“Omu nokuhangika mwa tya ngahelipi”!

“Oinima ei aishe ngenge tai hanauka ngaha, omu nokuhangika mwa tya ngahelipi moweenda uyapuki nometilokalunga.” — 2 PET. 3:11.

1. Omolwashike onhumwafo onhivali yaPetrus ya li ekumaido li li pefimbo kOvakriste vopefimbo laye?

ESHI omuyapostoli Petrus a shanga onhumwafo yaye onhivali ya nwefwa mo, eongalo lopaKriste ola li la hangwa nale le lididimikila omahepeko mahapu, ndele osho kasha li sha nyona po ouladi wavo ile shi ye moshipala okukula kweongalo. Onghee hano, Ondiaboli oya li ya longifa ekonda limwe vali olo la kala hali pondola luhapu okudja nale. Ngaashi Petrus e shi popya, Satana okwa li ta kendabala okunwefa mo oshiwana shaKalunga okupitila movahongi ovanaipupulu, ovo va li ve na ‘omesho e yadi ohole yoipala nomitima da deukila olwisho.’ (2 Pet. 2:1-3, 14; Jud. 4) Hano osha yela kutya Petrus okwa li ta kumaida Ovakriste tashi di komutima okupitila monhumwafo yaye onhivali opo va kale ovadiinini.

2. Etukulwa eti-3 laPetrus omutivali otali yandje elitulemo kushike, nomapulo elipi tu na okulipula?

² Petrus okwa ti: “Onda tala osha yuka, nokutya fimbo ndi li metwali eli, ndi mu papudule noku mu dimbulukifa oinima ei, osheshi ondi shi shii, etwali eli lange ohandi li dulwa ohangelela, . . . Ndele ndi nokudiinina shili nokutya, mu dule okudimbulukwa eshi konima yetembu lange yo.” (2 Pet. 1:13-15) Petrus okwa li e shii kutya oku li pokufya, ndele okwa li a hala omadimbulukifo aye oo e li pefimbo a kale taa dimbulukiwa. Omadimbulukifo oo okwa ninga oshitukulwa shOmbibeli notaa dulu okuleshwa kukeshe umwe womufye kunena. Etukulwa eti-3 lonhumwafo yaPetrus onhivali olihokwifa unene kufye, molwaashi otali yandje elitulemo ‘komafiku axuuninwa’ onghalelo ei yoinima nosho yo kokuhanaunwa po kweulu nedu lopafaneko. (2 Pet. 3:3, 7, 10) Mbela Petrus okwe tu pa omayele elipi? Ongahelipi okutula moilonga omayele aye taku dulu oku tu kwafela tu kale twa hokiwa kuJehova?

3, 4. (a) Petrus okwa li a longifa eingidotumbulo lilipi, nokwa yandja elondwelo lilipi? (b) Ohatu ka kundafana oitwa itatu ilipi?

³ Konima eshi Petrus a popya kombinga yokuxula po kwounyuni waSatana, okwa ti: “Omu nokuhangika mwa tya ngahelipi moweenda uyapuki nometilokalunga.” (2 Pet. 3:11, 12) Osha yela kutya Petrus ka li ta pula epulo pomhito oyo, ndele okwa popya eingidotumbulo. Okwa li e shi shii kutya ovo tava ka xupifwa ‘mefiku longhone’ olo li li pokuuya ovovo ashike hava longo ehalo laJehova nokuulika omaukwatya oo a hokwa. (Jes. 61:2) Omuyapostoli Petrus okwa ti vali: “Hano nye ovaholike, eshi mwe shi shiiva fimbo inashi uya, kaleni mwa londoka, mu ha twalwaatwalwe komapukifo eembwada [ovahongi ovanaipupulu], nye mu ha we mo mekanghameno leni la pama.” — 2 Pet. 3:17.

