Oshinima oshitivali
Kondjifa eamo lokukala to liyelekanifa navamwe
OMBIBELI OTAI HONGO SHIKE? “Longa oilonga yoye nawa opo u kale nelitango molwayo. Ndelenee ino liyelekanifa navamwe.” — Ovagalati 6:4, pa-Contemporary English Version.
MBELA ESHONGO LILIPI WA TAALELA? Omafimbo amwe otashi dulika tu kwatwe keamo lokuliyelekanifa navamwe, tashi dulika hatu liyeleke naavo ve na shinini tu va dule, naluhapu ohatu liyeleke naavo ve na eenghono ve tu dule, oupuna ile naavo ve na ounghulungu muhapu ve tu dule. Kashi na nee mbudi kutya oto liyelekanifa navamwe omolwetomheno lilipi, kashiwa okuliyelekanifa navamwe. Ohatu dulu okufika pexulifodiladilo la puka kutya ongushu yomunhu ohai ufwa kwaasho e na ile kwaasho ta dulu okuninga. Otashi dulika yo tu kale twa twila vamwe ondubo nokukwatwa komhepo yefiyafanepo. — Omuudifi 4:4.
MBELA OSHIKE TO DULU OKUNINGA PO? Kendabala okulitala ko ngaashi Kalunga he ku tale ko. Efa etaleko laKalunga li nwefe mo onghedi omo we litala ko. Ombibeli otai ti: “Omunhu ta tale osho shokombada, ndelenee [Jehova, NW]a ta tale omitima.” (1 Samuel 16:7) Jehova oha yeleke ongushu yetu mokukonakona omitima, omadilongo, omaliudo nomahalo etu, ndele hamoku tu yelekanifa navamwe. (Ovaheberi 4:12, 13) Jehova oku shii kutya ou na omangabeko nokwa hala u kale we a nongela. Ngeenge owa kala to liyelekanifa navamwe, otashi dulika u kwatwe kounhwa ile u kale alushe ino wanenwa. Onghee hano, dimina nelininipiko kutya ito ka kala oove dingi mukeshe shimwe. — Omayeletumbulo 11:2.
Oshike osho u na okuninga kondadalunde opo u kale u na ongushu momesho aKalunga? Kalunga okwa nwefa mo omuprofeti Mika a shange ta ti: “Omunhu ove, Ye okwe ku shiivifila eshi shiwa. Nashike shimwe Omwene ta pula kuove, nokutya u ninge eshi sha yuka nokuhola efilonghenda nokweenda nelininipiko pamwe naKalunga koye?” (Mika 6:8) Ngeenge owa dulika komayele oo, Kalunga ote ke ku fila oshisho. (1 Petrus 5:6, 7) Osho osho ashike oshinima sha fimanenena osho tashi dulu oku tu ningifa tu kale twa wanenwa!
[Eshangelo lopedu]
a Olo edina laKalunga notali hangwa momatoloko Eembibeli dimwe.
[Efano pepandja 5]
Jehova oha yeleke ongushu yetu she likolelela kwaasho shi li momitima detu