwa li e lineekela filufilu kutya Jehova ota dulu oku mu xupifa nosho yo oshiwana shaye. Asa okwa li e lineekela muXe womeulu, “nOmwene okwa taataa Ovaetiopia.” — 2 Omaf. 14:8-12.

13. Oshike lwanima sha ka ningilwa Asa, nomolwashike?

¹³ Nopehe na omalimbililo, oto dimine kutya okutaalela etangakwaita lovakwaita 1 000 000 osha li eshongo linene, ashike Asa okwa li a pondola. Ndele shinyikifa oluhodi, eshi Asa a li a taalela eyeleko linini ka li a konga ekwafo kuJehova. Eshi a li a ningilwa omatilifo kohamba ikolokoshi yaIsrael, Baasha, Asa okwa li a konga ekwafo kohamba yaAram (Siria). Etokolo olo lihe li pandunge ola li la eta oilanduliko ii. Jehova okwa li a lombwela Asa okupitila momuprofeti waye Hanani, a ti: “Shaashi ove we liameka kohamba yaAram, ndele ino liameka kOmwene, Kalunga koye, onghee hano omatanga ovakwaita vohamba Aram a dja mo meke loye.” Okudja opo pokati kavo opa kala ashike oita. (2 Omaf. 16:7, 9; 1 Eeh. 15:32) Oshilihongomwa oshilipi?

14. Ongahelipi to dulu okulineekela muJehova, noto ka kala wa tya ngahelipi ngeenge owa tula moilonga 1 Timoteus 4:12?

¹⁴ Kala omulininipiki nokutwikila okulineekela muJehova. Eshi opo wa ninginifwa owa li wa ulika kutya ou na eitavelo la kola nowe lineekela muJehova. Jehova okwa li a hafa eshi wa ninga oshilyo shoukwaneumbo waye. Paife osho wa pumbwa okuninga, okutwikila okulineekela muJehova. Otashi dulika tashi monika shipu okulineekela muJehova ngeenge to ningi omatokolo a fimanenena monghalamwenyo. Ndele ongahelipi shi na sha nomafimbo amwe? Inashi fimana tuu okulineekela muJehova ngeenge hatu ningi omatokolo, mwa kwatelwa nokuninga omatokolo e na sha nomalihafifo, oilonga yomboloto nomalalakano omonakwiiwa! Ino lineekela meendunge doye mwene. Ponhele yaasho, konga omafinamhango Ombiibeli oo tae ku kwafele u ninge omatokolo e li mondjila, nokukatuka metwokumwe nao. (Omayel. 3:5, 6) Ngeenge owa ningi ngaho, oto ka hafifa omutima waJehova noto ka kala wa fimanekwa kwaavo ve li meongalo. — Lesha 1 Timoteus 4:12.

OSHO HATU LIHONGO KOHAMBA JOSAFAT

15. Metwokumwe no 2 Omafimbo 18:1-3; 19:2, ohamba Josafat oya li ya ninga omapuko elipi?

¹⁵ Ngaashi ashike ovanhu aveshe, naave ino wanenena, noho ningi omapuko omafimbo amwe. Ashike osho itashi ku imbi u ninge ngaashi to dulu moilonga yaJehova. Natu ka kundafaneni oshihopaenenwa shohamba Josafat. Okwa li e na omaukwatya mahapu mawa. Eshi a li omunyasha, “okwa konga Kalunga kaxe ndele ta ende moipango yaye.” Shikwao vali, okwa li a tuma ovakwatelikomesho va endaende noilando yaJuda va honge ovanhu kombinga yaJehova. (2 Omaf. 17:4, 7) Nonande okwa li omudiinini, omafimbo amwe okwa li a ninga omatokolo ehe li pandunge. Omolwetokolo laye limwe lihe li pandunge, Josafat okwa li a pewa omayele a kwata moiti komukalelipo umwe waJehova. (Lesha 2 Omafimbo 18:1-3; 19:2.) Oshike hatu lihongo mehokololo olo?

16. Oshike hatu lihongo moshimoniwa shaRajeev?

¹⁶ Kala ho tambula ko omayele noku a tula moilonga. Ngaashi ovanyasha vahapu, naave otashi dulika ho mono shidjuu okupitifa komesho oinima oyo ya fimanenena monghalamwenyo yoye. Ashike ino teka omukumo. Diladila koshimoniwa shomumwatate wedina Rajeev. Okwa popya shi na sha naashi a li omunyasha a ti: “Omafimbo amwe onda li handi kala ndihe shii osho ndi na okuninga. Ngaashi ovanyasha vahapu, onda li ndi hole neenghono omaudano nosho yo oinima imwe vali shi dulife okuya kokwoongala nomoukalele.” Oshike sha kwafela Rajeev? Okwa li a pewa omayele komukulunhuongalo omunalukeno. Rajeev okwa ti: “Okwa li a kwafela nge ndi dilonge kefinamhango olo tali hangwa mu 1 Timoteus 4:8.” Rajeev okwa li a tula moilonga omayele oo nelininipiko nokwa li a talulula osho a pitifa komesho monghalamwenyo yaye. Okwa ti: “Onda li nda tokola okulitulila po omalalakano opamhepo.” Oshidjemo? Rajeev okwa ti: “Konima yomido dinini eshi nda pewa omayele, onda li nda nangekwa po ndi li omuyakuliongalo.”

HAFIFA XO WOMEULU

17. Ovanamido ove uditile ngahelipi ovanyasha ovo tava longele Jehova?

¹⁷ Ovanamido ove mu lenga neenghono ovamwatate ovanyasha, ovo tamu longele Jehova pamwe navo mu na ‘ediladilo limwe.’ (Sef. 3:9) Ove mu hole omolwomhepo yeni yeliyambo neenghono deni, naashi hamu wanifwa po nondjungu oilonga oyo mwa pewa. Omu na ondilo momesho avo. — 1 Joh. 2:14.

18. Ngaashi sha ulikwa mOmayeletumbulo 27:11, Jehova oha kala e uditile ngahelipi ovamwatate ovanyasha ovo tave mu longele?

¹⁸ Ovamwatate ovanyasha, inamu dimbwa kutya Jehova oku mu hole nokwe mu lineekela. Okwa xunganeka kutya momafiku axuuninwa, otapa ka kala etangakwaita lovalumenhu ovanyasha ovo tave ke mu longela nehalo liwa. (Eps. 110:1-3) Oku shii kutya omu mu hole nomwa hala oku mu longela ngaashi tamu dulu. Onghee hano, kaleni hamu lididimikile vamwe nokukala ovalididimiki. Ngeenge owa ningi omapuko, tambula ko edeulo noutekuduliko oo to pewa, noku u tala ko wa dja kuJehova. (Heb. 12:6) Wanifa po noudiinini oinakuwanifwa oyo wa pewa. Naasho sha fimanenena, hafifa Xo womeulu mwaashishe osho to ningi. — Lesha Omayeletumbulo 27:11.