⁴ Molwaashi Petrus okwa li umwe womwaavo va li ‘ve shi komesho yefimbo oinima oyo tai ke uya,’ okwa li e shii kutya Ovakriste ova li tava ka kala va pumbwa neenghono okukala oupafi momafiku axuuninwa opo va dule okukanyatela oudiinini wavo. Konima yefimbo, omuyapostoli Johannes okwa li a yelifa nawa kutya omolwashike. Okwa li a mona memoniko Satana ta umbwa mo meulu nokwa ‘handukila unene’ ovo “hava diinine oipango yaKalunga ndee ve na ehepaululo laJesus.” (Eh. 12:9, 12, 17) Ashike ovapiya vaKalunga ovavaekwa ovadiinini pamwe noovakwao ‘veedi dimwe’ ovadiinini otava ka pondola. (Joh. 10:16, OB-1986) Ndele mbela ongahelipi kufye pauhandimwe? Mbela ohatu ka kanyatela ngoo oudiinini wetu? Ohatu ka pondola okuninga ngaho ngeenge (1) otwa kulike omaukwatya opaKriste, (2) ngeenge otwa kala twa koshoka paenghedi nopamhepo notuhe na oshipo shasha nosho yo (3) ngeenge otwa kala tu na etaleko la yuka li na sha nomayeleko. Natu ka kundafaneni oitwa oyo.

Kulika omaukwatya opaKriste

5, 6. Otu na okuninga eenghendabala tu kulike omaukwatya elipi, nomolwashike okuninga ngaho haku pula ‘eenghono adishe’?

⁵ Petrus okwa popya lwopehovelo lonhumwafo yaye onhivali a ti: “Lalakaneni yo neenghono adishe okuholola meitavelo leni ouwa, mouwa eshiivo, meshiivo elipangelo, melipangelo elididimiko, melididimiko etilokalunga, metilokalunga ohole yokuhola ovamwatate nomohole yokuhola ovamwatate ohole yokuhola aveshe. Osheshi oinima ei ngenge i li munye notai tane, itai mu efa, mu kale noundede ile mu he na oiimati yomokushiiva Omwene wetu Jesus Kristus.” — 2 Pet. 1:5-8.

⁶ Oshoshili kutya ohashi pula ‘eenghono adishe’ okukufa ombinga momalipyakidilo oo hae tu kwafele tu kulike omaukwatya opaKriste. Pashihopaenenwa, ohashi pula eenghendabala okuya kokwoongala kwopaKriste nopehe na okufaula, okulesha Ombibeli efiku keshe nosho yo okukala tu na elandulafano lokukonakona noukeka paumwene. Ohashi pula yo okulonga noudiinini nosho yo eemhangela diwa opo omunhu a dule okukala ha ningi alushe Ekonakono lOukwaneumbo lihafifa notali ti sha. Ndele ngeenge otwa kala hatu ningi Ekonakono lOukwaneumbo pandjikilile, otashi ka kala shipu kufye, unene tuu ngeenge otwa mono oidjemo iwa.

7, 8. (a) Vamwe ova ti ngahelipi kombinga yEkonakono lOukwaneumbo? (b) Ouwa ulipi ho mono mekonakono loukwaneumbo weni?

⁷ Omumwameme umwe okwa popya shi na sha nekonakono loukwaneumbo a ti: “Ole tu kwafela tu lihonge kombinga yoinima ihapuihapu.” Omumwameme umwe vali okwa ti: “Okupopya oshili yovene, kanda li nda hala ekonakono lembo li xulifwe po, molwaashi ola li okwoongala oko ndi hole neenghono. Ndele paife eshi tu na Ekonakono lOukwaneumbo, onda mona kutya Jehova oku shii osho twa pumbwa nonokutya onaini twe shi pumbwa.” Omutwe woukwaneumbo umwe owa ti: “Ekonakono loukwaneumbo ohali tu kwafele neenghono. Oshiwa okukala tu na okwoongala oko hatu dulu okuninga twa kwatela mo eemhumbwe detu dokondadalunde tu li ovalihomboli. Atushe otu wete twa xwepopala mokuulika oiimati yomhepo iyapuki, nohatu hafele oukalele wetu shi dulife nale.” Omutwe umwe vali woukwaneumbo owa ti: “Ounona ohava ningi omapekaapeko kuvo vene nohave lihongo shihapu, nohave shi hafele lela. Elongekido la tya ngaho ohali tu kwafele neenghono tu kale tu na elineekelo kutya Jehova oku shii oisho yetu noha nyamukula omailikano etu.” Mbela naave osho ho kala u udite ngaho omolwefiloshisho liwa lopamhepo la tya ngaho?

⁸ Ino efa nande oinima yanafangwa i ye moshipala ekonakono leni loukwaneumbo. Ovalihomboli vamwe ova ti: “Etine keshe konguloshi oule woivike ine ya pita, opa kala tapa ningwa sha osho konyala shi tu imbe okuninga ekonakono letu, ndele katwa li twa efa shi tu imbe.” Oshoshili kutya omafimbo amwe oshi na oupu u lundulule elandulafano loye. Ndele nande ongaho, kala wa tokola toko okuninga Ekonakono lOukwaneumbo, ino efa nokuli pa pite oshivike shimwe ino li ninga.

9. Jehova okwa li a kwafela Jeremia ngahelipi, noshike hatu dulu okulihonga moshihopaenenwa shaye?

⁹ Omuprofeti Jeremia okwe tu tulila po oshihopaenenwa shiwa. Okwa li a pumbwa ekwafo lopamhepo olo a li a pewa kuJehova nokwa li a pandula neenghono omolwekwafo olo. Ekwafo olo a li a pewa ola li le mu kwafela a udifile ovanhu nelididimiko ovo va li inava hala okutambula ko etumwalaka laye. Jeremia okwa ti: ‘Ondjovo yOmwene oya li ya fa omundilo tau xwike wa kwatelelwa momakipa ange.’ (Jer. 20:8, 9) Osho osha li yo she mu kwafela e lididimikile omafimbo madjuu oo a li po eshi Jerusalem sha li shi li pokuhanaunwa po. Kunena, otu na Eendjovo daKalunga, Ombibeli, ya shangwa ya wana po. Ngeenge otwa kala hatu di konakona noukeka nokutala ko oinima ngaashi Jehova he i tale ko, nafye ohatu ke lididimikila nehafo oukalele wetu ngaashi Jeremia, nohatu ka kala ovadiinini notwa koshoka paenghedi nopamhepo nonande opa kale omayeleko. — Jak. 5:10.

Kaleni ‘muhe na onyata noshipo’

10, 11. Omolwashike tu na okukondja noudiinini tu kale ‘tuhe na onyata notuhe na oshipo,’ naasho otashi pula tu ninge shike?

¹⁰ Tu li Ovakriste, otu shii kutya otu li momafiku axuuninwa. Onghee hano, itashi tu kumwifa eshi ounyuni wa duvila oinima oyo Jehova e tonde, ngaashi olwisho, oluhaelo nosho yo elongifo leenghono. Ekoto laSatana otali dulu okungongwa taku ti: ‘Ngeenge ovapiya vaKalunga itava dulu okutilifwa, otava dulu okunyatekwa.’ (Rev. 2:13, 14) Onghee hano, otu na okukaleka momadiladilo ekumaido laPetrus lopahole olo tali ti: ‘Kendabaleni shili, mu monike [kuKalunga] muhe nonyata nomuhe noshipo mombili.’ — 2 Pet. 3:14.

¹¹ Outumbulilo “kendabaleni” owa faafana noutumbulilo “neenghono adishe” oo Petrus a longifa nale mekumaido limwe. Osha yela kutya Jehova oo a nwefa mo Petrus a popye eendjovo odo oku shii kutya otwa pumbwa okukondja noudiinini opo tu kale ‘tuhe na onyata notuhe na oshipo,’ sha hala okutya, inatu nyatekwa kedilo lounyuni waSatana. Okukondja noudiinini okwa kwatela mo okwaamena omitima detu diha nwefwe mo komahalo mai. (Lesha Omayeletumbulo 4:23; Jakob 1:14, 15.) Osho osha kwatela mo yo okukendabala tuha shololifwe kovanhu ovo va kuminwa onghedi yetu yokukalamwenyo yopaKriste nosho yo ovo have tu “sheke.” — 1 Pet. 4:4.

12. Eshilipaleko lilipi hatu hange muLukas 11:13?

¹² Ihashi kala shipu kufye okulonga osho sha yuka omolwokuhawanenena kwetu. (Rom. 7:21-25) Ohatu dulu ashike okupondola ngeenge otwa ilikana Jehova, oo ha yandje omhepo yaye iyapuki nehalo liwa kwaavo tave mu indile nomutima aushe. (Luk. 11:13) Omhepo iyapuki otai ka kulika mufye omaukwatya oo a hokiwa kuKalunga, nomaukwatya a tya ngaho otae ke tu kwafela tu kondjife nomupondo omayeleko onghalamwenyo, oo taa ka hapupala eshi efiku laJehova tali ehene popepi.

Pamekwa komayeleko oo to shakeneke

13. Ngeenge otwa hangwa komayeleko monghalamwenyo yetu, oshike tashi dulu oku tu kwafela tu lididimike?

¹³ Ohatu ka hangwa komayeleko e lili noku lili, molwaashi otu li monghalelo ei yoinima ya kulupa. Ndele ponhele yokuteka omukumo, omolwashike ito tale ko omayeleko e li omhito yokuulika kutya ou hole Kalunga nokupameka eitavelo loye muye nosho yo mEendjovo daye? Omuhongwa Jakob okwa ti: “Hafeni shili, ngenge tamu hangika komahongaulo opahapu, osheshi omu shi shii kutya, okuyelekwa kweitavelo leni otaku longo elididimiko.” (Jak. 1:2-4) Dimbuluka yo kutya ‘Omwene oku shii okuxupifa ovayuki momahongaulo.’ — 2 Pet. 2:9.

14. Oshihopaenenwa shaJosef oshe ku twa omukumo ngahelipi?

¹⁴ Natu tale koshihopaenenwa shomona waJakob, Josef, oo a li a landifwa po moupika kovamwaxe. (Gen. 37:23-28; 42:21) Mbela Josef okwa li a kanifa eitavelo laye omolwokulongelwa owii wa tya ngaho? Mbela okwa li a handukila Kalunga eshi a li a efa a ningilwe owii wa tya ngaho? Eendjovo daKalunga oda popya sha yela kutya hasho nandenande. Ashike omayeleko aJosef hapo a li a xulila opo. Konima yefimbo, okwa li a lundilwa kutya okwa kwata omukainhu onghonga ndele ta tulwa modolongo. Ndele nande ongaho, Josef okwa li a kanyatela oudiinini waye kuKalunga. (Gen. 39:9-21) Josef okwa li a efa omayeleko e mu pameke, nokonima yaasho okwa li a nangekwa noupuna.

15. Oshike hatu dulu okulihonga moshihopaenenwa shaNaomi?

¹⁵ Oshoshili kutya omayeleko otaa dulu oku tu nyikifa oluhodi ile oku tu polimanifa nokuli. Josef naye otashi dulika a li ha kala e udite ngaho omafimbo amwe. Ovapiya vaKalunga vamwe ovadiinini navo osho va li ve udite ngaho. Pashihopaenenwa, diladila shi na sha naNaomi oo a li a filwa omushamane waye novanamati vaye vavali. Naomi okwa ti: “Inamu ifana nge Naomi, ndelenee ifaneni nge Mara [tali ti ‘oululu’], osheshi Omunamapangelo aeshe a ningila nge oululu uhapu.” (Rut 1:20, 21) Naomi okwa li e linyenga monghedi i li paushitwe noi shii okuudiwa ko. Ndele ngaashi Josef, eitavelo laNaomi kala li la nghundipala noka li a efa po oudiinini waye kuKalunga. Onghee hano, Jehova okwa li a nangeka noupuna omukainhu oo omudiinini. (Rut 4:13-17, 22) Jehova ota ka xulifa po yo owii aushe oo wa etifwa kuSatana nosho yo kounyuni waye woukolokoshi mEduparadisa olo tali ke uya. Ombibeli oya ti: “Inya yonale itai dimbulukiwa vali, nongaashi kape na ou te i diladila momutima waye.” — Jes. 65:17.

16. Otu na okukala tu na oikala ya tya ngahelipi ngeenge tashi uya pokwiilikana, nomolwashike?

¹⁶ Otu shii kutya Kalunga oku tu hole, kashi na nee mbudi kutya otu hangwe komayeleko a tya ngahelipi. (Lesha Ovaroma 8:35-39.) Nonande Satana ita ka efa okukendabala oku tu teya omukumo, ita ka pondola ngeenge otwa kala tu na ‘omadiladilo mawa notu na elidiliko opo tu shiive okwiindila.’ (1 Pet. 4:7, yelekanifa no-NW.) Jesus okwa ti: “Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa, nokukala ofika koshipala shOmona wOmunhu.” (Luk. 21:36) Didilika kutya Jesus okwa longifa oshitya ‘okwiilikana,’ sha hala okutya, okwiindila omunhu wa mana mo. Eshi Jesus e tu kumaida tu kale hatu ilikana, okwa li ta divilike kutya katu na nande okukwata okahetengi ekwatafano letu naye nosho yo naXe. Ovo va hokiwa kuJehova ovo ashike tava ka dula okuxupa mefiku laye.

Kala we lipyakidila moilonga yaJehova

17. Ngeenge oshi li eshongo okuudifila moshitukulwa sheni, ongahelipi to dulu okumona ouwa moshihopaenenwa shiwa shovaprofeti vonale?

¹⁷ Okukufa ombinga momalipyakidilo opamhepo ohashi tu talaleke. Osho otashi tu dimbulukifa eendjovo daPetrus odo tadi ti: “Omu na okuhangika mwa tya ngahelipi meengeda diyapuki nomoilonga yometilokalunga.” (2 Pet. 3:11, NW) Oilonga ya fimanenena yomoilonga yometilokalunga oyo okuudifa onghundana iwa. (Mat. 24:14) Oshoshili kutya moitukulwa imwe oilonga yokuudifa otai dulu okukala eshongo, molwaashi otashi dulika ovanhu kave na ohokwe ile have tu pataneke ile molwaashi ve litula ashike moinima yonghalamwenyo yakwalukeshe. Ovapiya vaJehova vonale navo ova li va ungaunga novanhu ve na oikala ya tya ngaho. Ashike nande ongaho, kava li va sholola ndele ova li va twaalela ovanhu ‘lwoikando noikando’ etumwalaka olo va li va pewa kuKalunga. (Lesha 2 Omafimbo 36:15, 16, NW; Jer. 7:24-26) Mbela oshike sha li she va kwafela ve lididimike? Ova li va tala ko oshilonga shavo ngaashi Jehova e shi tala ko, ndele hangaashi ounyuni wa li we shi tala ko. Ova li yo ve shi tala ko shi li oufembanghenda munenenene okuhumbata edina laKalunga. — Jer. 15:16.

18. Oilonga yokuudifa Ouhamba otai ka fimanekifa edina laKalunga shi fike peni monakwiiwa?

¹⁸ Nafye otu na oufembanghenda wokuudifa kombinga yedina laJehova nosho yo omalalakano aye. Diladila kwaashi: Mefiku linene laKalunga, ovatondi vaye itava ka kala ve na elipopilo kutya inava udifilwa kombinga yaye nosho yo omalalakano aye. Ngaashi Farao wonale, otava ka shiiva kutya Jehova oye e va katukila onghatu. (Ex. 8:1, 20; 14:25) Pefimbo opo tuu opo, Jehova ota ka fimanekifa ovapiya vaye ovadiinini mokuulika filufilu kutya ova li shili ovakalelipo vaye. — Lesha Hesekiel 2:5; 33:33.

19. Ongahelipi hatu dulu okuulika kutya otwa hala okulongifa nawa onheni yaJehova?

¹⁹ Petrus okwa popya pexulilo lonhumwafo yaye onhivali oyo a li a shangela ovaitaveli vakwao a ti: ‘Onheni yOmwene wetu i taleni oyo exupifo leni.’ (2 Pet. 3:15) Heeno, natu twikileni okulongifa nawa onheni yaJehova. Ngahelipi mbela? Omokukulika omaukwatya oo Jehova a hokwa, mokukala ‘tuhe nonyata notuhe noshipo,’ mokukala tu na etaleko la yuka li na sha nomayeleko nosho yo mokukala twe lipyakidila moilonga yOuhamba. Mokuninga ngaho, ohatu ka dula oku ka mona omanangeko noupuna taa kalelele oo tae ke uya pamwe ‘neulu lipe nedu lipe.’ — 2 Pet. 3:13.

Oto dimbuluka?

• Oshike tashi dulu oku tu kwafela tu kulike omaukwatya opaKriste?

• Ongahelipi hatu dulu okukala ‘tuhe na onyata notuhe na oshipo’?

• Oshike hatu dulu okulihonga moshihopaenenwa shaJosef naNaomi?

• Omolwashike okukufa ombinga moilonga yokuudifa ku li oufembanghenda munene?

[Efano pepandja 21]

Oshike tashi dulu okukwafela ovashamane va kulike omaukwatya opaKriste pauhandimwe nosho yo omaukwaneumbo avo?

[Omafano pepandja 23]

Oshike hatu dulu okulihonga kombinga yanghee Josef a li a ungaunga nomayeleko?